1 Korĩtu 1

Pauru ojikuwa ijupe kõ

1Ije Pauru. Janejare'e wemimotarà rupi tè epyteporo Kiristu Jesu remimono rõmõ taiko. [A'e tè emowaite emono jane kõ tamotekokuwa aiko ipi.] Ajawyi aã kareta akusiwa pejẽ ajupa, Soteni reve. A'e Kiristu koty rewarà teve. A'e ereve ekoi. 2Jesu koty rewarà kõ Korĩtu taa wãnà kõ pè akusiwa ajupa. Kee a'e pejẽ. Kiristu Jesu rupi Janejare'e tè pepyteporo oupewarà kõ rõmõ, weruparà mõ tapeiko. Ãwĩvo ve pirujẽ ãmõ ãmõ Kiristu Jesu revejẽ ekoi mãe kõ rõmõ opyteporo ipi. A'e kõ ve “Janerõvijã ywete” e'i Jesu Kiristu pè ipi. Janevo jẽ ekoi kupa ky'y.#J.K.R. 18.1

3Janeruwasu ikõ tapenereko katu okatuaya rupi ipi nẽ. Ãmõ, Janerõvijã Jesu Kiristu teve ikõ tapenereko katu nẽ. Tapepy'amopiryvypy katu ikõ kupa ipi nẽ.

“Janejare'e amoe'e peupewarà mõ aiko ipi”, e'i mã'ẽ

4Amoe'e ywete Janejare'e penewarà mõ aiko ipi. Kee a'e ijupe penewarà mõ ipi: “Nekatuay wete! Korĩtu wãnà kõ nereko katuay wete Kiristu Jesu rupi ereko kõ!” a'e imoe'e ipi. Napi'ãi imoe'ea wyi ipi. 5Kiristu revejẽ peiko ipi wyi Janejare'e penereko katuay wete ipi. Mã jẽ rõwã naikoi peupe. Wayvu ome'ẽ ywete peupe tapemojenu ipi. Pemotekokuwaoka ywete teve ipi. 6A'evo oreremimojenuwerà Kiristu rewarà ojikuwa pepytery pè, aje ywete mã'ẽ rõmõ. 7Janejare'e o'Ãg rupi penemikuwa iteetejẽ ome'ẽ peupe pemokasia rõmõ. Emime'ẽgwerà pereko. Ajawyi napeporijaui penemikuwa rè peiko. Ajawyi tapepy'a katu peiko, Janerõvijã Jesu Kiristu vãea rã peãrõ jẽ rã'ĩ peiko remẽ. 8A'e pemomãatã jẽtà okasia rupi. Age'e remẽ pemokasi jẽ penereko, wemimotarà rupi tapeiko ipi. Pemokasi jẽtà tapejirovija jẽ ee peiko. Ava nomo'y'ãi nivoi mã'ẽ pene, Janerõvijã Jesu Kiristu rovake, uu mijẽ remẽ. 9Janejare'e tè pepyteporopa, Wa'yry Janerõvijã Jesu Kiristu reve tapeiko ipi. Aje ajawyi pemokasi jẽtà penereko. Temirovija rõmõ tè ekoi Janejare'e.

“Tapejimowaite e'ã ojiwyi peiko”, e'i mã'ẽ

10Tapejapyaka katu ikõ eayvu rè nẽ, eretãrãgwerà kõ. Kee a'e Janerõvijã Jesu Kiristu ayvu rupi. Ojeevejẽ ikõ Janejare'e ayvu rupi katu tapeiko ipi nẽ, a'e pejẽ. Tapejimoe'y e'yi e'ã ikõ ojiwyi ipi nẽ. Ojevo jẽ ikõ tapejipy'amogeta emimota rupi ipi nẽ, a'e pejẽ. 11Kee e'i Koroe retãrã kõ mõ penewarà imomewa ije: “Ojimoe'yipa ojiwyi iko kupa. Ijayvu teitetepa iko kupa ipi”, e'i mã'ẽ. 12Peneirõarà kõ mõ itõkõ, “Pauru koty rewarà tè ije!” e'i oupe. Ãmõ peneirõarà kõ mõ kee e'i teve: “Aporu koty rewarà tè ije”, e'i oupe. Ãmõ kõ, “Peturu koty rewarà tè ije”, e'i oupe. Ãmõ kõ, “Kiristu koty rewarà tè ije”, e'i oupe. Ojirõarõ iko wyi aepo e'i kupa. Aepo jaa penewarà ojenupa ije.#J.K.R. 18.24

13Ajawyi kee a'e pejẽ. Kiristu py'a katu rupi rõwã a'evo peiko, a'e pejẽ. Ije rõwã amãnõ yvyra jipokana rè peaiwererà repykarà mõ. Eayvu rupi rõwã pejimojãmorĩoka peiko. Ajawyi ekoty rewarà kõ rõwã pejẽ. 14Awyje katu sitõkõ noporomojãmorĩ. Awyje katu sitõkõ kejõ kõrijõ tè amojãmorĩ mãe kõ. Kiripu. Kaiju. Mokopejõ tè amojãmorĩ.#J.K.R. 18.8; 19.29; Rom. 16.23 15Ajawyi ava jẽ rõwã “Pauru ayvu rupi ajimojãmorĩ”, e'i kuwa. 16(Õ'õ, Sitepana retãrã kõ teve sitõkõ amojãmorĩ. A'e kõ kõrijõ tè maevo. Nakuwai ãmõ kõ. Maevo naikoi ky'y.)#1Kor. 16.15 17Poromojãmorĩ mã'ẽ rõmõ rõwã Kiristu epyteporo taiko mijã. Wayvu e'eay mojenuarà rõmõ tè epyteporo taiko mijã. Jane kõ tekokuwaa rupi rõwã amojenu aiko. Ãmõ, etekokuwaa rupi rõwã teve amojenu aiko. Aje, Kiristu tekokuwaa rupi tè amojenu aiko ipi. Ãwĩvo remẽ tè Kiristu mãnõawerà yvyra jipokana rè mã'ẽ ywesõ ikasità jane kõ pè.

“Jane kõ tekokuwaa wyi wete Janejare'e tekokuwaa”, e'i mã'ẽ

18Kee a'e imojenu erokwa ipi: “Kiristu omãnõ janerekovijarerà rõmõ”, a'e imojenu. Aepo amojenu remẽ, kee e'i waiwererà noity tari mãe kõ ipi: “Noporomotekokuwai mã'ẽ tè aepo”, e'i ywe'e tite kupa ipi. Noenu tari ywe'e tite iko kupa ipi. Aepo e'i mãe kõ, awyje Janejare'e omoisyrytà owyi mãe kõ tè. Ajamã'ẽ jane kee ja'e, emireko katuarà kõ rõmõ jaiko remẽ: “Ayvu ikasiay mã'ẽ aepo e'i!” ja'e. [Aepo mojenua rupi tè jajirovija ee ky'y.] 19A'evoa rè Janejare'e okusiwaokapa [tãmõ Isajasi pè tomojenu]. Kee e'i itõkõ ikusiwaoka amãtejẽ karamoe remeve:

“‘Atekokuwavay aiko’, e'i tite kupa.

Ajamã'ẽ eupe notekokuwai kupa.

Otekokuwa rã'ãga tè apijarerà kõ iko.

Amojikuwaoka kõtà otekokuwa rã'ãga mãe kõ rõmõ”, e'i itõkõ ikusiwaoka maekwerà.#Isa. 29.14

20Ike yvy pè nuvei 'eteay jane kõ otekokuwavay teãmã mãe kõ. Ãmõ, nuvei 'eteay teve ovote Janejare'e ayvu e'eay rè ojimotekokuwa ikuwapa iko mãe kõ. Nuvei 'eteay teve tãmõ Moisesi remikusiwarerà rè otekokuwavay teãmã mãe kõ. Nuvei 'ete poroayvuvajatà mãe kõ. A'e kõ pewarà mõ Janejare'e e'i: “Napetekokuwa ekojẽi peiko”, e'i ijupe kõ ãmẽ.#Jo 12.17; Isa. 19.12; 44.25 21Ajawyi, ava mõ sõ kee e'i remẽ: “Etekokuwaa rupi tè Janejare'e akuwatà ky'y”, e'i tite sõ remẽ, Janejare'e nojikuwaoka'ãi ijupe. Ajamã'ẽ, ava mõ Janejare'e ayvu mojenua rupi ojirovija ee remẽ, Janejare'e wereko katutà ãmẽ. Ayvu poromoeawyry maevo sõ tite mã'ẽ rupi tẽ tesõ wereko katutà ãmẽ ereko. Janejare'e otekokuwavay mã'ẽ rupi a'evo werekotà. 22Ijatyray Juteu kõ kee e'i mãe kõ: “Janejare'e kasia rupi tè mãrãnà jikuwa e'ã reinõa rè oromã'ẽ remẽ tè kuwa ‘aje’ oro'e kuwa mijã”, e'i mãe kõ ipi. Aepo ne'i Juteu rõwã mãe kõ ajamã'ẽ ipi. A'e kõ kee e'i tite: “Oremotekokuwavay remẽ tè kuwa ‘aje’ oro'e kuwa mijã”, e'i tite teve kupa. 23Ajamã'ẽ kee jaa oromojenu ipi: “Kiristu omãnõ yvyra jipokana rè, jane kõ rekovijarerà rõmõ, janeaiwererà repykarà mõ”, e'i mã'ẽ oromojenu oroiko. Juteu kõ wenu remẽ, ojikõ'õ ywe'e tite enu tare'ã kupa ipi. Ãmõ, Juteu rõwã mãe kõ wenu remẽ, oojai kõrijõ tè iko kupa ipi. “Ayvu poromoeawyry mã'ẽ tè aepo jaa”, e'i ywe'e tite ikuwa e'ã kupa ipi. [Noerovija tari ywe'e tite kupa rewarà mõ aepo e'i kupa ipi.] 24Na'evoi ãmẽ jane Janejare'e remipyteporokwerà kõ rõmõ jaiko. Kiristu pupe Janejare'e kasiay wetea omojikuwaoka janeupe. Itekokuwaa ve omojikuwaoka janeupe. Ajawyi, “Ayvu poromotekokuwavay mã'ẽ sienu”, ja'e enu. Juteu kõ aepo e'i, ijayvu wenu katu kupa remẽ. Ãmõ, Juteu rõwã mãe kõ ve aepo e'i, ijayvu wenu katu kupa remẽ. 25Janejare'e notekokuwai maevo sõ tite jane kõ pè. Ãmõ, nikasi maevo sõ tite teve. Ajamã'ẽ jane kõ wyi wete mijẽsi Janejare'e ikasiay wete iko ipi. A'e kõ wyi wete mijẽsi teve otekokuwavay wete iko ipi.

26A'evoa rè kee a'e pejẽ, eretãrãgwerà kõ. Pejipy'amogeta manyvo põ peiko Janejare'e pepyteporo remẽ. Jane kõ remimoe'e rõmõ rõwã itõkõ pejẽ peiko. Ava jẽ rõwã kee e'i pejẽ: “Otekokuwavay mãe kõ tè ãwĩ kõ”, ne'i'ãi pejẽ. Pe'ĩpe'ĩgà tè teãmã itõkõ peneirõarà kõ otekokuwavay teãmã mãe kõ. A'evo ve pe'ĩpe'ĩgà kõrijõ tè ikasi teãmã mãe kõ ekoi, ijayvukasi teãmã mãe kõ ekoi. A'evo ipe pejẽ peiko. 27Ajamã'ẽ Janejare'e pepyteporo jẽ, ãwisõ napetekokuwai epe remẽ. Ãwisõ napekasi epe remẽ teve. A'evo omosĩoka otekokuwa maevo sõ tite mãe kõ, [nojirovijai ee mãe kõ]. Ikasi maevo sõ tite mãe kõ ve omosĩoka, 28nopyteporo kõi remẽ. Emirõarõ kõ tẽ tesõ opyteporo kõ. Kejõ Janejare'e opyteporo wemĩgwai kõ rõmõ toiko kupa. Jane nikasi mãe kõ. Ãmõ, temirõarõgwerà kõ. Ãmõ, temimojaiwea kõ. A'e a'e kõ opyteporo Janejare'e. A'evoa rupi wereko noerovijai mãe kõ tekokuwaa rã'ãga imomioka ijupe kõ. 29Ajawyi, “Ije ywesõ ekatuay ãmõ jane kõ wyi aiko ipi”, nija'e'ãi kuwa Janejare'e rovake jaiko ipi. 30Janekatu rè rõwã janepyteporo Kiristu Jesu remĩgwai rõmõ tijaiko ipi. Janejare'e opota wyi tè a'evo janerereko ipi. Kiristu omãnõa rupi Janejare'e tekokuwaa omojikuwaoka janeupewarà mõ. [Kiristu nojavy ekojẽi Janejare'e rekoa ipi.] Ajawyi, eevejẽ jaiko mãe kõ rõmõ ivo mãe kõ rõmõ janererekotà ãmẽ. Oupewarà kõ rõmõ janerereko ipi. Janeaiwererà omoepypa omãnõa rupi. Ajawyi, kãramõ, jakãjã remẽ, Janejare'e pyri tè jaikotà ky'y. 31A'evoa rè kee e'i ikusiwaoka Janejare'e karamoe remeve: “Ava mõ sõ opota ojimoe'e remẽ, kee te'i kõrijõ: ‘Janejare'e remireko katuarà rõmõ tè ije aiko’, te'i kõrijõ ojimoe'e ãmẽ”, e'i maekwerà.#Jer. 9.24

Currently Selected:

1 Korĩtu 1: oymNT

Highlight

Copy