Yahiya 10

Dalilan sabab mangipat meꞌ bili-bilihin

1Manjari magdalilan si Isa, paꞌinne, “Sabennal akahante kaꞌam, bang aꞌahin padiyalem dem kural meꞌ bili-bilihin bu gaꞌi palabey amban gawang saguwaꞌ padiyalem amban lān seddili, aꞌa miyaꞌan panangkew duk ngalangpas. 2Aꞌa mapadiyalem amban gawangin, iye mangipat bili-bilihin. 3Duk ilukahan iye weꞌ tatungguꞌ gawangin. Pakale meꞌ bili-bilihin suwalanen paglingananne ēn meꞌ bili-bilinen dambuwaꞌ-dambuwaꞌ, duk boꞌone siye paluwas amban dem kural. 4Paglumuwas ne siye, padehellu iye duk patuhut meꞌ bili-bilihin amban dambulihanne peggeꞌ takilalede suwalanen. 5Bang seddili aꞌa, gaꞌi tuhut meꞌ bili-bili inin saguwaꞌ lahi siye amban iye peggeꞌ gaꞌi takilalede suwalanen.” 6Dalilan inin inaka weꞌ si Isa si meꞌ aꞌahin saguwaꞌ gaꞌi tasabutde hātinen.

Si Isa pastul mahāpin

7Hangkan missā si Isa si siye balik, paꞌinne, “Sabennal akahante kaꞌam, aku inin dalil gawang palabeyan bili-bilihin. 8Meꞌ aꞌa mapitu dehellu amban akuhin, meꞌ magtoloꞌ manggaꞌi matoꞌohin, kuweꞌ meꞌ aꞌa panangkew siye duk meꞌ aꞌa ngalangpas. Saguwaꞌ gaꞌ siye pinakale weꞌ meꞌ aꞌa sukuꞌ si akuhin. 9Aku dalil gawangin,” paꞌin si Isa. “Sine-sine padiyalem amban aku, timbul iye. Luhaya iye padiyalem-pabukut duk inurungan iye kahāpan. 10Aꞌa ngalangpasin, gaꞌ niyaꞌ akane pitu bang dumaꞌin nangkew, duk mapatey, duk makaꞌat. Saguwaꞌ aku, akaku mapituhin ngurungan meꞌ manusiyaꞌin umul, maglabi-labi hāpnen.

11“Aku inin,” paꞌin si Isa, “dalil pastul bili-bili hāp pagipatne meꞌ bili-bilinen. Pastul bili-bili mahāpin maglillaꞌ matey para si meꞌ bili-bilinen. 12Aꞌa tinangdanan magbantey meꞌ bili-bilihin, dumaꞌin iye pastulin duk dumaꞌin iye dapuꞌ meꞌ bili-bilihin. Hangkan bang niyaꞌ takitene hayep talun hap pī si meꞌ bili-bilihin, lahi iye duk ambananne meꞌ bili-bilihin. Manjari siggew hayep talunin meꞌ bili-bilihin duk kanat-kanatne siye. 13Hangkan iye lahi peggeꞌ tinangdanan hadja iye. Gaꞌ niyaꞌ lasane si meꞌ bili-bilihin. 14-15Aku inin,” paꞌin si Isa, “dalil pastul bili-bili, hāp pagipatne meꞌ bili-bilinen. Magkinataꞌu teꞌed kami duk Samakun. Damikkiyan isab, kataꞌuhanku meꞌ aꞌa sukuꞌ si akuhin duk kataꞌuhande ku isab. Maglillaꞌ ku matey para si meꞌ aꞌa sukuꞌ si akuhin. 16Niyaꞌ pe meꞌ sukuꞌku seddili amban meꞌ sukuꞌku inin, saguwaꞌ gaꞌ siye tuꞌu si pagipatanku inin. Subey isab siye boꞌoku. Pakalede du iyan bissākun. Pagdambuwaꞌku siye manjari dambuwaꞌ hadja pastulden.

17“Kinalasahan ku teꞌed weꞌ Samaku Tuhanin peggeꞌ maglillaꞌ ku matey supaya ku pinakellum balik. 18Gaꞌ niyaꞌ manusiyaꞌ taga kapatut mapatey aku, peggeꞌ makapagbayaꞌ ku bang matey ku atawa gaꞌi. Paglillaꞌku umulkun amban kabayaꞌanku. Taga kapatut ku maglillaꞌ umulkun, duk taga kapatut ku makellum barankun balik. Inin pangandaꞌakan Samaku Tuhanin si aku.”

19Pagkale meꞌ aꞌahin meꞌ bissā si Isa inin, magseddili-seddili tapikil ne isab siye balik. 20Ekka siye magpaꞌin, “Pasayedan seyitan iyan, duk binalew. Weꞌey kaꞌam pakale si iye?” 21Saguwaꞌ paꞌin meꞌ sinduwehin isab, “Bang aꞌa pasayedan seyitan, gaꞌi iye makabissā kuweꞌ binissāne miyaꞌan. Duk bang seyitan, gaꞌi tapangitene aꞌa pessekin.”

Gaꞌ si Isa tinayimaꞌ weꞌ meꞌ aꞌahin

22Manjari taꞌabut ne waktu pagkādjaꞌan ēnande ‘Pagsutsi langgal hadjehin’ laꞌi si Awrusalam. Tempo haggut masa miyaꞌan. 23Si Isa lumengngan-lengngan dem langgal laꞌi si ēnande Simpey Sulaiman. 24Manjari patipun pī si iye meꞌ aꞌahin duk paꞌinde si iye, “Sampay sumiyan pe kami paꞌagadnu meke kami akahannu bang sine kew? Bang asal bennal kaꞌu Almasihin, tapeneꞌ Tuhan magsultan si kamihin, akahanun kami papastiꞌ.” 25Sambungan si Isa siye, paꞌinne, “Bakas ne kaꞌam akahanku saguwaꞌ gaꞌi du ku kahagadbi. Meꞌ hinangan bakas hininangku amban kapatut Samakun, kuweꞌ ngakahan kaꞌam ne bang sine ku. 26Saguwaꞌ gaꞌi ku kahagadbi peggeꞌ dumaꞌin kaꞌam sukuꞌ si aku. 27Meꞌ aꞌa sukuꞌ si akuhin, meꞌ dalil bili-bilikun, pakalede suwalakun. Kataꞌuhanku siye duk nuhut siye aku. 28Urunganku siye umul gaꞌ tamananne. Gaꞌi teꞌed siye pinasapeꞌ amban Tuhan salama-lama. Duk gaꞌ teꞌed niyaꞌ makaꞌagew siye amban aku. 29Pinasukuꞌ siye weꞌ Samakun si aku. Samakun balakatan amban kēmon. Gaꞌ niyaꞌ makaꞌagew meꞌ aꞌa sukuꞌ si akuhin amban iye. 30Samakun duk aku dambuwaꞌ du.”

31Pagkale meꞌ aꞌahin binissā si Isa miyaꞌan, nimuk ne isab siye batu panibagde si Isa. 32Paꞌin si Isa si siye, “Ekka meꞌ hinangan hāp tapakitehanku si kaꞌam. Meꞌ hinangku miyaꞌan pinahinang weꞌ Tuhanin si aku. Inggehin meꞌ hinangku miyaꞌan kabunsihanbi hangkan ku batang tibagbi?” 33Nambung meꞌ aꞌahin, paꞌinde, “Dumaꞌin sabab hinangannu hāp hangkan kew batang tibag kami, saguwaꞌ sabab pamissānu kupul si Tuhanin. Manusiyaꞌ kew hadja bu paꞌinnu Tuhan kew.” 34Paꞌin si Isa si siye, “Tasulat bisan dem kitabbi pinaꞌin Tuhan si meꞌ aꞌa mangahukumin masaley. Paꞌin Tuhanin si siye, ‘Kaꞌam iyan meꞌ tuhan.’ 35Na, kataꞌuhante bi weꞌ kēmon tasulat dem kitabin gaꞌi teꞌed pinda salama-lama. Na, bang meꞌ pangurungan Tuhan lapalnen inēnan weꞌ ne meꞌ tuhan, 36pasōng ne aku asal talep inēnan Anak Tuhan. Peggeꞌ aku inin, tapeneꞌ weꞌ Tuhanin duk pinapitu ku weꞌ ne si dunya. Na, weꞌey paꞌinbi weꞌ bissāhanku Tuhanin kupul peggeꞌ magpaꞌin ku weꞌ Anak Tuhanin ku? 37Bang saꞌupama meꞌ hinangkun gaꞌi magsaliꞌ duk meꞌ hinang Samakun, na, daꞌa ku kahagadun bi. 38Saguwaꞌ bang magsaliꞌ du, bisan ne gaꞌi kahagadbi meꞌ bissākun basta kahagadbi hadja meꞌ hinangkun, ujud kataꞌuhanbi du duk tahātibi du teꞌed weꞌ Samakun duk aku dambuwaꞌ du.” 39Ubus mabayaꞌ ne isab siye niggew si Isa sabab bissāhannen saguwaꞌ lumahi iye.

40Manjari pī si Isa balik si dambiyaꞌ boheꞌ Jordan, laꞌi si lugal bakas pagpandihan Yahiya meꞌ aꞌahin. Patennaꞌ iye laꞌi bang piyem bahangi. 41Ekka meꞌ aꞌa pī si iye. Magbissā-bissā meꞌ aꞌahin, paꞌinde, “Gaꞌ niyaꞌ tahinang Yahiya meꞌ hinangan makaꞌulaliꞌ, saguwaꞌ kēmon inakane sabab si Isahin bennal.” 42Duk ekka aꞌa laꞌi kahagad pu si Isa.

Currently Selected:

Yahiya 10: yakV

Highlight

Copy