San Mateo 20
20
Jesús‑ni rigixxi'abie ge ka benne uren sina lhe'e ya uvaha
1’Tata Do Yebáha, tti rinnabie ka benne, elha rinnabia geeha raxxína na len nu ben ttu nubiyú yadinna ka ya uva lo yu geniha. Nubiyúha dila tteba udána diana ugila ka nu kwenkana lo yu geni ata yadinna ka ya uvaha. 2Unne lenna ka nu kwen sinaha kixana kana ttu denario nu anka lhiaxa ge ttu sá. Nianna tti udhelhana kana lhe'e ya uvaha. 3Atti chi ugwena retin jaa (9) dilaha nna bederiana attu libe nna bedelenna attu chupa ka nubiyú se'e nattibakana ata raka i'iyaha. 4Nianna tti rana ka nuha: “Anágaba lebi'i gwaltsiagaba kini kwenle sina lhe'e ya uva kiaha. Neti gwagixabaa le attiba ankaba geni.” Aníoka nna dia tteba ka nuha. 5Aníha‑gaba bedeonna tti chi begwena retin tsi'inuha (12) lhe tti begwena retin tsunnaha lhe. 6Atti chi ugwena retin gayuha nna bederiana attu libe nna bedelenna adíru ka nubiyú se'e nattibakana niha. Nianna tti redeana ka nuha: “¿Beaka kwentaba se'ele betú sába nii?” 7Ka nuha nna bekabikana geni, rákana: “Kumu lanú chi bedaxxuna ri'itu ki kwentu sina.” Nubiyúha nna rana kana: “Anágaba lebi'i gwaltsiagaba lhe'e ka ya uva kiaha ki kwenle sina, neti nna gwagixabaa le attiba ankaba geni.” 8Atti chi ulha sáha nna ra xxana yuha nu baninna ka nu riben sinaha: “Beyaxi ka nu yu'u sina‑na nna begwekana lhiaxakani. Dhulolu len ka nu bisia bitoha nna ulhuxalu len ka nu bisia dila tteha.” 9Tti ubiga ka nu uta'a sina retin gayuha nna kua ttu ttubakana uxíkana ida'aba nu ankaba lhiaxa ge betú sá. 10Laxkala atti ubiga ka nu uta'a sina dila tteha nna ukakinna deki gaxarukana xxeni, ttaka kua ttu ttukana uxígabakana nu ankaba lhiaxa ge ttu sá. 11Tti chi uxíkana belhuha, nianna udulokana rinne lhákana ge xxana yuha, rákana: 12“Ki ka nu se'e nii, deloliba bisia ka nuní, suna ttu uraruba urenkana. Delo nna ttúba utixalu ka nuní len ri'itu. Ri'itu betú sába bechíatu lo sina‑ni lhe uyu'utu lhe'e ubisa lhe.” 13Ttaka xxana yuha nna bekabina ge ttu ka nuha, rana na: “Biyúruga xa betsi to, neti labí runia nu abittu anka tse lenlu. ¿Laaba chiba beya'anri'i deki gwagixabaa lu nu ankaba lhiaxa ge ttu sá? 14Ne belhiu gelu tee nii nna beyya. Neti rakaba lasia kixaa ka nu bisia bito‑ni ttiba utixaa lu. 15Kumu neti gwakaba kia unia len belhiu kia‑ni attiba rakaba lasia. Lu nna, ¿si ritisibinlu neti de ankaa benne redá lasia rutea?”
16Nianna tti ra Jesús‑ni:
―Laxkala ka nu daa lo xubanaha, ka nuha‑la akakana ka nu nnerukana nna ka nu daneruha nna akakana ka nu sanalha lo xubana. Kumu ixeba ka benne raxi Tata Do Yebáha, ttaka nna ttu chuparubake rukwebie kini akake gebie.
Jesús‑ni beyonna libela rigixxi'abie deki teeki uttikane
(Mr. 10:32-34; Lc. 18:31-34)
17Laka yu'u Jesús‑ni neda die lhe'esi Jerusalén‑ni, nianna uxie ka benne tsi'inu (12) rudhetinieha. Sun labake uxie attu ta subi, nianna rabie ke:
18―Gwaluyúruga, chiba diari'i isinri'i Jerusalén‑ni nna neti benne daya yebáha chiba dabigana utekana neti lasi ná ka nu loni ge ka bixxudiha lhe lasi ná ka nu rule'ekinna ka benne nu ra lo bia bennabi bodha'an Moisés‑ni lhe. Ka nuha ukinnibakana neti ki gattia. 19Nianna tti utekana neti lasi ná ka nu dittu, ka nu abittu ankakana nu Israel. Ka nuha nna uxisilakana kia lhe ukulhakana neti lhe, nianna tti utákana neti lo ya kurusi. Ttaka ganna chi beyonna ubisaha nna eyaka benbaa.
Ttu benne nuila unnabe len Jesús‑ni kini ugwelhe kwia ka xi'inieha gaxxa kwe'ebie yebáha
(Mr. 10:35-45)
20Nan ge Santiago‑ni lhe Juan‑ni lhe ubige chebie ixpabakana arlo Jesús‑ni, nna bedú xibie, unnabe len benneha, ree:
―Neti innabaa lu ttu bixa xa tata.
21Jesús‑ni nna ree benneha:
―¿Bí raka lelu innabalu len neti?
Benne nuilaha nna bekabie ree:
―Ugwelhalu kwia ixpa ka xi'inia‑ni kwe'elu ganna chi innabialuha, ttúkana dhokana daka ná benlu, attúkana nna dhokana daka ná yattilu.
22Jesús‑ni nna ree kana:
―Lebi'i labí yule nu rinnabale. ¿Si gwadaale uyúle luesi elha disa uyúa‑ni lhe si gwadaale satele nu satea‑ni lhe?
Lakana nna bekabikana, rákane:
―Ila. Gwadaa galátu.
23Lee nna ree kana:
―Gwalí galá, gwadaabale uyúle luesi elha disa uyúa‑ni lhe gwadaabale satele luesi nu satea‑ni, ttaka nu rale deki ugwelhaa le kwiale ttúle daka ná bania nna attule nna daka ná yattia, nuná labí neti ralhaa innía ganna gwaka. Kumu Tata kialiba chi ga'ananie ka benne kwiake niha.
24Tti biyienin a tsii ka benne rudhetini Jesús‑ni nu rinnaba ka benneha, nianna bisa'a ttebakanie len ixpa betsiba ka benneha. 25Jesús‑ni nna uxie iyába ka benneha nna ree ke:
―Lebi'i gwa yúbale, yiesi lo yu‑ni ka nu rinnabia‑na rinnabiabakana ka benne gekani attiba rakaba lekani. Anágaba ka nu ra xxeni lekinna, nu rábakana raka. 26Ttaka lebi'i labí aná dika udhaka luesile. Lebi'i nu uinlale, ganna nuxa ttúle raka lele akale nu ra xxeni leni delo iyále, benne ra xxeni leeha, akalee benne ixúni adíle 27nna benne raka lebie ake nu loni ge iyále, lalee nuha ake attiba ttu nu to'o lo sina, ixúbie kini ute nábie len adíle 28ttiba neti benne daya yebáha, laa dagaa yiesi lo yu‑ni kini ixúti le uinle nu innía, sinuki dalaa ki ixúa ute náya len nuxaba benne lhe anágaba daya kini gattia kixaa ge ka tulha daa ka benne, ki odiláya ixeke.
Jesús‑ni bedhalie iyya lo chupa ka benne ankake lo xua
(Mr. 10:46-52; Lc. 18:35-43)
29Atti beria Jesús‑ni lenie ka benne rudhetinieha lhe'esi Jericó‑ni, ixe juisiru ka benne danalhake bie. 30Chupa ka benne lo xua se'eke ro'o nedaha. Tti biyienkanie daa Jesús‑ni ritebie ata se'ekeha, nianna uresi'a ttebake, ráke:
―¡Benne datia David, gwatuachi lelu ri'itu xa Tata Xisi to!
31Ka benne danalhaha nna rudhaka disalake ka benneha kini eyaka siike, ttaka ka benneha nna adíla idisa ribesi'ake, ráke:
―¡Benne datia David, gwatuachi lelu ri'itu xa Tata Xisi to!
32Nianna tti gwalheda Jesús‑ni nna uxie ka benneha nna ree ke:
―¿Bí raka lele udhakaa le?
33Ka benneha nna ráke:
―Raka letu edhalilu ka iyya lotu‑ni xa tata.
34Nianna gwatua tteba le Jesús‑ni ke nna utane ka iyya lokeha. Looraha tteba nna belákanie. Nianna dia ttebake danalhake bie.
Currently Selected:
San Mateo 20: zae
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
