Daniel 6

Daniel león jɨ̃a pꞌanadapꞌedaamãi batꞌatꞌaadapꞌedaa

1Rey Dariopa ciento veinte poro waibɨarã sátrapa apatapꞌedaarã bɨji, ichi jua ekꞌari eujã awara–awaraa bada akꞌɨpataadamerã. 2Ma awara poro waibɨarã õpee bɨji, ma satrapaarã mimia akꞌɨpataadamerã mãikꞌaapa reymaa jarapataadamerã, mãgá rey netꞌaa atuanaamerã. Ma õpeedepema poro waibɨa aba Daniel paji. 3Daniel audú kꞌĩsia kꞌawaa bada perã, ichi mimia piara oopachi apema poro waibɨarã kꞌãyaara mãikꞌaapa ma eujã awara–awaraa akꞌɨpataarã kꞌãyaara. Maperã reypa kꞌĩsiaji iru ma jõmaarã poro waibɨa bɨitꞌee. 4Mãga kꞌawa atadakꞌãri, apema poro waibɨarãpa mãikꞌaapa ma satrapaarãpa jɨrɨpachida rey kꞌĩrapite Daniel ɨmɨateedaitꞌee. Jɨrɨpachida jaradaitꞌee iru pia mimia–e bɨ. Mamĩda iru pꞌoyaa ɨmɨateeda–e paji, irua maarepida kꞌachia oo–e bada perã mãikꞌaapa iru pia mimia bada perã. Irua ichita oopachi reypa jaradakꞌa. 5Mapa ãchia mãgajida: “Daniel pꞌoyaa ɨmɨateeda–eda ajida, iru kꞌĩra jĩpꞌa mimiapari perã. Aba ɨmɨateedayada ajida, ichi Akꞌõre Waibɨade ijãa bɨ kꞌaurepa rey kꞌĩrapite ne–inaa kꞌachia ooru pɨrã.”

6Mãgá ma poro waibɨarã pedeeteejida satrapaarã ome rey Darío ome pedeenadaitꞌee. Iru kꞌĩrapite panadakꞌãri, mãgajida:

—¡Rey Waibɨa Darío, taipa kꞌinia pꞌanɨ pɨ ichita bapariimerã! 7Tai, pɨ jua ekꞌari mimiapataarã, satrapaarã eujã waibɨa awara–awaraa akꞌɨpataarã ãchi kꞌaripapataarã ome, pɨ ũraapataarã mãikꞌaapa eujã ma–ãriara awara–awaraa akꞌɨpataarã; pia jaraitꞌeera pɨ jua ekꞌari bee eujãdepema poro waibɨarã jõmaweda chipꞌedaidakꞌãri, nãga kꞌĩsiajida. Kꞌinia pꞌanɨ pɨa nãgɨ́ ley jaramerã: namãikꞌaapa waa ewari treinta wãyaarude apidaapa chupɨria iididaikꞌaraa bɨ akꞌõre waibɨamaa wa eperãmaa. Rey Waibɨa, pɨmaa aupai chupɨria iididaipia bɨ. Chi mãga oo–e bɨ león jɨ̃a pꞌanɨ uriade batꞌatꞌaadaipia bɨ. 8Ɨ̃rá Rey Waibɨa, ma ley jaráji mãikꞌaapa pꞌãpíji. Mãgá apidaapa wẽpapida–e pai, tachi Media pidaarã mãikꞌaapa Persia pidaarã leyde mãga jara bairã.

9Mãga iididapꞌedaa perã, rey Dariopa ma ley jaraji mãikꞌaapa pꞌãpipꞌeda, ma pꞌãdade ichi tꞌɨ̃ pꞌã bɨji. 10Danielpa kꞌawaakꞌãri reypa ichi tꞌɨ̃ pꞌãda ma ley pꞌãdade, wãji ichi temaa mãikꞌaapa ichi kꞌãipari cuartodepema ventana ewatꞌaaji. Ma ventana kꞌĩrapite Jerusalén pꞌuuru audú tꞌɨmɨ́ bapachi. Mapa naaweda ewari chaa ɨtꞌaa tꞌɨ̃da õpee ɨtꞌaa tꞌɨ̃pariidakꞌa, mama bedabaipꞌeda, Tachi Akꞌõremaa ɨtꞌaa tꞌɨ̃maa beeji. 11Mãɨmisa ma poro waibɨarã Daniel tede tꞌĩujida mãikꞌaapa unujida iru ɨtꞌaa iidimaa bɨ ichi Akꞌõre Waibɨamaa, irua ichi kꞌaripamerã.

12Mãga unudakꞌãri, reymaa wãjida mãikꞌaapa ma ley irua pꞌãda kꞌirãpapijida. Mãgajida:

—Rey Waibɨa, ¿pɨa nãgɨ́ ley pꞌãpiji–ekꞌã? ajida. Ewari treinta wãyaarude apidaapa chupɨria iididaikꞌaraa bɨda a bɨ akꞌõre waibɨamaa wa eperãmaa. Pɨmaa aupai chupɨria iididaipia bɨ. Chi mãga oo–e bɨ batꞌatꞌaadaitꞌeeda a bɨ, león jɨ̃a pꞌanɨ uriade. ¿Wãara–ekꞌã?

Reypa pꞌanauji:

—Mãgada aji. Ichita na leyde jara bɨkꞌa oodaipia bɨ tachi Mediadepema mãikꞌaapa Persiadepema leyde jara bɨkꞌa. Apidaapa mãga oonaapáde adaikꞌaraa bɨ.

13Mãpai ma poro waibɨarãpa mãgajida:

—Rey Waibɨa, jã Daniel tachi chonaarãpa Judá eujãdeepa presokꞌa aneedapꞌedaadepemapa pɨ waawee–e bɨ mãikꞌaapa ookꞌaa na ley pɨa pꞌãpidade jara bɨkꞌa. Ma kꞌãyaara, ewari chaa irua ɨtꞌaa tꞌɨ̃da õpee ɨtꞌaa tꞌɨ̃pari ichi Akꞌõre Waibɨamaa.

14Reypa mãga ũrikꞌãri, tꞌãri pꞌua nɨ̃beeji Daniel kꞌinia iru bada perã. Mapa akꞌõrejĩru baairumaa kꞌĩsia nɨ̃bapachi sãgá Daniel ma nepɨradeepa kꞌaripa atai.

15Mamĩda ma poro waibɨarã waya rey kꞌĩrapite chejida mãikꞌaapa mãgajida:

—Rey Waibɨa, pɨa pia kꞌawa bɨda ajida, tachi Mediadepema leyde jara bɨ mãikꞌaapa tachi Persiadepema leyde jara bɨ reypa pꞌãda apidaapa pꞌoyaa jõpida–e pai.

16Mãpai reypa jaraji Daniel aneedamerã mãikꞌaapa ma león jɨ̃a pꞌanɨ uriade batꞌatꞌaanadamerã. Mama panadakꞌãri, reypa Danielmaa mãgaji:

—¡Mɨa kꞌinia bɨ pɨchi Akꞌõre Waibɨapa nadeepa kꞌaripa atamerã, pɨa ichita oopari perã irua oopi bɨkꞌa!

17Mãpai ma uriade batꞌatꞌaadapꞌeda, mãu choma aneejida chi tꞌai jɨ̃a nɨ̃bɨdaitꞌee. Mãpai reypa ichi sortijade sello badapa mãikꞌaapa ichi ekꞌari pꞌanadapꞌedaa poro waibɨarã sortijade sello badapa ma mãu choma bɨde sellaa bɨji apidaapa ãyaa atanaadamerã mãikꞌaapa akꞌɨpidaitꞌee Daniel ome ãchi leyde jara bɨkꞌa oojida. 18Maapꞌeda rey wãji ichi palaciodee. Nekꞌo–ee ichi pꞌarude jẽra banaji mãikꞌaapa oo–e paji ichia ne–inaa oopariida o–ĩa beeitꞌee. Ma awara ma pꞌãrikꞌua pꞌoyaa kꞌãi–e paji. 19Aɨ norema tapꞌedaweda pꞌirabaidachi mãikꞌaapa isapai wãji ma león jɨ̃a pꞌanɨ uria badamaa. 20Mama kꞌaitꞌa pawãkꞌãri, kꞌĩsia nɨ̃bada perã, Danielmaa golpe biaji:

—Daniel, Akꞌõre Waibɨa ichita chokꞌai bapari–itꞌee mimiapari, pɨa ichita oopari irua oopi bɨkꞌa. ¿Pɨchi Akꞌõre Waibɨapa pɨ león juadeepa kꞌaripa atajikꞌã? aji.

21Mãpai ma uria badamãiipa Danielpa pꞌanauji:

—¡Rey Waibɨa, mɨa kꞌinia bɨ pɨ ichita bapariimerã! 22Mɨchi Akꞌõre Waibɨapa ichi ángel pëiji león itꞌai jɨ̃amerã. Mapa mɨmaa maarepida ne–inaa kꞌachia ooda–e paji. Rey Waibɨa, mɨchi Akꞌõre Waibɨapa kꞌawa bɨ mɨa iru kꞌĩrapite ne–inaa kꞌachia oo–e bɨ mãikꞌaapa pɨ kꞌĩrapite ne–inaa kꞌachia oo–e bɨ.

23Mãga ũrikꞌãri, rey o–ĩadachi mãikꞌaapa jaraji Daniel ma león jɨ̃a pꞌanɨ uriadeepa uchia atadamerã. Ẽtꞌa atanadakꞌãri, Daniel kꞌapꞌɨa jõmaweda pia baji. Maarepida tꞌoida wẽe baji, irua ichi Akꞌõre Waibɨade ijãapariida perã. 24Mãpai reypa jaraji ma poro waibɨarã, chi Daniel ɨmɨatee pꞌanadapꞌedaarã, aneedamerã mãikꞌaapa ma león jɨ̃a pꞌanɨ uriade batꞌakꞌoodamerã ãchi wẽraarã ome mãikꞌaapa ãchi warrarã paara. Ma jõmaweda batꞌakꞌoodakꞌãri, ma uria edajãde baaidai naaweda, leonpa ãra kꞌapꞌɨa kꞌaakꞌoojida ãchi bɨɨrɨ bɨakꞌoorutamaa. Mãgá kꞌokꞌoojida.

25Ma tꞌẽepai rey Dariopa na ley pꞌã pëiji jõmaweda ichi jua ekꞌari pꞌanapatapꞌedaa pꞌuuru pidaarã awara–awaraarãmaa, eujã awara–awaraadepemaarãmaa, mãikꞌaapa mãgɨ́ eujãdepema pedee awara–awaraa pedeepataarãmaa:

“Mɨa kꞌinia bɨ parã jõmaweda kꞌãiwee pꞌanapataadamerã mãikꞌaapa netꞌaa pia iru pꞌanapataadamerã. 26Mɨa jara bɨ mɨ jua ekꞌari pꞌanapataarã jõmaarãpa Daniel Akꞌõre Waibɨa waaweepataadamerã mãikꞌaapa irumaa ɨtꞌaa tꞌɨ̃pataadamerã.

’’Iru Jõmaarã Akꞌõre Waibɨa; ichita chokꞌai bapari. Iru ichita jõmaarã rey paitꞌee, iru jõmaarã kꞌãyaara waibɨara bairã. 27Irua eperãarã kꞌaripapari mãikꞌaapa kꞌachia beerã juadeepa uchiapipari. Pajãde, na eujãde paara irua oopari ne–inaa eperãarãpa pꞌoyaa oodakꞌaa ãchi juadoopa. Iruata Daniel león juadeepa kꞌaripa ataji.”

28Maadamãiipa Daniel eperã waibɨa paji rey Darío jua ekꞌari mãikꞌaapa Persiadepema rey Ciro jua ekꞌari.

Currently Selected:

Daniel 6: sjaB

Highlight

Copy