Hechos 3

Pedruha beyonie ttu benne anka xii ka ni'abie

1Ttu sá ugwapi Pedruha dia lenna Juan‑ni ttiba tu retin tsunna nuha diakana ata do yotuha, kumu uraha rilhapi ka benne tisa len Tata Do Yebáha. 2Ro'o yotuha do ttu nubiyú anka xii ka ni'ani. Aníha‑ba ankana attili ulinaha nna ttu ttu sába radokana na daka ata du puerta nu tee láni Puerta Nu Anka Latsiru. Radokana nuha niha kini rinnabana belhiu len ka benne ra'a lali'a ge yotuha. 3Tti bilen nubiyúha Pedruha lhe Juan‑ni lhe diakana ga'akana lali'a ge yotuha, nianna tti unnena rinnabana kana belhiu. 4Lakana nna belanni tsittabakana loni, nianna tti unne Pedruha, rana nubiyúha:

―¡Begía lotu!

5Lana nna “O” ba rana begíana lokani nna ubedaba dona kini ugwekana na belhiu. 6Ttaka Pedruha nna rana na:

―Neti labí belhiu kia tee kini utea gelu. Gutebaa len lu nu téruba kia. ¡Jesucristu ge Nazaret‑ni rudettia, udú lii nna udá!

7Nianna tti bedaxxu Pedruha ná ben‑ni nna tti bedhú liina na. Looraha tteba nna bedá rea tteba lhe'e ka ni'aniha lhe bedá rea tteba lhe'e ka sitta dheti geniha lhe. 8Nianna gintsaba udú liina nna udulo ttebana udána. Nianna tti uta'ana len ka Pedruha lali'a ge yotuha, ridábana lhe rigintsa ladhibana rulhana ge Tata Do Yebáha 9nna iyába ka benne rilákanie chi redána lhe rulhana ge Tata Do Yebáha lhe, 10bebanabakanie lhe uka tébakanie tti bilákanie nu ukaha, kumu beyakabiabakanie na. Labana nuha ridona ro'o yotuha rinnabana belhiu daka ata du puerta nu tee láni Puerta Nu Anka Latsiru.

Pedruha rinne lenna ka benne tupa ro'o yotuha

11Nubiyú chi beyakaha labí rudhanna Pedruha lhe Juan‑ni lhe danalhabana kana. Ka benne se'e niha nna iyábake rebanabakanie ge nu ukaha nna bigaa ttebake diake ata se'ekanaha ata daa kweredori nu tee láni Kweredori ge Salomón. 12Tti bilani Pedruha chi tupa xxatta ka benne, nianna tti rana ke:

―Lebi'i benne Israel, ¿beaka rebana xxattinle ge nu rilenle‑ni? Lhe ¿beaka doba lole ri'itu lhe? ¿Si rakinle deki ri'ibatu beyointu nubiyú‑ni de ra xxeni letu lhe o de ankatu benne rudo tsitsirutu tisa ge Tata Do Yebáha? 13Ko'o labí ri'itu, sinuki Tata Do Yebaa benne anke Diosi ge Abraham‑ni lhe ge Isaac‑ni lhe ge Jacob‑ni, lhe ge adíru ka benne ukake xuttori'iha lhe, benneha‑ba benie kini uná xxeni le Jesús benne anke Xi'inieha, delába Jesús benne bedaxxuleha nna gwaga'alee lo ná ka uxtisiha, nianna labí uxielhale kini olhaa Pilato‑nie, tti rana deki olhábane. 14Ttaka lebi'i nna ulu'ula ni'ale benne runie nu dika ixúha lhe anke ge Tata Do Yebáha lhe. Betse'e loona, lebi'i, nu ben elhuttiha‑la unnabale kini bodilaa Pilato‑ni 15nna benne runie kini aka benri'i ttu dia liiha‑la bettile, ttaka Tata Do Yebáha belhidha benbe benneha lagwi ge ka benne chi uttiha. Ri'itu biyú lotu iyá nu ukaha. 16Laxkala nubiyú du nii, nu ankabienle‑ni lhe rilenle‑ni lhe, de ugía leni ge Jesús‑ni, de nuha nna benie kini bedú tsitsina. De ugía leni gebie, de nuha nna chi beyaka chána. Lebi'i gwa ruyúba lole deki chi beyakana.

17’Neti yu xeabaa xa betsi to, lebi'i lhe ka nu rinnabia gele‑na lhe, de abíba yule nna bedhakale Jesús‑ni aníha. 18Ttaka Tata Do Yebáha aníha benie kini uka nu chi unnebie itú ttuha. Bixúnie iyá ka profeta geeha kini ka benneha unneke, ráke deki Cristu idhelheha teeki gatti benneha. 19Laxkala lebi'i gwalodúna le ge nu ruinle nna gwalodaxxu neda ge Tata Xisiha kini oxíe ka tulha gele‑na. La'ania nna unie kini lebi'i saría tsena le 20nna idhelhe Cristuha gele, delába Jesús benne chi ga'ananie idhelheha. 21Ttaka teeki dho Cristuha kwede yebáha axtaliba ganna chi bisia sá ose'e tse Tata Do Yebáha iyá tte nu se'e. Akaba atti tteba chi ree akaha. Ka profeta geeha, ka benne use'e itú nu reha, ka benneha bixúnie kini utixxi'ake ge nu akaha, 22attiba Moisés‑ni rana ka benne uka xuttori'iha: “Tata Do Yebaa benne anke Xxanari'iha, labie unie kini lagwi gebale kweabie ttu benne ake profeta attiba neti. Udole tisa ge iyá tte nu inná benneha. 23Ttaka nu abittu udona tisa ge benneha, ttu tsaba chadi gaa nuha, labíru aka iselana ka benne chi ankake ge Tata Do Yebáha.”

24’Debá Samuel‑ni nna, iyába ka profetaha unneke ge nu chi raka nnanna. 25Lebi'i dhile nu chi ra ka benneha lhe anágaba ralhagabale dhile nu chi ra Tata Do Yebáha Abraham‑ni ugwebie ka xuttori'iha. Tti bodha'an tsitsi tisa gebie len Abraham‑ni, la'ania rabie na: “Ka benne datialuha, ka benneha ixúti kini unia ki saría tsena iyá ka benne se'e yiesi lo yu‑ni.” 26Laxkala tti belhidha benbie Xi'inieha lo elhuttiha, len lebi'i nuha lade'a tte udhelhe benneha kini aka lenie le, kini anáchu nna ttu ttule udhanle nu satsa ruinle‑na.

Currently Selected:

Hechos 3: zae

Highlight

Copy