Genesis 32

Nan Sinmagongan Da Jacob Id Canaan

32:1-12, 22-31

1Idi mendad-aan da Jacob dat omey sab-aten nan tap-in di aanghel siya. 2Idi inilana daida danat kanan, “Mentetee si Apo Dios isna,” isonga danat ngadnan di is Mahanaim.

3Wadada nan inbaan Jacob ay omon-ona ay mangipagtek ken siya ken Esau ay besatna id Edom. 4Danat ibaga ken daida en, “Kananyo ken Esau en naay nan kanan Jacob ken sik-a. Si Jacob ay baam kano et ibagana ken sik-a, Esau ay apona, ay nakitetee siya ken Laban enggana id wani isonga egay kano sinmagong id issa. 5Iyalina kano nan ado ay baka, kalding, kalnilo, kabayo ya baa et inpaibagana na ken sik-a, Apo, ta gomasingka kano.”

6Idi sinmagong san deeyda ay binaan Jacob dadat kanan, “Inmey kami ken Esau ay besatmo et omal-ali et siya ay mangsab-at ken sik-a. Inpapakeyna nan epatpoo ay gasot ay lalalaki.” 7Inmegyat si Jacob danat gedwaen is dowa ay bonggoy nan ipogawna ya nan kalnilo, kalding, baka, ya nan kamelio 8tay kanana en no labanen Esau nan gedwa ay bonggoy et mabalin ay tomagtag nan kagedwa.

9Nakwas pay di dat menlowalo si Jacob ay mangwani en, “Apo Dios ay Dios din alapok ay si Abraham ya Dios amak ay Isaac, inbagam en awnitmo pasagongen sak-en isnan ilik ya isnan ag-ik et gawis nan ikkam ken sak-en. 10Ngem adiyak kapaay dakapay kayet ik-ikkan nan gawis ken sak-en ay baam. Isdin nanggedangak isnan ginawang ay Jordan ay kinmaanak isnan ilik et maid ginegen-ak nodi kedeng nan sokodko ngem id wani pay et naay somagongak ay wada nan naay dowa ay bonggoy. 11apo, dawatek ay salaknibam sak-en isnan besatko ay si Esau tay omegyatak modatya omal-ali ay mangpatey ken sak-en, isnan an-akko ya nan in-ada. 12Tay insapatam ken sak-en en gawis nan ikkam ken sak-en ya awnitmo paadoadowen nan ap-ok ay kaneg nan kaad-adon nan lagan isnan benget di baybay ay maid makabilang.”

Inmapa da Jacob issan kad-anda issan labi et idi nawakgat dat menpili isnan nateketeken ay talakena is nasolok ay liman gasot danat ibaa nan babaana et iyeyda isnan besatna ay si Esau.

22Issan deey pay ay labi et binmangon si Jacob danat gidowen nan dowa ay asawana, nan dowa ay baana ay bababai ya nan simpoo et esa ay an-akna danat ipagdang daida issan ginawang ay Jabbok. 23Nakwas pay ay inpagdangna daida danat abes ipagdang nan am-in ay kokwana 24dapay mataynan ay es-esa. Dat domateng nan esay am-ama et mendamada enggana ay pomat-a. 25Idi ilaen san am-ama ay adi makaabak ken Jacob danat mensogto nan leplepyak Jacob et maikobsil nan ninsoopan di tolangna. 26Dat kanan san am-ama ken siya, “Palobosam sak-en tay naay pomat-a.” Dat kanan Jacob, “Adiyak enggana ay mangbindisyonka on-ona.” 27Dat sooten san am-ama, “Ay ngan nan ngadanmo?” “Jacob,” insongbatna. 28Dat kanan san am-ama, “Menlogi id wani et baken et Jacob nan ngadanmo tay nakidamaka ken Apo Dios ya isnan ipogaw et nangabakka isonga Israel et nan menngadanmo.” 29Dat kanan Jacob, “Dawatek ta ibagam nan ngadanmo.” Ngem danat kanan, “Ayta dakan kayten ay manggetek isnan ngadanko?” Danat bindisyonan si Jacob dat komaan. 30Dat kanan Jacob, “Inilak nan angas Apo Dios dakpay daan kayet ay natatago.” Danat ngadnan san deey ay logal is Peniel.#32:30 Nan kanan nan kali ay Peniel et angas Apo Dios. 31Binmala nan agew issan kinmaanan Jacob id Peniel et menpilpilay gapo isnan inommat isnan opona.

Ginomdang si Jacob issan kad-an san as-awana. Et olay no omeegyat si Jacob ay daan nan liget Esau ken siya ngem adi obpay tay dat omey si Esau ya nan adoado ay iib-ana ay mangsab-at ken daida et men-galalasingda ay sin-agi ay men-inila. Nabayag pay dat komaan si Esau et omey mentee id Edom.

Currently Selected:

Genesis 32: xnn

Highlight

Copy