San Mateo 15

Ta ndanno bzhiꞌik be men cuent ten Dios

(Mr. 7:1-23)

1Tsoꞌo wa leꞌa pla be mech ten ley nsea bexa fariseo utoꞌo gezh Jerusalén nchaꞌbe wats Jesús. Cha ndab bexa ndoꞌ Jesús:

2—¿Xtaꞌan ni lá ndankea be xmen lu be costumbr mchaꞌan be usan gox polta? Lbaꞌatsa naꞌa bexa gor ndaw bexa parea naꞌanpa naꞌa bexa lak nibeꞌe costumbr wa.

3Leꞌa Jesús cha ukaꞌab ndab:

—¿Xtaꞌan lá ndun bega lak nibeꞌe ley ten Dios, ndi ndankeatsa bega be costumbr ten leꞌaka bega? 4Leꞌa Dios unibeꞌe ndab: “Wankea bega xus bega nsea xnaꞌa bega.” No ndab xa: “Leꞌa tal ton kweaꞌ iníꞌi ndoꞌ xus na natal ndoꞌ xnaꞌa na, leꞌa xa wa nsabndoꞌ gat.” 5Ná leꞌa bego ndi ndab leꞌa tal ton gab ndoꞌ xus na natal ndoꞌ xnaꞌa na “leꞌa itea ta ndiꞌizh gakno naꞌ bega wa, leꞌa ta wa ndi usa naꞌ ndoꞌ Dios”, 6weꞌe leꞌa xa wa yá naꞌantapa juerska gakno xus na no xnaꞌa na. Li nlaꞌa bega ta unibeꞌe Dios, ndankea bega ndi sbeꞌen costumbr ten bega. 7Leꞌa bega nluu cuentta xa wen, ná bega ugap nak. Ugeaka ndab Isaías sakndoꞌ Dios tiemp polta, ndab xa lak nak bego:

8Leꞌa be men ndee diꞌizhtsa ndankea naꞌ,

parea leꞌa ladoꞌo xa sit nak ndoꞌ naꞌ.

9Naꞌan xtiꞌin ta ndankea bexa naꞌ,

leꞌa cuent diꞌizh ten naꞌ nluu bexa,

parea diꞌizh ten be mentsa‑yá.

10Weꞌe leꞌa Jesús cha utezh be men kwaꞌad wa, ndab xa:

—Blaꞌach bego ta gáp naꞌ ndee. No byakbeꞌena bega‑yá. 11Leꞌa be ta ndaw be men naꞌanpa leꞌa ndun bzhiꞌik ladoꞌo be men. Ndi ta ugap ndadiꞌizh be men leꞌa ndun bzhiꞌik bexa.

12Cha ulen be xmen Jesús wats xa, ndab bexa:

—¿Uniꞌí go leꞌa bexa fariseo ngokloo gor na mbiꞌín bexa ta li ndab go wa?

13Leꞌa Jesús cha ukaꞌab ndab:

—Leꞌa bexa nak cuent dub ya naꞌanpa ngas Xus naꞌ xa nsob gibeꞌa, leꞌa gal dub wizh leꞌa xa kib‑a. 14Blaꞌa bega bexa, leꞌa bexa cuent dub xa lá naꞌ nchaꞌano stub xa lá naꞌ. Leꞌa tal li goꞌo dub xa lá naꞌ stubga xa lá naꞌ, leꞌa bexa itop slaꞌyoꞌo len dub geꞌed.

15Leꞌa Pedr cha ndab:

—Bluu ga xteꞌe nak ta msaktabeꞌe ga wa ndoꞌ besa.

16Leꞌa Jesús cha ndab:

—¿Noga bego ni lá nyakbeꞌena ta ndáp naꞌ zha? 17¿Lá nyakbeꞌena bega zha leꞌa ta ndaw dub men nchaꞌa len xa, cha nchaꞌaga‑yá len letrina? 18Ná leꞌa ta ugap ndadiꞌizh be men wa ladoꞌoka xa ntoꞌo. Cha ndun bzhiꞌik‑a xa ndoꞌ Dios. 19Leꞌa len ladoꞌo be men ntoꞌo be ta ugap ndanbeꞌe bexa. Ta weꞌe ncho xa ndut men. No ngal xa xa ten stubga men. No ndun xa ta ugap ltsaꞌa ta li nak wa. No ndun xa gealwaꞌan no gealkwiꞌin. No nisi xa be ltsaꞌa xa. 20Leꞌa itea be ta ugap ndee ndun bzhiꞌik bexa cuent ten Dios. Parea ta na lá unaꞌa dub xa lak nibeꞌe bexa wa cha gaw xa, leꞌa ta wa naꞌanpa gun bzhiꞌik xa cuent ten Dios.

Dub xagots naꞌanpa xa judio mgeꞌ ladna Jesús

(Mr. 7:24-30)

21Cha utoꞌo Jesús nchaꞌa xa dub sa gax gezh Tiro no gezh Sidón. 22Weꞌe leꞌa dub xagots ncho sa wa dub xa Canaán ulen wats Jesús, ugeꞌ ndab xa:

—¡Señor, xin David! ¡Blats ladna go naꞌ! Leꞌa xiꞌín gots naꞌ ncho mbi bxin len ladoꞌo na uzhebpa kweaꞌ nsak xa.

23Ná leꞌa Jesús ni lá ikaꞌab ndoꞌ xa. Leꞌa be xmen Jesús cha ulen wats xa, cha ndab bexa:

—Gud go ndoꞌ xa baꞌ yaꞌ xa, leꞌa xa uzhebpa ndun ruid nsenkea xa tsoꞌo beuna.

24Leꞌa Jesús cha ndab:

—Leꞌa Dios mtuꞌub naꞌ gakno naꞌ bexa Israeltsa, bexa nak cuent be borreg ulaꞌ.

25Parea leꞌa xagots wa ubii, cha usaxib xa ndoꞌ Jesús, ndab xa:

—¡Señor, gokno ga naꞌ!

26Leꞌa Jesús cha ndab:

—Naꞌanpa utsin nak ulat besa pan ndoꞌ be meꞌed, cha usaꞌab besa‑yá ndoꞌ be mbek.

27Leꞌa xagots wa cha ndab:

—Ta ugeaka ta wa, Señor, parea leꞌa be mbek ndaw be taꞌa nlate xan mes ten xwan ma.

28Leꞌa Jesús cha ndab:

—Xagots, uzheꞌeb ngeꞌ ladna lu naꞌ. Nat gak ta nlad lu.

Bi leꞌa gor wa leꞌa xingots xa wa cha myakna.

Jesús myunyakna kwaꞌad bexa gizh

29Leꞌa Jesús cha utoꞌo sa wa nchaꞌagal xa toꞌo lagun Galilea. Cha ukea xa dub bet, cha usob xa. 30Weꞌe leꞌa kwaꞌadpa men ulen wats xa, nseano bexa bexa lá yoo gan isea, no bexa lá naꞌ, no bexa lá yoo gan gudiꞌizh, no bexa moch, nsea kwaꞌadta bexa gizh. Cha mte bexa bexa gizh wa ndoꞌ Jesús, cha myunyakna Jesús bexa. 31Leꞌa be men wa ngwanseanabe gor uniꞌí bexa leꞌa bexa lá yoo gan gudiꞌizh wa ndadiꞌizhla, no bexa moch wa myaklana, no bexa lá yoo gan isea wa utsinla nsea, no bexa lá naꞌ wa nwiꞌila. No ndab be men leꞌa Dios ten bexa Israel uzheꞌeb dub Dios juert.

Jesús mgaw dub dap mil xabgiꞌi

(Mr. 8:1-10)

32Cha utezh Jesús be xmen na, cha ndab xa:

—Leꞌa naꞌ nlats ladna be men kwaꞌad ndee, leꞌa bexa wizh nyonla nde wats naꞌ, parea lá ndapta bexa ta gaw na. Leꞌa naꞌ lá nlad utuꞌub naꞌ bexa lbaꞌatsa lá gaw bexa, nchaꞌa bexa lá uxik ilanseaꞌ ta lid na.

33Leꞌa be xmen Jesús cha ndab ndoꞌ xa:

—¿Pa izheal beuna pan gaw dub lbaꞌata men kwaꞌad baꞌ? Leꞌa sa ndee sit nde be gezh.

34Leꞌa Jesús cha unabdiꞌizh ndab:

—¿Plo pan ndap bega zha?

Leꞌa bexa cha ndab:

—Sgaꞌad pan nsea stapla mbeal byux.

35Cha ndab Jesús ndoꞌ be men kwaꞌad wa kwe bexa ndoꞌ yo. 36Cha usen xa isagaꞌad pan nsea be mbeal wa, cha msaꞌa xa xno ndoꞌ Dios, no uleꞌa xa be ta wa sian bleꞌa. Weꞌe msaꞌa xa‑yá ndoꞌ be xmen xa, utseꞌa bexa‑yá ndoꞌ be men wa. 37Leꞌa be men wa itea udaw gast plo mzhea bexa. Cha mteleꞌe be xmen Jesús sgaꞌad zhum byux be ta myaꞌan sobr. 38Leꞌa lat bexa udaw wa ncho pa dap mil xabgiꞌitsa, parea naꞌanpa igaꞌab be xagots no be meꞌed. 39Cha ndab Jesús ndoꞌ be men yaꞌbe bexa. Cha ukea xa ndoꞌ barco wa nchaꞌa xa dub sa gax gezh nsaleaꞌ Magdala.

Currently Selected:

San Mateo 15: zpt

Highlight

Copy