Etanta-nakari 9
9
1Ikanta Tajorentsi itajonkawentakiri Noé itsipataakiri itomipaeni, iroka ikantakiri: “Roshekitee pitomipaeni, ithonkya inampiteeyaawo kepatsiki. 2Ithaawanteemi antamiweripaeni. Eeroka yotashiteerini shiwankiripaeni, antamiweripaeni, nijaweripaeni. 3Kameethatatsi poyaari antamiweripaeni eejatzi pankirentsipaeni. Naakaha pakimirori maawoeni. 4Riima añiinkari wathatsi, eero powakotawo riraa, rootaki añaakayiriri. 5Roo kowaperotachari irahaantsi. Arika piratakakiri pisheninka pompojeri, arira nomatakimi naaka. Arira nokantzityaari pipira, pirentzi, maawoeni atziriyitatsiri, niratakayiri nompojeri.
6Iitarika ompojerini atziri,
Arira rompojeeteeri rirori.
Tema Tajorentsi owetsikakiri atziri, roshiyakaakiri itajorentsishiretzi irirori.
7Roshekitee pitomipaeni eeroka,
Ithonkaeya inampitanteeyaawo kepatsiki.”
8Eekiro iñaanatatziiri Tajorentsi irika Noé itsipataakiri itomipaeni, ikantziri: 9“Pikem, tzimatsi nokashiyaakaakimiri, ari nokantzityaari eejatzi picharinipaeni. 10Ari nokanteri maawoeni antamiweripaeni ikaatzi tsipayitakimiri pishitowaera amaatakomentotsiki: shiwankiripaeni, tsimeripaeni, ikaatera tzimayitaatsini kepatsiki. 11Okaatzi nokashiyaakaakimiri eero nowashiñeero. Eero napiitantaawo oonkawo nowajankitanteeyaari atziriite eejatzi antamiweripaeni. Eero apiita oonkaeya kepatsi othonkaerikari tzimayitaatsiri.” 12Eekiro ikenkithawaetakaatziiri Tajorentsi, ikantziri: “Irika iñahaeteeri riyotanteetyaari tzimatsi nokashiyaakaakimiri, roo piñaapiinteeri eeroka eejatzi antamiweripaeni. 13Arika piñeeri oye menkoriki, piyotzi eenitatsi nokashiyaakaakimiri. 14Arika ooreenkakite kepatsiki, ari iñahaeteeri ikatziye oye. 15Ari nokenkithashireterori naaka nokashiyaakaakimiri eeroka eejatzi antamiweripaeni, eero rapiiteero iñahaero oonkawo othonkaero kepatsi. 16Arika noñeeri oye menkoriki, nokenkithashiretapiinteero nokashiyaakaakimiri rootaki naapatziyanteeyaariri atziripaeni, eejatzi antamiweripaeni jeekatsiri kepatsiki. 17Roo iñeeri atziripaeni riyotantyaari, riyotee eejatzi antamiweripaeni eenitatsi nokashiyaakaantziri.” Roowa iñaani Tajorentsi ikamantakiriri Noé.
18Irika itomipaeni Noé ikaatzi shitowaatsiri amaatakomentotsiki: Sem, Cam, Jafet. Riitaki Cam ipaapatetanakari Canaán. 19Ritaki mawa itomipaeni Noé oshekitaatsiri kepatsiki. 20Owaancheempeki rini Noé, riira etanakawo ipankiyitziro chochoki imiriyiiteeri. 21Ikanta rirakirowa Noé owaa iwankiri, antawoete ishinkitanakawo tee iñaakoteeya, aatonkoryaawaetaka ipankoki. 22Ikanta Cam ipaapatetanakari Canaán, iñaakiri ipaapate raatonkoryaawaetaka, ikamantakiri rirentzi. 23Ipokapaaki Sem itsipatakari Jafet, ramaki ithaari ipashikaeri ipaapate. Itaapi ipokantaka eero iñaantari raatonkoryaakaa. 24Ikanta ikakitee Noé, riyotaki ritaki iyaapitsi itomi pashikaeriri. 25Ikantanaki:
Iyakataarewo rinatye Canaán,
Romperatapiintane rinatye rirentzi.
26Eekiro ikantanakitzi Noé:
Riitaki Tajorentsi tajonkawenteerini Sem,
Riitaki omperateeyaarini Canaán.
27Riitaki Tajorentsi kantakaeyaarini Jafet roshekitanteeyaari,
Inampiteeyaawo iipatsiteki Sem,
Rijatzi omperateeyaarini Canaán.
28Okanta awijakira oonkapaetetantakari kepatsi, ojamani rañaawae Noé okaatzi 350 ojarentsi. 29Okaatzi ojamanitaki rañaaki Noé 950 ojarentsi roojatzi ikamantaari.
Currently Selected:
Etanta-nakari 9: cpyB
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved
