Daniel 8

Danielpa oveja mãikꞌaapa chivo kꞌãimokꞌaraa pɨkꞌa bɨde unuda

1Rey Belsasar año õpee rey bɨde, kꞌãimokꞌaraa pɨkꞌa bɨde mɨ, Danielpa awaraa ne–inaa unuji.

2Ma kꞌãimokꞌaraa pɨkꞌa bɨde mɨ Elam eujãde baji; Susa pꞌuuru waibɨa ciudadela#8.2 Rey palacio badamãi ciudadela apachida. Mãgɨ́ murallapa tꞌɨakꞌau baji. apatapꞌedaade. Mama mɨ Ulay to kꞌaitꞌa bainɨ̃ baji. 3Mama bɨde mɨa pi–ia akꞌɨkꞌãri, unuji oveja ɨmɨkꞌĩra to ide akꞌɨnɨ̃ bɨ. Ma oveja cacho omé teesoo iru baji. Cacho aba tꞌẽera uchiada teesoora baji.

4Mama mɨa pi–ia akꞌɨmaa bɨde, mãgɨ́ ovejapa ichi cachopa occidente eeree; norte eeree mãikꞌaapa sur eeree su wãpachi. Awaraa ne–animalaarã apidaapa mãgɨ́ ome pꞌoyaada–e paji, ma cachopa sutꞌaa wãda perã. Ichia oo kꞌiniata ooji mãikꞌaapa waapɨara juataura pawãpachi. Mapa apida iru juadeepa pꞌoyaa uchiada–e paji.

5Mɨa atꞌãri ma unudade kꞌĩsiamaa bɨde unuji chivo occidente eereepa pꞌira cheru. Audú isapai pꞌira chewãda perã, chi jĩru eujãde tꞌõbaikꞌaa paji. Mãgɨ́ chivopa cacho choma iru baji ichi tau omé esajĩakꞌa. 6Ma chivo pꞌira chedapa ma oveja cacho omé iru bada mɨa to ide unudamaa wãji mãikꞌaapa chi cachopa golpe sutꞌaaji. 7Mɨa unuji ma chivopa oveja cacho omé iru bada golpe ooru mãikꞌaapa chi cacho omeeweda kꞌõrakꞌooru. Mapa ma oveja iru ome waa chõo–e paji, juatau wẽe beeda perã. Mãpai ma chivopa ma oveja eujãde batꞌatꞌaaji mãikꞌaapa iru ɨ̃rɨ tꞌɨamaa beeji. Apidaapa iru pꞌoyaa kꞌaripada–e paji.

8Mãpai ma chivo waapɨara juataura pawãpachi. Mamĩda audú juataura beekꞌãri, chi cacho choma bada kꞌõradachi. Ma pari cacho kꞌĩmari uchiajida mãikꞌaapa ɨa pꞌaneejida norte eeree, occidente eeree, sur eeree mãikꞌaapa oriente eeree. 9Mãpai ma cacho kꞌĩmaridepema abaadeepa awaraa cacho ma–ãri uchiaji. Mãgɨ́ wari wãji waibɨa padarumaa. Wari wãji sur eeree; oriente eeree mãikꞌaapa occidente eeree, tachi eujã pi–ia bɨmaa. 10Mãgá audú waibɨa wariji ɨtꞌaripema soldaorã chipꞌepatamãi parumaa. Lucero ũkꞌuru baaipikꞌooji mãikꞌaapa aɨ ɨ̃rɨ tꞌɨakꞌooji. 11Mãgá ɨtꞌaripema soldaorã poro waibɨa kꞌãyaara waibɨara pa kꞌinia baji. Mapa jaraji Tachi Akꞌõre tede ne–animalaarã paanaadamerã mãikꞌaapa mama ne–inaa kꞌachia ooji. 12Mãgá ewari chaa ma tede ne–animalaarã paadai kꞌãyaara, mama ne–inaa audú kꞌachia oopachida, Tachi Akꞌõrepa jara bɨkꞌa oodaamaa pꞌanadapꞌedaa perã. Mapa irua Tachi Akꞌõre, eperãarã paara bɨji ichi jua ekꞌari. Mãgá irua Tachi Akꞌõrepa wãarata jarada seewakꞌa papiji. Maapai ma cachopa ichia kꞌiniata oo wãji mãikꞌaapa ne–inaa jõmaade pia uchiaji.

13’’Maapꞌeda mɨa ũriji angelpa awaraa angelmaa nãga iidimaa bɨ:

—¿Sãapai jõitꞌeema na ne–inaa kꞌachia oomaa bɨ ne–animalaarã ewari chaa paapata altarmãi? ¿Jõmasaa taarãitꞌeema aji, na pꞌekꞌau kꞌachia waibɨa oomaa bɨ? Iru Tachi Akꞌõre tede tꞌɨamaa bɨ mãikꞌaapa soldaorã Tachi Akꞌõre jua ekꞌari beerã#8.13 Kꞌĩsiapata nama ‘soldaorã’ akꞌãri, jara kꞌinia bɨ Tachi Akꞌõrede ijãapataarã. kꞌachia pꞌe iru bɨ.

14Mãpai chi apema angelpa pꞌanauji:

—Kꞌãima dos mil trescientos taarãitꞌeeda aji. Maapꞌeda waya ma te pia oodaitꞌeeda aji, kꞌachia wẽe beemerã.

Kꞌãata jara kꞌinia bɨ Danielpa kꞌãimokꞌaraa pɨkꞌa badade unuda

15Mɨ, Danielpa ma kꞌãimokꞌaraa pɨkꞌa badade kꞌĩsiamaa beeji kꞌawaaitꞌee kꞌãata jara kꞌinia bɨ. Mãga bɨde mɨ kꞌĩrapite eperãkꞌa padachi. 16Mãpai mɨa ũriji Ulay to esa–aukꞌaapa golpe biaru: ‘‘Gabriel, na eperãmaa jaráji ma kꞌãimokꞌaraa pɨkꞌa bada kꞌãata jara kꞌinia bɨ.’’

17Mãpai Gabriel mɨ kꞌaitꞌa chekꞌãri, mɨ pꞌeradachi mãikꞌaapa bedabaidachi tau bɨɨrɨ eujãde tꞌõbairumaa. Mãpai irua mɨmaa mãgaji:

—Eperã, kꞌawáji ma kꞌãimokꞌaraa pɨkꞌa bada jara kꞌinia bɨ ne–inaa pꞌasaitꞌee Tachi Akꞌõre ewari waibɨa ewate pakꞌãri.

18Iru pedeemaa bɨde, mɨ kꞌĩra kꞌĩdachi mãikꞌaapa eujãde barrobai baainaji. Mama pia kꞌãidachi. Mamĩda irua mɨ tꞌõbaipꞌeda, pꞌirabai ataji 19mãikꞌaapa mãgaji:

—Mɨa pɨmaa jaraitꞌeeda aji, ne–inaa pꞌasaitꞌee bɨ Tachi Akꞌõre kꞌĩrau jõ wãkꞌãri. Eperãarãpa pꞌekꞌau kꞌachia oopata kꞌaurepa iru kꞌĩrau bɨ. Mamĩda ichi kꞌĩrau jõitꞌee ichi ewari waibɨa awara bɨda pakꞌãri.

20’Ma oveja pɨa unuda cacho omé iru bada jara kꞌinia bɨ Media eujãdepema rey aba mãikꞌaapa Persia eujãdepema rey aba. 21Jõdee ma chivo jara kꞌinia bɨ Greciadepema rey. Ma cacho choma iru bada ichi tau omé esajĩakꞌa jara kꞌinia naarapema Greciadepema rey. 22Ma cacho kꞌõrapꞌeda, cacho kꞌĩmari uchiadapꞌedaa jara kꞌinia bɨ ma Greciadepema rey jua ekꞌari eujãde awaraa reyrã kꞌĩmari uchiadaitꞌee. Mamĩda ãchi makꞌɨara juataura pꞌanada–e paitꞌee chi naapemakꞌa.

23’Ma reyrã jõ wãdakꞌãri mãikꞌaapa ãchi jua ekꞌari pꞌanapataarãpa ne–inaa audú kꞌachia oo wãdakꞌãri, rey awaraa uchiaitꞌee. Ma rey audua baitꞌee mãikꞌaapa ikꞌawaa baitꞌee. 24Mãgɨ́ rey waibɨa paitꞌee. Mamĩda ichi itu mãga pa–e paitꞌee. Mãgɨpa ne–inaa kꞌĩra tꞌãdoo jõpiitꞌee. Eperãarãpa mãga unudakꞌãri, pꞌera pɨkꞌa para beeitꞌee. Jõmaweda irua oo bɨ pia uchiaitꞌee. Eperãarã poro waibɨarã jõpiitꞌee, Tachi Akꞌõre eperãarã chokꞌara paara. 25Ikꞌawaa bapariitꞌee perã, eperãarã chokꞌara kꞌũraitꞌee mãikꞌaapa mãgá ãra pꞌoyaaitꞌee. Kꞌĩsiaitꞌee ichita jõmaarã kꞌãyaara waibɨara bɨ. Iru jua ekꞌari pꞌanapataarãpa irude ijãadaitꞌee mĩda, irua ãchi traicionaaitꞌee mãikꞌaapa peepikꞌooitꞌee. Chõoitꞌee Ɨtꞌaripema Rey ome. Mamĩda mãgɨpa ichi kꞌĩradoopa iru jõpiitꞌee.

26’Ma kꞌãimokꞌaraa pɨkꞌa badade pɨa ũri baji jarakꞌãri kꞌãima jõmasaa ma ne–inaa kꞌachia oodaitꞌee. Ma jarada wãara. Mamĩda pɨa unuda awaraarãmaa jaranáaji, mãga pꞌasaitꞌee taarãitꞌee perã.

27Ma tꞌẽepai mɨ, Daniel, juatau wẽe beeji mãikꞌaapa kꞌãima chokꞌara kꞌayaa beeji. Maapꞌeda pꞌirabaiji mãikꞌaapa waya Babilonia eujãdepema poro waibɨarã ome mɨchi mimia oomaa beeji. Mamĩda audú kꞌĩsia nɨ̃bapachi ma kꞌãimokꞌaraa pɨkꞌa badade unuda kꞌaurepa, pꞌoyaa kꞌawa–e pada perã kꞌãata jara kꞌinia baji.

Currently Selected:

Daniel 8: sjaB

Highlight

Copy