Exodus 3

GODUNGKU MOSES KUNJAN, ISRAEL-WARRA EGYPTMUN WUNDINKA

Godungku Moses kunjan.

3.1-20

1-6Yala-yalaku Mosesangka nyungu ngalayinamu minya sheep, minya goat kujil-kujin. Nyulu jananin bububurr marraldarr wundin, manjalba kadan, burri Sinai. Yinya Godumu manjal. Yuba manjalba Mosesangka baya nyajin duduymbu, yamba yinya duduy kari wayjujin. Mosesangka nyuluku yalaman, “Ya, yinya duduy wanyurrinku kari wayjuji? Ngayu yubaku dungay, nyajinka.” Moses yubaku dunganka, yamba Godungku nyungundu yirrkan duduymun. Nyulu yalaman, “Moses, Moses.” Mosesangka yalaman, “Yuwu, ngayu kukuuu.” Godungku yalaman, “Kari yuba kaday. Yundu dambal walnga, ngayu God yaluy, yundu bubungu dayirr-dayirrba janjanayda. Ngayu yunuwunbu nganjan-karramu God. Ngayu Abrahamamu God, Isaacamu God, Jacobamu God.” Mosesangka yinya kuku nyajin, nyulu yinyilman, walu nandajin, God kari nyajinka.

7-10Godungku Mosesanda yalaman, “Ngayu ngayku bama nyajin bubungu Egyptanda. Ngayu Egypt-warra nyajin jananin buyun-damanya. Ngayu binal jana warrngkan-warrngkay, binal jana yirrkan-yirrkay, bubumun Egyptmun wandinka. Yinyaynka ngayu bubungu kadan, jananin wandi-maninka, bubungu ngulkurrbu wundinka. Ngayu yunun yungal kinganda Egyptmunbu, yundu ngayku bama bubumun Egyptmun wandi-maninka.”

11-20Yamba Mosesangka Godundu yalaman, “Ngayu jarra yala. Ngayu murruji kinganda dungay, Israel-warra bubumun Egyptmun wundinka.” Godungku yalaman Mosesanda, “Ngayuda yununji dungay. Yundu jananin Egyptmun wandi-manil, yurra nganya buyay-manil yalaymba manjalba. Yinyamundu yundu binalmal ngayuku yunun yungan.” Yamba Mosesangka yalaman, “Ngayu jananda Israel-warranda dungay, balkal, ‘Nganjan-karrandamundu Godungku nganya yungan.’ Jana nguba balkal, ‘Yinya God burri wanju?’ Ngayu wanyu balkalda jananda?” Godungku yalaman, “Ngayu God wuljaljiku juranku bundan, wuljaljiku juranku bunday. Yundu jananda balka ngayu yinya God wuljaljiku. Jananda balka ngayuku Maja God Abrahamamu, Isaacamu, Jacobamu, janawundu majangka Godungku yunun yungan. Bamangka nganya yalaku bamba, Maja God wuljaljiku. Dungayda, Israel-warramu maja-maja muru-bunga, jananda balka Abrahamamu, Isaacamu, Jacobamu God yunundu nguwimal milbijin. Jananda balka ngayu jananin nyajin warrngkan-warrngkanya bubungu Egyptanda. Balka ngayu jananin bubumun Egyptmun wandi-maninka, bubungu ngulkurrbu wundinka. Yundu jananji maja-majanji kinganda dungay, nyungundu babajika yurranin yunganka bubungu jirrbu-jirrbungu, nganya buyay-maninka. Nyulu kingangka wawu kari yurranin yunganka, yamba ngayu nyungun junkurr-murubuku mambarril yurranin yunganka. Ngayu jananin Egypt-warra yinyil-bungal, jana yurranin yunganka.”

Currently Selected:

Exodus 3: gvnNTOTPO

Highlight

Copy