Jesu koty rewarà kõ 12

Peturu jimopã'ãga pupe tui remẽwarà

1Ãmẽ jakatu kovenatu Eroti Juteu kõ kovenatu rõmõ ekoi jẽ. A'e 'ary pè remẽ omomorijauoka ypy Jesu koty rewarà kõ mõ. 2A'e ipõ ojukaoka tesõ Tiaku marija poko pupe. A'e Juwão reke'yry. 3Ãmẽ Juteu kõ ory tesõ ijukaa rè omãjã, Jesu koty rewarà kõ ãpã kõ. Ory tesõ kupa remẽ, kovenatu Eroti omã'ẽ ee kõ. Ajare:

– Haa! Amoryoka kõ tarà mijẽ, temoe'e kupa! e'i oupe.

Ajawyi Peturu opyyoka mijẽ imopã'ã. Meju vororo e'ã wa remeve ipõ a'evo ekoi. 4Opyyoka paire, omonooka jimopã'ãga pupe. Wãrõoka jẽ sota kõ pè. Irõ irõte tesõ ãrõarà kõ oinõoka. A'e tè ojeapykyro kyro tesõ kupa. Juteu kõ wãmõi kõ jisyryawerà 'arà omoete#12.4 Karamoe remẽ Janejare'e wekyioka Juteu kõ rãmõi kõ Ejitu yvy pe wyi imoisyry kõ. Karai kõ Páscoa dos Judeus e'i a'evoa pè. Ajamã'ẽ Jesu poeraawerà pè ywesõ Páscoa e'i kupa. Emogeta Jisyry. 12.1-27; Epr. 11.27-29; J.K.R. 7.30-36 paire, kovenatu Eroti wenõetà Peturu aty wasu rovake imosã'ãga esa. 5A'evo Peturu ojimopã'ãoka remẽ, sota kõ wãrõ.

Ajamã'ẽ Jesu koty rewarà kõ ojimoaty oporegeta Janejare'e pè ijupewarà mõ, tomoẽoka mijẽ. A'evoa rè ojimokasiay wete kupa.

Peturu oẽ jimopã'ãga pe wyi remẽwarà

6Kõ'ẽme tè kovenatu Eroti wenõetà Peturu jane kõ rovake mijã. Ãmẽ Peturu pya oke jimopã'ãga pupe upa. Sota kõ pytery pè tè oke upa. Jipokwa ãtãay mã'ẽ weroke upa, sota ijuvuri tui mãe kõ reve. Mõrijõ. Ãmõ sota kõ jimopã'ãga rovapyka ypy pè wãrõ jẽ upa.

7Ãmẽ py'awarà mõ Janerõvijã ywete remĩgwai yvapewarà ojisaoka jimopã'ãga pupe. Oyape tesõ a'e pè upa. Ãmẽ Peturu omõtã ijasi'y rè imoma, oke upa remẽ.

– Epõ'ã kuise'ẽ! e'i.

Ameve ipokwawerà kõ otararaipa ipoapy kõ wyi o'a.

8– Nekõ'ã emokãrãgãtã, e'i ve ijupe. Ãmõ, nesãtaja nepyrokape rewarà emokãrãgãtã, e'i teve.

A'evo Peturu ekoi ãmẽ.

– Ejiyrunõ ejo erupi, e'i teve ijupe.

A'evo wereko teve. 9Ãmẽ Peturu oẽ oo jimopã'ãga pupe wyi upi ky'y, yvapewarà rupi.

– Apouvai teipõ ajupa, e'i tite Peturu oupe.

Nokuwai aje ywete. 10Ãmẽ ijaty sota kõ jimopã'ãga rãrõarà kõ upa mijã. Ãmẽ Peturu oẽ oo yvapewarà rupi. Sota kõ pyryvo okwa kupa. Ipyri'ĩje'ẽ sa'u mãe kõ pyryvo ypy okwa kupa. Ajaire kuipe'e sa'uwarà kõ pyryvo okwa kupa. Ãmẽ si oo ovãe jimopã'ãga rovapyka pyriwarà kõ pyryvo kupa. Ajaate pari rovapyka mitirõwã mã'ẽ pè ovãe kupa. A'e separari jimoãtãgwerà tè ovapyka rõmõ.#12.10 Portão de ferro A'e pupe wyi jaẽ jaa jimopã'ãga pupe wyi mã'ẽ. A'e pè ovãe kupa remẽ, py'awarà mõ ovote ojiovapyjavo. Okwa te'ĩte ãmẽ kupa. Pee wasu rupi oo iko kupa ky'y. Ameve py'awarà mõ Janejare'e remĩgwai ojimopi ky'y. Oity Peturu a'e pe wyi oo.

11Ãmẽ tè Peturu:

– Aje ywete si! e'i ky'y. Age'e si akuwa aje ywete Janerõvijã ywete tè omuu wemĩgwai temoẽ, kovenatu Eroti tejuka e'ã. Pirujẽ Juteu kõ wyive emoẽ, manyvo jẽtà erereko kupa remẽ, e'i Peturu oupe.

12Aja paire oo Maria eu mã'ẽ retã gyty. A'e wãivĩ Juwão Maku y tè. A'e retã wyry pè mõa'ãrõwã Jesu koty rewarà kõ ojimoatypa upa. Peturu pewarà mõ tè sikaepo oporegeta kupa upa, Janejare'e pè. 13Ãmẽ Peturu tetã rovapyka omotãtã. Ãmẽ emĩgwai mõ uu esa. Kõjãmuku tè a'e. Roti eu ijupe.

– Ava põ ene? e'i Roti.

– Ije tè! e'i Peturu ijupe.

14Iporegeta rupi Roti okuwa Peturu tè ovãe mã'ẽ. Oryvay ãmẽ. Noovapyjavo tuvei tetã ajamã'ẽ. Ojirojivy kõrijõ tè rã'ĩ oo javo jane kõ pè.

– Peturu tetã ypy pè tui upa! e'i oory rõmõ.

15[Ajamã'ẽ, “Aje ipõ”, ne'i kupa, noikeive tetã wyry pè uu rewarà mõ.]

– Newari tè aepo ere! Nereawyry sipõ? e'i tite ijupe kupa.

– Ãnĩ! Ewari rõwã a'e! e'i kõjãmuku.

Ãmẽ ãmõ kõ e'i:

– A'e rãrõarà yvapewarà teipõ! e'i kõrijõ kupa.

16Ãmẽ omotãtã jẽ Peturu tetã rovapyka upa. Ãmẽ tè oovapyjavo ijupe kupa ky'y. Aje ywete Peturu tè sikaepo tui upa. Ojimonyi tesõ ee omãjã kupa.

17Ãmẽ Peturu ojipomomojai tokuwa kupa, tipu e'ã kupa. Ãmẽ tè omome'u omoẽawerà ijupe kõ, Janerõvijã ywete omoẽoka maekwerà.

– Erekoawerà tapemome'u Tiaku pè, e'i. Ãmõ, Jesu koty rewarà kõ pè ve tapemome'u, e'i.

[Tiaku amyry rerà vo mã'ẽ pewarà mõ aepo e'i.] Aepo e'i paire ojisyry te'ĩte oo ãmõ taa kyty ãmẽ ky'y, pyave.

18[Ãmẽ jakatu sota kõ ãrõarerà kõ oke jẽ upa, jimopã'ãga pupe. Nokuwaive manyvo e'i oẽ mã'ẽ kupa.] Kõ'ẽma mẽ omã'ẽ remẽ tè okuwapa kupa. Ojipy'amopirai tesõ ãmẽ kupa. Otytypa tesõ ojimonyi iko kupa.

– Manyvo'i ywete põ oẽ Peturu jimopã'ãga pe wyi oo? e'i kupa.

19Ãmẽ kovenatu Eroti wekaoka ipe. Ajamã'ẽ noesai kupa. Ajawyi e'i jimopã'ãga rãrõarà kõ pè:

– Manyvo põ pereko imoẽ toẽ oo? e'i. Mape põ tui upa? e'i.

[Nokuwai kupa ajamã'ẽ. Ãmẽ kovenatu Eroti e'i jẽ:

– Pejẽ rõwã põkõ pemoẽ vija imono? e'i.]

Ajaire wapisioka ãrõarerà kõ ky'y.

Kovenatu Eroti mãnõa rewarà

Aja paire kovenatu ojisyry rã'ĩ oo Juteja yvy pe wyi ky'y. Sesareja taa pè ojimoena rã'ĩ.

20Ãmẽ ajaire kovenatu Eroti omãnõ ky'y. Kee e'i omãnõ. Ojikõ'õ tite Tiru taa wãnà kõ rè, Sitõ taa wãnà kõ rè ve. Noesa tari kõ. Ajawyi nomonookari temi'õ rã ijupe kõ ipi. Ajare ojimoaty oo oporegeta kovenatu Eroti pè kupa. Kovenatu pãtavõarà mõ rè ypy ojimory kupa ajamã'ẽ, Parasitu eu mã'ẽ rè. A'e pè kee e'i kupa:

– Orepãtavõ rejupa, kovenatu Eroti tojimory mijẽ orere, e'i kupa.

“Hoõ” e'i ãmẽ Parasitu. A'e rupi kovenatu Eroti rè ojimory mijẽ kupa ãmẽ.

– Terejimory mijẽ orere, e'i kupa.

21– Ãmõ 'ary pè teipõ taporegeta a'evoa rè, e'i ijupe kõ.

Ãmẽ ãmõ 'ary pè, kovenatu oporegetatà ijupe kõ ky'y remẽ, oyru e'eay opypy rã'ĩ enõe, epy wete mã'ẽ. Ajaire oẽ wapy jõvijã apyka 'aryvo oporegeta atyry kõ pè. A'e ojimoaty mãe kõ pè. Omogeta kõ, ayvu katu rupi.

22Ãmẽ jane kõ ijayvu wenu remẽ, wenu takatu kupa. Ajawyi wapuka pukai tesõ kee javo kupa:

– Haa! Jane rõwã ãwĩ oporegeta upa! e'i e'i kupa. Janejarà tè ãwĩ! e'i ywe'e tite imoe'e kupa mijã.

23Ameve Janejare'e naoryi kovenatu Eroti rè, ojimoe'eoka pãnẽ jane kõ pè rewarà mõ. “Ãnĩ, aepo pejẽ sõ”, ne'i rewarà mõ. “Janejare'e rõmõ'ĩte ikasiay mã'ẽ rõmõ ekoi”, ne'i rewarà mõ. Jane kõ omoe'e tite remẽ, ne'i rewarà mõ. Ãmẽ sõsi Janerõvijã ywete wemĩgwai yvapewarà mõ py'awarà mõ omuroka Eroti pè tomotekorã ky'y. Tapuru pè o'upaoka tomãnõ.

24Ãmẽ Janejare'e ayvu ke'ĩrõwãwarà kõ pè ojenu jenupa ky'y.

25Ãmẽ Panape kõ ojivy oo wena kyty ky'y, Ãtiokia taa kyty. Sauru reve ojivy oo kupa. Karakuri Ãtiokia taa wãnà kõ remimuurerà ome'ẽma Jesu koty rewarà rõvijã kõ pè kupa, Jerusarẽ taa wãnà kõ pè. Aja paire ojivy oo kupa. Juwão Maku ve weraa oupi kupa.

Currently Selected:

Jesu koty rewarà kõ 12: oymNT

Highlight

Copy