Matiyo 11

Yang Osip ni Yahiya na Magsosogboway

(Luk. 7:18-35)

1Pagkatapos ni Isa magindo sang sampoo aw dowa na mga inindowan nan, pyomanaw yan ansan aw kyomadto yan sang makilibot na mga longsod antak magindo aw magosiyat.

2Adon, si Yahiya na Magsosogboway na adto sa suud ng pirisowan, yamadungug nan daw ono yang ininang ng Almasi. Agaw, syosogo nan yang mga inindowan nan adto kang Isa antak magosip kanan. 3Pagdatung nilan kang Isa, laong nilan, “Paglaonga kami daw ikaw agaw yang pyapasad ng Tohan na madatung atawa aon pay tuna na atagadan nami?”

4Tyomobag si Isa, “Barik da kamo adto kang Yahiya aw paglaonga yan daw ono yang dyudungug aw kikita mayo. 5Paglaonga mayo yan na yang mga bota yakakita da, yang mga sadi yakapanaw da, aw yang mga sanglaun yamadyaw da. Yang mga bungul yakadungug da, yang mga patay yamabowi da oman aw yang Madyaw na Gogodanun yamapayapat da adto sang mga miskinan.#11:5 Tanawa sang Kitab Tawrat, Nabi Isayas 35:5-6; 61:11. 6Kadyaw ng ginawa sidtong otaw na wa magadowa-dowa kanak.”

7Pagpanaw ng mga inindowan ni Yahiya, yagalaong si Isa adto sang kamangaotawan makapantag kang Yahiya, laong nan, “Pagkadto mayo sang kamingawan, ono yang kallini mayo kitaun? Sambok na otaw na yagaisab-isab yang dumduman na maynang tambiling na pyagaparid-parid ng samut? 8Na, ono kadi yang kyakadtowan mayo? Sambok na otaw na madyaway yang dagom? Dili kowaw, kay yang mga otaw na mayninyan yang dagom adto magauya sang palasyo ng soltan. 9Anda, ono sagaw yang kyakadtowan mayo? Sambok na nabi? Bunna sagaw na nabi si Yahiya, awgaid labaw pa yan sang kadaigan pa na mga nabi. 10Kay si Yahiya yang pyagalaong sang Kitab nang yagalaong yang Tohan,

“ ‘Apadaa ko yang sogowanun ko

antak maona yan kanmo sang pagpangandam ng agianan mo.’#11:10 Yani yang yamakasorat sang Kitab Tawrat, Nabi Malaki 3:1.

11Sang bunna-bunna pagalaong ko kamayo na sang kariko ng mga yamangkaotaw adi sang babawan ng donya way makalabaw kang Yahiya na Magsosogboway. Awgaid adon, maskin yang pinakababa na otaw na magapasakop sang pagdato ng Tohan, labaw pa kanan. 12Sikun sang pagosiyat ni Yahiya na Magsosogboway sampay adon makusug yang pagpayapat makapantag sang pagdato ng Tohan aw aon mga otaw na yamaningkamot pagpasakop sinyan. 13Kay yang kariko ng mga nabi aw yang Hokoman ni Nabi Mosa, pyagatagna nilan yang pagdatung ng pagdato ng Tohan aw yagasogod da yang pagtoman sang pyagatagna nilan sang pagdatung ni Yahiya. 14Kong mangintoo kamo sang pyaglaongan ng nabi na mabarik kono si Nabi Iliyas, akatigaman da mayo na si Yahiya kadi si Nabi Iliyas.#11:14 Tanawa sang Kitab Tawrat, Nabi Malaki 4:5. 15Kamo na yamaningug, paningugi mayo ng madyaw yang pyagalaong ko kamayo.

16“Adon, ono yang akaparias ko sang mga otaw adon na panahon? Magonawa silan sang mga isu na yanagingkod adto sang plaza aw yanaglaro. Yagalaong da yang kadaigan adto sang mga kalaro nilan,

17“ ‘Pyagatogtogan kamo nami ng kolintang,

awgaid wa kamo magasayaw.

Pyagakantaan kamo nami ng kanta ng paglubung,

awgaid wa kamo magatiyao.’

18Na, yang mga otaw adon magonawa da kanilan. Kay pagdatung ni Yahiya, yabay yan magpowasa aw wa yan magainum ng bino. Agaw yagalaong silan na ‘Kyakasaytanan kowaw yani na otaw!’ 19Aw pagdatung ko na Anak ng Manosiya, yakan aw iminum ako. Agaw yagalaong silan, ‘Tanawa mayo, tokgawan aw paralasing yani na otaw! Inagad yan ng mga mangobraay ng bowis aw yang kadaigan pa na mga baradosa.’ Awgaid maskin maynan,” laong ni Isa, “yang bonga ng gawbuk nami ni Yahiya, idto yang tanda na syosogo kami ng Tohan.”

Makapantag sang mga Otaw na wa Magatawbat

(Luk. 10:13-15)

20Ansinyan syasaway ni Isa yang mga otaw sidtong mga banwa daw wain yan magainang ng madaig na mga katingaan kay wa silan magatawbat sang mga dosa nilan. 21Yagalaong yan, “Labi na maat yang adatungan mayo na taga Korasin! Labi na maat oman yang adatungan mayo na taga Bitsayda! Kay kong yamainang pa sang Tiros aw Sidon yang mga katingaan na ininang ko ansan kamayo, dogay da silan yanagsoot ng sako aw yanagingkod sang abo silbi tanda ng pagtawbat nilan. 22Agaw, pagalaong ko kamayo na sang allaw ng paghokom, labaw pa yang siksa kamayo kaysang mga taga Tiros aw Sidon. 23Na, kamo oman na taga Kapirnaom. Yagadumdum ba kamo na apataasun kamo adto sang sorga? Dili! Kay ioog kamo ng Tohan adto sang narka. Kay kong yamainang pa sang Sodom yang mga katingaan na ininang ko ansan kamayo, sang way dowa-dowa iyan pa adon idtong longsod. 24Na, pagalaong ko kamayo na sang allaw ng paghokom, labaw pa yang siksa kamayo kaysang mga taga Sodom.”

Yagadowaa si Isa

(Luk. 10:21-22)

25Pagkatapos sinyan yagadowaa si Isa aw laong nan, “O kay Ama, ikaw da yang yagadato adto sang sorga aw adi sang donya. Yamanginsokor ako kanmo kay yang pyagatago mo sang mga aon katigam aw mataas yang pagpangadi pyapakatigam mo adto sang mga way katigam. 26Ininang mo yani, kay Ama, kay idto yang karim mo.”

27Ansinyan yagalaong si Isa sang mga otaw, “Yang kariko ng mga butang yatag kanak ng kanak Ama. Way ikilaa kanak yatabiya yang kanak Ama. Aw way oman ikilaa sang kanak Ama yatabiya ako na Anak nan kipat sidtong mga otaw na pipili ko na makakilaa kanan.

28“Pagdood kamo kanak, yang kariko mayo na kyakapoyan aw kyakabugatan kay antak makapagpatana kamo. 29Tarimaa mayo yang mga sogowan ko aw pangagadi mayo yang indowan ko. Ansinyan akaonan kamo ng kalinaw sa suud ng pangatayan mayo kay ako maloyanun aw masabar. 30Kay yang indowan ko masayun pangagadan aw dili ng mairap yang apainang ko kamayo.”

Currently Selected:

Matiyo 11: kqe-e

Highlight

Copy