Lukas 3

Yang Pagosiyat ni Yahiya na Magsosogboway

(Mat. 3:1-12; Mark. 1:1-8; Yah. 1:19-28)

1Ansinyan sang ika-15 na ka toig ng pagkasoltan ni Tibiriyo na yan yang soltan sang bangsa Roma, si Pontiyos Pilato yang gobirnador sang probinsya ng Yahodiya aw si Hirod yang pangoo sang probinsya ng Jalil. Yang lomon ni Hirod na si Pilip yang pangoo sang mga probinsya ng Itoriya aw Tarakonitis, aw si Lisaniyas yang pangoo sa Abilin. 2Yang mga Dakowa na Imam si Anas aw si Kayapas. Na, sidto na wakto pyapasampay ng Tohan yang kanan pyaglaongan adto kang Yahiya na anak ni Sakariyas nang idto yan magauya sang kamingawan. 3Agaw pyomanaw da si Yahiya aw kadtowi nan yang kariko ng mga banwa na masaid sang tobig ng Yordan aw yagaosiyat yan sang mga otaw. Laong nan, “Pagtawbat kamo sang mga dosa mayo aw pagpasogbo kamo silbi tanda ng pagtawbat mayo antak amponon ng Tohan yang mga dosa mayo.” 4Yani na ininang ni Yahiya yang pagtoman sang syosorat ni Nabi Isayas sang Kitab na laong nan,

“Aon sangka otaw na manawag-tawag adto sang kamingawan aw laong nan,

‘Andama mayo yang daan para sang Dato na Labi na Mabarakat

aw patorida mayo yang agianan nan.

5Yang kariko ng mga aog abonowan,

yang kabtayan pantayun.

Yang mga daan na liko-liko toridun

aw yang mga daan na batoon dadayawon.#3:5 Yang karim ipasabot sinyan na pagdadayaw ng daan na dait andamun ng mga otaw yang ginawa nilan para sang pagdatung ng Almasi.

6Aw ansinyan makita ng kariko ng manosiya daw ono yang inangun ng Tohan sang paglowas kanilan.’ ”#3:4-6 Yani yang yamakasorat sang Kitab, Nabi Isayas 40:3-5.

7Na, madaig yang mga otaw na kyomadto kang Yahiya antak magpasogbo. Yagalaong si Yahiya kanilan, “Kamo na mga limbongon! Sino kadi yang yagalaong kamayo na kong magapasogbo kamo, makalikay kamo sang siksa ng Tohan na mallug da domatung? 8Na, kong di mayo karim na isiksaun kamo, pakitaan da gaid mayo pinaagi sang madyaw na batasan na bunna na tyatarikodan da mayo yang mga dosa mayo. Aw ayaw kamo magdumdum na di kamo isiksaun kay mga topo kamo ni Nabi Ibrahim. Kay pagalaong ko kamayo na maskin yaning mga bato amabaoy ng Tohan na mga topo ni Nabi Ibrahim. 9Timani mayo na main kamo ng kaoy na mallug da pilaun. Kay yang kariko ng kaoy na way madyaw na bonga ipilaun aw timbagan adto sang atoon.”

10Ansinyan yagaosip kanan yang mga otaw, laong nilan, “Na, kong maynan, ono da yang inangun nami?”

11Tyomobag si Yahiya aw laong nan, “Sino-sino kamayo yang aon dowambok na dagom, dait na atag nan yang sambok adto sang way dagom. Aw kong aon pagkan mayo, atagi mayo yang way pagkan.”

12Aon oman mga mangobraay ng bowis na kyomadto kang Yahiya antak magpasogbo. Yagaosip silan kanan, “Na kami, kay Goro, ono yang dait nami inangun?”

13Tyomobag si Yahiya aw laong nan kanilan, “Ayaw kamo magpangobra ng sobra sang pyagasogo kamayo ng gobirno.”

14Na, aon oman mga sondao na yagaosip kanan, laong nilan, “Na, monono da kami, ono yang dait nami inangun?”

Tyomobag si Yahiya kanilan, “Ayaw kamo magpamugus sang mga otaw atawa magbutang-butang kanilan antak kamo atagan ng sapi. Aw dait na panginsokoran mayo yang soweldo mayo.”

15Adon, pagdungug ng mga otaw sang pagosiyat ni Yahiya, yagadumdum silan na basin si Yahiya yang pyapasad na Almasi na tyatagadan ng bangsa Israil. 16Awgaid yagalaong si Yahiya kanilan, laong nan, “Tobig yang pyagasogbo ko kamayo, awgaid aon mosonod kanak domatung na labaw pa kanak. Maskin yang pagobad ng liston ng sandalyas nan di dait kanak. Yang pagasogbo nan sang kadaigan kamayo yang Nyawa ng Tohan aw yang kadaigan oman isiksaun nan sang atoon adto sang narka. 17Yan da yang magahokom sang manosiya aw lainun nan yang mangkadyaw sikun sang mangkaat. Kay main yan ng otaw na magtaap ng omay. Pagkatapos magtaap, tagoon nan yang omay adto sang kamarig. Awgaid yang tipig osonogon nan sang atoon na di amatay.”

18Na, madaig pa yang pyagaindo ni Yahiya sang mga otaw sang pagosiyat nan kanilan ng Madyaw na Gogodanun aw pyagalaong nan silan na isabun nilan yang batasan nilan. 19Aw maskin pa si Hirod na pangoo sang Jalil syasagda ni Yahiya kay pyapangasawa nan si Hirodiya na asawa ng lomon nan na si Pilip aw madaig pa yang ininang nan na maat. 20Aw sang orian dyodogangan pa ni Hirod yang kaatan nan kay pyapapiriso nan si Yahiya.

Yang Pagsogbo kang Isa

(Mat. 3:13-17; Mark. 1:9-11)

21Na, sang wakto na wa pa ipirisowa si Yahiya, madaig yang mga otaw na yagapasogbo kanan. Maskin oman si Isa yagapasogbo kanan. Pagkatapos kasogbowan si Isa, yagadowaa yan. Aw sidto na wakto yagaboka yang langit 22aw yang Nyawa ng Tohan yukunsad adto kanan sang porma ng salampati. Aon oman sowara sikun sang langit na yagalaong, “Ikaw yang pyapasaya ko na Anak. Dakowa yang kasowat ko kanmo.”

Yang mga Kaompowan ni Isa

(Mat. 1:1-17)

23Adon si Isa, yagasogod yan magindo sang mga otaw sang yagaidad yan ng mga 30 ka toig. Sang dumduman ng mga otaw anak yan ni Yosop.

Si Isa makiompo ni Hili.#3:23 Si Hili aw yang kadaigan pa na mga otaw na yamakalista ansini yang mga kaompowan ni Isa sikun sang ina nan na si Mariyam. Yang mga kaompowan ni Yosop yamakalista sang Kitab Injil, Matiyo 1:1-17.

24Si Hili anak ni Matat.

Si Matat anak ni Libi.

Si Libi anak ni Malki.

Si Malki anak ni Yanai.

Si Yanai anak ni Yosop.

25Si Yosop anak ni Matatiyas.

Si Matatiyas anak ni Amos.

Si Amos anak ni Nahom.

Si Nahom anak ni Isli.

Si Isli anak ni Nagay.

26Si Nagay anak ni Maat.

Si Maat anak ni Matatiyas.

Si Matatiyas anak ni Simain.

Si Simain anak ni Yosik.

Si Yosik anak ni Yoda.

27Si Yoda anak ni Yowanan.

Si Yowanan anak ni Risa.

Si Risa anak ni Sirobabil.

Si Sirobabil anak ni Salatiyal.

Si Salatiyal anak ni Niri.

28Si Niri anak ni Malki.

Si Malki anak ni Addi.

Si Addi anak ni Kosam.

Si Kosam anak ni Ilmadam.

Si Ilmadam anak ni Ir.

29Si Ir anak ni Yossa.

Si Yossa anak ni Ilisir.

Si Ilisir anak ni Yorim.

Si Yorim anak ni Matat.

Si Matat anak ni Libi.

30Si Libi anak ni Simiyon.

Si Simiyon anak ni Yodah.

Si Yodah anak ni Yosop.

Si Yosop anak ni Yonam.

Si Yonam anak ni Iliyakim.

31Si Iliyakim anak ni Miliya.

Si Miliya anak ni Mainan.

Si Mainan anak ni Matata.

Si Matata anak ni Natan.

Si Natan anak ni Daud.

32Si Daud anak ni Isai.

Si Isai anak ni Obid.

Si Obid anak ni Booz.

Si Booz anak ni Salmon.

Si Salmon anak ni Nason.

33Si Nason anak ni Aminadab.

Si Aminadab anak ni Admin.

Si Admin anak ni Arni.

Si Arni anak ni Isrom.

Si Isrom anak ni Paris.

Si Paris anak ni Yodah.

34Si Yodah anak ni Yakob.

Si Yakob anak ni Isahak.

Si Isahak anak ni Ibrahim.

Si Ibrahim anak ni Tirah.

Si Tirah anak ni Nahor.

35Si Nahor anak ni Sirog.

Si Sirog anak ni Ragaw.

Si Ragaw anak ni Pilig.

Si Pilig anak ni Ibir.

Si Ibir anak ni Silah.

36Si Silah anak ni Kainan.

Si Kainan anak ni Arpaksad.

Si Arpaksad anak ni Sim.

Si Sim anak ni Noh.

Si Noh anak ni Lamik.

37Si Lamik anak ni Mitosala.

Si Mitosala anak ni Idris.

Si Idris anak ni Yarid.

Si Yarid anak ni Mahalalil.

Si Mahalalil anak ni Kinan.

38Si Kinan anak ni Inos.

Si Inos anak ni Sit.

Si Sit anak ni Adam.

Si Adam anak ng Tohan.#3:38 Si Nabi Adam tyatawag ng anak ng Tohan kay byabaoy yan ng Tohan sikun sang abog. Agaw way taganak nan adi sang donya. Tanawa sang Kitab Tawrat, Tagna Donya 1:26 aw 2:7.

Currently Selected:

Lukas 3: kqe-e

Highlight

Copy