San Marcos 11
11
Yölataka buere joära Jerusaléniu kimuhuame
(Mt. 21:1-11; Lc. 19:28-40; Jn. 12:12-19)
1Huam Jerusaléniu kaa mékka aneka, Betfagé, entok Betánia pueblom náapo aneka, Oliivo káhui pújbapo, Jesús guoy ä discíipulom áman bíttuak. 2Júnel ámeu jiaahua:
—Katëem, huam pueblou enchim pújbapo kátekamtahui. Ámanem yájakätek ili buru bemelata áma chäkamtem téunake; huächi jábe yoreme júne kee jee át yejte. Akem ä búttiaka äbo ä huérianake. 3Huanäi jábeta enchimmeu ínel jiay: “¿Jatchiakem júkäi johua?” Huanärem juka Señorta ä huáatiä tíanake, entok chúkula ä nóttiria rókka.
4Huanärim áman sájaka, juka ili buruta téuhuak áma chäkamta puértapo yeutana, böota tottëpo. Huanärim ä búttiak.
5Huate áma aneme ínel ámeu jiaahua:
—¿Jitasem johua? ¿Jatchiíakem juka ili buruta butbúttia?
6Huanäi bempo Jesústa nésahuekä páman am yommiak. Huanärim am tójjak. 7Huanärim juka ili buruta Jesústau nüpaka, bem sánkom at töak. Huanäi Áapo at yejtek. 8Gente éntok juebénaka bem sánkom böot áapat tösakay; huate éntok júya sáhuam chúktiaka, ket böot áapat am tösakay.
9Jume bat kateme chay sákay entok jume amapo kateme ínel jíaka:
—¡Looria! ¡Diosta tü eäu at chúpari jü Diosta yaura úttiäray téhuampo yebisiseme! 10¡Diosta tü eäu áa béchïbo, jü David itom áchay nésahuepo äbo huémta béchïbo! ¡Buéresi al‑leehuame téhuekau tájti!
11Huanäi Jesús buere joära Jerusaléniu yepsaka, jum tiöpou kibakek. Huanäi nate chíkola reemteka, sïmeta áma ayukamta bitchak. Bueïtuk beja kúptey huanäi pueblo Betániau bíchaa yeu siika, jume dóoce discípulommaki.
Chuna óguotat bette noki chúpari
(Mt. 21:18-19)
12Huanäi yokoríapo Betaniapo yeu am sájako, Jesús tébäurek. 13Huanäi mékka chuna óguota bitchak yún sáhuakamta. Áu rúktek takam áu téu máchileka, të kaita at téuhuak, sáhuam jíbba, bueïtuk kee jee yuumay bem takanakëhui. 14Huanäi Jesús ínel au jiaahua hua chuna óguotahui:
—Kaibu jábe éntok em taka buänake, jíba béchïbo.
Ä discíipulom éntok ä jíkkajak ínel ä jíayo.
Tiöpopo jita nénkame yeu jaase
(Mt. 21:12-17; Lc. 19:45-48; Jn. 2:13-22)
15Jum Jerusaléniu yájaka, Jesús jum tiöpou kibakeka, jume jita áma nénkame entok jita jínnume päkun yeu bep táytek. Entok jume tómita nakuliame mesam naa guötiriak, entok jume guókohuim áma nénkame bankom kétchi. 16Kaabeta jum tiöpopo áman kia jume vasom júne yeu huéria ïay. 17Huanäi am majtiaka, ínel ámeu jiaahua:
—¿Jachu kaa ínel jïojteri? “In káari áma Diostau oraciompo nok béchïbo káari ti téhuaanake entok sïme géntem béchïbo.” Eme éntok lak‑ron kári guójoriäpo ä tahuariala.
18Jume escribam éntok jume tiöpopo nésahueme ä jíkkajaka, at tekipánoa táytek, jáchin bem ä mëtebonakëhui, bueïtukim ä májhuei, sïme jume géntem ä yosireka at guómtilatukä béchïbo hua áapörik am majtíäubechi. 19Tukáriu yúmak éntok Jesús áma yeu siikä jum puéblopo.
Chuna oguo béttesi at nokhuakame huakek
(Mt. 21:20-22)
20Huanärim yokóriapo kethueitana böot kateka, juka chuna óuguota bitchak huakíata nahuapo naateka jikau tajti. 21Huanäi Peero au huahuáateka ínel au jiaahua:
—Maestro, Akë ä bitcha hua chuuna nokta béttesi em at nokakau huakía.
22Huanäi Jesús ínel ámeu jiaahua:
—Dióstachem eiya. 23Bueïtuk tua lútaüriapone enchimeu ínel jiaahua, jábe júne ï kautau ínel jíakame: “Sóoktekë, bahuéu emo jimma”, éntok ä jiápsipo kaa täbuiasi éaka tua ä súalëtek ä nokákähui, huanäi ä nokákä páman yáatunake. 24Kíalïkune enchimeu ínel jiaahua, sïme hua Diostau oraciompo enchim aahuähui, akem ä súale enchim ä mabetnakëhui, huanäi jíba enchimeu ayúnake. 25Diostau oraciompo nokätekem emo jiokore, jabetamak emo béj‑reka ayulaatukätek, huaka enchim Átchay téhuekau kátekamta ket enchim jiokorinakë béchïbo, huame enchim Dios bejrimmechi. 26Bueïtuk enchim kaabeta jiokoreyo, enchim Átchay téhuekau katekame ket kaibu enchim jiokorinake enchim Dios bejrimmechi.
Jesústa yäura úttiära
(Mt. 21:23-27; Lc. 20:1-8)
27Huanärim júchi Jerusaléniu bíchaa nóttek, éntok áapörik jum tiöpopo huaijhua hueramai, jume tiöpopo nésauhueme éntok jume escribam Jesústahuim yájjak, éntok jume koba yoiyoöhuem. 28Huanärim ínel au jiaahua:
—¿Jita lútüria úttiatasë jípureka íkäi johua? Éntok, ¿Jábesu enchä mak‑la juka lútüria úttiata íkäi em yáanakë béchïbo?
29Huanäi Jesús ínel ámeu jiaahua:
—Senu huémtane enchimmeu nátemaijnake ínapo kétchi. Enchim nee téjhuakne ket enchim téjhuanake jita lútüriai íkäi ín joähui. 30Jü Juanta yore batöau, ¿jachu téhueka bétana nésautukai jäni, ö im buíapo yoremem bétana? Nechem téjhua.
31Huanäi bempo júnen nau jiaahuay:
—Téhueka bétana tï itom jiai junne, ínel itou jiaunake: “¿Jatchíaka júntukem kaa ä súalek?” 32Yoremem bétana ti itom jíäi éntok kaa türinake.
Ínëlim jiaahuay bueïtukim juka genteta majhuëi, bueïtuk sïmetakam Juanta tua lútüriapo ä proféta tíiyai. 33Huanärim Jesústau ínel jiaahua:
—Katte jüneiya.
Huanäi Áapo ínel am yommiak:
—Ínapo ket kaa enchim téjhuanake jita lútüria úttiärai íkäi ín joähui.
Currently Selected:
San Marcos 11: mfy
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved
