San Marcos 3
3
Teeçx piçthẽ'j txajx kuse udxnisa
(Mt 12.9-14; Lk 6.6-11)
1Vxite sapatu ente' Jesusa' ki'kin judiuwe'sx pkhaakheni yatte u'kak. Aça' kxte' teeçx piçthẽ'j teeçx kuse udxnisa kẽese'jya' ãjãsameek u'p yu'. 2Aça' fxariseowe'sxa' Jesusa's peethegu'natx ũsu', sapatu jxkaase ente nuykatxhite' pãatxhĩ'khya' sũhçxa.
3Txajũ' Jesusa' txãa piçthẽ'ja's pa'yaçxa nasaa pxãhte kxuuju'jçxa', 4na'wẽk paapẽjx vxite kxtee ũssatx:
—Sapatu jxkaase entewa pu'çxte ¿ewmanx? meeçxa' ¿pu'çxwa'jmeemanx? Nasa's nwe'wete ¿ewmanx? meeçxa' nwe'wemeete ¿ewmanx? jĩte', txãawe'sxa' pasmée sxuuna'tx neeyũu.
5Txã'wẽ fxariseowe'sxa' Jesus we'weni's jxpa'gaya' wa'lte', Jesusa' txãawe'sxtxi ũusçxa thegçxa na'jĩnak we'we txãa piçthẽ'j kuse udxnisa's:
—Kuse's mku'le'j jĩçpkaçxha', txajx kuse' ewuuk.
6Txajũ' fxariseowe'sxa' Jesusa's ikhya' puutx we'weya' u'jtx Herodes ju'gsawe'sx yakh.
Nasa wala kuh pehnatx ĩkh pukasu
7Naapkaçxha' Jesusa' txãa yakh u'jusawe'sx yakh u'kh ĩkh wala pukan. Aça' Galileaju nasa wala kuh u'jtx Jesus e'stey. 8Txã'wẽ Jesus kĩjkĩhwa ew yũuni's nasa jiyuçxa', majũwe'sxwa Jesus tasxte pa'jtx thegya', Judeajuwe'sx, Jerusalenuwe'sx, Idumeajuwe'sx, Jordan yu'wala kutejuwe'sx, vxite' Tiro, Sidon çxhab peeku'juwe'sxwa. 9-10Nasa txã'wẽ wala pa'the', maazkuẽe ãçã'satxwa nuykatxhik, aça' jxukaysa Jesusa's kpaajxa'dxçxa katxhi wẽesa txajx tasxteçxaçxáa utxaaçxa akaaçxpçxãhtx yuuna ũsu'. Txãa pa'gak Jesusa' txãa yakh u'jusawe'sxtxi jxkaah teeçx barko ih ji'phukahn akaaçxhiçte kxtee khẽewa'j. 11Aça' eçx iiyamunisawe'sxa' Jesusa's uyçxa, txajx tasxte peejxũkwena na'jĩnatx we'we':
—Idxa' Dxus Nçxi'kgu jĩte', 12Jesusa' txãawe'sxtxi' wala juuna' we'wek kimtewa ãate kaajiyu'khamen.
Doce nasa Jesus txhitxhni
(Mt 10.1-4; Lk 6.12-16)
13Txãa e'su' Jesusa' thã'the u'kh kuh nasatx pi'kxçxa.
14Aça' kxtee kãhçxa', doce nasatx txhitxhku txãa yakh u'juwa'jsa, txãawe'sxtxi' Dxus yuwe's pta'sxya' kaajxa'. 15Txã'wẽ txhitxhçxa', ãçã'satxwa nuykatxhina eçx luuku vxit-satxwa ũusu kutxi'jya' ãjãwa'ja's ũsku.
16Txãa doce nasa' na'wẽ yaaseta': Simon, txã'sa' Pedro yasek ki'p. 17Vxite' Zebedeo nçxi'kwe'sx pxakhsa Jakobo Juanwe'sxtxi yu'. Txãa pxakhtxi' Boanerges jĩnatx kxsuusu', nasa juuna'sa pa'ga. 18Vxite' Andrés, Fxelipe, Bartolomé, Mateo, Tomás, Alfxeo nçxi'k Jakobo, Tadeo, vxite' Simón kananista nasa, 19vxite' Judas Iskariote, Jesusa's açesawe'sx kusete dukhwa'jsa.
Jesusa' thã'ju sxawedçxa', teeçx yattek u'ka, txajx txhitxhnisawe'sx yakh.
Dxus Espiritu's açewe'weni
(Mt 12.22-32; Lk 11.14-23; 12.10)
20Txã'wẽy nasa iiméh wala kuh pkhaakhete', ũ'wa'j en yuhwa ji'phumeeta'.
21Txajũ' Jesus nwe'sxa' txã'wẽ yũuni's jiyuçxa', Jesusa' luuku yuune' sũhçxa pe'jna u'jya' pa'jtx. 22Aça' Dxus leya's kaapiya'jsawe'sxwa Jerusalenu pa'jçxa' na'jĩ'tx:
—Naa piçthẽ'ja' eçxthẽ'ja's yuu ũuste ji'pha'. Txã'wẽçxaíik eçxtxi nasaa ũusuh kutxi'jya' ãjã' jĩte', 23Jesusa' nasatx pa'yaçxa na'wẽk pta'sx jiyukahn:
—¿Ma'wẽçxa eçxthẽ'ja' eçxthẽ'ja's íiçxáa kutxi'jya' ãjã'kx? 24Maa kiwetewa gobierno' peekx nasatx íiçxáa ahçeçxa puiiçxa', çxhãçxhameena. 25Txã'wẽy teeçx yattewe'sxwa puutx yahçena puiiçxa', pçuutxna puutx uuna. 26Aça' txã'wẽy eçxthẽ'jwa txajx jxkaahnisa eçx yakh íiçxáa puiiçxa', çxhãçxhamée puutx pçuutxna.
27Kim yuhwa ewteçxah yu' nkuusa'jya' ãjãmeetxna, yat namu khuẽ'ya's tudmeeçxa yu'. Aça' txã'wẽ tudçxa yuuçxáa nkuusa'jya' ãjãtxna.
28I'kwe'sxa' mpa'yajkxwe: Nasa naa kiwete kĩhwa ewmée yũuni kĩhwa Dxusna ewmée nuywe'wetewa txãatxi' jxuka ya'peltunaĩna. 29Nawa Dxus Espiritu's açewe'wete', bagaçxte yuhwa peltunãynimée yuuna, uu kiwen kaahwa'jçxáa nvxiituna jĩk. 30Nasa we'weçxa': Eçxthẽ'ja's ũuste ji'pha' jĩpa'gak txã'wẽ pta'sx Jesusa'.
Jesus njĩ'j vxite' txajx nyakhwe'sx
(Mt 12.46-50; Lk 8.19-21)
31Naapkaçxha' pa'jtx Jesus njĩ'j vxite' nyakhwe'sx jxuka. Sa' ekate kũhçxa, Jesusa's pa'yakaahtx. 32Aça' Jesus yakh dxiite u'psa' pta'sxtxi na'jĩna:
—Iidx mama iidx nyakhwe'sx pa'jçxa ekate ũsta', sa' idxa'stxi yuukaja' jĩte', 33Jesusa' na'wẽk pas:
—¿Kimtxikwe adx mama adx nyakhwe'sx jĩna we'wé'? 34Sa' txã'wẽ pta'sxsatx thegçxa' na'jĩk:
—Adx mama adx nyakhwe'sxa' naata'. 35Dxus jxkaahni's nwẽese'jna kxtey yuusáa yuuçxáa, adx nyakh, adx npe'sx, adx mama na'wẽsata' jĩk.
Currently Selected:
San Marcos 3: pbbNNT
Highlight
Share
Copy
Want to have your highlights saved across all your devices? Sign up or sign in
© 1984, Wycliffe Bible Translators, Inc. All rights reserved.
