Luk 20

Jisasin limu silira, “Lawe mbashihindak lerawu oson mi landu?”

(Mt 21:23-27; Mk 11:27-33)

1Nindi las wolok Jisas tempel akak or layihi mashi jivi Avui Wasilakahin or owesawerik bikpris ondo nga mashi Moseshin sawendari ma lal nga Judama lida lihi lal nga limu tara. 2Uhu orin limu silira, “Mir sawenak ni misi. Lawe mbashihindak lerawu oson mi landu?” 3Urik ormu mbara, “Os mbele las jirin a siliwan armek ji sawenak a misi nahi, an nga vai sawenak ji misikwa sir, lawe or mbashihindak lerawun a landu. 4Jon man fak or tolofalendari oto lawe mbashirik lerawun or lar? Avui Wasilaka mbashirik mo ma misambik fehe mbashirik lerawu oson lari or?” 5Urik lihi ambek limu mbara, “Mberem ni mbakwa ambu re. Os ni mba, Avui Wasilaka mbashirik lerawu oson ormu lara, karem ni mba nahi, avak or mba, “Mberem ushirik orin ji tiyakurin ji halar?” karem mbakwa ora. 6Hako os ni mba, ma misambik fehenda mbashirik lerawu oson ormu lara, karem ni mba nahi, ma rondo avak nirin li sunjakom loho ormbekwa ola. Mberem ushiwak? Jon oto profet oria, karem hishinda ola.” 7Karem li hishihi limu mbara, “Nir ni hishiwa kom.” 8Urik ormu sawera, “An ngana, mbeek jirin a sawekwa ambu nir, ma or anin mbashihindak lerawu toson a lawan.”

Sauheima os noumashama hala ishirik ma kava ondo hiniyin li ori

(Mt 21:33-46; Mk 12:1-12)

9Jisas sauheimak ormu sawera, “Ji misi. Ma lar wain nowe las or laha ma lalhi tavak or halashihi yanga home lasik ormu i lira. #Ais 5:1 10Undarik wain siji ondo am li nivikuri wolok si narik noumashama oto ornjik lerawun landari ma lar or mbashirik wain nowen washilindari man or heyehe ornjik lal or nimba laharakmbaha ormu ira. Hako ma ol nowe orok landari ma ondo orin li jihi li mbashirik tapas ormu ira. 11Urik noumashama ornjik lerawun landari ma anandi lar nga nor mbashirik ormu ira. Urik or er nga li jihi kavak er li naha li mbashirik tapas indik ormu ira. 12Urik lar er nga nor mbashirik ormu ira. Urik or er nga li jihi li ermberik ormu tulura. 13Urik noumashama ormu mbara, “Ter mberem avai uku? Avak jikisi anhi tor a rupshindan a mbashinak or inak mashi orhin avak li misikwa lir.” 14Hako ma ol nowe orok landari ma ondo jikisi orhi oto rarik li heyehe lihi ambek limu mbara, “Noumashama jikisi orhi indingo ormu tanduwa. Ka ni i orin jimandingormehe mbele mbele orhi ondon hiniyin ni oka.” 15Karem li mbaha orin hikriyok li tololongo lalayihi orin limu mandingormera.

Wa, jir mberem ji hishindu? Noumashama oto ma ondon mberem orvai uku? 16Avak or taha ma kava ondon or mandingormehe nowe oson ma anandi lalhi tavak or hakwa sir.” Jisas karem or mbarik ma ondo mashi oso li misihi limu mbara, “Erem or uwan or hala.” 17Karem li mbarik Jisas lirin or heyehe ormu mbara, “Mberem ukurik jekamba Avui Wasilakahik karem li kayer?

“Sunja ma ol akan unda ondo, kava, karem li hishihi li ormberi sir. Hako wahau, angop wormbonawa hom maifuk ormu sinduwa.” Buk Song 118:22

18Ji misi. Ma ol sunja heye orok takatukuyiwa avak havan tlekwa lir. Unak os sunja oso ma lalhi heyek si raka nahi, si mandingormekwa lir.” #Ais 8:14-15 19Jisas karem or mbarik mashi Moseshin sawendari ondo nga bikpris ondo nga li misihi limu hishira, “Jisas sauheimak or sawewa nirin or sawewa sir. Wain nowe oson washilindari ma ondo nirin olmu heimanduwa.” Karem li mbaha orin li tolokmbaha limu hishira. Hako hulaima nokopman li ajeri osik os limu halara.

Takis yan Sisarin hakwa on mo wahau?

(Mt 22:15-22; Mk 12:13-17)

20Uhu bikpris nga mashi Moseshin sawendari ondo nga Jisasin mandingormekuri nombon limu li hishira. Uhu ma lal li mbashirik limu ira. Li ihi karem limu haimba handambara, “Nir Jisashi mashin misikwak ni rawa nir.” Erem li mbanak mashi las or mbanak li heyehe nombo orok malakama Romik fehe orhi tavak Jisasin li kotim ukmbahan. #Lk 11:54 21Li ihi Jisasin limu silira, “Tisa, nir angop ni heyenda mir. Mashi mihi wornak si nawak mainome nom sawenda mir. Ma amber hi ngashi nga hi ngashi ambu nga nakremkop sawenda mir. Mashi omendinga os Avui Wasilakahik nanda nom sawenda mir. 22Hako mberem mi hishindu? Nir takis yan Sisarin ni hakwa oso jivik nakwa os mo wahau?” 23Hako Jisas os orin li oweioweiheyehe orin li kotim ukurik li mbari oson angop or heyeri sir. 24Uri osik ormu mbara, “Ya las ji hanak a heye. Fumunyava lawehi nga hi lawehi nga ya torok si wandu?” Urik limu mbara, “Sisarhi vria.” 25Urik ormu mbara, “Wa, mbele mbele ol Sisarhi ondo indik orin ji haka. Hako mbele mbele ol Avui Wasilakahi ondo indik orin ji haka.” 26Karem mbarik li misihi li lishnyafaha mayam er limu sira. Uhu mbeek mashi las orin li haimba handambaha orin li kotim undahik nari ambu lir.

Sadyusi lal ma ol hahandari indik li usahakurin Jisasin li siliri

(Mt 22:23-33; Mk 12:18-27)

27Judama lal Sadyusi lira. Lir karem hishinda lir, ma ol hahanda ondo mbeek indik usahakwa ambu lir. 28Ma ondo Jisasik li taha orin limu silira, “Tisa, Moses mashi las karem nirin or kayeri osa, “Os ma lar nokoplaha jikisi nga nor na namber or hashinak maha orhi lar mumbla oson or owehe jikisi nga fri nawa tlavuji oto sanje laka or hahanda orhik nakwa ri.” 29Hako mas mahasanje 7-pelak nahandari lir. Uhu sanje laka or nokoplaha jikisi nga nor na namber, er hari ri. 30Ushirik maha orhi mu mumbla oson owera. Uhu or hashirik 31orhi hindiyashi mu mumbla oson owera. Uhu or er nga ormu hara. Karem uhu mahasanje 7-pela ondo amber nokove oson li laha jikisi nga li na namber er limu harakora. 32Urik nokove oso nga er simu hara. 33Hako avak mi mbanak ni misika. Kumak ma ol hahanda indik li usahana wolo nokove oso lawehik si naku? Mahasanje 7-pela amber nokove oson lari ola.”

34Karem mbarik Jisas mu sawera, “Ma ol ter liwa olmu nokoplaha hulasinduwa. 35Hako ma ol Avui Wasilaka or mbanak indik usaha ermba ermbak or nga likwa ma ondo mbeek hulasihi nokoplakwa ambu lir, wahau. 36Lir mbeek indik hakwa ambu lir. Avui Wasilaka or mbanak indik li usaha avak jikisi orhik li naha ensel orhi hom nakwa lir. 37Hako hi os mi awarikandak ukrurik Moses or heyehe nor kayeri oson ji hishika. Oso er nga nirin si mukunak ni heyekwa sir, ma ol hahanda indik usahakwa oson. Avui Wasilaka orhinjik karem or mbari osa, “An God Abraham, Aisak, Jekop lihi God anira.” 38Mashi os or mbari oso mu nirin kormbak mukunduwa. Avui Wasilaka mbeek ma ol hahanda lihi God ambu ri, wahau. Or God ma ol linda lihi God oria. Misokome orhik or heyewa, ma amber olmu er linduwa.”

39Jisas mashi oson or mbarik mashi Moseshin sawendari ma lal li misihi limu mbara, “Tisa, mashi mihi jivina.” 40Karem li mbarik Sadyusi ondo Jisasin mbele lal nga li silikurin olmu ajera.

Krais lawehi jikisi ri?

(Mt 22:41-46; Mk 12:35-37)

41Urik Jisas lirin ormu silira, “Mberem ushiwak karem li mbandu, Krais Devithi nirambarak nakwa ri? 42Ji misi. Devit orhinjik karem or mbari sir.

“Avui Wasilaka ormu Wasilaka anhin karem sawera. 43“Mir tapmama anhik lika. Ushinak wutari mihin avak a halashinak mihi siyok sikwa lira.” ” Buk Song 110:1

44Ji misi, os Devit orhinjik or mbar, Krais Wasilaka anhi ria, karem or mbari sir. Os erem si na nahi, mberem ushiwak Krais nirambara Devithi, karem li mbandu?”

Mashi Moseshin sawendari ma kavakavan undari lir

(Mt 23:1-36; Mk 12:38-40; Lk 11:37-54)

45Urik ma amber li misirik Jisas orin tiyandari man ormu sawera, 46“Ji auheyeka, ol mashi Moseshin sawenda ma ondon. Lir unda hom ji uwa hala. Lir kowe hombelakan li falehe li ikwan rupshinda ola. Uhu ma tirsanda mishik li inak ma lirin li heyehe li makshitakshikwan rupshinda ola. Uhu os li lotu unda mishik li layihi maifuk li lerenda kawu orok li likwan rupshinda ola. Uhu hiyawu wasilakan li unda mishik li ihi malakama linda mishik li lihi akwan li akwan rupshinda ola. 47Uhu nokove ol mumblak wahayandan li haimba handambaha mbele mbele lihin landa ola. Uhu os Avui Wasilakan li sawewa wolo mashi hombelakak li sawenak ma li misihi li mba, tondo ma jivi tolira, karem li mbakmbaha unda ola. Hako os Avui Wasilaka hulaima nokopman or heyembakmbaha or mbahanda wolo lir avak nomorawu wasilaka menden kishakwa lir.”

Currently Selected:

Luk 20: sim

Highlight

Copy