Mateu 28

Yezu Alamuka pa Kufa

(Mk. 16:1-8, Lk. 24:1-12, Jw. 20:1-9)

1Pa ntsiku ya Dimingu, m'bambakuca, Mariya Madhalena na Mariya unango aenda kaona ku nthumbi.

2Na mwansanga kwabveka citeke-teke cikulu, thangwi anju m'bodzi wa Mbuya achita kudzulu, mbabulumundisa mwala pa khundu ukhadafunga nsuwo wa nthumbi, mbaukhalira. 3Makhaliro ace anju akhali ninga kucetuma kwa njazi, nguwo zace zikhali zakucena ninga thonje. 4Anyankhondo akhaonera atoma kudzadzamira na kugopa, mbakhala ninga afa.

5Anju alonga na akazi kuti: “Lekani gopa, thangwi ine ndisadziwa kuti imwe muli kusaka Yezu adakhomerwa pa ntanda. 6Iye nkhabepo pano. Alamuka pa kufa ninga mukhadalongera Iye. Bwerani mudze kaone pakhadaikhwa Iye. 7Cincino ndokoni na mwansanga mukhapange anyakupfundza ace, kuti Iye alamuka pa kufa. Iye ali kutsogola kwenda ku Galileya. Ndi kweneko kunafuna imwe kamuona. Ndi penepi pikhafuna kukupangani ine.”

8Na tenepo, iwo abuluka na mwansanga pa nthumbi na kugopa, pontho na kukomerwa pikulu, aenda mbathamanga kalonga mphangwa kuna anyakupfundza ace. 9Pa n'dzidzi ubodzi-bodzi Yezu aenda kuna akazi mbaamwanyika. Penepo iwo anfendedzera mbam'phata myendo mbamulambira. 10Na tenepo, Yezu aapanga tenepa: “Lekani kugopa! Ndokoni kapange abale anga kuti aende ku Galileya. Kweneko anaonana na Ine.”

Uthambi wa Anyankhondo

11Pa n'dzidzi ukhaenda akazi, anyankhondo anango akhaonera nthumbi abwerera ku nzinda, kwenda kalonga kuna akulu aanyantsembe pire pyonsene pikhadacitika. 12Na tenepo, akulu aanyantsembe agumanyikana mbakhala pantsi na mathubu. Penepo iwo abverana kudyekera anyankhondo na ntengo ukulu wa kobiri, 13mbaapanga tenepa: “Longani kuti: ‘Anyakupfundza ace abwera na masiku mbaaba manungo, ife mbatikhagona.’ 14Mbwenye ntongi Piratu angadza kapibva pinthu penepi, ife tinam'matamiza, mbaticita kuti imwe mukhonde kuoneswa nyatwa na thangwi eneyi.” 15Anyankhondo atawira kucita pidapangwa iwo, mbatambira kobiri. Na tenepo, uthambi unowu wamwazika pakati pa madjuda, mpaka na lero.

Yezu Abulukira kuna Anyakupfundza ace

(Mk. 16:14, Lk. 24:36-49, Jw. 20:19-23)

16Anyakupfundza khumi na m'bodzi aenda ku Galileya, pa phiri ikhadaapanga Yezu. 17Pidamuona Iwo, amulambira, mbwenye anango akhapenula.

Yezu Atuma Anyakupfundza Ace

(Mk. 16:15-18)

18Na tenepo, Yezu aafendedzera mbaapanga kuti: “Ndapasiwa mphambvu zonsene za kutonga kudzulu na pantsi. 19Na tenepo, ndokoni mbamucita kuti madzindza onsene akhale anyakupfundza anga. Mbamuatambirisa batixmu onsene na dzina#28:19 Arm. 6:3, 1Ak. 1:13, 10:2, Agt. 3:27. ya Baba na ya Mwana na ya Nzimu Wakucena, 20mbamuapfundzisa kukoya pyonsene pidakupangani Ine. Dziwani kuti Ine ndinakhala na imwe kwenda na kwenda, mpaka kumala kwa pantsi.”

Currently Selected:

Mateu 28: sehNT

Highlight

Copy