Panagnaꞌan 45

Magpakilale si Yusup si meꞌ pungtinaꞌinen

1Manjari gaꞌi ne tasandal si Yusup pagtangisnen si harapan kēmon daraꞌakannen duk paꞌinne si siye, “Pī kaꞌam dahuꞌ kēmon tahalaꞌ.” Manjari gaꞌ niyaꞌ aꞌa seddili talebbi laꞌi dem bilik luwal si Yusup duk meꞌ pungtinaꞌinen. Ubus magpakilale ne si Yusup si meꞌ pungtinaꞌinen. 2Magtāring iye manamal hangkan takale iye weꞌ meꞌ aꞌa Misirin, duk magaka meꞌ aꞌahin sampay umabut pī si sultan Misirin.

3Paꞌin si Yusup si meꞌ pungtinaꞌinen, “Aku hep si Yusup. Ellum pe ke samakun?” Saguwaꞌ gaꞌ sumambung meꞌ pungtinaꞌinen peggeꞌ takeddut dem ateyden duk tinalew siye. 4Ubus paꞌin si Yusup, “Patapit kaꞌam pitu.” Patapit ne siye pī. Manjari paꞌinne, “Aku hep pungtinaꞌibin si Yusup, iye bakas pinabellihanbin bu taboꞌo ku pitu si Misir. 5Na, daꞌa kaꞌam suse. Daꞌa sasewun bi pikilanbin peggeꞌ bakas ku pabellihanbi. Peggeꞌ pinadehellu ku pitu weꞌ Tuhanin amban kaꞌam supaya kaꞌam ellum. 6Peggeꞌ niyaꞌ ne duwen tahun unus dem lahatin bu kulang pe limen tahun gaꞌi katomoꞌ tinanemin duk gaꞌi kamanjari buwaꞌnen. 7Pinapitu ku dehellu weꞌ Tuhanin supaya kaꞌam ellum duk niyaꞌ tubuꞌbi duk timbul kaꞌam amban kasigpitan kuweꞌitu inin. 8Dumaꞌin kaꞌam mamapitu akuhin, saguwaꞌ Tuhanin. Pinalangkew ku weꞌ Tuhanin hangkan aku pangandelan sultanin. Amban Tuhan isab weꞌ aku mangandaꞌak daraꞌakan sultanin kēmon duk amban Tuhan isab weꞌ aku mangantanan lahat Misirin.

9“Na, magdayiꞌ-dayiꞌ kaꞌam balik pī si samaten bi duk paꞌinun bi si iye, ‘Iye ne inin bissā anaknun si Yusup: Inurungan ku weꞌ Tuhanin kapatut ngantanan lahat Misirin. Pitu kaꞌam si aku, daꞌa kaꞌam magdayan-dayan. 10Subey kaꞌam patennaꞌ si lahat inēnan Gosen tuꞌu diyalem Misir duk kaꞌam tapit si aku, kaꞌam duk meꞌ anak-ampubin duk meꞌ bili-bilibin, meꞌ hayepbi sinduwehin duk meꞌ kēmonbin. 11Bang laꞌi ne kaꞌam si Gosen, aku saꞌ ngagastuhan kaꞌam peggeꞌ limen tahun pe unus inin. Gaꞌi ku mabayaꞌ bang kasigpitan kaꞌam duk meꞌ tindegbin.’ ”

12Paꞌin si Yusup pe si meꞌ pungtinaꞌinen, “Na, takilalebi du - duk pesōng salikun Binyamin - weꞌ asal aku iye mamissā si kaꞌam inin. 13Subey akahanun bi samaten bi sabab kēmon kabantuhanku matuꞌu si lahat Misir inin duk sabab kēmon bakas takitebin. Ubus boꞌohun bi pitu samaten bi. Daꞌa kaꞌam magdayan-dayan.” 14Ubus miyaꞌan kinekkepan weꞌ ne salinen Binyamin duk magtangis siye duwangan. 15Kinekkepan isab weꞌ ne kēmon meꞌ sakanen duk inūkan weꞌ ne duk nangis iye. Ubus behude ne magbissā-bissā.

16Pag kalede laꞌi si lumaꞌ sultanin weꞌ tekka ne meꞌ pungtinaꞌi Yusupin, sinna sultanin duk meꞌ aꞌa langkew si pagsultanannen. 17Paꞌin sultanin pu si Yusup, “Paꞌinun si meꞌ pungtinaꞌinun, ‘Sā inin hinangun bi. Duwaꞌanun bi meꞌ hayepbin duk balik kaꞌam pī si lahatbi Kanaꞌan. 18Boꞌohun bi samabin duk meꞌ kaꞌanakanbin pitu si aku. Urungante kaꞌam bulak tamanan mahāp tuꞌu si Misirin duk para si kaꞌam kinakan mahāpin.’ ” 19Paꞌinne pe, “Daꞌakun siye isab, paꞌinun, ‘Hinangun bi ininen. Moꞌo kaꞌam bittuꞌu amban lahat Misir meꞌ kahdu pasakeyan meꞌ anakbin duk meꞌ andabin duk boꞌohun bi samabin pitu. 20Daꞌa kaꞌam suse sabab meꞌ panyapbin peggeꞌ meꞌ mahāp tuꞌu si lahat Misirin si kaꞌam ne.’ ”

21Iye ne miyaꞌan hininang meꞌ anak Yakubin. Inurungan siye weꞌ si Yusup meꞌ kahdu kuweꞌ bakas dinaꞌak weꞌ sultanin. Duk urunganne isab siye meꞌ lutuꞌde. 22Inurungan isab siye weꞌ ne dangan-dangan semmek hāp manamal. Saguwaꞌ Binyamin inurungan weꞌ ne lime semmek mahāp manamalin duk tellu hatus isab kayuꞌ pilak tibuꞌuk. 23Pinaboꞌohan samanen weꞌ ne sampūꞌ asnu lella pinaduwaꞌan ekka bayuꞌ-bayuꞌan mahāp amban Misirin duk sampūꞌ asnu dende pinaduwaꞌan meꞌ kinakan, meꞌ pan duk meꞌ pamalutuꞌne samanen bang pī iye si lahat Misir. 24Manjari daꞌak si Yusup ne meꞌ pungtinaꞌinen pī tahalaꞌ duk sessaꞌanne isab siye, paꞌinne, “Magsulut-sulut kaꞌam. Daꞌa paꞌin kaꞌam magsasaꞌ si lān.”

25Manjari tahalaꞌ ne siye amban Misir moleꞌ hap Kanaꞌan. Pag tekka siye laꞌi magtawus akahande samaden, 26paꞌinde, “Ellum pe si Yusup, Ammaꞌ. Duk iye mangantan kēmon dem lahat Misirin.” Takeddut dem atey Yakubin. Gaꞌi iye kahagad si siye. 27Saguwaꞌ sakaliꞌ ne siye magaka-aka sabab kēmon bakas pinaꞌin Yusupin duk pag kitene meꞌ kahdu pinaboꞌohan si Yusup amban Misirin dinaꞌak pasakeyannen, kuweꞌ hinanyangan ne dem ateynen. 28Paꞌinne, “Kahagad ne ku. Ellum pe anakkun si Yusup. Pī ne ku duk iye kiteku pād-pād ku ellum.”

Currently Selected:

Panagnaꞌan 45: yakV

Highlight

Copy