San Juan 3

Jesús ndadiꞌizhno Nicodemo

1Uyoꞌo dub xa fariseo nsaleaꞌ Nicodemo, xa no nak dub xa nsak ten bexa judio. 2Leꞌa dub gor teꞌal ulayaꞌ xa wats Jesús, cha ndab xa:

—Mech, leꞌa besa uniꞌí leꞌa go Dioska mtuꞌub, ndontsa uluu ga be men. Leꞌa naꞌan ton gun gan gun be uyon ndun ga, tal leꞌa Dios naꞌanpa isoꞌ wats xa.

3Leꞌa Jesús cha ukaꞌab ndab:

—Leꞌa naꞌ gáp ndoꞌ lu leꞌa tal ton lá gal stub biaj, leꞌa xa lá yoo gan iniꞌí sa nibeꞌe Dios.

4Leꞌa Nicodemo cha ndab:

—¿Xteꞌe yoo gan gal dub xa goxla stub biaj zha? Lá yoo gan yoꞌo xa len xnaꞌa xa, cha galgal xa stub biaj.

5Leꞌa Jesús cha ndab:

—Leꞌa naꞌ gáp ndoꞌ lu leꞌa tal ton lá gal nsea nits no Espíritu ten Dios, lá yoo gan yate xa sa nibeꞌe Dios. 6Leꞌa bexa na ndal lak ndal be men, leꞌa xa wa mentsa nak. Ná leꞌa bexa na ndal stub biaj lak nsaꞌa Espíritu ten Dios leꞌa xa wa xa ten Espíritu wa. 7Lá yanseana lu ta ndáp naꞌ leꞌa be men nsabndoꞌka gal stub biaj. 8Leꞌa mbi ndaꞌ guniꞌi pa nlad na no ndoꞌón lu nbezh‑a, parea leꞌa lu ni lá iniꞌí pa nsea‑yá no pa nchaꞌa‑yá. No liga nak gealnaban nsaꞌa Espíritu ten Dios ndoꞌ be men.

9Leꞌa Nicodemo cha ndab:

—¿Xteꞌe nak ta ndee zha?

10Leꞌa Jesús cha ndab:

—Lu nak mech ten bexa Israel, ¿ná lá yakbeꞌena lu ta ndee zha? 11Leꞌa naꞌ gáp leꞌa besa ndadiꞌizh ta nchandoꞌ besa no ta uniꞌí besa. Parea leꞌa bega lá ndangea ladna‑yá. 12Ná tal leꞌa bega lá ndangea ladna gor ndadiꞌizh naꞌ cuent ten be ta ncho ndoꞌ gizhliyo ndee, ¿xteꞌema gungea ladna bega‑yá gor gudiꞌizh naꞌ cuent ten be ta ncho gibeꞌa baꞌ zha?

13’Naꞌan ton gol gaꞌ gibeꞌa, nabtsa naꞌ ulen gibeꞌa leꞌa naꞌ nak Xa Myak Men Ndoꞌ Gizhliyo. 14No lak uxits Moisés dub uzhib giꞌib geꞌe sa bid wa, no liga ixits be men naꞌ, Xa Myak Men Ndoꞌ Gizhliyo, 15ndontsa tal ton gungea ladna naꞌ lá gak perdid, ndi gap bexa gealnaban nunk lá idub.

Dios nkweaꞌ ladna be men

16’Leꞌa Dios uzheꞌeb nkweaꞌ ladna be men, ta weꞌe msaꞌa xa dubkama Xin xa, ndontsa tal ton gungea ladna xa lá gak perdid ndoꞌ Dios, ndi gap xa gealnaban nunk lá idub. 17Leꞌa Dios mtuꞌub Xin na ndoꞌ gizhliyo naꞌanpa nsea utsaksi xa be men, leꞌa xa ndi nsealoꞌo be men ndoꞌ be ke ten bexa.

18’Leꞌa bexa na ndangea ladna Xin Dios, leꞌa Dios naꞌanpa gab leꞌa bexa wa ndap ke. Parea leꞌa bexa na lá ndangea ladna xa wa, leꞌa Dios ndabla leꞌa bexa wa ndapka ke, geal leꞌa bexa lá ngungea ladna xa nabkama nak Xin Dios. 19Leꞌa bexa wa ndap ke ndoꞌ Dios geal leꞌa zha ulen xa nak xeꞌa ten Dios ndoꞌ gizhliyo ndee, leꞌa bexa lá nlad xeꞌa wa, ndi sa ukaw nlad bexa leꞌa bexa sbeꞌen be ta ugap ndun. 20Leꞌa tal ton gun be ta ugap, leꞌa xa wa nxeeno ladna xeꞌa, no lá ibii xa ndoꞌ xeꞌa, ndontsa lá uluꞌu‑yá be ta ugap ndun xa. 21Parea tal ton gun lak nak gealngea ten Dios, leꞌa xa wa nbii ndoꞌ xeꞌa, ndontsa uluu xeꞌa wa leꞌa xa ndunka lak nlad Dios.

Juan mbidiꞌizhgal cuent ten Jesús

22Tsoꞌo wa leꞌa Jesús cha nchaꞌano be xmen na distrit Judea, cha uyoꞌo bexa dub ndeꞌep sa wa, no ngoleaꞌ Jesús be men. 23Leꞌa Juan noga ngoleaꞌ be men sa nsaleaꞌ Enón gax sa nde gezh Salim, geal leꞌa sa wa kwaꞌal nits ncho. Leꞌa be men nchaꞌbe wats Juan, cha ulaleaꞌ xa bexa wa. 24Leꞌa ta wa zha biseata ikea Juan litgiꞌib.

25Weꞌe leꞌa be xmen Juan no stapla bexa judio usaxan ndeyotoꞌo cuent ten xteꞌe nsambiꞌi bexa ndoꞌ Dios. 26Leꞌa be xmen Juan cha ulayaꞌ wats Juan, cha ndab bexa:

—Mech, leꞌa xa na li ulen wats go stub toꞌo yowbeꞌe Jordán, xa na li mbidiꞌizh ga cuent ten na, leꞌa xa wa no ngoleaꞌ be men no itea be men nchaꞌbe wats xa.

27Leꞌa Juan cha ndab:

—Naꞌan xtaꞌan yoo gan gun dub men tal leꞌa Dios naꞌanpa usaꞌa‑yá. 28Leꞌa bego uniꞌí leꞌa naꞌ ndáp leꞌa naꞌ naꞌanpa leꞌa nak Cristo, leꞌa naꞌ ndee ndi nak xa nedtsa mtuꞌub Dios ndoꞌ xa wa. 29Leꞌa sa nchilyaꞌa dub men leꞌa xagots nak xa tenka xabgiꞌi nchilyaꞌa wa. Leꞌa amig ten xabgiꞌi nchilyaꞌa wa nsoꞌ wats xa no uzhebpa nten ladna xa gor na ndoꞌón xa ti xabgiꞌi wa. No liga leꞌa naꞌ uzhebpa nten ladna nat ta na ndon naꞌ ta ndun Jesús. 30Nsabndoꞌka leꞌa xa wa nsayak mas dub xa nsak, ná leꞌa naꞌ ndee ndi nsayak dub xa uxee nsak.

Xin Dios ulen gibeꞌa

31’Leꞌa Jesús xa ulen gibeꞌa, no mas nsak xa ndoꞌ itea be men. Leꞌa bexa ncho ndoꞌ gizhliyo ndee mentsa nak, no ndadiꞌizh bexa ta ncho ndoꞌ gizhliyo. Ta weꞌe leꞌa xa na ulen gibeꞌa wa mas nsak ndoꞌ itea be men. 32Leꞌa ta uniꞌí xa no ta mbiꞌín xa, ta weꞌe ndadiꞌizh xa, parea leꞌa be men lá ndangea ladna ta wa. 33Ná leꞌa tal ton ndangea ladna ta ndadiꞌizh Jesús, leꞌa ta wa nluu leꞌa xa ngondoꞌ leꞌa Dios sbeꞌen gealngea ndadiꞌizh. 34Leꞌa Dios leꞌa mtuꞌub Jesús ndadiꞌizh xa diꞌizh ten Dios, no uzhebpa nsaꞌa Dios Espíritu ten na ndoꞌ xa. 35Leꞌa Tad Dios nkweaꞌ ladna Xin na, no msaꞌa Dios itea be taꞌa inibeꞌe xa. 36Leꞌa tal ton gungea ladna Xin Dios, leꞌa xa wa gap gealnaban nunk lá idub. Parea leꞌa tal ton lá nlad gungea ladna Xin Dios, leꞌa xa wa naꞌanpa gap gealnaban wa, leꞌa Dios ndi utsaksi xa.

Currently Selected:

San Juan 3: zpt

Highlight

Copy