Panagnaꞌan 43

Balik meꞌ pungtinaꞌi Yusupin hap Misir moꞌo Binyamin

1Saguwaꞌ sigpit meꞌ aꞌa si lahat Kanaꞌanin sabab unusin. 2Pag ubus ne weꞌ disi Yakub kinakan binoꞌo amban Misirin, paꞌin si Yakub si meꞌ anaknen, “Pī ne kaꞌam pī balik mellihan kite bi kapamangan bisan kuꞌahat.” 3Saguwaꞌ paꞌin si Yahud, “Bakas nessaꞌ aꞌa miyaꞌan, paꞌinne, ‘Bang gaꞌi nuhut kaꞌam salibin gaꞌi kaꞌam makajari paharap si aku.’ 4Na, bang daꞌaknu nuhut sali kamihin, pī kami balik mellihan kite bi kapamangan. 5Saguwaꞌ bang gaꞌi daꞌaknu nuhut Binyamin gaꞌi kami pī balik peggeꞌ paꞌin aꞌa miyaꞌan weꞌ asal gaꞌi koꞌ kami kajari paharap si iye bang gaꞌi nuhut sali kamihin.”

6Paꞌin si Yakub, “Weꞌey sā iyan hinangbi si akuhin? Weꞌey pe kaꞌam magaka weꞌ niyaꞌ pungtinaꞌibi seddili?” 7Nambung siye, paꞌinde, “Peggeꞌ magtilew-tilew isab aꞌa miyaꞌan sabab kite bi duk sabab meꞌ usbaten bi. Paꞌinne, ‘Ellum pe samabin? Niyaꞌ pe ke pungtinaꞌibi seddili?’ Ubus nambung hadja kami. Gaꞌ kataꞌuhan kami weꞌ daꞌakne binoꞌo pī sali kamihin.”

8Manjari paꞌin si Yahud pu si Yakub, “Daꞌakun ne nuhut aku Binyamin duk kami tapī duk kite bi gaꞌi matey weꞌ kewugtuꞌ, kēmon kite bi sampay kaꞌu duk meꞌ anak kamihin. 9Nanggup ku weꞌ asal tūrananku du iye balik pitu. Aku du mangipat iyehin. Bang gaꞌi iye tūrananku balik pitu si kaꞌu moleꞌ si aku susunin tiggelanku ellum. 10Bang siꞌ kami gaꞌ lahan-lahannu, bisan siꞌ kami miyaꞌan minduwe magbalik-balik pī melli kinakan.”

11Manjari paꞌin samaden si siye, “Na, bang gaꞌ niyaꞌ dapatte bi, iye inin hinangun bi. Moꞌo kaꞌam meꞌ bayuꞌ-bayuꞌan mahāpin amban lahatte bi inin pangurung aꞌa miyaꞌan. Boꞌohanun bi iye boheꞌ buwani duk meꞌ bayuꞌ-bayuꞌan gettaꞌ kayu bengngi duk bigi buwaꞌ kayu hāp kinakan kuweꞌ bigi pistasiyo, duk bigi almon. 12Dublihanun bi sīn binoꞌobin duk tūrananun bi bakas dem karutbin, peggeꞌ hatu siye salaꞌ. Ubus sinduwehin pamellihun bi ne kinakan balik. 13Boꞌohun bi isab salibin duk pī kaꞌam balik si aꞌahin. 14Karayaw urungan Tuhan Mabalakatanin pikilan hāp aꞌa miyaꞌan supaya maꞌaseꞌ iye duk papoleꞌne Simeon duk Binyamin. Saguwaꞌ bang iye kahandak Tuhanin weꞌ matey anakkun, na, magsabal ku hadja.”

15Manjari binoꞌo weꞌ de meꞌ pangurungden duk dubli sīnden duk Binyamin isab. Pī ne siye tudju Misir. Pag laꞌi ne siye, pī siye paharap pu si Yusup. 16Pag kite si Yusup weꞌ nuhut Binyamin paꞌinne si daraꞌakannen, “Boꞌohun siye pī si lumaꞌ bu padiyalemun siye bu sumbaliꞌanun kami kambing duk magmemes kaꞌam peggeꞌ mangan kami duk meꞌ aꞌa iyan lettu miyaꞌan.” 17Iye ne miyaꞌan hininang weꞌ daraꞌakannen duk boꞌone siye pī si lumaꞌ si Yusup.

18Tinalew meꞌ pungtinaꞌi Yusupin peggeꞌ binoꞌo siye pī si lumaꞌ si Yusup. Kannalde kaw siye tuntutanne sabab sīn bakas umisi dem karutden tagnaꞌ papīden hangkan siye binoꞌo si lumaꞌne. Magbissā-bissā siye paꞌinde, “Kaw kite bi siniggew weꞌ ne duk meꞌ hayepten bi duk hininang banyagaꞌne.” 19Hangkan pī ne siye si daraꞌakan pangandelan Yusupin duk magbissā siye laꞌi tapit si gawang lumaꞌin 20paꞌinde, “O, Tuwan, bang makajari niyaꞌ bissā kami si kaꞌu. Bakas kami pitu metuꞌuhin melli kinakan. 21Pag tahalaꞌ ne kami bu tekka si padeheng-dehenganley sangem, iluka weꞌ kami karut kamihin. Na, īꞌ laꞌi sīn bakas pamelli kamihin dem karut kami dangan-dangan. Hangkan tiyaꞌ ne tūranan kami balik. 22Duk moꞌo pe kami sīn pamelli kami kinakan balik. Gaꞌi kataꞌuhan kami bang sine mamapī sīn dem karut kamihin.” 23Nambung iye, paꞌinne, “Daꞌa kaꞌam suse. Daꞌa kaꞌam tinalew. Tuhan pagtuhananbin duk pagtuhanan samabin iye hatu mamapī sīn dem karutbin. Tasangkaku hep bayedbin.” Ubus pinaluwas weꞌ ne Simeon pī si siye.

24Manjari pinadiyalem siye weꞌ daraꞌakan pangandelan Yusupin, inurungan siye weꞌ ne boheꞌ pangosoꞌde bettisde duk pinakan weꞌ ne hayepden. 25Pag inakahan siye weꞌ mangan siye laꞌi duk si Yusup lettu ellew, binettad weꞌ de pinahāp-hāp meꞌ pangurungden.

26Pag tekka si Yusup si lumaꞌ boꞌode pangurungden padiyalem pī si iye, duk pasujud siye si iye. 27Ubus tilewne siye paꞌinne, “Saꞌingge ne kaꞌam? Saꞌingge ne samabin, aꞌa bahiꞌ bakas inakahanbi akuhin? Ellum pe iye?” 28Paꞌinde, “Aweꞌ, ellum pe sama kamihin duk biskey pe.” Ubus miyaꞌan pasujud siye si iye balik.

29Pag takite si Yusup saline langgungin Binyamin tilewne siye, “Inin ke salibi bakas inakabi si akuhin?” Ubus paꞌinne pu si Binyamin, “Karayaw inurungan kahāpan kew weꞌ Tuhanin, Totoꞌ.” 30Ubus miyaꞌan peggeꞌ takalessane weꞌ sōng nangis iye hawal lasane si salinen, magdayiꞌ-dayiꞌ si Yusup tahalaꞌ pī si bilikne ubus bu nangis iye laꞌi.

31Manjari ngulaꞌup dahuꞌ si Yusup ubus bu balik iye pī si siye. Sandalanne pagtangisnen duk paꞌinne si meꞌ daraꞌakannen, “Magtāgad ne kaꞌam.” 32Binettad weꞌ de tellu tumpuk pagkakanan, dembuwaꞌin pu si Yusup dendangan, dembuwaꞌin para si meꞌ pungtinaꞌinen duk dembuwaꞌin isab para si meꞌ aꞌa Misir saweꞌnen. Lemmiꞌ meꞌ aꞌa Misirin bang siye mangan magtampu duk meꞌ aꞌa Hibrani. Gaꞌi kuhi si siye. 33Pinatingkoloꞌ weꞌ si Yusup meꞌ pungtinaꞌinen pinagsunuꞌ-sunuꞌ dehellu sakahin ubus tamanan dambuli salihin. Hangkan hep ulaliꞌ manamal meꞌ pungtinaꞌinen. 34Niyaꞌ meꞌ laꞌuk amban pamanganan si Yusup binoꞌo pī si siye, saguwaꞌ pangurung Binyaminin minlime ekkahannen amban meꞌ pungtinaꞌine sinduwehin. Ubus mangan siye duk nginum duk maglami-lami siye kēmon.

Currently Selected:

Panagnaꞌan 43: yakV

Highlight

Copy