San Marcos 7

Nasa's ewmée vxit-sa

(Mt 15.1-20)

1Txajũ' fxariseowe'sx vxite' Dxus leya's kaapiya'jsawe'sxwa Jerusalenu pa'jçxa Jesus tasxte utxaatx thegya'. 2Aça' Jesus yakh u'jusawe'sxa' kusekhẽ' yu' kaahmée ũ'weçte uyçxa', açewe'wetx fxariseowe'sxa'.

3(Yaçgawe'sx ma'wẽ jxkaathe' Judiuwe'sxa' jxukaysa na'wẽ kuh jwed yũuwa'ja'stxi nwẽesẽ'jẽ' ewmeesa pẽethekahmén jĩçxa: 4Merkaujũ pa'jçxa', kusekhẽ yu' kaahwa'ja' jĩ'tx. Sa' waso, mitxh, kĩhwa iijxũni çam yuutxi' jxuka kajkwekhẽ yu' kaahçxa iijxũwa'ja' jĩnatx kaapiya'ja'.)

5Txãasatx fxariseowe'sx vxite' Dxus leya's kaapiya'jsawe'sxa' na'jĩna Jesusa's pẽjx:

—Idx yakh u'jusawe'sxa' ¿kĩh yũuçxata yaçgawe'sx kaapiya'jnitxi' kxtey yu'çmée, kusekhẽ yu' kaahmée ũ'wé'? jĩte', 6Jesusa' na'wẽk pas:

—I'kwe'sxa' yuwejuçxáa ew we'weçxa', ũuste yu' ewméeçxáa yaakxsai'kwe aça' Isaiasa' isa yuh Dxus we'weni's na'jĩna fxi'jne':

Naa nasa' yuweju yu' adxa's yaaki'tha'w jĩçxawa,

Ũusuh yu' adxa's yaaki'çmeeta'.

7Naa kiwete nasaa kaapiya'jniçxá's kxtey yuuna ũsçxa,

Txã'wẽ Dxus jxkaahni'stha'w kxtey yu' jĩte', kxul yuhna jĩna Dxus we'weni'sku fxi'j Isaiasa'.

8I'kwe'sxa' Dxus jxkaahni yu'sa' nvxihtçxa, naa kiwega nasaa kaapiya'jniçxá's i'kwe nwẽesẽ'jna wala ew ki'su' na'wẽ yũuna: waso, mitxh, kĩjkĩhtxwa txã'wẽ i'kwe ki'su' yu' kaahna.

9Na'jĩ'th na': i'kwe'sxa' naa kiwega nasaa kaapiya'jniçxá's nwẽesẽ'jna ki'sçxa', Dxus jxkaahni yu'sa' nvxihti'kwe. 10I'kwe'sx na'wẽ yũuni's myajkxwe wakx: Moisesa' na'jĩnak fxi'j: Iidx tata iidx mama txãawe'sxtxi' peeygãhna pu'çxwa'ja' jĩ'k. Aça' txã'wẽ yũumée, neywe'sxtxi açewe'wesa' uu ena's ji'phuna jĩ'k. 11-13I'kwe'sx yaçgawe'sxa' na'wẽtx kaapiya'ja': Maa nasawa neywe'sxtxi peeygãhna pu'çxmée, adx ji'phuni i'kwe'sxtxi pu'çxwa'ja's Dxusna dukhe'nja jĩna we'weçxaçxáa, neywe'sxtxi' pu'çxmeetewa ewa' jĩ'tx. Nawa i'kwe'sxa' txã'wẽ yaçgawe'sx kaapiya'jniçxá's kxtey nwẽese'jçxa', Dxus jxkaahni yu'sa' kxtey yu'çmeei'kwe, naasáa Dxus jxkaahnimeeçxáatx i'kwe kĩjkĩhnawa jxuka kxtey yu'.

14Jesusa' ki'kin nasatx we'weçxa' na'jĩk:

—Mwẽesẽ'jwe jxukaysa, ew jiyuya': 15Kĩh ũ'wa tutxhteçxáa khẽesa yu', nasatx ewmeesa vxitu'çme'. Naasáa ũusuh ewmée yaakxnisa yuuçxáak nasatx ewmeesa vxitu'. 16Aça' maawa jiyuwa'jsa ũsçxa', jiyune'kwe jĩçxak nvxiht.

17Txajũ' Jesusa' nasatx txuteeçxa' yattek u'ka. Aça' txãa yakh u'jusawe'sxa' jiyumeeçxa' pẽjxtxi txã'wẽ pta'sxni's. 18Aça' Jesusa' na'wẽk we'wena pta'sx:

—¿I'kwe'sxwa jiyu'çmeewá'kwe? Kĩh ũ'wa tutxhteçxáa khẽeçxa', nasatx ewméesa yu' vxitmeena sũju'çmeewá'kwe. 19Txãa pa'gatey kĩh ũ'wa ũuste yu' u'kamée tutxhteçxáa khẽeçxa', txajũ ki' kaseje'k jĩk.

Jesusa' txã'wẽ we'weçxa': ũ'nisa yu' kĩhwa jxuka ewsaçxaçxáata' jĩçxak txã'jĩ'.

20Nawa ũusuh ewmée yaakxnisa yuuçxáak nasa's ewmeesa vxitu'. 21Txãa pa'gatey, kazx yaakxni, ptamsaçxawa vxite yakh kazx yuuna fxi'zeni, kazx yuuni, nasa ikhni, 22pesweeni, vxite jĩ's kusa'jçxa ji'phu wẽeni, pthãaweni, ĩsxĩini, vxitetx ahçena fxi'zeni, wẽesxuni, kazx we'wena fxi'zeni, iiwejçx iiwejçx yajkxna fxi'zeni, kĩhtewa ewmeeçxáa yũuna fxi'zeni 23txã'wẽ ewmée yaakxnisa' ũustewe'sxta'. Txãasatx txã'wẽ kaaũusuthe'jçxa, nasa's ewmeesa vxitu'.

Teeçx u'y judiu ji'jmeesa Jesusa's jxpa'gasa

(Mt 15.21-28)

24Jesusa' txãajũ kasehçxa', Tiro Sidon çxhab ja'dasuk pekũjxa' u'j. Sa' kxsũ pa'jçxa', teeçx yatte u'kaçxa, kim yuhwa jiyu jxthãasme'. Nawa kim yuhwa jiyunimeete u'juya' yu' ãjãme'. 25-26Txajũ' teeçx u'y Sirofxenicia kiwetewe'sxa' Jesus pa'jni's jiyuçxa pa'kh. Sa' tasxte peejxũkweçxa pxthaa we'wek:

—Niisa ji'phthu txã'sa' eçx luuku vxit-sak iiyamu. Aça' txãa eçxa's nuukutxi'jine'ga ũusu jĩna pi'kxte', 27Jesus pasçxa na'jĩk:

—Mũythaswe, luuçx khuẽ'y ũ'kahn. Txã'wẽ luuçx ũ'wa'ja's kusa'jçxa alkutx ũswa'jme' jĩte', 28txãa u'y pasçxa':

—Isa yuh we'we'g, txã'wẽ yuja'. Nawa alku' mesa dxiisu ũsçxa', pejka ũ'wẽ'tx luuçx ũ' pe'yaçxáatxwa jĩte', 29Jesus pasçxa':

—Isa, txã'wẽ yuja'. Aça' me'jwe, i'kwe jxthãasni's uyuune'kwe, eçx luuku vxit-sa' i'kwe niisa ũusu kasejxã'kh jĩte', 30txãa u'ya' yatna sxawedçxa uyku, eçxa' ũusu kasehte' wẽt yã'j kamaga ũste.

Teeçx piçthẽ'j wẽse'jya' we'weya'wa ãjasame's Jesus nuykatxhini

31Jesusa' ki'kin Tiro kiwejũ kasehçxa, Sidon çxhabuy vxite' Dekapolis kiwey uykhẽwna u'jçxa, Galilea ĩkh walatek pa'j. 32Kxteea' teeçx piçthẽ'j wẽsẽ'jya' we'weya'wa ãjãsame'stxi Jesus tasxte nuypa'jçxa pxthaa we'we nuykatxhikahn. 33Aça' Jesusa' txãa ãçã'sa's nasameete fxii pe'jna u'jçxa, thũ'wẽ kafxte pdxi'p jxa'dxna'wa, txajx fxne'sxa's kuse vxiçte kuuçhe'jna', thunetewa jxa'dxku. 34Sa' ũusdxi'na cielute pagayçxa:

—¡Efxata!—jĩk, tee phaate jĩçxak txã'jĩ'.

35Txã'jĩçpkaçxha', thũ'wẽ kafxa' phaatetx, aça' thunewa ewuute', ew we'weya' ãjãk. 36Txajũ' txãa nasatxi' Jesusa' wala neewe'wek, txã'wẽ yũuni's kim yuhtxwa pta'sxkahmén. Txã'wẽ ew neewe'wetewa, jweeíiçxáatx mtee mteewa pta'sxna jxã'j. 37Txã'wẽ yũute', nasa jxukaysa wala kuh jwed yaaki'tx na'jĩna:

—Ãçã' ma'wẽsatxwa jxukak pu'çxhi'. Wẽsẽ'jya' ãjãsameetxwa kwẽesẽ'je'kh, sa' we'weya' ãjãsameetxwa kwe'we'je'kh jĩ'tx.

Currently Selected:

San Marcos 7: pbbNNT

Highlight

Copy