Maakaꞌ 6

Jiisuu' Nasareti'ka Poore'au'na'

(Mat 13:53-58; Luk 4:16-30)

1Jiisuu' teketa' tenkenura bakanameng-aape toroaru', ee'noko bakaninge siompaitaa' berou'. 2Ee'noko Doong Uaana'mung pava dootuu'nava-koo daanki tutumpuu'. Ee'noko nantoong karika'ke taaravaara sinka'orora aa'pau', “Aung amurii' kara are'ka nkavuu'nung? Ee'noko aung matau ee' oro' baie avuu'nunge? Ee'noko aung ta'nimpaarii'nanka iri'po'ning arekee' tavo'antavumaunge? 3Aung ee ee'nara tee Meeri' bauring deea', tamung anke pava-kani? Jeemisi, Joosesi, Judasi ee'noko Saimoni' aung ninka namaia' ee deea'? Ee'noko ba'marikaampi anke nii' ninka ee otoroa'?” 4Ee'noko teing tee-koo domang oraka' otoroko Jiisuu'ke aa'puru', “Napo' ookara nii'ning nakaro-nupoong-koo tee'ke, nantoonge oovunoo'ka pankaing-antavaarimaung, teka biikanoo'ka deea', ee'noko bii'marange deea'.” 5Ee'noko mintoong baru' purinto' nkovuarupeu' teke. Ee'noko nii'ning deeko' siipa-po'nupoong taare-antavuripeu' tanka'ke pante'urima. 6Ee'noko Jiisuu' ta'nimparu' teing-koo baitoropanuka. Ee'noko osinankai nanuma nantoong nau-antavuru'.

Barevare-nupoonge Jiisuu' Papaaravau'na' Bane Bakaang Iri' Nauvuriko

(6:7–8:21)

Jiisuu'ke Bakaning Nanai'keta Kenaankara Mintoong-koo Botovuru'na'

(Mat 10:5-15; Luk 9:1-6)

7Ee'noko Jiisuu'ke bakaning barevare-nupoong nanai'keta kenaankara naro' bokuvuru' ee'noko irikung-antavuru'. Ee'noko teketa kenaankarana' botovuru' ma'nari oreng bata'koo. 8Ee'noko aa'puru', “Kapoo' nkaveriauka', donsi' narung deeko'. Ta'mari' deea', bakura deea', mooni' deea'. 9Boonamante˜ narung deeko' si'dariaing. Ee'noko mononopa'koo nanaa' nkaveriai.” 10Ee'noko napo' aa'puru', “Osi du'dariko teka bokuraariaining ninka otoriai bera temono-ita tenkeniriainoo'ke basi. 11Ee'noko Nii'navuntu'koo onkeonke'daariarura taararaariaruko deeko' tenkeniriai temono-ita ee'noko da'mong pe'naa'koong te' tankaveriai temono Kumponing-koo maarekusi'noo' taa'ni'antaveri.”

12Ee'noko teing tenkenaara daankiarima aa'pau', “Bere'darirai orara aarumo-ita.” 13Ee'noko mmau' ma'nari oreng bata'aaru'. Ee'noko karika' siipa-po'nupoong duuni dau koo'aariko taarevorou'.

14Enang tee Daurarong˜ Eeroti'ke Jiisuu'nung doorenang berempario' taaravuu' aa'paako, “Jooni Minkinara boo'keta napo' daa'aring, ee'noko tee'koo purinto' ninka mintoomparamaang.” 15Ee'noko nii'ninge aa'paako', “Tee aa' Eliasi#6:15 Ooveai Malakai 4:5. Teie nakaronarai Malakai-e temu' Ju'nupoong nauvuru'nung tee temu'nung nakaronara pankaing, Eliasi, napo' tavo'aravaing nantoong maamu-antavurii'naang Ovoring poaing-koo. pa.” Ee'noko nii'ninge napo' aa'paako', “Aung aa' narung nakaronara pankaing urikavarang-koong.” 16Ee'noko Eeroti'ke taaravurai'nange aa'puu', “Aung aa' Jooni Minkinara ninge kuru bitu'antu'noo'keta napo' domamparara otong.”

17Teka tutuna' Eeroti' teni ninka Erodiasi, baara'ma'nung Pilipi' ba'aang ninka otoreko'. 18Ee'noko Joonie Eeroti' tautauvuma aa'puko', “Da' bakei boto toto'peitaa' daara'ma'nung ba'aang ninka otoremaatoing.” 19Ee'noko tenang Erodiasi iiravou' tee' minkuvio'. Ee'noko Eeroti'ke teni dotu-anta-koo bakaning botovuru' Jooni moo'aara dai'aava'naang pava kiimata-koo. 20Erodiasie napo' domang dupisi'koo piavoko Eeroti' tavu'koo kupi'ora donkonu'uu' avoroitaa' Jooni-koo, ai' Eeroti'ke Jooni tee tampa' noru'ui otoko'nung, naning koonto' ee'noko meekarai. Ee'noko bane teie, Eeroti'ke Jooni taaravuma noru' manki'oko'nunge, teka tee taara-koo piavoko'nung.

21Ee'noko dama'ke taung narung meu'puu' Erodiasie Jooni dupisi'koong. Enang tee Eeroti' ponto'aru'na'mung doong makotuu'. Ee'noko nantoong pankainanka paroro nkoevuru': ovo'ma'koo kuunge mintoompariko'ning, piatooronuka˜ biikaning bore'nuka ee'noko ovontung Kaaleli'nameng-nupoong. 22Ee'noko Erodiasi baurang pava-koo kuung tumparara mairu'aru' Eeroti' damisimainku ninka nari' dotu-antavurima. 23Ee'noko Eeroti'ke mamairoarara, mariaritaa' maraka-antavuma aa'puu', “Kapoo' eentameko makosi aroma'naang. Ookara kapoo' tareamaing-koo meu' pisi'derompainge piaroko.”

24Teketa nerai'na' okora' siarara bauko tana'uma aa'puu', “Aming arekee' oro' ninge eentavama'naang?” Ee'noko baukoi aa'puu', “Jooni Minkinara bakaang bore' eentaveaing.” 25Ee'noko teni nerai'na' namu'ke kua'pari daurarong-anko beu' ee'noko aa'puu', “Jooni Minkinara bakaang bore' namu'ke ameaing daara-koo si'memura.” 26Ee'noko nauvuio' daurarong aa'na' orarunsiaru', ee'noko tutung damisimainku-koo dutakanoo'ke teni-koo marakavaru'nung deemparako paapaa'aru' bakaang kara toto'koo. 27Ee'noko dauraronge bakaning piatooronuka-koo narung botovuu' Jooni bakaang bore' tavo'ua'naang. Ee'noko bera pava kiimatanava'koo kuunga kuru tako'pevuu'. 28Ee'noko bore' diisi-koo kuung doompura tavo'evuu' teni nerai'na'. Ee'noko tenie napo' bauko-anko tavo'uu'.

29Ee'noko Jooni bakaning barevare-nupoonge taaravau' Jooni tavau'na', ee'noko porora Jooni-koong mono nkavaara kuvi dako'doma dako'au'.

Jiisuu'ke Nantoong Deerunoo' Pa'noko' Kokorei' Divu' Bau'uru'na'

(Mat 14:13-21; Luk 9:10-17; Jon 6:1-13)

30Ee'noko Jiisuu'ke botovuru'ning napo' toroarira tasi'antavau' ookara kapoo' osinanka-koo nkoau'ning ee'noko nauaaru'ning. 31Nantoong karika' poroi otoroko bakaning ninka taamanaapeu'nung batei otoaruu', ee'noko aa'puru' teing, “Enang tokoi nii'ka merira o'noriai uaarorima.” 32Ee'noko teketa bakaasie tenkenau' baku'ariri otoroainoo'aape. 33Ee'noko nantoong karika'ke ooaari otoroko tenkenau' ee'noko tasi'paarira osi ookara-ita nantoonanka kua'pariru', ee'noko Jiisuu' dovang-koo uro'ke tavo'ariru'. 34Ee'noko Jiisuu' bakaasi-eta siarama nantoong karika' oovuru' ee'noko bakaang domang aa'na' piaavou' teing-koo, sipisipi' tanatanungropanuka-pina' oro'pariko. Ee'noko tenang Jiisuu'ke kara amutemurii' nau tutumpuru'.

35Ee'noko kamunoo'uio' teing barevare-nupoong bakaning Jiisuu'anko porora aa'pau', “Aung muung-aapevuing. Nii' mee'bora' sirakamaa'koo o'noring. 36Nantoong botoveriko osinanka anketa due' otoroining-koo berora taamang moo'siaavai.” 37Ee'noko Jiisuu'ke bari'urima aa'puru', “Dii'ke kapoo' averereriko naiaavaing.” Ee'noko teinge napo' bari'aama aa'pau', “Teka arekee'? Ai' kenaanka kivora nopa'koo makosininge moo'ampira bau'arampii'naang?” 38Ee'noko Jiisuu'ke napo' tana'urima aa'puru', “Teka arekee'ning berete' oto'deruring? Berira ooveriai.” Ee'noko ooaara Jiisuu' aa'pau', “Tee aa' pa'noko' masikeng berete' otong, ee'noko tavi'ning keura.”

39Ee'noko Jiisuu'ke nantoong navituna' karaasi'koo ba'nang-koo botovuru'. 40Ee'noko nauvurio' narung daaku'na' ee'noko nariong naruaapena' ba'nampariru'. 41Ee'noko Jiisuu'ke teing pa'noko' berete' ee'noko tavi'ning keura nkavura tee paning-aape ankamparara biraankevuu', ee'noko berete'nanka pisi'uma bakaning barevare-nupoong avuru' teinge nantoong-koo tankaampaava'naang. Ee'noko napo' teing tavi'ning keura tankaampuru' ookara-koo. 42Ee'noko ookara taamanaara poovorou'. 43Ee'noko Jiisuu' bakaninge berete' dovang ee'noko tavi' oparavaruu'ning naro'aara peku' kivora-ita keveku'ka-koo makosi maanto'antavau' 44Ee'noko nantoong taamang naiau'ning-koo donkaang naing deerunoo' pa'noko' kokorei'.

Jiisuu' nuaru'koo Daue Nanuu'na'

(Mat 14:22-23; Jon 6:16-21)

45Ee'noko namu'ke Jiisuu'ke bakaning barevare-nupoong bakaasi-nareng-koo aa'e-antavurira ureaitaa' nuaru'koo Besaida-nameng-koo be'koo botovuru', nantoong karinga tenkeng-koo botovurii'naang. 46Ee'noko Jiisuu'ke nantoong si'noora'urira baka mii-koo koinuu' teke kunsiaraa'naang. 47Ee'noko muumpuio' bakaasi-nareng nuaru'koo meu' basiaru' Jiisuu' teke kansi'koo baka otoko. 48Ee'noko Jiisuu'ke otou'noo'keta oovuru' pore'oroko, pionge uro'kanoo'keta dama'du-aape bii'urima tavuriko. Ee'noko tane' dere'uaruko Jiisuu' nanura pou' teing-aape nuaru'koo daue. 49Ee'noko ntong-koo daue nanuma dapi' divu'uriko teinge ookarai ma'naang pina' ooaara bokiau', avoro'ke tavurio'; 50Teka Jiisuu'ke namu'ke karavurima aa'puru', “Aing ee, domang kuaa'doriai aroreria'. Tee ning ee' nanamang.” 51Ee'noko tenang bakaasi-koo aa'eario' doving taarorovuu'. 52Ee'noko bakei aa'na' sinka'orou', nantoong domang tupu'paa'nuka deemparira. Tampa' tasi'paavaruu' kapoo' berete'koo nkoaru'na' kuunoo'.

Jiisuu'ke Siipa-po'nupoong Kenesire'ka Taare-antavuru'na'

(Mat 14:34-36)

53Ee'noko nuaru' pako'aitaa' Kenasereti'nameng-koo tavo'arira biikaang bakaasi teka bi'au'. 54Ee'noko tenang bakaasi-eta siariko Jiisuu' namu'ke tasi'pau' nantoonge. 55Ee'noko tevaro-koo osinanka ookutuning dooreveera siipa-po'nupoong batanang-koo nkavaari porou' Jiisuu' otou'noo' taaravaara. 56Ee'noko ookara osinanka Jiisuu' nanuko'nairu-koo-osi pankeng, osi oki'nareka', pora'nairu-koo-nantoong tee-anko siipa-po'nupoong tavo'aariko'. Ee'noko eentavariko Jiisuu'koo tamung bakaang mononopa'koo kainu' kong-koo taura'purii'naang. Ee'noko ookara mononopa'koo kompariko'ning taarevoroko'.

Currently Selected:

Maakaꞌ 6: nasNTpo

Highlight

Copy