San Lucas 21

Belhiu ulu'u benne nuila bidabiha

(Mr. 12:41-44)

1Jesús‑ni bechidha lobie nna bilánie ka nu tee gekaniha rigu'ukana belhiu lhe'e ata ru'u úna ge Tata Do Yebáha. 2Bilágabanie ttu benne nuila bidabi abí gebie tee nna rigu'ubie chupa ka belhiu to, ka nu lattiruba lidhakakani tee. 3Nianna ree:

―Neti gwalígati xa, benne nuila bidabi‑na ixenirula daka belhiu ulu'u benne‑na attichula nu chi ulu'u iyá ka nu chi rigu'u belhiu‑na. 4Kumu iyába ka nuná nu rexxaruba nuná rigu'ukana; ttaka benne nuila‑ni, anke benne abí gebie tee nna ulu'ube iyába belhiu tee gebie nu dika ixúnie ki aka benie.

Jesús‑ni rigixxi'abie isia sá tse'e looba yotuha

(Mt. 24:1-2; Mr. 13:1-2)

5Ttu chupa ka nu se'e niha rinnekana rákana deki latsiruba rule'e ka íyya kua yotuha lhe adíru ka nu rule'e latsitoru taa latiniha lhe. Nianna ra Jesús‑ni kana:

6―Isia sá iyába nu rilenle‑ni tse'e looba nuní; niruba attu íyya laa eya'anna iki luesini. Itúbana tse'e lo.

Jesús‑ni rigixxi'abie gasina aka atti lani lhuxa yiesi lo yu‑ni

(Mt. 24:3-28; Mr. 13:3-23)

7Nianna unnaba tisakana Jesús‑ni, rákane:

―Maestru, ¿nuka aka nuní? ¿Bí aka ki unna liina deki nuní chi dabigana aka?

8Jesús‑ni nna bekabie, ree kana:

―Gwaluyú gele, bittu tsia lele ge ka nu reki naa. Kumu ixe ka nu isiakana nna uinkana ttisidiba netiba nuha ankakana, nianna tti innákana: “Neti ankaa Cristu” lhe innákana: “Chiba dabigana lhuxa yiesi lo yu‑ni.” Lebi'i nna abittu tsia lele gekani tti innákana aníha. 9Ganna chi tsu'u nagale deki chi yu'u ka yiesi ritilha len luesikani lhe se'e ka benne rese'e disakana lo ka uxtisi gekaniha lhe, lebi'i bittu gasinle, kumu lade'axa teeki aka aní. Ttaka nna laa la'ania ttega nuha chi isia lhuxa yiesi lo yu‑ni.

10Rárugabe kana:

―Ka yiesi elha‑na ebi'i noo luesikani ttilhakana lhe ka nu rinnabia‑na ebi'i noo luesikani lhe. 11Anágaba nna gattibani yiesi lo yu‑ni ixú xxatta lhe ga'a ubina lhe isagwe lhe. Anágaba nna ilágabin ka benne bixa aka yebáha, nu uinna ki gasikanie lhe ebanakanie lhe.

12’Ttaka tti lani aka iyá nuní, lebi'i chila udaxxukana le lhe chila dhu nookana le lhe anágaba lhe taga'akana le lo ka xueda se'e lhe'e ka yo'o ata rudhetiri'i ka tisa ge Tata Do Yebáha, nianna kixxakana le lhe'e lisiyya lhe anágaba utso dúkana le arlo ka nu rinnabia xeni. Aníha udhakakana le kumu de ria lele neti. 13Aní satele kini lebi'i gapale lo neda kixxi'enle kana kia. 14Gwaluin doelha bittu uchacha ikile bixa ekabile gekani, 15kumu neti gutebaa tisa len lebi'i lhe elha rieni nu dika ose'e siina iyá ka nu ritisikinna leha ki abittu ese'e disakana lole. 16Axtagaba ka xxudileha lhe ka betsileha o si ka benne raka luesileha o ka nu se'e tse lenleha taga'akana le lo ná ka uxtisi nna ttu chupale nna uttikana le. 17Anágaba iyába ka benne se'e yiesi lo yu‑ni utía di lekani le de ria lele neti. 18Ttaka niruba ttú itsa ikile, labí tse'e loo nuná. 19¡Ganna lebi'i tse'e tsitsile, gwa daabale odilá Tata Do Yebáha le!

Jesús‑ni rigixxi'abie deki chi tteba dabigana tse'e loo lhe'esi Jerusalén‑ni

20’Ganna chi ilenle ebi'i ka soldaduha abi'iba kwe'e Jerusalén‑ni, la'ania nna chi yule deki chi tteba duna tse'e loona. 21La'ania nna lebi'i, ata se'ele daka Judea‑ni, gwaluxunni nna gwaltsapi iki ka i'iya sia niha. Ata se'ele Jerusalén‑ni, nna gwaliria lhe'e yiesiha nna ata se'ele lhe'exxiha nna abittu eyekile tata'ale lhe'esiha. 22Kumu la'ania elha disa tsitsi nuha uyúle, ganna chi aka iyá nu chi ga'anna lo ka yetsi ge Tata Do Yebáha. 23¡Gwalíchiru le ka benne nuila ata nuja xi'inke la'ania lhe denke ka nuto rasi lhe! Kumu elha disa tsitsi nuha isia itúba lo yu geri'i‑ni. La'ania nuha Tata Do Yebáha riguabie elha rise'iki geeha len ka benneha. 24Ttu chupa ke uttikana ke len espada nna adíke nna udaxxukana ke nna echekana ke lhe'e iyába ka yiesi dittu. Ka nu dittuha nna utse'e lookana Jerusalén‑ni axtaliba ganna chi gwadona sá chi ga'anani Tata Do Yebáha satekana ttu bixa.

Jesús‑ni rigixxi'abie gasina aka atti chi esiabie yiesi lo yu‑ni

(Mt. 24:29-35, 42-44; Mr. 13:24-37)

25’La'ania nna aka ttu bixa lo tatubisa‑na lhe lo nanto beo‑na lhe anágaba lo ka beli‑na lhe. Ka benne se'e yiesi lo yu‑ni nna aka télakanie lhe gasikanie de iyienkanie tsu'u be xxatta lo indatooha de radha xxatta loni. 26Axtaba echulhakanie de elha rasi ge nu aka yiesi lo yu‑ni, kumu ka beli‑na lhe adíru ka nu ra xxeni lekani se'e gwetsáha igubibakana. 27La'ania nna neti benne daya yebáha, iláni ka benne neti dedáya yebáha lhe'e ttu bea ra tsitsi lasia lhe raka lhalhaba xiani kia lhe. 28Ganna chi dhulo aka nuní, la'ania nna gwalelhidha ikile lhe tsitsi gwalese'e, kumu neti chi tteba esiaya kini odiláya le.

29Utixxi'agabani Jesús‑ni kana ttu tisa. Aníha benie kini utte dákana bí diani nu raka lebie kixxi'anie kanaha. Nianna tti ree:

―Gwalugíaruga lo ka ya higu‑na lhe o bixaba lo attu yaga. 30Ganna chi rilenle rega'a lhaga gekani, la'ania nna chi yule deki chi tteba dabigana eta'a iyya. 31Anágaba la'ania ganna chi ilenle aka nu chi ria‑ni, la'ania nna chi yule deki chi tteba dabigana innabia Tata Do Yebáha.

32’Netiru ria, labí chi utti ka benne se'e nnanna tti isia sá aka iyá nuní. 33Yebáha lhe yiesi lo yu‑ni lhe tse'e loobaka nuní, ttaka ka tisa ria‑ni teekiba aka nu ra ka benne‑ni.

34’Gwaluyú gele, bittu tse'ele uinle nu rakaba lele, nigaba akale nu dusi lhe, kini ni kina ge ka elhaxchacha iki tee yiesi lo yu‑nila do ikile, la'ania nna ttu iyyaba lasi isia sá aka iyá nu chi ria‑ni. 35Kumu ttu nnelaba aka nuní, ttiba ttu nu iyaxxuna lhe'e yalhi, aníha‑ba aka nuha. Ttu nnelaba isia elha disa ge iyába ka benne se'e yiesi lo yu‑ni. 36Gwaltse'e tsitsi lhe satía gwalulisa Tata Do Yebáha kini dhaale lhaale lo iyá nu aka la'ania lhe anágaba kini aka eso dule arloa, neti benne daya yebáha.

37Jesús‑ni lo resába rule'enie ka benne ro'o yotuha, lo rela nna raya'ane iki i'iya ta daa ka ya olivuha. 38Iyába ka benne dila tteba riake ro'o yotuha kini rado nagake gebie.

Currently Selected:

San Lucas 21: zae

Highlight

Copy