San Juan 12

María‑ni rigabie seti ka ni'a Jesús‑ni

1Xxupa ubisa atti lanila isia laní Pascuaha, ugía Jesús‑ni lhe'esi Betania ata do Lázaro benne belhidha benbie lo elhuttiha. 2Ka Lázaro‑ni benke ttu irse ki goke lenbie. Marta‑ni daabie riga'abie lhe'e ka ye'enaha, Lázaro‑ni nna labie nuha anke ttu ka nu do len Jesús‑ni ro'o mexaha. 3María‑ni nna bedaxxue ttiba medi litru seti rure ixixxi. Setiha ankana taga'a ge ttu iyya to tee láni nardo. Setiha raka xxattana yaxi nna utabi María‑ni nuha ka ni'a Jesús‑ni. Nianna tti bodibisie ka ni'eha len itsa ikieha. Itúba lhe'e yo'oha ure tsi'i setiha. 4Ttaka Judas Iscariote, ttu ka nu rudhetinieha nu utene lasi ná ka nu uttikaneha, lana rana:

5―¿Beaka a bito'ochila seti rure ixixxi‑ni ki utekana geni tsunna gayua (300) denario, kini belhuha nna dhi ka benne dii abittu geke tee?

6Judas‑ni rana aníha, labí kumu de retabinna ge ka benne abittu geke tee, sinuki rana aníha kumu de ankana ubana lhe kumu lana denna beduti to yu'u belhiu gekeha nna chi labinna rudaxxu sigána belhiu rigu'uke lhe'e nuha.

7Nianna tti ra Jesús‑ni na:

―Begwelha na egu'una seti‑ni ka ni'aya‑ni. Ruinna nuní kumu chi rodú tse gaana neti ganna chi isia sá igatsiaha. 8Ka benne dii abittu geke tee satíaba tse'e ka benne‑na len lebi'i, ttaka neti labí satía dhoa len lebi'i.

9Ixe ka nu Israel‑ni tti binakana deki do Jesús‑ni Betania, nianna ugíakana gwalannikane. Ttaka labí sun labie ugíakana gwelanni, sinuki ugíagabakana kini ilákinna Lázaro benne beyadha benbie lo elhuttiha. 10De nuha nna ka nu loni ge ka bixxudiha chi beda'a ro'okani uttigabakana Lázaro‑ni, 11kumu de lana nna ixe ka benne Israel chi bekwittake lenkana nna ge Jesús‑nila chi ria leke.

Jesús‑ni uta'abie lhe'esi Jerusalén‑ni

(Mt. 21:1-11; Mr. 11:1-11; Lc. 19:28-40)

12Beyeki sáha ixe ka benne dia laní Pascuaha, tti bina ka benneha deki chi daa Jesús‑ni ga'abie lhe'esi Jerusalén‑ni, 13nianna ugíake gwaledake bie nna bedaxxuke dina denke nna ribesi'abake, ráke:

―¡Xxeniba ra lelu! ¡Lu ankalu benne udhelha Tata Xisiha! ¡Karubárulu! ¡Lu ankalu benne innabialu ka benne Israel‑ni!

14Nianna tti gwaxxaka Jesús‑ni ttu burru kwiti to nna udobie kwe'eni. Ukaba attiba chi ga'anna lo ka yetsi ge Tata Do Yebáha ata dia ra:

15¡Bittu gasinle, lebi'i ka benne ge lhe'esi Sión!

¡Gwalulanniruga! Ne benne rinnabia geleha chi daa naa

doe kwe'e ttu burru kwiti to.

16Tti sisi'a tteha, ka benne rudhetini Jesús‑ni labí ute dákanie iyá nu rakaha. Iki deliba chi uttieha nna beyapie yebáha ata ra xxeni leeha, la'anialiba nna tti gwadú leke deki iyába nu benke len benneha chiba ga'anna nuha lo ka yetsi ge Tata Do Yebáha deki aníha aka. 17Ka benne se'e len Jesús‑ni tti beyaxie Lázaro‑ni lhe'e yieru baaha, tti belhidha benbie benneha lo elhuttiha, ka benneha rigixxi'ake ge nu bilákanie la'ania. 18De nuha nna biria ka benne gwaledake bie kumu de binake ge milagru benieha. 19Ka fariseo‑ni nna ra luesikani:

―Gwaluyúruga, ri'i labí dhaari'i. Gwalugíaruga, iyába ka benne danalhake nuná.

Ttu chupa ka benne griegu rekike regilake Jesús‑ni

20Lagwi ge ka benne dia laníha, delába ka benne dia ki sadú xibike arlo Tata Do Yebáha, lhe'e ka benneha sela ttu chupa ka benne griegu. 21Ka benneha ubigake ata du Felipe‑ni. Felipe‑ni ankana benne lhe'esi Betsaida. Yiesiha rena daka Galilea. Nianna unnabake lenna, ráke na:

―Raka letu ilentu Jesús‑ni, xa tata.

22Felipe‑ni nna ugíana utixxi'enna Andrés‑ni. Nianna ixpabakana diakana gwatixxi'akinna Jesús‑ni nu ra ka benneha. 23Jesús‑ni nna bekabie gekani, ree:

―Benne daa yebáha chiba bisia ura gatti benneha nna eyapie yebáha kini inná xxeni lebie. 24Netiru ria, ttiba xua xuxtilaha, ganna abíba igatsi yu ikie ki e'eyue, la'ania nna labí tsani benneha, ttúbe eya'anna. Ttaka ganna xuaha gattibe, delába egelhaba xoe nna e'eyue, la'ania nna ixeni lena ute benneha. 25Benne abittuba raka lebie bixa satebie de etenalhe neti, benneha nnittilee arlo Tata Do Yebáha nna benne eria iki eria lebie etenalhe neti meskila bixa satebie yiesi lo yu‑ni, benneha gwaka benlee ttu dia lii arlo Tata Do Yebáha. 26Ganna nuxa ttu benne raka lebie ixúe kini unie nu raka lasia, teeki itee etenalhe neti nna ata esina dhoaha, niha‑gaba dhoe, nna ganna nuxa ttu benne chi rixúe runie nu raka lasia, Tata kiaha gugwebe lidhaka benneha.

Jesús‑ni rigixxi'abie deki teeki uttikane

27’Loora nnanna yalhá rudú xxattana neti. Nianna, ¿si gwannílaa, “Tata, bodiláchittu neti lo elha disa uyúa‑ni”? Ttaka ki de uyúlaa elha disa‑ni, de nuha nna daya yiesi lo yu‑ni. 28Tata, bele'e nu xxeni ra lelu arlo ka benne.

Nuha‑ba rabie, nianna biyien tsi'i ttu benne unnebie yebáha, ree:

―Chiba bele'a nu xxeni ra lasia, nnanna nna odole'a na attu libe.

29Ka benne se'e niha, tti biyienkanie tsi'i benne unneeha, ttu chupake ráke:

―Uyu'u beba nuná.

Adíke nna ráke:

―Ttu anjeli daa yebáha‑ba nuná belise benne‑ni.

30Jesús‑ni nna rabie kana:

―Laa de netiga nna biyien tsi'i benneha, de lebi'ila nuná nna biyien tsi'ibie. 31Nnanna nuha chi bisia sá uin Tata Do Yebáha elhuxtisi ge ka benne se'e yiesi lo yu‑ni lhe nnanna nuha chi bisia sá kweabie nu rinnabiana yiesi lo yu‑ni, delába nu xxegwiha. 32Neti nna ganna chi ulhidhakana neti betákana neti lo ya kurusiha, la'ania nna unia kini iyába ka benne ibigake len neti.

33Aníha rinnebie ki benna liie gaxasina gattie. 34Ka benneha nna bekabike gebie, ráke:

―Ri'itu yutu deki lo ka yetsi ge Tata Do Yebáha rigixxi'a ra deki benne anke Cristuha satíaba aka ben benneha. Lu nna, ¿galasina nna rálalu deki teeki ilhidhakana benne daa yebáha? ¿Núla nuha anka benne daa yebáha ganna?

35Jesús‑ni nna rabie kana:

―Attu sattiruba do benne anke xiani‑ni lagwi gele. De nuha nna laka sa ruden xiani‑ni gele, gwalugwela lele kini abittu udaxxu elaha le, kumu nu reki lhe'e chulhaha, labí yu nuha gaxa diana. 36Laxkala gwaltsia lele ge benne anke xiani‑ni laka sa doe len lebi'i, kini anáchu nna akale gebie.

Nuha‑ba ra Jesús‑ni nna deyye bekatsi lobie gekani.

Ka nu Israel‑ni labí ria lekani ge Jesús‑ni

37Meskiba chi ben Jesús‑ni ixe ka milagru arlo ka benne, ttaka labí ria leke gebie. 38Aníha uka ki gwado tisa ge nu unne profeta Isaías‑ni tti ree Tata Xisiha:

Nurula chi ugía leni ge nu rigixxi'atu‑ni xa tata,

lhe nurula nu chi bele'enlu nu xxeni ra lelu lhe.

39Labí uka tsia lekani ge Tata Xisiha, kumu attiba ra Isaías‑ni attu lisia lo ka yetsi ge Tata Do Yebáha, tti rana:

40Bechulhaba Tata Do Yebáha lokani lhe ben tsitsibe lastokani,

kini meskiba yu'u lokani, abittu bilákinna,

lhe meskiba tee elha rieni gekani nna abittu utte dákinna.

Aníha benkana kini ka eyekikana odaxxukana neda kia nna eyonia kana, ra Tata Do Yebáha.

41Isaías‑ni unnena aníha kumu chiba bilenna nu xxeni inná le Jesús‑ni ganna chi bisie. De nuha nna utixxi'ana gebie.

42Laa kiga de nuha nna ixeba ka nu Israel‑ni ugía lekani ge Jesús‑ni, axtala ka nu rinnabia gekaniha ugía lekani. Ttaka kumu de rasikinna ge ka fariseo‑ni, de nuha nna labí rigixxi'akana kini ka kweakana kana lhe'e ka yo'o ata rudhetikana ka tisa ge Tata Do Yebáha. 43Kumu ru'urula lekani eya'an tsekana arlo ka benne attichula arlo Tata Do Yebáha.

44Jesús‑ni nna unnebie idisa, ree:

―Benne ria lebie netiha, labí sun neti nuha ria le benneha, sinuki riagaba lebie benne udhelhe netiha, 45nna benne rilánie netiha, benne udhelhe netiha nuha rilen benneha. 46Neti ankaa xiani bisiaya yiesi lo yu‑ni kini iyába ka benne tsia leke neti abittu tse'eke ata anka chulhaha. 47Nu iyieninna ka tisa kia‑ni nna abittu uinna nu rákana, labí neti ukinnia nuha, kumu neti laa dagaa gwerixxi gwekinni ka benne, sinuki dalaa kini odiláya ke. 48Nu rigu'u ni'ani netiha lhe abittu rulabina ka tisa kia‑ni, chiba do nu ukinnina nuha, delába ka tisa chi unnea‑ni, ka tisa‑niba urixxi ukinnikana nuha ganna chi isia sá daluxaha. 49Kumu neti labí rinnea nu anka kia. Tata kia benne udhelhe netiha, benneha‑ba chi rabie neti bixa innía lhe gasina innea lhe. 50Neti yúgabaa deki nu ra benneha uinri'i, nuha uinna kini satíaba aka ben ka benne. Laxkala nu rinnea‑ni, rinnebaa na attiba chi ra Tata kiaha.

Currently Selected:

San Juan 12: zae

Highlight

Copy