Génesis 6
6
Eperãarã kꞌachia pꞌaneedapꞌedaa
1Maapai na pꞌekꞌau eujãde eperãarã cho–kꞌara ĩwajida. 2Angeleerãpa eperãarã kꞌaurã kꞌĩra wãree unudakꞌãri, miakꞌãijida ãchia kꞌinia pꞌanadapꞌedaarã ome.
3Mãga unukꞌãri, Tachi Akꞌõrepa mãgaji:
—Eperãarã ichita chokꞌai pꞌanapi–e paitꞌee, na pꞌekꞌau eujãdepema perã. Ciento veinte añopai choodaitꞌeeda aji.
4Mãgá angeleerã araa padakꞌãri eperãarã kꞌaurã ome, ãchi warrarã ũkꞌuru gigante uchiajida. Mamĩda tꞌẽepai ichiaba gigante paraaji. Chonaarãwedapemaarãpa mãgɨɨrã tꞌo pꞌanapachida, ne–inaa kꞌĩra tꞌãdoo oopatapꞌedaa perã.
5Maapai Tachi Akꞌõrepa eperãarã pia akꞌɨ–e paji, audú ne–inaa kꞌachia ooi awaa pꞌanapatapꞌedaa perã mãikꞌaapa kꞌĩsia kꞌachia aupai kꞌĩsiapatapꞌedaa perã.
6Mapa tꞌãri pꞌua bapꞌeda, Tachi Akꞌõrepa mãgaji:
7—Páripɨ na eperãarã oojikꞌate aji. Eperãarã mɨchia ooda jõtꞌaaitꞌee. Ichiaba ne–animalaarã taunomaa, tausaaree beerã jõpiitꞌeeda aji, chi eujãde bipa urtꞌĩu nĩuteepata mãikꞌaapa ipanaarã paara.
8Mamĩda Noepa Tachi Akꞌõrede ijãa bapachi. Mapa Tachi Akꞌõrepa iru pia akꞌɨpachi.
Noepa barco waibɨa ooda
9Noé nãga bapachi. Noé tꞌãri pia bapachi. Oopachi Tachi Akꞌõrepa oopi bɨkꞌa. Apemaarã iru ikꞌaawa pꞌanapatapꞌedaarãpa audú ne–inaa kꞌachia oopachida mĩda, irua mãga ookꞌaa paji. Tachi Akꞌõrepa kꞌinia bɨkꞌa oopachi. 10Noepa warrarã õpee iru baji. Tꞌɨ̃jarapachida Sem, Cam mãikꞌaapa Jafet.
11Tachi Akꞌõre–itꞌee na pꞌekꞌau eujãde audú kꞌachia paraaji. Eperãarã chĩara ome chõopachida mãikꞌaapa peepachida. 12Eperãarãpa ne–inaa kꞌachia kꞌĩra tꞌãdoo oo wãpachida, kꞌĩra nejasiada–ee.
13Mãga unukꞌãri, Tachi Akꞌõrepa Noemaa mãgaji:
—Kꞌĩsia iru bɨda aji, eperãarã jõtꞌaaitꞌee, na pꞌekꞌau eujãde ne–inaa audú kꞌachia oomaa pꞌanadairã. Maperãpɨ na pꞌekꞌau eujã jõmaweda jõtꞌaaitꞌeeda aji. 14Pɨ, pɨchideerã ome madeepa chokꞌai uchiadamerã, barco waibɨa oopáde aji. Ma barco nãga ooipia bɨ. Pakꞌuru kꞌayoo kꞌarakꞌaraa jɨrɨipia bɨ. Mãgee pakꞌurudee barco ooitꞌee. Ma pakꞌuru jɨrrɨpa sooipia bɨ taawaikꞌa eere mãikꞌaapa edajãare. Ichiaba barco edajãde cuarto ooipia bɨ. 15Nãga ooipia bɨ chi waibɨa: ciento treinta y cinco metros chi teesoo; veintidós metros apꞌeda waa metro esa–aukꞌa chi jobɨa; trece metros apꞌeda waa metro esa–aukꞌa chi ɨtꞌɨa. 16Piso õpee óoji. Chi te kꞌiru kꞌaitꞌa metro esa–aukꞌa aɨ ekꞌari, ventana óoji mãikꞌaapa puerta aba bɨ́ji ma barco bi abaade. 17Mɨa eujã jõmaweda ũutꞌaaitꞌee paniapa. Eujãde chokꞌai beerã jõmaweda jõtꞌaaitꞌee. 18Mamĩda pɨ ome mɨa pacto ooitꞌee. Pɨ, pɨchideerã ome kꞌaripaitꞌee. Ma barcode pɨa tꞌĩupiitꞌee pɨ wẽra, pɨchi warrarã mãikꞌaapa ãchi wẽraarã. 19Ichiaba ne–animal chaachaadepema pɨa barcode ateeitꞌee; chi ɨmɨkꞌĩra, chi wẽra ome. Mãgá ne–animalaarã pɨkꞌa chokꞌai uchiadaitꞌee. 20Mãgá omee–omee tꞌĩupíji ne–animalaarã kꞌĩra tꞌãdoo: tausaaree, taunomaa, eujãde bipa urtꞌĩu nĩuteepata mãikꞌaapa ipanaarã, mãgá chokꞌai uchiadamerã. 21Chikꞌo pꞌepáde aji, parãpa mãikꞌaapa ma ne–animalaarãpa kꞌodamerã barcode pꞌanaruta misa.
22Noepa jõma ooji Tachi Akꞌõrepa jaradakꞌa.
Currently Selected:
Génesis 6: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.