San Mateo 17

Jesús‑ni tti due iki i'iyaha besea lobie

(Mr. 9:2-13; Lc. 9:28-36)

1Iki de chi ute xxupa ubisaha nna uche Jesús‑ni Pedruha lhe Jacobuha lhe Juan betsi Jacobuha lhe, uchebie kana sun labakana iki ttu i'iya xeni do niha. 2Niha besea lobie arlokani. Rapi edha linníba loe ttiba lo tatubisa‑na, ka xoeha nna sitsi túba beyakana ttiba xiani. 3Nianna tti bela'akinna uka xxe Moisés‑ni lhe Elías‑ni lhe, rinne len ka benneha Jesús‑ni. 4Pedro‑ni nna rana Jesús‑ni:

―Gwen tte uka se'etu nii xa tata xisi to. Ganna raka lelu, gusiabatu tsunna ka yo'o lhaga: ttu gelu nna ttu ge Moisés‑ni nna attu ge Elías‑ni nna.

5Sa dúlana rinnena ttiru chi bisia ttu bea yien charába ankana urena ata se'ekeha nna lhe'e beaha nna biyien tsi'i ttu benne, rabie:

―Benne‑ni anke Xi'inia lhe rakati gebie lhe. Benne‑ni runie nu ru'u lasia. Ge benne‑ni gwaludo nagale.

6Ka benne rudhetini Jesús‑ni nna tti biyienkanie unne benneha, nianna bedú xibike nna bettudhi loke lo yu de usi xxattakanie. 7Jesús‑ni nna ubige nna gwadaxxue kwe'eke nna rabie ke:

―Gwaleyadha. Abittu gasinle.

8Tti belhidha lokeha nna nurua nuxa bilákanie, a sunruba Jesús‑ni du niha.

9Laka deyyake reyadike lati i'iyaha nna ra Jesús‑ni ke:

―Bittu kixxi'enle ka benne ge nu bilenle‑ni. Axtaliba ganna neti benne daya yebáha chi beyaka bania lagwi ge ka benne chi uttiha, la'anialiba nna kixxi'ale ge nu bilenle‑ni.

10Ka benne rudhetinieha nna unnaba tisake bie, ráke:

―¿Beakala ka nu rule'ekinna ka benne nu ra lo bia bennabi bodha'an Moisés‑ni nna rálakana deki Elías‑ni teeki esie lade'a tte, niala nna tti isia Cristuha?

11Jesús‑ni nna bekabie, ree:

―Gwalí galá deki Elías‑ni esiabie lade'a tte. Benneha ose'e tsebie iyá nu se'e. 12Ttaka neti ria le, Elías‑ni chiba bita benneha nna ka benne labí belabike bie, nna bedhakabake bie attiba rakaba leke. Aníha‑gaba neti benne daya yebáha, aníha‑gaba satea lasi nákani.

13La'anialiba nna tti ute dani ka benne rudhetinieha deki ge Juan benne begadi indaha‑ba nuha unnebie tti ree aníha.

Jesús‑ni beyonie ttu nu kwiti yu'u ttu espíritu xxegwi latini

(Mr. 9:14-29; Lc. 9:37-43)

14Tti besin Jesús‑ni len iyunna ka benne rudhetinieha ata se'e ixe juisiru ka benne, nianna tti ubiga ttu benne biyú ata du Jesús‑ni nna bedú xibie arloe nna ree bie:

15―Tata xisi to, gwatuachi lelu xi'inia‑ni, kumu rakabi beora nna yalhá elha disa ruyúbi. Gwadú ribixxibi lo giha lhe gwadú ribixxibi lhe'e indaha lhe. 16Chi bisiaya lenbi ata se'e ka benne rudhetinlu‑ni, ttaka ka benne‑ni labí udaake eyoinke bi.

17Jesús‑ni nna ree ka benne rudhetinieha:

―¡Aalexa nu a du itá leni lhe nu a ria leni lhe! ¿Nukalila sa dhua len lebi'i? ¿Nukalila sa utto uchíaya ge nu ruinle? ¡Aní gwataxxí nu kwiti‑na!

18Nianna tti bedhaka dise espíritu xxegwi yu'u lati nu kwitiha nna beria tteba nuha. Looraha tteba nna beyaka tteba nu kwitiha.

19Delola nna tti ubiga ka benne rudhetinieha ata du Jesús‑ni nna sun labe unnaba tisake, ráke bie:

―¿Beakala ri'itu nna a udaatu ebeatu espíritu xxegwi‑na?

20Lee nna ree ke:

―Kumu de lebi'i labí ria tsitsi lele. Netiru ria, ganna ria lele kwadiba ttuxka'a to ttiba ttu besi ge kuana muxtasa, nuná ttu nu chika'a toru ankana, aníha‑gaba lebi'i, ganna ria lele ttu latti to, la'ania nna labí tee ttu bixa abittu aka gele uinle nna gwakaba gele gale i'iya do naa: “Ugía, gwadho daka aná.” I'iyaha nna gweyyabana sa dhona niha. 21[Ttaka luesi espíritu xxegwi uyu'u lati nu kwiti‑ni labí eria nuní ganna abíba ilhapiri'i tisa len Tata Do Yebáha lhe utte ubina lhe'eri'i lhe.]

Jesús‑ni redegixxi'e attu libe deki teeki uttikane

(Mr. 9:30-32; Lc. 9:43-45)

22Tti rekike daka Galilea‑ni nna ra Jesús‑ni ka benne rudhetinieha:

―Neti benne daya yebáha utekana neti lasi ná ka nu 23uttikana neti, ttaka ganna chi beyonna ubisaha nna eyaka benbaa.

Ka benne rudhetinieha, tti biyienkanie nu reeha nna yalhá bedú si'ina leke.

Jesús‑ni rukixakane belhiu nu ruttupakana ge yotuha

24Tti bisin Jesús‑ni lenie ka benne rudhetinieha lhe'esi Capernaum‑ni, ka nu rukixakana ka benne belhiu, delába belhiu nu ruttupakana ge yotuha, nna ubigakana, rákana Pedruha:

―Maestru gele‑na, ¿si lagwa gwa rigixa benne‑na belhiu nu ruteri'i ge yotuha?

25Pedruha nna bekabina, rana:

―Gwa rixa galee.

Tti uta'ana lhe yo'oha nna lade'axala unnaba tisa Jesús‑ni na, ree na:

―Simón, ¿bí rakinlu? Ka nu rinnabia se'e yiesi lo yu‑ni, ¿si ka benne lhe'esi gekani rukixakana belhiu‑na ak? ¿Ka benne dittu ak?

26Pedro‑ni nna bekabina, rana:

―Ka benne dittuba xa.

Nianna ra Jesús‑ni.

―Ganna aníha nna ka benne lhe'esi gekinna labí elha ralha ka nuná kixakana. 27Ttaka ki abittu ituxxukinna nna, ugía ro'o indatoo‑na nna bedelha yexxa nu rudaxxu belha‑na. Belha nu udaxxulu sisi'a tteha nna ixxálu ro'oni. Ro'o belhaha saxxakalu ttu belhiu. Bedaxxu belhuha nna ugía gwatixa gelu lhe gwatixa kia lhe.

Currently Selected:

San Mateo 17: zae

Highlight

Copy