Génesis 42

José chi ɨ̃pemaarã ome Egiptode unuda

1José akꞌõre Jacob Canaán eujãde atꞌãri bapachi chi warrarã ome. Irua kꞌawakꞌãri Egipto eujãde chikꞌo paraa, chi warrarãmaa mãgaji:

—¿Sãapꞌeda parã jãma kꞌĩra akꞌɨ para nɨ̃bɨma aji, chikꞌo jɨrɨnada–ee? 2Egiptode trigo paraada a pꞌanɨ. Wãdapáde aji, Egiptodee trigo netode, maa–e pɨrã tachi jarrapa piudaridayada aji.

3Mãpai José ɨ̃pemaarã diez Egiptodee wãjida trigo netode. 4Mamĩda ãchi akꞌõrepa José ɨ̃pema Benjamín wãpi–e paji, ode ne–inaa kꞌachia pꞌasai jĩakꞌaapa. 5Israel warrarã awaraa cananeorã ome aukꞌa wãjida ma eujã jõmaade jarrajara paraada perã.

6Maapai José Egipto pidaarã poro waibɨa paji. Iruata trigo neto pëipachi awara ãiipa chedapꞌedaarãmaa. Chi ɨ̃pemaarã Egiptode panadakꞌãri, José kꞌĩrapite bedabaidachida ãchi tau bɨɨrɨ eujãde tꞌõbairutamaa. 7Josepa ãra unukꞌãri, kꞌawaji chi ɨ̃pemaarã. Mamĩda irua kꞌawa–ee pɨkꞌa beeji.

Trigo neto iididakꞌãri, Josepa ijɨ̃atɨ pedeeji:

—¿Parã, sãmãikꞌaapa cherutama? aji.

Ãchia pꞌanaujida:

—Tai Canaandeepa cherutada ajida, chikꞌo netode.

8Josepa ãra kꞌawaji mĩda, ãrapa iru kꞌawada–e paji.

9Mãpai Josepa kꞌirãpaji ichi kꞌũtrãaweda kꞌãimokꞌaraada. Ijɨ̃atɨ pedeepa mãgaji:

—Parã seewata trigo netode che pꞌanɨda aji. Pãchi kꞌinia nidada aji, tai eujã akꞌɨde.

10Pꞌanaujida:

—Mãga–eda ajida. Tai pɨ mimiapataarã́kꞌapɨ pꞌanɨ. Trigo netodeta che pꞌanɨda ajida. 11Tai jõmaweda akꞌõre apaideepa uchiadapꞌedaarã. Tai nepɨra jɨrɨdakꞌaa chĩara ome. Ma awara chĩara eujãde mãgá nipadakꞌaa.

12Mãpai Josepa mãgaji:

—Seewada aji. Parã chejidada aji, na eujã akꞌɨde, tꞌẽepai chõo che kꞌinia pꞌanadairã.

13Mamĩda pꞌanaujida:

—Tai pɨ mimiapataarã. Canaán eujãde pꞌanapata. Tai ɨ̃pemaarã doce, akꞌõre apaideepa uchiadapꞌedaa. Chi tꞌẽepema aba tai akꞌõre ome beeji. Chi apema tai ome wẽ–e.

14Mãpai Josepa mãgaji:

—Mɨa jaradakꞌa parã na eujã akꞌɨ chejidada aji. 15-16Nãga oodaipia bɨ mɨa parã pedee ijãamerã. Aba wãpáde aji, pãchi ɨ̃pema tꞌẽepema atade. Chi apemaarã nama presoorãkꞌa pꞌaneedaitꞌee. Irua pãchi ɨ̃pema anee–e pɨrã, mɨa kꞌawaaitꞌee wãara na eujã akꞌɨde che pꞌanɨ. Faraón kꞌĩrapite mɨa juraa bɨ parã namãikꞌaapa uchiada–e paitꞌee, pãchi ɨ̃pema cheru misa.

17Mãga jarapꞌeda, Josepa carcelde tꞌɨpikꞌooji ãchi jõmaweda kꞌãima õpee. 18Mamĩda kꞌãima õpeemaa jaraji:

—Mɨa Tachi Akꞌõre waawee baparida aji. Nãga oodaipia bɨ chokꞌai uchiadaitꞌee. 19Parãpa wãarata jara pꞌanɨ pɨrã, nama carcelde aba ata bë́itɨ mãikꞌaapa chi apemaarã wã́tɨ trigo teede pãchi ëreerãmaa. 20Tꞌẽepai pãchi tꞌẽepema aneedapáde aji. Maa–e pɨrã mɨa parã peepikꞌooitꞌeeda aji.

Ijãajida. 21Mamĩda chi ɨ̃pemaarã wãdaitꞌee pakꞌãri ãchi temaa, ãchi pitapai pedee para bapachi:

—Nãgá pꞌanɨda ajida, Tachi Akꞌõrepa tachi kꞌachia oo bairã. Nãga oomaa bɨ tachi ɨ̃pema chupɨria kꞌawaada–e pada perã. Mia baji mĩda, irua chupɨria iidida ũrida–e paji.

22Mãpai Rubenpa mãgaji:

—¿Mɨa parãmaa jaraji–ekꞌã aji, ma kꞌachia oonaadamerã? Mamĩda parãpa ũri kꞌiniada–e paji. Ɨ̃rá ma kꞌaurepa Tachi Akꞌõrepa tachi kꞌachia oomaa bɨda aji.

23Ãra pedee pꞌanɨ misa, Josepa ũri baji. Mamĩda ãrapa kꞌawada–e pꞌanajida. José Egipto pidaarã pedeede pedee baji. Mamĩda kꞌõpꞌãyo aba iru baji. Ma eperãpa hebreo pedee, pedee kꞌawaa baji. Mapa Josepa Egipto pedeede pedeekꞌãri, ma eperãpa hebreo pedeede jarapachi José ɨ̃pemaarãmaa. Mãgá chi ɨ̃pemaarãpa kꞌawada–e pꞌanajida Josepa ãchi pedee ũri bɨ. 24Ãra pedee ũrikꞌãri, José awara ãi wãji jẽede mãikꞌaapa chepꞌeda, ãra kꞌĩrapite Simeón jɨ̃piji carcelde tꞌɨ nɨ̃bɨpiitꞌee. Tꞌɨ nɨ̃bɨpipꞌeda, mama ata bɨji chi tꞌẽepema aneerutamaa.

25Maapꞌeda jara pëiji ichi mimiapataarãmaa trigo neto pëidamerã ãramaa. Ma awara jaraji teedamerã chikꞌo ode kꞌo wãdamerã. Ichiaba jaraji ãra pꞌaratꞌa waya pëidamerã ma trigo ome costal chaachaa. Mamĩda ãrapa kꞌawada–e paji. 26Ma costal ãchi burro ɨ̃rɨ bɨdapꞌeda, wãjida.

27Otꞌa kꞌãidaitꞌee pakꞌãri, abaapa ichi costal ewaji trigo teeitꞌee chi burromaa. Mãga bɨde ma costalde ichi pꞌaratꞌa unuji. 28Mãpai chi ɨ̃pemaarãmaa mãgaji:

—¡Mɨ pꞌaratꞌa nama bɨda aji, mɨchi costalde!

Mãga ũridakꞌãri, jõmaweda ãchobeedachida mãikꞌaapa ãchi pitapai mãgajida:

—¿Kꞌãata oojima ajida, Tachi Akꞌõrepa?

29Canaán eujãde panadakꞌãri, ãchi akꞌõre Jacobmaa ãchi pꞌasada nepɨrɨjida mãikꞌaapa mãgajida:

30—Jã eujãdepemaarã poro waibɨapa tai ɨmɨateejida ajida. Jaraji tai ãchi eujã akꞌɨ nipajida, tꞌẽepai chõonadaitꞌee. 31Mamĩda jarajida tai kꞌĩra jĩpꞌa pꞌanapata mãikꞌaapa kꞌachiade nipadakꞌaa. 32Jarajida tai ɨ̃pemaarã doce, akꞌõre apaideepa uchiada. Aba tai ome wẽ–eda ajida, mãikꞌaapa aba tai akꞌõre ome beeji.

33Mãpai ma poro waibɨapa jaraji: “Nãgá mɨa kꞌawaai parã wãara wa seewa jara pꞌanɨ. Parãdepema aba nama atabëidapáde aji, trigo ateeruta misa pãchideerã–itꞌee. 34Tꞌẽepai parã tꞌẽepema aneedapáde aji. Mãgá mɨa kꞌawai parã kꞌĩra jĩpꞌa nipapata mãikꞌaapa cheda–e paji tai eujã akꞌɨde. Parã tꞌẽepema aneedakꞌãri, chi atabëida kꞌena pëiitꞌeeda aji, mãikꞌaapa na eujãde nepɨra wẽe nipapataadaitꞌee.”

35Ãchi costal ewa atadakꞌãri, costal chaachaa ãchi pꞌaratꞌa unujida. Mapa ãchobeedachida, ãchi akꞌõre paara.

36Mãpai Jacobpa mãgaji:

—¿Pãchi kꞌaurepa mɨ warra wẽe beeru–ekꞌã? aji. José wẽ–eda aji, Simeón ichiaba. Ɨ̃rá Benjamín paara atee kꞌinia pꞌanɨda aji. ¡Apidaapa mɨ chupɨria kꞌawaada–eda! aji.

37Mãpai Rubenpa chi akꞌõremaa mãgaji:

—Mɨa Benjamín akꞌɨ bapariitꞌee mãikꞌaapa waya aneeitꞌeeda aji. Anee–e pɨrã, pɨa mɨ warrarã omeeweda peepáde aji.

38Mamĩda Jacobpa ijãa–e paji. Mãgaji:

—Mɨ warra parã ome wã–eda aji. Parã ɨ̃pema José piujida aji. Warra apai beeru Raquelpa tꞌoda. Ode wãdade ne–inaa kꞌachia pꞌasaru pɨrã, parã kꞌaurepa mɨ tꞌãri pꞌuapa piu baibeeyada aji.

Currently Selected:

Génesis 42: sjaB

Highlight

Copy