لُكِ 24

عِسَ شَ مَرَكٍلِ قَشّ مَ

مَتِيُ ٢٨‏؛١ ٬ ١٥، مَرَكِ ١٦‏؛١ ٬ ٨، يَيَ ٢٠‏؛١ ٬ ٢٠

1سَندٍ لْشْي سُبَشّ مَ، فِنّيٍ نَشَ كُرُن سِفَ رَ فَبُرِ يِرٍ، عٍ لَبُندّ تُرٍ شَنِن، عٍ نُ بَرَ نَشَن نَقَلَ. 2كْنْ عٍ نَشَ عَ لِ، فّمّ نَشَن نُ دْشْشِ فَبُرِ دّ مَ، عَ نُ بَرَ بَ نَا. 3عٍ تٌ سٌ فَبُرِ كُي، عٍ مُ مَرِفِ عِسَ قُرٍ تٌ. 4عٍ كْنتْقِلِشِ تٌ نُ تِشِ، شّمّ قِرِن نَشَ مِنِ عٍ مَ، عٍ شَ سٌسٍيٍ مَيِلٍنمَ. 5فِنّيٍ نَشَ فَاشُ، عٍ عٍ شُن سِن بْشِ. نَ شّمّ قِرِن نَشَ عَ قَلَ عٍ بّ، «مُنقٍ رَ وٌ مِشِ حِحّ قٍنمَ قَشَمِشِيٍ يَ مَ؟ 6عِسَ مُ نَ بٍ، عَ بَرَ كٍلِ قَشّ مَ. وٌ شَ وٌ رَتُ عَ نَشَن مَسٍنشِ وٌ بّ فَلِلٍ. 7عَ عَ مَسٍن نّ، عَ قٌ عَدَ مَ شَ دِ شَ سَ يُنُبِتْييٍ بّلّشّ، عَ بَنبَن وُرِ مَفَلَنبُشِ مَ، عَ مَن قَ كٍلِ قَشّ مَ عَ شِ سَشَن ندٍ مَ.» 8نَ كُي، عٍ نَشَ رَتُ عِسَ شَ وْيّنيِيٍ مَ.

9عٍ تٌ فبِلٍن كٍلِقٍ فَبُرِ يِرٍ، عٍ نَشَ نَ قٍ بِرِن مَسٍن عِسَ قْشِرَبِرّ قُ نُ كٍرٍنيِيٍ بّ، عَ نُن عَ قْشِرَبِرّ بٌورٍ بِرِن بّ. 10مَرِيَمَ مَفِدَلَكَ، يٌهَننَ، يَكِ نفَ مَرِيَمَ، عَ نُن فِنّ فبّتّيٍ نَشٍيٍ نُ نَ عٍ قْشْ رَ، عٍ تَن نَن نَ قٍ بِرِن قَلَ عِسَ شَ شّيرَيٍ بّ. 11كْنْ نٍيٍ مُ لَ عٍ رَ، بَرِ مَ نَ مَسٍنيِ نَشَ لُ عٍ بّ عَلْ دَشُ وْيّنيِ. 12كْنْ ثِيّرِ تَن نَشَ كٍلِ، عَ عَ فِ هَن فَبُرِ يِرٍ. عَ نَشَ عَ قٍلٍن نَ كُي مَتٌقٍ رَ، كْنْ عَ مُ سٍسٍ تٌ قٌ كَسَنفٍ، عَ سَشِ عَ كُي عِفٍلِ. عَ نَشَ فبِلٍن عَ شْنيِ، عَ كَابَشِ نَ قٍ مَ نَشَن بَرَ رَبَ.

عِسَ نُن عَ قْشِرَبِرّ قِرِنيِ ندٍيٍ

مَرَكِ ١٦‏؛١٢ ٬ ١٤

13نَ لْشْي كٍرٍنيِ، عِسَ قْشِرَبِرّ مِشِ قِرِن ندٍيٍ نُ نَ كِرَ رَ سِفَقٍ عٍمَيُسِ، تَا لَنمَ نَشَن مَكُيَ دَرِ سَلَمُ رَ كِلٌمّتِرِ قُ نُن كٍرٍن حْندْن. 14عٍ نُ نَ وْيّنقٍ عٍ بٌرٍ بّ يِ قٍ بِرِن مَ نَشٍيٍ نُ بَرَ رَبَ. 15عٍ نُ وْيّنقٍ تّمُي نَشّ، عِسَ نَشَ عَ مَسٌ عٍ رَ، عٍ بِرِن نَشَ سِفَ كِرَ كٍرٍن شْن، 16كْنْ عٍ مُ عَ كٌلٌن عَ عِسَ نَن عَ رَ.

17عِسَ نَشَ عٍ مَشْرِن، «وٌ نُ نَ مُنسٍ قَلَقٍ كِرَ شْن؟» نَ مَشْرِنيِ مَ، عٍ نَشَ تِ كِرَ رَ، عٍ سُننُنشِ. 18كٍلٌثَ نَشَ عَ يَابِ، «عِ كٍرٍن نَن مُ عَ كٌلٌنشِ قٍ نَشَن دَنفِشِ يِ وَشَتِ دَرِ سَلَمُ؟» 19عِسَ نَشَ عَ مَشْرِن، «مُنسٍ نِيَشِ؟» عٍ نَشَ دّنتّفّ سَ عَ بّ قٍ نَشَن عِسَ نَسَرّتِكَ لِشِ. عٍ نَشَ عَ قَلَ عَ بّ، «نَمِحْنمّ شُنفبٍ نَن نُ عَ رَ عَ كّوَلِ كِ مَ نُن عَ شَ مَسٍنيِ كِ مَ عَلَ نُن حَمَ بّ. 20سّرّشّدُبّ كُنتِفِيٍ نُن مُشُ شَ مَنفّيٍ بَرَ عَ سَ مِشِيٍ بّلّشّ، عٍ شَ عَ مَكِيتِ قَشّ كِيتِ رَ، عٍ عَ بَنبَن وُرِ مَفَلَنبُشِ مَ. 21كْنْ مُشُ تَن نَن نُ لَشِ عَ رَ، عَ عَ تَن نَن نُ قَمَ عِسِرَيِلَ شْرّيَدٍ. سَ نَ بِرِن شُن مَ، عَ شَ قَشّ شِ سَشَن ندٍ نَن تٌ، 22كْنْ فِنّ ندٍيٍ نَ مُشُ يَ مَ، عٍ بَرَ مُشُ رَكَابَ عٍ شَ دّنتّفّ رَ. عٍ تٌ كُرُن سِفَ رَ فَبُرِ يِرٍ، 23عٍ مُ عَ قُرٍ لِ نَا. عٍ نَشَ قَ عَ قَلَ مُشُ بّ، عَ مَلٍكّ ندٍيٍ نَن مِنِ عٍ مَ، عٍ عَ قَلَ عٍ بّ عَ عِسَ حِحّ نَ عَ رَ. 24مِشِ فبّتّيٍ مُشُ يَ مَ، عٍ قَن نَشَ سِفَ فَبُرِ يِرٍ، عٍ عَ بِرِن لِ عَلْ فِنّيٍ عَ مَسٍنشِ كِ نَشّ، كْنْ عٍ مُ عَ تَن عِسَ تٌ.»

25نَ كُي، عِسَ نَشَ عَ مَسٍن عٍ بّ، «عٍٍ، وٌ شَشِلِ شْرْشْ! نَمِحْنمّيٍ نَشَن بِرِن مَسٍنشِ، وٌ بْحّ مُ لَمَ عَ رَ مَقُرٍن! 26وٌ مُ عَ كٌلٌن عَ قٌ عَلَ شَ مِشِ سُفَندِشِ شَ نَ تْورّ سْتْ، عَ قَ سٌ عَ شَ نْرّ كُي؟» 27عَ نَشَ قَ عَ قْلْ عَننَبِ مُنسَ مَ، دْشْ نَمِحْنمّ بِرِن نَ، عَ كِتَابُييٍ يِرٍ بِرِن قَسَرِ عٍ بّ، عَ تَن يّتّ شَ قٍ مَسٍنشِ دّننَشّ.

28عٍ تٌ مَكْرّ نَ تَا لَنمَ رَ عٍ نُ سِفَقٍ دّننَشّ، عِسَ نَشَ لُ عَلْ عَ نُ وَ مَ دَنفِقٍ نّ، 29كْنْ عٍ نَشَ عَ مَيَندِ، عٍ عَ قَلَ عَ بّ، «لُ مُشُ شْنيِ نّ. نُنمَرٍ نَ عَ رَ يِ كِ، كْي حَن بَرَ سٌ.» نَ كُي، عَ نَشَ سٌ عٍ شْنيِ عَ شَ لُ نَا. 30عٍ بِرِن تٌ دْشْ عٍ دّفٍدٍ، عِسَ نَشَ تَامِ تٌنفٌ، عَ تَنتُي رَ سِفَ عَلَ مَ، عَ عَ عِفِرَ، عَ عَ عِتَشُن عٍ مَ. 31عَ نَشَ مَكّنّن عٍ شَشِلِ بّ كٍرٍن نَ، عٍ عَ كٌلٌن عَ عِسَ نَ عَ رَ، كْنْ عَ مَن نَشَ لْي عٍ مَ يٍن! 32عٍ نَشَ عَ قَلَ عٍ بٌرٍ بّ، «عَ تٌ نُ كِتَابُي كُي قَسَرِ مَ وٌن بّ كِرَ شْن، عَ مُ نُ لُشِ شّ عَلْ عَ تّ نَن شُرُشِ وٌن بْحّ كُي؟»

33عٍ نَشَ كٍلِ كٍرٍن نَ، عٍ فبِلٍن دَرِ سَلَمُ. عٍ نَشَ سَ عِسَ قْشِرَبِرّ قُ نُن كٍرٍنيِيٍ لِ، عَ نُن نَشٍيٍ نُ نَ عٍ قْشْ رَ، عٍ بِرِن مَلَنشِ يِرٍ كٍرٍن. 34نٍيٍ نَشَ عَ قَلَ عٍ بّ، «مَرِفِ بَرَ كٍلِ قَشّ مَ يَتِ! عَ بَرَ مِنِ سِمْن مَ!» 35عٍ قَن نَشَ دّنتّفّ سَ نٍيٍ بّ قٍ بِرِن مَ نَشٍيٍ دَنفِشِ كِرَ شْن، عَ نُن عِسَ مَكّنّن عٍ بّ كِ نَشّ عَ تٌ تَامِ عِفِرَ.

عِسَ نُن عَ قْشِرَبِرّ قُ نُن كٍرٍنيِ

مَتِيُ ٢٨‏؛١٦ ٬ ٢٠، مَرَكِ ١٦‏؛١٤ ٬ ١٨، يَيَ ٢٠‏؛١٩ ٬ ٢٣، تَرُشُي ١‏؛٦ ٬ ٨

36عٍ تٌ نُ وْيّنقٍ نَ قٍ بِرِن مَ، عِسَ يّتّ نَشَ مِنِ عٍ مَ، عَ تِشِ عٍ تَفِ. عَ نَشَ عٍ شّيبُ، «عَلَ شَ وٌ بْحّ سَ.» 37عٍ بْحّ نَشَ مِنِ، عٍ فَاشُ، بَرِ مَ عٍ نُ عَ مَحْشُنشِ تُبَرِ نَن نَ. 38كْنْ عِسَ نَشَ عَ مَسٍن عٍ بّ، «مُنقٍ رَ وٌ كْنتْقِلِشِ، وٌ بْحّ مَن سِيكّشِ؟ 39وٌ ﭑ بّلّشّيٍ نُن ﭑ سَنيِيٍ مَتٌ، وٌ شَ عَ كٌلٌن ﭑ تَن نَن يَتِ عَ رَ. وٌ شَ ﭑ مَسُشُ، وٌ شَ ﭑ مَتٌ، بَرِ مَ سُبٍ نُن شْرِ مُ نَ تُبَرِ بّ، عَلْ وٌ نَشَن تٌمَ ﭑ مَ يِ كِ.» 40عَ تٌ نَ قَلَ عٍ بّ، عَ نَشَ عَ بّلّشّيٍ نُن عَ سَنيِيٍ مَسٍن عٍ بّ، 41كْنْ نَ قٍ سّيوّ نُن كَابّ نُ فبٌ عٍ بّ. عٍ تٌ مُ نُ فّشِ لَدٍ عَ رَ، عِسَ نَشَ عٍ مَشْرِن، «دٌنسٍ نَ وٌ يِ رَ بٍ؟» 42عٍ تٌ يّشّ فَنشِ ندٍ سٌ عَ يِ، 43عَ نَشَ عَ تٌنفٌ، عَ عَ دٌن عٍ يَ شْرِ.

عِسَ تٍقٍ كٌورٍ

مَتِيُ ٢٨‏؛١٦ ٬ ٢٠، مَرَكِ ١٦‏؛١٥ ٬ ٢٠

44نَ تّمُي، عَ نَشَ عَ مَسٍن عٍ بّ، «ﭑ نُ نَ وٌ تَفِ تّمُي نَشّ، ﭑ يِ قٍ بِرِن مَسٍن نّ وٌ بّ. ﭑ عَ مَسٍن نّ وٌ بّ، قَ قَلَ نَشَن بِرِن سّبّشِ ﭑ تَن مَ قٍ رَ عَننَبِ مُنسَ شَ سّرِيّ كُي، عَ نُن نَمِحْنمّيٍ شَ كِتَابُييٍ كُي، عَ نُن يَبُرَ دَوُدَ كُي، قٌ نَ بِرِن شَ كَمَلِ نّ.» 45نَ تّمُي، عَ نَشَ عٍ شَشِلِ رَبِ عَلَكٌ عٍ شَ كِتَابُييٍ قَهَامُ. 46عَ نَشَ عَ مَسٍن عٍ بّ، «عَ سّبّشِ نّ، عَ قٌ عَلَ شَ مِشِ سُفَندِشِ شَ تْورْ، قٌ عَ مَن شَ كٍلِ قَشّ مَ عَ شِ سَشَن ندٍ. 47عَ تَن شِلِ رَ، قٌ سِ بِرِن شَ كَوَندِ نّ تُوبِ قٍ نُن يُنُبِ شَقَرِقٍ رَ، قْلْقٍ دَرِ سَلَمُ مَ. 48وٌ تَن بَرَ قِندِ يِ قٍيٍ سٍيدٍيٍ رَ. 49ﭑ بَبَ نَشَن لَايِدِشِ، ﭑ نَ رَ سَنبَمَ نّ وٌ مَ. وٌ تَن شَ لُ بٍ تَا كُي، هَن سّنبّ شَ كٍلِ كٌورٍ فٌرٌقٍ وٌ مَ.»

50نَ شَنبِ، عِسَ نَشَ عٍ شَنِن هَن بٍتَنِ بِرِ رَ. عَ نَشَ عَ بّلّشّ عِتٍ، عَ دُبَ عٍ بّ. 51عَ نُ دُبَمَ عٍ بّ تّمُي نَشّ، عَ نَشَ كٍلِ عٍ شُن، عَ رَتٍ كٌورٍ. 52عٍ تٌ فّ عَ سُيِدِدٍ، عٍ نَشَ فبِلٍن دَرِ سَلَمُ سّيوّ شُنفبٍ كُي. 53عٍ نُ نَ هْرْ مْبَنشِ كُي تّمُي بِرِن عَلَ تَنتُدٍ.

Currently Selected:

لُكِ 24: Soso

Highlight

Copy