San Marcos 7

Ta ndun bzhiꞌik gealnaban ten be men

(Mt. 15:1-20)

1Tsoꞌo wa leꞌa pla bexa fariseo nsea be mech ten ley utoꞌo Jerusalén ulen wats Jesús. 2Cha uniꞌí bexa leꞌa pla be xmen Jesús ndeyaw ni lá unaꞌa bexa lak nibeꞌe costumbr ten bexa. Ta weꞌe unisi bexa be xmen Jesús. 3Leꞌa bexa fariseo nsea iteata be men judio uzhebpa ndankea be costumbr ten be usan gox polta ten bexa. Tal leꞌa bexa lid ned unaꞌa sian biaj lak nak costumbr wa, leꞌa bexa lá yoo gan gaw. 4No tal bexa ngwaꞌ ndoꞌ xgeꞌe, leꞌa bexa wa lá yoo gan gaw tal leꞌa bexa lá unaꞌa. Nsea sianta be costumbr ndankea bexa, lak nsat bexa be vas no be kamplor no be ta giꞌib. Nsea iteata be taꞌa ndantiꞌin bexa sa ndaw bexa juerska yat‑a lak nibeꞌe costumbr ten bexa. 5Ta weꞌe leꞌa bexa fariseo nsea be mech ten ley unabdiꞌizh ndoꞌ Jesús ndab bexa:

—¿Xtaꞌan ni lá ndankea be xmen lu be costumbr mchaꞌan be usan gox polta ten beuna zha? Lbaꞌatsa naꞌa bexa gor ndaw bexa parea naꞌanpa naꞌa bexa lak nsabndoꞌ‑yá.

6Leꞌa Jesús cha ukaꞌab ndab:

—Leꞌa bega nluu cuentta xa wen ná bega xa ugap nak. Ugeaka mkeꞌa Isaías sakndoꞌ Dios tiemp polta, ndab xa lak nak bego:

Leꞌa be men ndee diꞌizhtsa ndankea naꞌ,

parea leꞌa ladoꞌo xa sit nak ndoꞌ naꞌ.

7Naꞌan xtiꞌin ta ndankea bexa naꞌ,

leꞌa cuent diꞌizh ten naꞌ nluu bexa,

parea diꞌizh ten be mentsa‑yá.

8Mlaꞌa bega ta unibeꞌe Dios gun bega, ndankea bega ndi sbeꞌen costumbr ten men, lak nsat bega kamplor no be vas, no sianta be taꞌa cuent ta ndee ndun bega.

9No ndab Jesús ndoꞌ bexa:

—Leꞌa bega nlaꞌa be ta unibeꞌe Dios, cha ndi ndankeatsa bega be costumbr ten leꞌaka bega. 10Leꞌa ta na mkeꞌa Moisés ndab: “Wankea bega xus bega nsea xnaꞌa bega.” No ndab‑a: “Leꞌa tal ton kweaꞌ iníꞌi ndoꞌ xus na natal ndoꞌ xnaꞌa na, leꞌa xa wa nsabndoꞌ gat.” 11Ná leꞌa bego ndi ndab leꞌa tal ton gab ndoꞌ xus na no ndoꞌ xnaꞌa na leꞌa iteanak be taꞌa ndiꞌizh gakno xa bexa wa, leꞌa ta wa ndi usaꞌa xa ndoꞌ Dios, 12weꞌe leꞌa xa wa yá naꞌantapa juerska gakno xus na no xnaꞌa na. 13Li nlaꞌa bega ta unibeꞌe Dios, ndankea bega ndi sbeꞌen costumbr ten bega. No sianta be taꞌa cuent nak ta ndee ndun bega.

14Weꞌe leꞌa Jesús cha utezh itea be men kwaꞌad wa, cha ndab xa:

—¡Blaꞌach bega ta gáp naꞌ ndee! ¡No byakbeꞌena bega‑yá! 15Leꞌa ta ndaw be men naꞌanpa leꞌa ndun bzhiꞌik bexa ndoꞌ Dios. Ndi leꞌa ta ntoꞌo ladoꞌo be men ndun bzhiꞌik bexa cuent ten Dios. 16Leꞌa bego na ndap nchaꞌ na, blaꞌach bega ta ndáp naꞌ ndee.

17Leꞌa gor na mlaꞌa Jesús be men wa, cha nseaꞌ xa len niꞌi. Weꞌe leꞌa be xmen xa unabdiꞌizh ná xteꞌe nak ta msaktabeꞌe xa wa. 18Leꞌa Jesús cha ndab:

—¿Noga bego ni lá nyakbeꞌena ta ndáp naꞌ zha? ¿Lá nyakbeꞌena bega zha leꞌa ta ndaw dub men, leꞌa ta wa lá gun bzhiꞌik xa ndoꞌ Dios? 19Leꞌa ta wa naꞌanpa nyoꞌo ladoꞌo xa, ndi len xa nchaꞌa‑yá, cha tsoꞌo wa nchaꞌa‑yá len letrina.

Leꞌa ta li ndab Jesús wa gab leꞌa itea ta ndaw bexa umbiꞌika ndoꞌ Dios. 20Weꞌe ndab Jesús:

—Leꞌa ta ntoꞌo ladoꞌo dub men, leꞌa ta wa ndun bzhiꞌik xa ndoꞌ Dios. 21Leꞌa len ladoꞌo xa ntoꞌo be ta ugap ndanbeꞌe xa. Ta weꞌe ncho bexa ngalga xa ten stubga men. No ncho xa ndun ta ugap ltsaꞌa ta li nak wa. No ncho xa ndut men. 22No ncho xa ndun gealwaꞌan. No ncho xa sbeꞌen nlad mas sian taꞌa gap. No ncho xa ugap ndanno be men. No ncho xa ndun gealkwiꞌin. No ncho xa ndun itea ta nladtsa xa. No ncho xa ndaklono stub xa ndap taꞌa. No ncho xa nisi be ltsaꞌa na. No ncho xa nzhinna. No ncho xa ni lá nsakyoꞌón. 23Leꞌa itea be ta ugap ndee ntoꞌo len ladoꞌo be men, cha ndun bzhiꞌik‑a gealnaban ten xa ndoꞌ Dios.

Dub xagots naꞌanpa xa judio mbingea ladna Jesús

(Mt. 15:21-28)

24Cha utoꞌo Jesús distrit Galilea nchaꞌa xa dub sa gax gezh Tiro no gezh Sidón. Cha uyoꞌo xa len lid dub men sa wa. Leꞌa Jesús lá nlad igen pa ncho xa, ná leꞌa‑yá mgenka. 25Weꞌe leꞌa dub xagots mbiꞌín pa ncho Jesús cha ulen xa wats Jesús, leꞌa xa ndap dub meꞌed gots gizh ncho mbi bxin len ladoꞌo na. Cha usaxib xagots wa ndoꞌ Jesús. 26Leꞌa xa wa xa Sirofenicia, naꞌanpa xa judio. Leꞌa xa wa unab kontuꞌub Jesús mbi bxin ncho len ladoꞌo xin xa wa. 27Ná leꞌa Jesús ndi ndab:

—Blaꞌa ned be meꞌed itayaw. Naꞌanpa utsin nak ulat besa ta gaw be meꞌed, cha usaꞌab besa‑yá ndoꞌ be mbek.

28Leꞌa xagots wa ukaꞌab ndab:

—Ta ugeaka ta wa, Señor, parea leꞌa be mbek ndaw be taꞌa nlate toꞌo be meꞌed xan mes.

29Leꞌa Jesús cha ndab:

—Leꞌa lu utsin ukaꞌab. Nat byaꞌ ta lid lu, leꞌa mbi bxin wa utoꞌola len ladoꞌo xmeꞌed lu.

30Leꞌa gor na mtanseaꞌ xagots wa ta lid xa, leꞌa mbi bxin wa utoꞌola len ladoꞌo meꞌed gots wa. Leꞌa meꞌed wa nax ndoꞌ loꞌon myaklana.

Jesús myunyakna dub xa mud no ngwaꞌad

31Leꞌa Jesús cha mkaꞌan sa nibeꞌe Tiro wa, nchaꞌtid xa Sidón nsea distrit nsaleaꞌ Decápolis, ulayaꞌ xa toꞌo lagun Galilea. 32Leꞌa be men kwaꞌad cha ulayaꞌno dub xa mud no ngwaꞌad xa. Cha unab bexa uxoꞌob Jesús yaꞌa na gek xa mud wa, ndontsa yakna xa. 33Leꞌa Jesús cha mbiꞌi nabtsa xa mud wa dub lad wats be men wa. Cha mkiko Jesús ngutsyaꞌa na be len nchaꞌ xa mud wa. Cha mchukko Jesús dub ngutsyaꞌa na, cha mgal Jesús luzh xa mud wa. 34Weꞌe mwiꞌi Jesús gibeꞌa, cha mgaꞌa ladna xa, ndab xa:

—¡Efata! —leꞌa ta wa gab: ¡Byaꞌal lu!

35Bi leꞌa gor wa cha myaꞌal nchaꞌ xa, cha myakna luzh xa nsea usaxan utsin ndadiꞌizh xa. 36Weꞌe cha ndab Jesús ndoꞌ bexa:

—Naꞌan ton ndoꞌ ná gudiꞌizh bega ta ndee.

Parea lakta pla biaj ndab Jesús lá gudiꞌizh bexa‑yá, ná leꞌa bexa ndi mas mbidiꞌizh‑a. 37Leꞌa itea be men uzhebpa ngwanseana, ndab bexa:

—Wenka ndun xa itea be taꞌa, gast nyunyakna xa bexa mud no ngwaꞌad.

Currently Selected:

San Marcos 7: zpt

Highlight

Copy