San Lucas 1

Luc mkeꞌa cuent ten Jesús ndoꞌ Teófilo

1Leꞌa kwaꞌad be men mbin juers ndon xkwaꞌa mkeꞌa bexa ta na ta ugeakapa mbin Jesús lat besa. 2Leꞌa bexa na ukeseano Jesús ndon leꞌa ned uniꞌí be ta wa no mbidiꞌizh bexa‑yá ndoꞌ besa. 3Ta weꞌe no naꞌ uzhebpa uloxnes gast xan itea be ta ndee. Cha mbinbe naꞌ leꞌa naꞌ nsabndoꞌ ndon xkwaꞌa ukeꞌa be ta ndee ndoꞌ go, Teófilo, 4ndontsa wen igondoꞌ go gealngea, be ta na mbidiꞌizh bexa ndoꞌ ga.

Dub angel ndab ndoꞌ Zacarías leꞌa xa gap Juan

5Leꞌa zha na ngok Herodes xa nibeꞌe Judea, uyoꞌo dub uleꞌay judio nsaleaꞌ Zacarías, dub xa no nak partid Abías ten be uleꞌay. Leꞌa xagots ten Zacarías wa nsaleaꞌ Elisabet, dub xa ras ten Aarón. 6Leꞌa Zacarías nsea Elisabet uzhebpa bexa wen ngok ndoꞌ Dios. No uzheꞌeb mxobgek bexa ndoꞌ itea be taꞌa unibeꞌe Dios. 7Ná leꞌa bexa wa lá ndap xin na, geal leꞌa Elisabet wa dub xagots lá yoꞌo gan gap meꞌed. No goxlapa itop bexa wa.

8Ngol zha na leꞌa partid ten uleꞌay Zacarías wa leꞌa ngol gun tiꞌin ndoꞌ Dios. 9Lak nak costumbr ten be uleꞌay uloꞌo bexa suert, cha leꞌa Zacarías ngol leꞌa yaꞌlo zhen len niꞌi ten Dios. 10Ngol gor na ngo xa zhen len wa, leꞌa itea be men ndebe tsoꞌo juer ndadiꞌizhno Dios. 11Cha mlundoꞌ dub angel ten Dios ndoꞌ Zacarías, nsoꞌ angel lad gaꞌal wats mes, sa ngo uleꞌay zhen. 12Leꞌa gor na uniꞌí Zacarías angel wa, leꞌa xa ni lá iniꞌí xteꞌe gun, no mzheb xa. 13Leꞌa angel wa cha ndab:

—Zacarías, lá izheb lu, leꞌa Dios ndoꞌón ta nab lu ndoꞌ xa. Leꞌa Elisabet xagots ten lu gap dub meꞌed bgiꞌi, cha usaleaꞌ lu meꞌed wa Juan. 14Leꞌa zha na gal meꞌed, leꞌa lu uzhebpa iten ladna, no kwaꞌadpa be men iten ladnabe, 15geal leꞌa xin lu wa gak dub xa uzhebpa nsak cuent ten Dios. Leꞌa xa ni lá goo vin no ni stub taꞌa nsudna be men. No uzhebpa gap xa juers ten Espíritu ten Dios, gor na bi leꞌa xnaꞌa xa nsoꞌno xa. 16Leꞌa xa gun gan leꞌa kwaꞌadpa bexa Israel yach yankea bexa Dios Xa Nibeꞌe. 17Leꞌa Juan leꞌa yaꞌ ned ndoꞌ Xa Nibeꞌe wa. Leꞌa xa wa juert gudiꞌizh sakndoꞌ Dios lak juert mbidiꞌizh Elí, ndontsa gun xa gan lá kuyota be men nsea leꞌaka be xin xa, no leꞌa bexa lá nxobgek wa uxobgek ndoꞌ Dios. Li gun xa ndontsa list kwe be men gungea ladna bexa xa nak Xa Nibeꞌe wa zha na ilen xa.

18Leꞌa Zacarías cha unabdiꞌizh ndoꞌ angel, ndab xa:

—¿Xteꞌexá iní naꞌ syoꞌo gan gak ta ndee zhaga? Leꞌa naꞌ no xagots ten naꞌ yá goxlapa besa.

19Leꞌa angel cha ukaꞌab ndab:

—Leꞌa naꞌ nsaleaꞌ Gabriel, naꞌ ndun tiꞌin ndoꞌ Dios. Leꞌa Dios mtuꞌub naꞌ ndalyáp naꞌ ndoꞌ lu be diꞌizh wen mbidiꞌizh naꞌ wa. 20Leꞌa nat leꞌa lu yak mud, yá lá gudiꞌizhta lu gast gal wizh yoo be ta ndáp naꞌ ndee wa, ke na lá ngungea ladna lu ta ndee. Nat leꞌa ta wa gakka gal zha nsabndoꞌka li gak‑a.

21Ndalen wa leꞌa be men ndenkeaꞌ ná xá gor itoꞌo Zacarías len niꞌi ten Dios. Ndanseana bexa xtaꞌan ngi lita kwen nchaꞌa xa len wa. 22Ná leꞌa gor na utoꞌo xa leꞌa xa lá yoolata gan iníꞌi. Weꞌe uniꞌí be men leꞌa xa uniꞌí dub ta mluu Dios len wa. Leꞌa xa sbeꞌen seintsa ndun, leꞌa xa lá yoolata gan gudiꞌizh.

23Leꞌa ngol zha ngwaꞌa be wizh mbin Zacarías tiꞌin wa, cha nseaꞌ xa ta lid xa. 24Leꞌa tsoꞌo wa leꞌa Elisabet xagots ten xa cha nsoꞌnola dub meꞌed. Leꞌa xagots wa cha lá itoꞌota ta lid na dub gaꞌay mbeꞌe. Mbinbeꞌe xa, ndab xa: 25“Lndeꞌe ngokno Dios naꞌ gap naꞌ meꞌed, ndontsa naꞌantapa ido lad naꞌ ndoꞌ be men.”

Dub angel ndab leꞌa Jesús gal

26Leꞌa ngol sxoꞌop mbeꞌe tsoꞌo wa, leꞌa Dios mtuꞌubgal angel Gabriel gezh Nazaret ten distrit Galilea, 27sa ncho dub xagots ben, dub xa ni gol ugal xabgiꞌi. Leꞌa xa wa nsaleaꞌ Marí, xa na ikaꞌaka dub xa na nsaleaꞌ Kosé, xa ras ten David. 28Leꞌa angel wa uyoꞌo len lid xagots wa, cha ndab angel ndoꞌ xa:

—Tiux ga Marí, leꞌa Dios nsak ladna lak nak lu, no nsoꞌ Dios wats lu. Leꞌa xa mas ndakno lu ndoꞌ itea be xagots.

29Ná leꞌa Marí ni ko lá iniꞌí xteꞌe gun gor na mbiꞌín xa ta li ndab angel wa. Ni lá iniꞌí xa xtaꞌan ngi li ndab angel ndoꞌ xa. 30Leꞌa angel cha ndab:

—Marí, lá izheb lu leꞌa Dios nsak ladna lak nak lu. 31Leꞌa nat leꞌa lu yoxinna dub meꞌed bgiꞌi, cha usaleaꞌ lu meꞌed wa Jesús. 32Leꞌa meꞌed wa gak dub xa nsakpa, geal leꞌa xa Xin Dios siꞌil. Leꞌa Dios Xa Nibeꞌe leꞌa gun leꞌa Jesús inibeꞌe lak unibeꞌe David usan gox polta ten xa. 33Leꞌa Jesús wa inibeꞌe bexa ras ten Jacob idub tiemp. Leꞌa tiemp inibeꞌe xa nunk lá idub.

34Weꞌe leꞌa Marí cha unabdiꞌizh ndab ndoꞌ angel:

—¿Xteꞌe yoo gan gak ta li ndab go wa zha? Leꞌa naꞌ ndee dub xagots nab, ni dub xabgiꞌi gol ugal naꞌ.

35Leꞌa angel cha ukaꞌab ndab:

—Leꞌa Espíritu ten Dios siꞌil ilen cuent dub xgal tsoꞌo lu. Leꞌa Espíritu wa leꞌa gun gap lu meꞌed wa. Ta weꞌe leꞌa meꞌed gap lu wa ni dub ke lá gap, no isaleaꞌ meꞌed Xin Dios. 36Leꞌa Elisabet ltsaꞌa lu wa no gap dub meꞌed maska yá goxlapa xa. Leꞌa be men ndab leꞌa xa wa lá yoo gan gap meꞌed, parea leꞌa xa nsoꞌnola meꞌed dub xoꞌop mbeꞌe. 37Leꞌa cuent ten Dios naꞌan xtaꞌan dub ta lá yoo gan.

38Leꞌa Marí cha ndab:

—Leꞌa naꞌ ndee dub xa ndun tiꞌin ndoꞌ Dios Xa Nibeꞌe. Gun Dios lak ndab go ndoꞌ naꞌ wa.

Leꞌa angel wa cha mkaꞌan sa wa.

Marí ngwaꞌinaꞌ Elisabet

39Ngol tsoꞌo wa leꞌa Marí cha uxax nchaꞌa dub gezh nde lat be bet distrit Judea. 40Cha uyoꞌo xa len lid Zacarías, cha unidiꞌizh xa ndoꞌ Elisabet. 41Leꞌa gor na mbiꞌín Elisabet unidiꞌizh Marí ndoꞌ xa, leꞌa meꞌed nsoꞌno Elisabet wa cha uteꞌal len xa. Leꞌa Espíritu ten Dios cha mas uyoꞌo len ladoꞌo Elisabet, 42cha ugeꞌ ndab xa:

—¡Leꞌa Dios uzhebpa ndakno lu ndoꞌ iteata be xagots! ¡No uzheꞌeb gakno Dios xin lu! 43¿Tonxá nak naꞌ nsea inaꞌ lu naꞌ zhaga, ná lu leꞌa nak xnaꞌa xa gak Xa Nibeꞌe naꞌ? 44Leꞌa gor na mbín naꞌ unidiꞌizh lu, leꞌa meꞌed nsoꞌno naꞌ ndee uteꞌal‑la len naꞌ tant nten ladna meꞌed. 45Uzhebpa wen ncho ladna lu ta na mbingea ladna lu ta ndab Dios ndoꞌ lu, leꞌa ta wa gakka lak ndab xa.

Marí msaꞌa xno ndoꞌ Dios

46Leꞌa Marí cha ndab:

Leꞌa naꞌ idub ncho ladna ndáp

leꞌa Dios uzheꞌeb dub Dios wen.

47Leꞌa ladoꞌo naꞌ nten ladna ndoꞌ Dios

xa nsaꞌa gealnaban ndoꞌ naꞌ.

48Leꞌa Dios nlaꞌach naꞌ, xa ndun tiꞌin ndoꞌ xa,

maska naꞌanpa nak naꞌ dub xa nsak.

Leꞌa idub ndoꞌ ndee gab be men

leꞌa naꞌ uzhebpa wen ncho lad naꞌ.

49Leꞌa Dios siꞌil uzhebpa ndakno naꞌ;

leꞌa xa dubkama nak Dios.

50Idub tiemp nkweaꞌ ladna xa be men,

bexa nxobgek ndoꞌ xa.

51Leꞌa juers ten Dios mbin xa be ta ndanseana beuna;

Mteꞌachso xa bexa zhin nak.

52No ulatsob xa bexa nsak sa nibeꞌe bexa,

Cha myunno Dios bexa uban nak cuent bexa nsak.

53Nsea bexa lá ndap ta gaw na, msaꞌa Dios sian taꞌa ndoꞌ bexa.

No ulantuꞌub xa bexa rik ni naꞌanta xtaꞌan ndap bexa.

54Ndakno Dios bexa Israel, bexa ndun tiꞌin ndoꞌ xa,

leꞌa xa lá nyalad ta nkweaꞌ ladna xa bexa wa.

55Leꞌa ta wa ta ndabka Dios ndoꞌ bexa gox polta ten beuna,

ta gunno Dios Abraham no bexa ras ten xa idub tiemp.

56Weꞌe leꞌa Marí cha uyoꞌo ta lid Elisabet pa chon mbeꞌe. Cha weꞌeta nseaꞌ xa ta lid xa.

Xteꞌe ngol Juan xa ulaleaꞌ men

57Leꞌa ngol wizh na gap Elisabet meꞌed, leꞌa xa cha ngop dub meꞌed bgiꞌi. 58Leꞌa bexa ncho gax wa no be ltsaꞌa xa cha mbiꞌín xteꞌe li utsin mbinno Dios Elisabet, cha no bexa mten ladna. 59Leꞌa ngol zha na ngok xoꞌon wizh ngol meꞌed wa, cha ulo bexa beꞌe meꞌed lakka ndun bexa judio. No cha nlad bexa usaleaꞌ bexa meꞌed wa Zacarías lak nsaleaꞌ xus meꞌed. 60Ná leꞌa xnaꞌa meꞌed lá kaꞌab li isaleaꞌ meꞌed. Ndab xa:

—Leꞌa meꞌed isaleaꞌ Juan.

61Leꞌa bexa wa cha ndab:

—¿Xtaꞌan ngi li isaleaꞌ meꞌed baꞌ zha? Leꞌa ni dub ltsaꞌa lu naꞌanpa li nsaleaꞌ.

62Weꞌe cha unabdiꞌizh bexa sbeꞌen sein ndoꞌ xus meꞌed xteꞌe nlad xa isaleaꞌ meꞌed. 63Leꞌa xa cha unab dub bleꞌa tabl, cha mkeꞌa xa ndoꞌ tabl wa: “Leꞌa meꞌed isaleaꞌ Juan.” Leꞌa itea be men wa cha ngwanseanabe. 64Cha bi leꞌa gor wa cha uyoꞌo gan uníꞌi Zacarías, cha usaxan xa nsaꞌa xa xno ndoꞌ Dios. 65Leꞌa itea be men ncho gax ta lid Zacarías cha ngwanseana bexa no mzheb bexa. Leꞌa ta li ngok wa mgen itea be gezh ndebe lat be bet distrit Judea. 66Leꞌa itea bexa na li mbiꞌín ta wa cha mbinbeꞌe bexa, ndab bexa:

—¿Xteꞌema gak meꞌed wa zha?

Leꞌa bexa wa uniꞌí leꞌa meꞌed wa ncho ndoꞌ yaꞌa Dios.

Ta msaꞌa Espíritu ten Dios mbidiꞌizh Zacarías

67Leꞌa Zacarías xus meꞌed wa mas uyoꞌo juers ten Espíritu ten Dios len ladoꞌo na, cha mbidiꞌizh xa sakndoꞌ Dios, ndab xa:

68Uzhebpa wen Dios Xa Nibeꞌe bexa Israel,

geal leꞌa xa mbiꞌid yakno be xmen xa.

69Leꞌa Dios mtuꞌub dub xa juertpa usaꞌa gealnaban,

dub xa ras David, xa mbin tiꞌin ndoꞌ Dios.

70Leꞌa ta wa ta ndab Dios ndoꞌ be profet ten na polta,

cha mbidiꞌizh bexa‑yá ndoꞌ be men sakndoꞌ Dios.

71Leꞌa Dios ndab leꞌa xa lá ulaꞌa beuna ndoꞌ be men ndakloo ndoꞌ beuna,

no bexa nxee ladna ndoꞌ beuna.

72Leꞌa Dios nkweaꞌ ladna be usan gox ten beuna,

no ndunka xa lakka ndab trat mbinno xa bexa wa.

73Leꞌa trat wa ta ndab Dios ndoꞌ Abraham usan gox ten beuna leꞌa Dios sunka ta wa:

74leꞌa xa gakno beuna ndoꞌ be men ndakloo ndoꞌ beuna,

ndontsa naꞌanpa izheb beuna gun beuna tiꞌin ndoꞌ Dios,

75no umbiꞌi gak ladoꞌo beuna ndoꞌ Dios,

no uzhebpa wen gak beuna ndoꞌ xa idub tiemp nban beuna.

76Leꞌa lu, chuu, isaleaꞌ dub profet ten Dios Siꞌil,

leꞌa lu yaꞌ ned ndoꞌ xa gak Xa Nibeꞌe,

ndontsa list kwe be men Israel gal zha ilen xa wa.

77Weꞌe iniꞌí bexa leꞌa Dios stsuꞌu be ke ten bexa,

no usaꞌa xa gealnaban ndoꞌ bexa.

78Leꞌa Dios ten beuna uzhebpa nkweaꞌ ladna be men,

ta weꞌe utuꞌub xa xa nak cuent xeꞌa wizh gor tempran ndoꞌ beuna,

79ndontsa usu xa xeꞌa ladoꞌo bexa ndencho sa ukaw,

bexa nzheb gat.

Li uluu Dios beuna nes ten xa,

ná xteꞌe wen yoono beuna xa.

80Leꞌa Juan ngoꞌol, no mas juert ngok ladoꞌo xa. Ngol zha goxla xa ngwaꞌ xa uyoꞌo xa geꞌe sa bid sa naꞌan men, gast ngol zha na usaxan mbidiꞌizh xa ndoꞌ bexa Israel.

Currently Selected:

San Lucas 1: zpt

Highlight

Copy