Maku 16

Jesu omãnõ maire opoera mijẽ remẽwarà

(Mateusi 28.1-8; Rukasi 24.1-12; Juwão 20.1-10)

1Jimoava 'arà okwa paire, Maria Matarena oo Jesu reãgwerà mopije mã'ẽ pyy, ipije katu mã'ẽ.#16.1 Ipije katu mã'ẽ omogy wemiau reãgwerà kõ rè kupa ipi. Ekoa kõ tè a'evoa. Ãmõ Maria reve oo opyy, Tiaku y. Ãmõ, Sarome reve oo. 2Ãmẽ ji'iveay oo Jesu reãgwerà rena kyty kupa. Pee rupi oo iko kupa remẽ, 3e'i ojiupe kupa:

– Manyvotà põ takuru sirekotà? Ava põ omotore toretà imoisyry ikwarà rovake wyi janeupe tijaike? e'i kupa.

Ta'yrõwã takuru wyi aepo e'i kupa. 4Ajamã'ẽ ovãe kupa remẽ, soõ, ova 'ejẽ tui upa!

– Emã'ẽ ee! e'i ojiupe kupa. [Ava sipõ omoisyry! e'i kupa.]

5Ãmẽ oike te'ĩte kupa. Oike kupa remẽ, Jesu reãgwerà renawerà eekatu kytyre kõnomĩokyry mõ wapy upa. Ijyru poko sĩ gatu a'e. A'e rè omã'ẽ kupa remẽ, ojimonyi tesõ ee omãjã kupa. 6Ajamã'ẽ kõnomĩokyry e'i ijupe kõ:

– Pejimonyi sõ! Akuwa Jesu Nasare taa wãnà peeka, yvyra jipokana rè omãnõ maekwerà. A'e ike natui ky'y! Opoerapa opõ'ã oo! Ike eãgwerà tui mijã! Pemã'ẽ ee esa! Natui ky'y! e'i ijupe kõ.

7E'i jẽ ijupe kõ:

– Pekwa emimo'ekwerà kõ pè Peturu kõ pè javo. “Karireja yvy kyty ootà penenone kyty. A'e pè penãrõtà, e'ipa maekwerà rupi katu”, tapejẽ ijupe kõ imomewa, e'i.#Mat. 26.32; Mak. 14.28

8Aepo e'i remeve wãivĩ kõ ojivy oo. Ojava oo Jesu reãgwerà renawerà pe wyi. Otyty tesõ okyjea iko kupa. Nooive aepo momewa kupa ajamã'ẽ, ojimonyi kupa rewarà mõ.

Jesu ojisaoka Maria Matarena pyri remẽwarà

(Mateusi 28.9-10; Juwão 20.11-18)

9Ji'iveay, jimoava 'arà paire,#16.9 Domingo remẽ. Jesu opoera. Ãmẽ Maria Matarena pyri ypy ojisa. Kõitokõ jypy remẽ Jesu ãjãgai kõ, 7 rõmõ omoẽ iwyi. A'e pyri ypy ojisa. 10A'e Jesu rè omã'ẽ maire oo emimo'ekwerà kõ pè javo. Wãpirõ ywete wãgyo rõmõ kupa upa, ovãe ipyri kõ remẽ. 11E'i ãmẽ ijupe kõ:

– Jesu opoerapa! Amã'ẽ ee! e'i.

Ajamã'ẽ aepo wenu kupa remẽ, “aje ipõ” ne'i kupa.

Jesu ojisaoka wemimo'earà mõrijõgwerà kõ pyri remẽwarà

(Rukasi 24.13-35)

12Ãmẽ ajaire Jesu ojisa mijẽ wemimo'earà kõ mõ pè, mõrijõ mãe kõ pè. Nojikuwai ojisa ijupe kõ ajamã'ẽ. A'e kõ oo pee rupi iko remẽ, a'evo ekoi. 13Ajaire ojikuwapa ijupe kõ remẽ, ojivy oo a'evoa momewa ãmõ emimo'ekwerà kõ pè kupa.

Ajamã'ẽ aepo wenu mãe kõ “aje ipõ” ne'ive enu kupa.

Jesu ojisaoka mijẽ wemimo'ekwerà kõ pè remẽwarà

(Mateusi 28.16-20; Rukasi 24.36-49; Juwão 20.19-23; Jesu koty rewarà kõ 1.6-8)

14Ajaire sa'u Jesu ojisa mijẽ wemimo'ekwerà kõ pè ky'y, 11 rõmõ mãe kõ pè. Ojimi'u kupa upa remẽ ojisa ijupe kõ. Kee e'i ijupe kõ:

– “Aje” napejẽi sõ, omã'ẽ ere mãe kõ omome'u pejẽ remẽ! “Aje” pejẽ kuwasi mijã. Age'e si “aje” pejẽ ky'y, pemã'ẽ ere rewarà mõ tè, e'i ijupe kõ.

15E'i jẽ Jesu ijupe kõ:

– Pekwa pirujẽ tena tena kõ rupi eayvu e'eay mojenu erokwa. Pirujẽ yvy yvy wãnà kõ pè pemojenu. “Emãnõa rupi Janejare'e poroereko katutà ky'y”, pejẽ.#J.K.R. 1.8 16Ava mõ eako'i ere wereko katuarà rõmõ remẽ, ãmõ, ojimojãmorĩoka ekoty rewarà rõmõ remẽ, areko karuarutà epyri. Naeako'i ere mãe kõ ãmẽ nareko katu'ãi. Aemavo kõtà ity aa, e'i. 17Ãmõ, kee a'e pejẽ. Amokasiay wetetà “aje” e'i mãe kõ ipi, eayvukasia rupi toiko kupa. Ajawyi ãjãg kõ pè ijayvukasità imoẽ ojimoemija ee mãe kõ wyi imoisyryoka eayvu rupi kupa. Ãmõ, ãmõ e'yiwarà kõ pè omojenutà eayvu e'eay remẽ, amokasi kõtà ãmõ kõ ayvu rupi toporegeta kupa, e'i. 18Ãmõ, areko katu kõtà moe porojuka mã'ẽ wyi opyy sikaepo remẽ timanyvo e'ã. Ãmõ, ay mõ sikaepo o'u kupa remẽ, nimanyvo'ãi ijupe kõ. Ãmõ, itekorã mãe kõ omokatutà ekasia rupi opo oinõ ijapyte kõ 'aryvo kupa remẽ. Eayvukasia rupi tè a'evo ekoità kupa, e'i Jesu ijupe kõ.

Jesu oẽ yva kyty oo remẽwarà

(Rukasi 24.50-53; Jesu koty rewarà kõ 1.9-11)

19Ãmẽ Janerõvijã Jesu oporegeta ijupe kõ paire, oẽ oo yva kyty, Janejare'e rena kyty. Janejare'e 'ekatu kytyre wapy upa, eeve Jõvijã wasu rõmõ. Awyje rõmõ rã'ĩ a'e pè ekoi.

20Ãmẽ Jesu remimo'ekwerà kõ oo oo ijayvu e'eay mojenu jenu erokwa ky'y. Pirujẽ tena tena kõ rupi oo oo kupa. [Pirujẽ jane atyry kõ pè.] Janejare'e omokasiay kõ toporomokatu kupa, itekorã mãe kõ tomokatu kupa ipi. Ãmõ, ãjãgai kõ tomoẽ teve kupa. A'evo omojikuwaoka aje ywete emimojenuwerà.

[Awyjepa eremikusiwarerà Jesu rewarà. Maku remikusiwarerà.]

Currently Selected:

Maku 16: oymNT

Highlight

Copy