Matyu 27

Jisasin Pailathi akak li laha iri

(Mk 15:1; Lk 23:1-2; Jn 18:28-32)

1Nirsumbu mendek si narik bikpris nga Judama lida lihi amber nga li tirsaha nombo os Jisasin li mandingormekurin limu mbaolsolora. 2Uhu orin kuvuk li ishihi Romik fehenda malakama otohik orin limu laha ira. Ma oto hi orhi Pailat.

Judas orhinjik or kupsiri

(Ap 1:18-19)

3Judas ma or Jisasin wutarihi tavak hari ma oto os Jisasin li mandingormekurik li mbari mashin or misihi ormu mbara, “Os erem a uwa osmu kavak nawa sir.” Karem or mbaha ya 30-pela silva os hetpris nga Judama lida lihi nga orin li harin indiyok ormu lai hara. 4Uhu ormu mbara, “An kavakavan a uwa nir. Ma or tava jihik a hawak ji mandingormekwak ji mbawa oto mbeek musa las nga nawa ambu ri.” Urik limu mbara, “Mirvai mbakwa sir, mihinjik mi uwa os te!” 5Karem li mbarik ya ondon tempel akomek or ermbeshihi hikrik or i layihi ormu kupsira. #Mt 26:14-15; Ap 1:18-19

6Urik bikpris ondo ya ondon li laha limu mbara, “Ya kando man li mandingormekurik li landa ya kalira, mbeek tempelhi yanga ni tirsakwa ambu nir.” 7Karem uhu li mbaolsoloho limu mbara, “Ka ni i ma or pavin unda ma misambi orhin ya orok ni frungawuka. Uhu ni halashinak ma ol homek fehe tol torok liwa os li hawa wolo orok ni wakor eweka.” 8Erem li uri osik misambi oso ter nga, Fi ngoronda misambi, karem li ushanda sir. 9Nombo os erem li uri oso si urik mashi os profet Jeremaia maskop or mbahandari osmu omek nari sira. Karem or kayeri sir, “Ya silva 30-pelak ol Israelik fehe ma oton li hanak li mandingormekurik li mbari. #Sek 11:12-13 10Uhundari ya oson li laha ma or pavin unda ma misambi orhin ya orok li frungawuri lir, os Avui Wasilaka mas anin or mbahandari hom.”

Jisasin kotik li ewehe li mandingormekurik li mbari

(Mk 15:2-5; Lk 23:3-5,13-25; Jn 18:33–19:6)

11Urik Jisasin Pailat liri mishik li halashirik ormu sira. Urik Pailat mu silira, “Mir King Judamahi om?” Karem or silirik Jisas mu mbara. “Os mi mbawa homa.” 12Urik bikpris nga Judama lida lihi nga mashi mushak Jisasin limu mbahanjira. Hako or mbeek mashi las nga mbari ambu ri. #Ais 53:7 13Urik Pailat mu silira, “Mir ma tondo mbawan am mi misindu? Tol mashi mushak mirin li mbawan?” 14Hako Jisas mbeek mashi las nga mbari ambu ri. Urik Pailat wavu orhi musha mushak ormu hishira.

15Asama asama Judama ondo hiyawu Pasovan li undari wolo Pailat oto ma ol krawuk sindari lar or halashirik indari ora. Hulaima nokopma ma or li rupshindari oton li kamaha Pailatin li mbashirik or halashirik indari ora. 16Oro wolok ma kava lar, hi orhi Barabas, krawuk liri ria. 17-18Hako Pailat angop or heyeri sir, Judama ondo Jisasin li wapkava hishiri osik orin kotik li eweri ri. Karem uri osik ma ol akasumbu orhik tirsari ma ondon ormu silira, “Lawen a halakwak ji hishindu? Barabasin mo Jisas or Krais karem li ushanda ma oton?” #Jn 11:47-48; 12:19 19Urik Pailat kawu os or lihi kotin or misindari kawu orok or lirik nokove orhi simu mainhara, “Avak nirik ma oton a sukwaheyehe sunguwavu anhi nga osmu nomok nawa. Or worna ma mende ri. Mir avak orin mberem uwa hala.”

20Hako bikpris nga Judama lida lihi nga hulaima nokopman li mbaskashirik Pailatin li mbanak Barabasin or halaha Jisasin or mandingormekmbaha limu mbara. 21Urik indik ormu silira, “Lawe menden a halashinak or iku, Barabasin mo Jisasin?” Urik limu mbara, “Barabasin halanak or ika.” 22Urik ormu silira, “Wa mberem avai uku, Jisas or Krais karem li ushanda ma oton?” Urik limu ushambara, “Oton miandok tirika.” 23Urik ormu silira, “Mberem ushiwak? Mbele mende os or uwak kavak nawak ji heyew?” Hako wasilaka mendek limu ushambara, “Oton miandok tirika.”

24Urik Pailat or heyeri mbeek orhi mashin li misikurik nari ambu lir. Uhu awun li ukmbaha limu ura. Erem li urik or heyehe ukun or tarmu ewehe tava orhin or yokoho ormu mbara, “Ma otohi fi kas mbeek anhik nakwa ambu sir. Oso jihikop nakwa sir.” #Lo 21:6-9 25Urik limu mbara, “Halanak musa oso nihikop si nanak kumak jikisi nihi lihikop si naka.” #Ap 5:28 26Urik Pailat Barabasin or halashirik ormu ira. Uhu or mbashirik Jisasin li wakoroho orin miandok li tirikmbaha limu ira.

Awun undari ma Jisasin li okoleri

(Mk 15:16-21; Jn 19:2-3)

27Awun undari ma ondo Jisasin li laha gavmanhi akak limu laha ira. Uhu li mbashirik ma ol lir nga nakrem awun li undari ma ondo orok limu layi tirsara. 28Uhu kowe orhin li tloloho kounalo las orin limu faleshira. #Lk 23:11 29Uhu kuvu lame ngashi las li laha malakama falendari hat hom li yantlehe masiji orhik limu haufalera. Uhu kombe las tapmama orhik li harik ormu tolora. Uhu kumbambongo lihin li huvuhu li okolehe limu mbara, “Awasayi, mir Judama King lihi mira.” 30Uhu orin li suntlayashihi kombe os li hari oson li laha orin masijik limu jira. #Ais 50:6 31Erem li mbaha ihi am li krehe kounalo oson li tloloho kowe orhin indiyok limu faleshira. Uhu miandok li tirikuri mishi orok orin limu laha ira.

Jisasin miandok li tiriri

(Mk 15:22-32; Lk 23:27-43; Jn 19:17-27)

32Am li ihi nombo nindik ma lar yanga Sairinik fehen limu heyera. Hi orhi Saimon. Orin li toltangrihi li mbashirik miando Jisashin ormu kishara. 33Or kishaha yanga Golgotak limu ira. Hi Golgota oso maintontlo sihi, Telemba masik havamba hom nanda, karem li ushandari sir. 34Urik wain uku kas marasin nga li tirsandarin Jisasin li harik or aheyehe mbeek uksem ari ambu ri. #Sng 69:21 35Urik orin miandok li tirishihi kowe orhin li lakmbaha lihi ambek satuk limu ewera. #Sng 22:18 36Uhu orok li lihi orin limu washilira. 37Uhu maintontlo os orin li mandingormerin jekambak li kayehe jekamba oson masiknuku heyek li eweri sir. Mashi oso karem, “King Judamahi toria.”

38Os or wari mishik ma kava frijip er nga li tirishirik wari vria, lar tapmama yok, lar tava ashi yok. #Ais 53:12 39Urik ma musha orok li tere i tere raha masijikop li senjelenjehe orin li okolehe limu mbara, #Sng 22:7; 109:25 40“Mir tempel akan mi tarvlashihi niri frijipkop indik undahik mbari om te! Unda osik mir mihinjik jelyaka. Os Avui Wasilakahi jikisik mi na nahi, miando oson halaha rakaka.” #Mt 26:61; Jn 2:19 41Urik bikpris nga mashi Moseshin sawendari ma nga Judama lida lihi nga orin li okolehe limu mbara, 42“Ma anandin jelyandari ri. Hako orhinjik wahau. Os nir Israelik fehenda King nihik or na nahi, wa miando oson or halaha or takanak ni heyehe orin wavu nihik ni eweka. 43Or orhinjik, “Jikisi Avui Wasilakahi” karem mbari ria. Or hishiwa Avui Wasilaka or nga siwa ri. Os erem si na nahi, halanak orin or jelyaka.” #Sng 22:8 44Urik ma op er nga li tirishiri ovro os lir mbari hom frimu mbara.

Jisas or hari

(Mk 15:33-41; Lk 23:44-49; Jn 19:28-30)

45Ta am komek or sirik kolok si krinyaha simbalesik misambin er simu tangna arangorakora. Si naha ihi homi avi li mbari wolok indik simu harara. 46Urik Jisas wasilakak or ushaha ormu mbara, “Eli, Eli, lama sabaktani.” Maintontlo os or mbari karem, “Avui anhi, avui anhi mberem ushiwak anin mi halanduwa?” #Sng 22:1 47Urik ma ol pasir siri ondo mashi oson li misihi limu mbara, “Ji misi, or Elaijan ushandu.” 48Urik ma lar or shirinya ihi mbele las warsuvu hom nandarin wain ukuk or halfaleshihi kombek or ishihi Jisasin or hanak or uksem akmbaha ormu ura. #Sng 69:21 49Urik lal olmu mbara, “Awarsi ni siheyehen, las avak Elaija raha orin or jelyanda ngashi.” 50Urik Jisas indik wasilakak or ushaha masikome orhin or halaha ormu hara.

51Or harik kolok kouwarmba os tempel akak li fengfakashirik wahandari oso nindi nindi hom er simu frehe larakara. Urik nenawu si jirik misambi mu mblira. #Kis 26:31-33; Hi 10:19-20 52Urik mawa li sutlarik Avui Wasilakan hishiowehe mas hahandari ma lal olmu usahara. 53Li usahaha mawan li halaha Jisas indik or usahari wolok Jerusalemik limu ira. Urik ma musha olmu orok lirin heyera. 54Urik kepten nga awun undari ma ol Jisasin washiliri ma ondo nga nenawu si jirik mbele mbele ondo ralarik li heyehe li ajehe limu mbara, “Omendinga sira, ma oto jikisi indingo Avui Wasilakahi ria.” 55Nokove mushak homek siri lir. Nokove ondo Galilin li halaha Jisasin li tiya ihi orin jelyandari lira. #Lk 8:2-3 56Lihi nindik siri las Maria yanga Makdalak fehe sir, las Maria nijava Jems fre Josephi sir, las nijava Sebedihi jikisi ovrohi sir.

Jisashi maninimban sunja akak li eweri

(Mk 15:42-47; Lk 23:50-56; Jn 19:38-42)

57Am si homirik yanga Arimateak fehe ma lar, hi orhi Josep, or mbele mbele musha ngashi ma ria, or er nga Jisasin tiyandari ma lar oria. 58Or ihi Pailatin or silinak maninimba Jisashin or mbashinak or laharakmbahan. Or silirik Pailat ol awun undari ma orhin or mbashirik Jisashi maninimban li laha Josephi tavak limu hara. #Lo 21:22-23 59Urik or laha kouavisha lasik ormu hevera. 60Uhu sunja aka akri las ornjik li tlohondari orok or ewekurik ormu laha ira. Or layi eweshihi sunja laka os mawan arangokurin or temberik simu ra arangora. Erem or ulafakaha ormu ira. #Ais 53:9 61Urik Maria yanga Makdalak fehenda nga Maria ome las nga mawa mashik fri sihi mbele mbele os or urin frimu sishi heyera.

Awun undari ma Jisashi mawan li washiliri

62Ushirik li wahandaha hiyawu oson li hundujeri wolo oso mendek si narik bikpris nga Farisi nga Pailatin limu i heyera. 63Uhu limu mbara, “Awasayi, ma oto karem mbari ri, “An niri frijip mawak a wakwa nira. Uhu indiyok a usahakwa nira.” #Mt 12:40; 16:21; Mk 9:31; 10:33-34; Lk 9:22; 18:31-33; Jn 2:19-21 64Karem or mbahandari osik mir avak mbashinak mawa orhin armek niri frijip li washilika. Las avak orin tiyanda ma li ihi maninimba orhin mayam li laha ihi li mba, “Angop mawan or halaha indik usahawa ri.” Os erem si na nahi, haimba handambanda mashi akri lihi oso wasilakak si naha mashi os mas li mbahandan tikrikwa sir.” 65Karem li mbarik ormu mbara, “Ji ihi awun unda ma lal ji laha os ji ukmbaha hishiwa hom ji uka.” 66Karem or mbarik li ihi mawa oson limu seve watla ura. Uhu awun undari ma ondon li mbashirik mawan limu washilira.

Currently Selected:

Matyu 27: sim

Highlight

Copy