Mateo 12

Panilew sabab ellew liꞌihin

(Markus 2:23-28; Lukas 6:1-5)

1Dambuwaꞌ Sabtuꞌ, ellew liꞌi meꞌ Yahudihin, pabutas disi Isa dem tanaꞌ. Peggeꞌ inusan meꞌ tindegnen, ngalupuꞌ siye buwaꞌ tanaꞌin bu inintaꞌ weꞌ de. 2Pagkite meꞌ Pariseohin miyaꞌan, paꞌinde pu si Isa, “Payamanun be. Meꞌ tindegnun hinangde tinaggahan saraꞌ si ellew liꞌihin.” 3Paꞌin si Isa si siye, “Gaꞌ ke bakas tabatsabi bang ine hininang Sultan Daꞌudin masaley paginusan iye duk meꞌ saweꞌnen? 4Padiyalem hep iye pī si lumaꞌ Tuhanin duk ineddoꞌ weꞌ ne pan binettad laꞌi pangurung si Tuhanin duk kinakan weꞌ ne duk meꞌ saweꞌnen. Bu tinaggahan hep weꞌ saraꞌ kinakan pan miyaꞌan, luwal hadja para si meꞌ imam. 5Duk gaꞌ ke isab tabatsabi dem kitab Tawrat weꞌ meꞌ imam si langgal hadjehin maghinang kahabaꞌ ellew liꞌi bisan tinaggahan maghinangin weꞌ saraꞌ? Saguwaꞌ gaꞌi du siye magduse. 6Akahante kaꞌam, niyaꞌ ne tuꞌu pasōng kapatutnen amban saraꞌ si langgal hadjehin. 7Niyaꞌ tasulat dem kitab, pinaꞌin, ‘Gaꞌi mahalgaꞌ si aku kulubanin saguwaꞌ iye kabayaꞌankun weꞌ maꞌaseꞌ kaꞌam si saweꞌbi.’ Bang tasabutbi teꞌed hātine inin, gaꞌi laboꞌanbi hukuman aꞌa manggaꞌ niyaꞌ dusenen. 8Aku, Anak Manusiyaꞌin, taga kapatut ku magpaꞌin bang ine-ine mapatut hininang si ellew liꞌihin.”

Aꞌa masapik tangannen

(Markus 3:1-6; Lukas 6:6-11)

9Manjari palanjal si Isa billaꞌi duk padiyalem iye dem langgalde. 10Laꞌi dem langgal niyaꞌ aꞌa sapik tangannen. Niyaꞌ isab laꞌi meꞌ aꞌa batang miha duse si Isa supaya iye katuntutande. Hangkan tilewde iye, paꞌinde, “Ngalanggalan saraꞌ ke magpakoleꞌ si ellew liꞌihin?” 11Nambung si Isa, paꞌinne, “Ine hinangbi bang upama niyaꞌ bili-bilibi dambuwaꞌ du bu laboꞌ pe dem kupung baytu ellew liꞌi? Gaꞌi ke eddoꞌbi maluwas bisan ne ellew liꞌi? 12Pasōng hep mahalgaꞌ aꞌahin amban bili-bili. Hangkan patut maghinang makahāp si ellew liꞌi.” 13Manjari paꞌinne si aꞌa masapik tangannen, “Pahintengun tangannun.” Na, pinahinteng weꞌ ne, manjari kawuliꞌan ne tangannen kuweꞌ tanganne dambuwaꞌin. 14Manjari paluwas meꞌ Pariseohin amban langgal duk magisun siye bang saꞌingge si Isa tapapateyde.

Si Isa daraꞌakan Tuhanin

15Pagkataꞌuhan si Isa sabab isun meꞌ Pariseohin, tahalaꞌ iye amban lahat miyaꞌan. Ekka aꞌa paturul si iye. Pinakawuliꞌ weꞌ ne kēmon meꞌ aꞌa masakihin 16duk sinessaꞌan siye weꞌ ne gaꞌi dinaꞌak magaka-aka sabab iye. 17Sabab inin, tuman ne bissā Tuhan sinulat weꞌ Nabi Isayahin, pinaꞌin,

18“Inin daraꞌakanku bakas pineneꞌkun. Kalasahanku iye duk kasulutan ku teꞌed si iye. Papīku Niyawakun si iye duk magmahalayak du iye sabab hukumanku mabentelin si kēmon bangsa. 19Gaꞌi iye iyan magsasaꞌ atawa maggasud duk gaꞌi iye missā papales si meꞌ lān. 20Asigne meꞌ makulang sandelnen duk tabangne meꞌ aꞌa gaꞌ ne teꞌed niyaꞌ ase-asede. Gaꞌi iye padeheng samantaꞌan gaꞌi tadaꞌag kēmon malaꞌatin. 21Iye pangandelan kēmon kabangsahan si dunyahin.”

Si Isa duk Belsebul

(Markus 3:20-30; Lukas 11:14-23)

22Manjari, niyaꞌ binoꞌo pī pu si Isa dambuwaꞌ aꞌa pessek duk umew peggeꞌ pasayedan seyitan iye. Kawuliꞌan iye weꞌ si Isa, hangkan kapamissā ne iye duk ngite ne iye. 23Kēmon aꞌahin ulaliꞌ duk paꞌinde, “Inin ne enteꞌ tubuꞌ Sultan Daꞌudin?” 24Pagkale meꞌ Pariseohin inin, paꞌinde, “Kaꞌurungan iye balakat weꞌ Belsebul, nakuraꞌ meꞌ seyitanin, hangkan iye kapagpaluwas meꞌ seyitan.” 25Kataꞌuhan si Isa bang ine dem pikilanden, hangkan paꞌinne si siye, “Bang niyaꞌ pagsultanan bu magbonoꞌ meꞌ aꞌanen, magkaꞌat pagsultanan miyaꞌan. Duk bang meꞌ aꞌa si dambuwaꞌ puweblohin atawa meꞌ magtewtey-anakin gaꞌi magtuhut pikilan saguwaꞌ luwal magsasaꞌ, ujudnen magkanat-kanat siye. 26Hangkan bang nakuraꞌ seyitanin maluwas tindegne seyitanin, hātinen weꞌ magkuntara ne siye duk gaꞌi layun pagbayaꞌan seyitanin. 27Paꞌinbi weꞌ magpaluwas ku seyitan peggeꞌ kaꞌurungan ku balakat weꞌ Belsebul, nakuraꞌ seyitanin. Bang bennal inin, na, meꞌ tindegbin, amban balakat sine pagpaluwasde seyitanin? Siye ne iyan magpaꞌinin weꞌ salaꞌ pamikilbin. 28Saguwaꞌ iye matoꞌohin, asal amban Niyawa Tuhanin balakatku magpaluwas seyitanin. Hātine inin, Tuhanin magbayaꞌ ne tuꞌu si kaꞌam.

29“Nakuraꞌ seyitanin, dalilnen aꞌa basag. Gaꞌ niyaꞌ tapī ngahawas si lumaꞌ aꞌa basag bang gaꞌi dahuꞌ ingketanne aꞌa mabasag miyaꞌan, ubus meke ne iye tapangahawas.” 30Paꞌin si Isa pe, “Manggaꞌi mamēbbegan akuhin nguntarahan aku. Duk manggaꞌi manabangan aku magtipunin, nganat-nganat du. 31Hangkan hep akahante kaꞌam,” paꞌin si Isa, “ampun Tuhanin du kēmon duse aꞌahin duk meꞌ bissāde kupul si Tuhanin. Saguwaꞌ bang missā siye kupul si Niyawa Sutsihin, asal gaꞌi teꞌed siye inampun. 32Sine-sine missāhan aku, Anak Manusiyaꞌin laꞌat, makajari du iye inampun, saguwaꞌ bang Niyawa Sutsihin binissā-bissāhannen, asal gaꞌi teꞌed iye inampun bisan sumiyan-sumiyan.”

Pangataꞌuhan kayuhin si buwaꞌne

(Lukas 6:43-45)

33“Bang upama hāp kayuhin, hāp isab buwaꞌnen. Damikkiyan bang gaꞌi hāp kayuhin, gaꞌi hāp buwaꞌnen. Kayuhin kataꞌuhan si buwaꞌne. 34Kaꞌam iyan meꞌ aꞌa pangakkal. Gaꞌi kaꞌam makabissā hāp peggeꞌ laꞌat dem ateybin. Ine-ine dem atey manusiyaꞌ, iye miyaꞌan mapaluwas amban behenen. 35Aꞌa mahāpin, hāp kawul-piꞌilnen duk hāp bissānen peggeꞌ hāp dem ateynen. Saguwaꞌ aꞌa malaꞌatin, peggeꞌ laꞌat dem ateynen hangkan gaꞌi hāp kawul-piꞌilnen duk bissānen. 36Akahante kaꞌam, bang tekka ne ellew pangahukum Tuhan manusiyaꞌin, subey ne meꞌ aꞌahin magaka sabab kēmon bakas binissāde manggaꞌ niyaꞌ gunanen. 37Amban meꞌ bissānun kataꞌuhan bang ine hukuman si kaꞌuhin, bang inampun ke kew atawa ilegga.”

Meꞌ guru si saraꞌ āgamahin duk meꞌ Pariseohin makapakite tandaꞌ

(Markus 8:11-12; Lukas 11:29-32)

38Manjari, niyaꞌ meꞌ guru si saraꞌ āgama duk meꞌ Pariseo laꞌi duk paꞌinde pu si Isa, “Tuwan, mabayaꞌ kami ngite tandaꞌ balakatnun.” 39Saguwaꞌ sambunganne siye, paꞌinne, “Kaꞌam meꞌ aꞌa maꞌellum kuweꞌitu inin laꞌat kaꞌam duk gaꞌi kaꞌam nuhut Tuhan. Makapakite tandaꞌ hatiꞌ kaꞌam. Saguwaꞌ gaꞌ niyaꞌ tandaꞌ pinakitehan si kaꞌam luwal hadja tandaꞌ Nabi Yunus awwalley. 40Peggeꞌ kuweꞌ Nabi Yunusin laꞌi dem betteng kenna mahadjehin tellu ellew duk tellu sangem, damikkiyan aku, Anak Manusiyaꞌin, si sinōng laꞌi ku dem bulak tellu ellew duk tellu sangem. 41Bang tekka ellew pangahukum Tuhan meꞌ manusiyaꞌin, pī iyan nengge meꞌ aꞌa si lahat Niniba awwalley duk taksilde kaꞌam. Peggeꞌ siye, pagsusunande duk lebbahande duseden sakaliꞌ takalede usihat Nabi Yunusin. Akahante kaꞌam, kuweꞌitu niyaꞌ tuꞌu si kaꞌam pasōng langkew amban Nabi Yunus, saguwaꞌ gaꞌi tayimaꞌbi panoloꞌnen duk gaꞌi pagsusunanbi dusebin. 42Bang tekka ellew pangahukum Tuhan meꞌ manusiyaꞌin, pī iyan nengge sultan dende amban lahat Seba masa awwalley duk taksilne kaꞌam. Peggeꞌ iye, pitu iye amban higad dunya peggeꞌ bayaꞌ pakalene meꞌ bissā Sultan Sulaimanin, aꞌa lalem teꞌed kataꞌunen masaley. Akahante kaꞌam, kuweꞌitu niyaꞌ tuꞌu si kaꞌam pasōng kataꞌunen amban Sulaiman, saguwaꞌ gaꞌi tayimaꞌbi panoloꞌnen.”

Pabalik seyitanin

(Lukas 11:24-26)

43“Bang niyaꞌ seyitan,” paꞌin si Isa, “paluwas amban aꞌa, maglengngan-lengngan iye dem lahat makagindew-gindew miha pahalihanne, saguwaꞌ gaꞌi iye ngasuwaꞌ. 44Manjari paꞌinne dem pikilanne, ‘Tiyaꞌ ku balik pī si bakas patennaꞌankun.’ Pagtekkane laꞌi takitene weꞌ gaꞌ niyaꞌ patennaꞌ laꞌi duk bakas pinahidan ne duk memes ne. 45Ubus pī iye ngeddoꞌ pituꞌ meꞌ seyitan seddili, pasōng pe laꞌatden amban iye, duk paꞌasek siye kēmon pī dem baran aꞌahin patennaꞌ laꞌi. Kaꞌujudan aꞌa miyaꞌan, pasōng pe laꞌatan maꞌumantag si iye kuweꞌituhin amban tagnaꞌin. Kuweꞌ iyan du isab maꞌumantag si meꞌ aꞌa malaꞌat kuweꞌitu inin.”

Saꞌi si Isahin duk meꞌ pungtinaꞌine lellahin

(Markus 3:31-35; Lukas 8:19-21)

46Sasang si Isa pe mamissā si meꞌ aꞌahin, tekka saꞌinen duk meꞌ pungtinaꞌine lellahin laꞌi si bukut. Batang boꞌode si Isa magbissā. 47Manjari niyaꞌ ngakahan iye, paꞌinne, “Tuwan, īꞌ laꞌi saꞌinun duk meꞌ pungtinaꞌinun si bukut miha kaꞌu.” 48Saguwaꞌ paꞌin si Isa si mangakahan iyehin, “Sine saꞌikun duk sine meꞌ pungtinaꞌikun?” 49Manjari tinoloꞌ weꞌ ne meꞌ tindegnen, paꞌinne, “Siye inin saꞌikun duk meꞌ pungtinaꞌikun. 50Peggeꞌ sasuku maghinang kinabayaꞌan Samaku malaꞌi si surgaꞌin, iye iyan pungtinaꞌiku lella duk pungtinaꞌiku dende duk saꞌiku.”

Currently Selected:

Mateo 12: yakV

Highlight

Copy