मत्ती 20
20
गुन्डुम शिङ खला लाका कितुप मीतिवा
1येलुङ येशूकी दुक सुङ्सुङ, “देवाच्येनकी ग्येल्खाप ति टोपला टेताङ खोरो गुन्डुम शिङ खला लाका कितुप मीतिवा छोलुपला पाङ्ला थेन्दुप शिङ ज्यिन्दाक दोके यिन। 2तीकी लाका कितुप मीतिवाला ङ्यिमा च्यिकला ङुलकी डप्बु च्यिक तेर्सा क्यानी खोरो गुन्डुम शिङ खला लाका कितुपला ताङ्सुङ।#२०:२ ङुलकी डप्बु च्यिक ति लावा मिरा च्यिककी ङ्यिमी ल यिन। 3ती ज्युक्ला टोपला छ्युजी गु चोयीला ती ज्यिन्दाक ति पाङ्ला गल्नी ल्हासालेन्सिन हाला मीतिवा लाका मेनी तुक राङ लानी देतुप थोङ्सुङ। 4ती थोङ्सिमा तीकी तिवाला ‘ख्यिराङ साङ ङे गुन्डुम शिङ खला गल्नी लाका की। ख्यिरा लाका क्यावु चोयी ति ल तेरिन।’ सिनी सिक्यासुङ। 5तमा तिवा शिङ खला लाका कितुपला गाल्सुङ। येलुङ ती ज्यिन्दाक ति ङ्यिमी गुङगी छ्युजी च्यिङ्ङी चोयीला ताङ छ्युजी सुम चोयीला पाङ्ला थेन्नी तुक राङ क्यासुङ। 6येलुङ गोमु छ्युजी ङ चोयीला साङ पाङ्ला थेन्सियाङ मी यम्बातिवा तुक राङ क्यानी लानी देतुप थोङ्सुङ। तीकी तिवाला साङ ‘ख्यिराङ च्यिला ङ्यिमा काङ लाका माक्यानी तुक राङ देकिवी?’ सिनी टिसुङ। 7तमा तिवी ‘सी साङ ङ्यिराङला लाकाला माच्यिनी तुक राङ देन वे।’ सिनी सिक्यासुङ। तमा तीकी तिवाला ‘ख्यिराङ साङ ङे गुन्डुम शिङ खला गल्नी लाका की।’ सिनी सिक्यासुङ।
8गोमु नाम ल्होसिमा ती गुन्डुम शिङ ज्यिन्दाक तीकी खोरो शिङ ल्हाप लावा छ्ये तीला ‘लाका कितुपतिवाला कताङ्नी तेरी सिनाङ तिङ्ला वावुतिवा नेसुर गो चुनी तेरी सिनाङ गोमाला वावुतिवा सेक ल बिन।’ सिनी योक कुसुङ। 9गोमु छ्युजी ङ चोयीला लाका कितुपतिवा वानी तिवा रे रेला ङुलकी डप्बु रे रे ङ्येसुङ। 10तमा तेरी सिनाङ गोमाला वानी लाका कितुपतिवी खोरो सेमला तिङ्ला वावुतिवाला सिनाङ ल ल्हक्पा थोप्किते सिनी नो क्यासुङ, यिने तिवाला साङ ङुलकी डप्बु रे रे राङ ङ्येसुङ। 11ल ङ्येसिमा तिवा शिङ ज्यिन्दाकला ङ्योशोक ङ्योशोक सियी 12‘दिवा तिङ्ला वानी घण्टा च्यिक तिराङ लाका क्यावुतिवा ताङ ङ्यिराङ ङ्यिमा छेन्दीला ङ्यिमा काङ लाका क्यावुला च्यिक्पा राङ ल बिन्सुङ।’ सिनी सिक्यासुङ। 13तमा ती शिङ ज्यिन्दाक तीकी तिवी पर्ला मिरा च्यिकला ‘आङो, ख्यिराङला ङे काङ मेलोवा माक्या वे। ख्यिरा ङुलकी डप्बु च्यिककी लला लाका कितिन सिक्यावु मिन? 14ख्यिराङ दाक दाक्पुला थोपुप ल खुर्नी ग्युक। दी तिङ्ला वावुतिवाला ख्यिराङला चोयी राङ तेरुप ति ङे नो वे। 15ङे टङ्गाला ङरा काङ कितुप नो वे, तुकै राङ कितुप मेङ्येवी रो? ङे च्यम्बा वोतुप तप्की ख्युरुङ ठतोक किवी?’ 16तुक क्यानी तिङ्ला वुङ्गुपतिवा ति गोमाला ख्येल्गिवी, गोमाला वुङ्गुपतिवा ति तिङ्ला ख्येल्गिवी।”
येशूकी थेङ्मा सुम्बाला खोरुङ टुङ्गुप कोर्ला नम्दर शेतुप
(मर्कूस १०:३२-३४; लूका १८:३१-३४)
17ती ज्युक्ला येशू यरूशलेमला फेपिन कितुप पेला खोकी लोमा च्यिङ्ङीतिवाला कुतुक टि गल्नी दुक सुङ्सुङ, 18“ल्होसा, त दाक्पु यरूशलेम नेवा डोयी वे। मी पुज्युङला कोङ्यार छ्येतिवा ताङ यहूदी छ्योकी गेकेनतिवी लकला चेक तेकितो। तमा तिवी तीला क्येन बिन्नी सेतुप छ्येर्पा ग्येल्गितो। 19ती ज्युक्ला तीला यहूदी मिन्दुप मिरिक यम्बातिवाला चेक तेकितो। तमा तिवी तीला मारे ताङ्नी तल्ज्येक ग्यक च्यिनी ग्यङ्शिङला कल्नी से ज्यिकितो। यिने शेप ङ्यिमा सुमकी छेर्मु कोन्छ्योककी तीला ङोसु लोङ्गितो।”
याकूब ताङ यूहन्नाकी आमाकी येशूला गोङ्बा शुवु
(मर्कूस १०:३५-४५; लूका २२:२४-२७)
20ती ज्युक्ला जब्दियाकी पुज्युङ याकूब ताङ यूहन्नाकी आमा तीकी खोरो पुज्युङतिवा ताङ मुला येशूकी चाला वानी पुमुङ सला चुनी खोला गोङ्बा शुसुङ। 21तमा येशूकी तीला “ख्युरुङला काङ गोकिवी?” सिनी टि नाङ्सुङ। तीकी “ङे पुज्युङ ङ्यिवुला गेकेनकी ग्येल्खापला च्यिक ति गेकेनकी यावी थाकाला, च्यिक ति येन्बी थाकाला देतुप ङ्येशी।” सिनी सिक्यासुङ। 22येशूकी तिवाला “ख्यिरा लङ्गुप ति काङ यिन सिनी ख्यिराङला छ्या मे। काङ ङे थुङ्गुप दुक्पाकी कोरा नेमा ख्यिरा थुङ थुप्किवी?” सिनी सुङ्सुङ। तमा तिवी “लसे, ङ्यिराङ थुङ थुप्किवी।” सिनी सिक्यासुङ। 23तमा येशूकी तिवाला सुङ्सुङ, “ङे थुङ्गुप कोरा ति वुतुङ के ख्यिरा थुङ्गिवी। यिने ङे यावा ताङ येन्बाला देतुप ति ङे कि ज्यितुप मिन, ङे पपी सी थोक्ला टडिक क्यावे, तिवाला राङ देतुप ङ्येकिवी।”
24ती थोसिमा लोमा च्यिथम्बातिवा याकूब ताङ यूहन्नाला ङ्यिर्मु क्यासुङ। 25तमा येशूकी तिवा तेरीला चाला कताङ्नी सुङ्सुङ, “ख्यिराङला छ्या वे, जम्बुलिङकी ग्येल्वी खोरो मीतिवाला ओङ्ज्येन किवी, तमा ती लुङ्बाकी मी छ्येतिवी मीतिवाला ओङ्ज्येन किवी। 26यिने ख्यिरा पर्ला याङ तुकै मेङ्गिवी। बोरु सु ख्यिरा पर्ला छ्ये डोप नो किवे, ती ति ख्यिराङ तेरीला शब्ज्यी कितुप मी च्युङ गोकिवी। 27तमा ख्यिरा पर्ला सु तेरी सिनाङ छ्ये डोप नो किवे, ती ति ख्यिराङ तेरीकी योक्पु च्युङ गोकिवी। 28ङ मी पुज्युङ ति मीतिवा नेमा शब्ज्यी ङ्येतुपला वावु मिन, यिने शब्ज्यी कितुपला ताङ मी बङीला दिक्पा ने थर ज्यितुपकी थोक्ला ङरा मिजी तेरुपला वावु यिन।”
मिक मोथोङ्गुप मिरा ङ्यीला थोङ थुपुप जोवु
(मर्कूस १०:४६-५२; लूका १८:३५-४३)
29तमा येशू ताङ खोकी लोमातिवा यरीहो ने फेपिन कितुप पेला मी माङ्छ्योक खोकी तिङ्ला तिङ्यासुङ। 30ती पेला मिक मोथोङ्गुप मिरा ङ्यी ते लामकी गारीला देनी येशू ती लाम नेवा फेपिन वे सिरुप थोनी, “ओ चोवो, दाऊदकी सेवु, ङ्यिराङला च्यम्बा की।” सिनी च्यार ग्यप्सुङ। 31मी माङ्छ्योककी तिवाला खरक्पा दे सिनी वोरु तेन्सिनाङ तिवा मङ कशेन च्यार ग्यकिन सिरा “ओ चोवो, दाऊदकी सेवु, ङ्यिराङला च्यम्बा किटे की।” सिनी सिक्यासुङ। 32तमा येशू ते टङी देनी तिवाला चाला कताङ्नी, “ख्यिराङला ङे काङ किशी सिरुप नो वे?” सिनी सुङ्सुङ। 33तमा तिवी “ओ चोवो, ङ्यिरा मिक ति थोङ्गुप डोशी।” सिनी सिक्यासुङ। 34तमा येशूकी तिवाला ङ्यिङ्ज्ये लानी तिवी मिकला खोरे छ्याक रेक्सिमा शार्क्येक तिवी मिक ति थोङ थुपुप गाल्सुङ। ती ज्युक्ला तिवा ङ्यिकर खोकी तिङ्ला तिङ्यासुङ।
Currently Selected:
मत्ती 20: xsrNT
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
