Genesis 25

7-8Naam-aam-ama si Abraham et sin-gasot ya pitompoo ya lima nan tew-ena esapay matey. 9Nan an-akna ay da Isaac ken Ismael nan nangippey isnan awakna issan liyang id Macpela ay sag-en di Mamre. Nan liyang ay naay et wada isnan om-an Efron ay anak Zohar ay Heteo. 10Siya di san om-a ay linakowan Abraham ay naipay-an din si Sara ay asawana.

Da Esau Ken Jacob

25:21-34

21Nabayag ay nin-aasawa da Isaac ken Rebecca dadapay adi kayet omanak isonga dat menseg-ang si Isaac isnan apo ta omanakda koma. Dat tongpalen nan apo nan lowalon Isaac et maliton si Rebecca. 22Nan inyanakna et ipi ngem dadama nan kiwida esadapay bomala et kanegda mendamdama isnan egesna isonga kinwanin Rebecca, “Adiyak makaitpe isnan kaneg tona ay om-ommat ken sak-en!” Isonga danat sooten isnan apo. 23Dat kanan nan apo, “Nan an-akmo ay wada isnan egesmo et awnitda menbalin ay apon di dowa ay ili et awnit menbibinosoda. Nan esa et awnit napigpigsa no nan esa et nan iyon-a et awnit menbaan nan innodi.”

24Inomdan nan omanakana et lalalaki ay ipi nan inyanakna. 25Nan inmon-ona ay binmala et men-gadangdang ya nabobookan nan awakna isonga nginadnanda is Esau.#25:25 Esau nan kananda isnan nabobookan. Edom nan esay ngadana tay siya nan pangwanida isnan gadangdang. Jacob nan kananda isnan manggegeen isnan siki. 26San maisned et binmala ay nanggegeen isnan mokod Esau isonga nginadnanda is Jacob. Si amada ay Isaac et enempoo nan tew-ena isnan inmanakan asawana.

27Idi nasiken san lalalaki dat menbalin si Esau is omaanop tay laylaydena ay mendad-aan isnan pagpag ngem si Jacob et nasingpet ya laylaydena ay mentetee isnan baey. 28Laylayden amada ay Isaac si Esau gapo tay laylaydena ay mang-is-isda isnan an-anopana ngem si Rebecca et si Jacob nan laylaydena.

29Isnan esay agew ay mendengdengdeng si Jacob is posi ay men-gadangdang dat domateng si Esau ay inmey nanganop. Naowaowat siya 30danat kanan ken Jacob, “Matmateyak is owatko. Kadya omyalika isnan men-gadangdang ay sibo ay sana.” (Isonga nabodayan siya is Edom tay siya di nan kananda isnan men-gadangdang.) 31Dat kanan Jacob, “Agtak sik-a no iyalim nan kalebbengam#25:31 Nan ogalida isnan kalebbengan di iyon-a ay lalaki et siya nan kaneg aman nan inannodi no matey nan amada ya ad-ado nan tawidna no nan inannodi. isnan kinainoy-am.” 32Dat kanan Esau, “Owen. Matmateyak is owatko et ngan di silbin di kalebbengak?” 33Dat kanan Jacob, “Isapatam ngalod ay iyalim nan kalebbengam.” Dat mensapata si Esau et isokatna is sibo ken Jacob nan kalebbengana isnan kinainoy-ana. 34Dat agtan Jacob siya is tinapay ya sibo. Dat mangan dapay ominom dat komaan. Et siya di nan inikkan Esau ay nangipaila ay adina paayen nan kalebbengana.

Idi naam-aam-ama si Isaac et nakowap danat layden ay bindisyonan koma si Esau tay nan ogalida et esapay matey nan ama et masapol ay bindisyonana nan iyon-a ay anakna ay lalaki. Nan ikkana ay mangbindisyon et ibagana nan gawis ay awnit ikkan Apo Dios koma ya nan gawis ay awnit ommat. Ngem si Jacob et inallilawna si amana ay kaneg san inbagan inana tay kayatna ay siya nan mabindisyonan ay baken si Esau isonga dat menbado is kodil di kalnilo ta no kapposen amada et kanana en siya si Esau tay nabobookan si Esau. Dat omey si Jacob ken amana. Idi kinappos amana si Jacob danat kanan en siya tet-ewa si Esau isonga danat bindisyonan siya.

Idi gintek Esau dat palalo nan ligetna et kayatna ay pateyen si Jacob. Ngem getken Rebecca ay inada isonga kinwanina ken asawana en masapol ay omey ay dagos si Jacob id Haran ay ilin Rebecca ta siyay omasawaana tay adina layden ay makiasawa si Jacob isnan iCanaan. Isonga dat paeyen da amana si Jacob id Haran ta makiasawa isnan agida isdi.

Currently Selected:

Genesis 25: xnn

Highlight

Copy