Luka 7

Iesu Roma Ifani Lopiaga Ega Kala'afi Epafelo

(Mateo 8:5-13)

1Iesu i'ina iifa'i ma'oai papiau fekelogo eoma maa'iai eifania efua aisama, epua'afuni'i elao Kapenaum taoninai ekoko. 2Ega aisama egae Roma ifani au'i 100 e'ima'i lopiaga alo ko'agai ega kala'afi aga'o anina eani auga eisafa emia femae. 3Ega'ina lopiaga Iesu emai auga fouga elogo puo, Iudea au akaiki'a au'i isa'i feulai'i, Iesu eega fekelao fekegoina femai ega kala'afi fepafelo eoma. 4Ke ega'ina au'i Iesu eega kelao aisama, kegoi kapulania keifa keinaka, “I'ina auga faagagai ega'ina alokapa auga felo ipauma. Ke isa au felo puo, fou falao ega kala'afi fopafelo aoma. 5Gome isa alo ko'agai i'a a'a ago anina eani, ke i'a a'a la'afou afuga epaapa,” keoma. 6Ega puo Iesu isa fou kelao.

Ke Iesu elao Roma lopiaga ega e'a kainagai aisama, ega'ina lopiaga ega iifa ekefa'a epenii'i eulai'i Iesu kegapaina eoma. Ke isa kemai Iesu maagai ega'ina lopiaga ega iifa keifania keinaka, “Lopia, oi fomai lau e'u e'a alogai fokoko auga laopolaga afaekaina. Gome lau au e'eleu. 7Ega'ina kainai lau ifou famai faisao mo auga laopolaga aekainia. Kai moifa mo e'u kala'afi felo gamia. 8Gome lau ifou isafa e'u lopia akaiki'a'i papa'iai lapinauga, ke e'u ifani au'i isafa lau papauai kepinauga. Lau i'ina auga aga'o lapaina ‘molao’ laoma aisama elao. Ke aga'o lapaina ‘mai’ laoma aisama emai. Ke e'u kala'afi auga lapaina ‘i'ina mokapa’ laoma aisama ekapa,” eoma.

9Iesu ega'ina iifaga a'o elogonia aisama, ekauai alogaina ke e'afoaipini muninai la'afou akaiki'a kepea au'i epaini'i einaka, “Iifa gome maamiai laifania. Israel papiau'i mo ganinagai epo'iai kai aga'o iina epako'a omaisau alaisa koa,” eoma. 10Egae kai Iesu ega'ina lopiaga ekefa'a au'i eulai'i kemue kelao. Ke kelao e'ai aisama, ega'ina lopiaga ega kala'afi felo emia keisa.

Iesu Afuafu Gauga Maeai Epamaunimue

11Ega'ina afegai mo, Iesu taoni aga'o aka Nain keoma auga taonina elao. Ega aisama ega imoi ma'oai ke la'afou akaiki'a fou kelao. 12Ke kelao taoni pa'afina eegai aisama, papiau mae auga aga'o kepuaisa kemai. Mae ega'ina auga afuafu gauga, ega mo aga'omo kai emae. Ke mae ega'ina muninai afuafu ega'ina la'afou akaiki'a fou kepea. 13Lopia Iesu afuafu ega'ina eisa aisama, gua eani alogaina, ke elao epainia einaka, “Foloapepe,” eoma.

14Egae kai Iesu elao mae kofugai eafiau aisama, papiau mae kepua au'i keapakipo. Ega aisama Iesu mae auga epainia einaka, “Au agu'amu! Lapainio mo'ue,” eoma. 15Ega aisama mae auga e'ue eagu, e'ina enini'ani pugu. Ke Iesu au agu'a emaunimue auga imagai eafi ina epenimue.

16Egae keapa papiau'i ma'oai i'ina emia keisa aisama, kemani'i alogaina, ke Deo keau afagaina keifa keinaka, “Lai Deo ega profeta akaiki'a emai epomaisai,” keoma. Ke keifa pugu keinaka, “Deo ega papiau gapalagaini'i eoma puo emai,” keoma. 17Ke Iesu au epamaunimue auga fouga Iudea ago fofouga,#7:17 1:5 moisa. ke Iudea ago eegai ago'iai isafa efoufa'a.

Iesu Ioane Baptista Ega Pa'ani Afa Epamue

(Mateo 11:2-19)

18Ioane ega imoi i'ina a'o kelogonia aisama, kelao Ioane Baptista maagai Iesu kapa'ina ekapai'i auga ma'oai keifania. Ega aisama Ioane ega imoi auni'i eifani'i kemai. 19Ke eulai'i kelao Iesu iina fekepa'ani peni oma eoma, “Au aga'o agemai auga oi ma? O aufalao aga'o i'oina ma fa'ima?” eoma.

20Ke i'ina au'i kemai Iesu eegai aisama, kepainia keinaka, “Ioane Baptista eulaimai oi fapa'ani penio eoma puo amai. Ioane eifa, ‘Au aga'o agemai auga oi ma? O aufalao i'oina aga'o ma fa'ima?’” keoma.

21Ke kepa'ani penia alogai, Iesu auga isafa e'ele'i au'i, isafa akaiki'a au'i, ke tiapolo apala'i alo'iai keagu au'i epafelo'i. Ke maakimi'i au'i isafa epafelo'i. 22Ega puo Iesu Ioane Baptista ega imoi e'i iifa epamue einaka, “Maakimi'i au'i amu keisa'i pugu, melo au'i kepea, molumolu au'i felo'i kemia, aina'i efua au'i a'oa'o kelogo, mae au'i kemaunimue, ke ulalu au'i iifa faunina a'o kelogo. Pau oi fomue folao Ioane Baptista maagai kapa'ina oisa ke a'o ologonia auga foifania. 23Ke foifa, ‘Kaisau lau epako'aniau ke opo gua aemia auga Deo eegai kapa felo'i ageafi'i fooma,’” eoma.

24Ioane Baptista ega imoi kemue kelao afegai, Iesu Ioane Baptista fouga la'afou maa'iai e'ina eifa einaka, “Kapa'ina foisa ooma puo Ioane eagu afuga ago maini olao? Ameku inipo epua foisa ooma puo olao ma? 25Ega'ina laa'i aisama, kapa'ina foisa ooma puo olao? Au afe tiapuga felo ei'iuka foisa ooma puo olao ma? Laa'i ipauma! Tiapu afa akaiki'a kei'iuka au'i, ke aufa kina keagu felo alogaina au'i auga, kin eaguagu e'agai keagu. 26Kai kapa'ina foisa ooma puo opealai olao? Profeta aga'o foisa ooma puo olao ma? E, iifa gome maamiai laifania, Ioane auga profeta ma'oai eka'egaini'i. 27Ega kainai isa fouga Deo iifa ega pukagai iina kepapua oma:

“‘Lau e'u iifa ipapea auga oi agomuai alaulai kakaua, emu keaga agepakaisa.’ Malaki 3:1

28Iifa gome maamiai laifania. Papiau ma'oai papie gua'iai kemauni au'i epo'iai kai aga'o Ioane Baptista ega akaiki'a koa i'opoga laa'i. Kai Ioane Baptista, Deo ega agofa'ai au e'ele ipauma aga'o aeka'egaina,” eoma.

29Papiau tax keafi'i au'i isafa, Ioane baptismo epeni'i au'i ma'oai Iesu ega nini'ani a'o kelogonia aisama, Deo ega keaga opaina ipauma auga kepako'ania, ke ko'a keoma. 30Kai Faliseo au'i ke Moses ega iifa pamalelega au'i fou, Ioane eegai baptismo kepamafua akeafia au'i, isa fau'iai Deo ega logo ekapaisa auga keumakalaina.

31Iesu kapa'ina eifania auga aina akeafia puo eifa einaka, “I'ina papiau'i kapa'ina koa fou alaoge'opo'i agekaina? Isa kaisau koa i'opo'i? 32Isa imoi e'ele'i koa i'opo'i, afa'afa afugai keagu ke ifo'i epo'iai iina keifa oma:

“‘Lai oi faumiai filiko apa'opuania kai alogefa,

ke lai alomafu iifina aifinia kai aloapepe.’

33Ega'ina iifaga koa i'opoga, oi kapa aga'o faagamiai emia kai kainai alokai. Ke oi emi laomai ega koa kainai, Ioane Baptista emai alogai palafa aeania ke fino aeinu aisama, oi oifa, ‘Isa alogai tiapolo eague’ ooma. 34Kai Papiau Aumauni Gauga emai alogai, eaniani ke fino einu aisama, oi oifa, ‘Amoisa, isa eaniani mogemoge, einuinu alogaina, laomai apala'i kekapa au'i epo'iai tax keafia au'i isafa fou kepaekefa'a kelao kemai’ ooma. 35Kai pau lau lapainimi. Kaisau Deo aina keafia ke muninai kepea au'i mo ega ikifa epakina'i.”

Laomai Apala Papiega Iesu Ife Eikuisa

36Kai Faliseo auga aga'o aka Saimon, Iesu eifa koko ega e'ai fou fekeaniani eoma. Ega puo Iesu ega imoi fou Faliseo auga ega'ina ega e'a kelao keagukipo kegaaniani keoma. 37Ega aisama papie aga'o ega'ina taoninai laomai apalagai eaguagu auga, Iesu Saimon ega e'ai fou keaniani auga elogo. Ega puo isa mulamula foga felo ipauma kafapuga eafiia elao. 38Ekoko aisama, Iesu muninai eapa ife fo'inai eomukipo eapepe, ke e'ina maaga iugai Iesu ife epafeisa. Egae kai fufugai Iesu ife epaigu fugania, ke ife egoapi'i, ke mulamula foga felo ipaumagai ife e'efai'i.

39Faliseo auga ega'ina Iesu eifa koko auga, papie ega'ina ega koa ekapaisa eisa aisama, ifo alogai eifa einaka, ‘I'ina auga profeta ko'a gamia koa aisama, kaisau isa faaga eafi opogaina auga felogo. Ke papie laomai apala ipauma ekapakapa auga isafa felogo,’ eoma.

40Iesu Faliseo auga ega'ina kapa'ina eopolaga auga elogo puo epainia einaka, “Saimon, kapa aga'o maamuai maifania laoma,” eoma.

Ke Saimon eifa einaka, “Pamalele aumu, maauai moifania,” eoma.

41Ega puo Iesu eifa einaka, “Au aga'o moni eegai keapiapitoleaina auga eegai au auni'i moni keapitoleaina. Au aga'o 500 denari#7:41 ‘Denari’ aga'omo auga au aga'o kina aga'o epinauga afa. eapitoleaina ke aga'o auga 50 denari eapitoleaina. 42Ke auni'i kai'ialao moni fekepenimue auga aekainia. Ega puo e'i apitole ea'ini'i. Ega koa aisama, ega'ina au'i auni'i epo'iai kaisau auga alo ko'agai moni eegai keapitoleaina auga anina ageani alogaina. Oi moopolaga moifania,” eoma.

43Saimon iifa epamue einaka, “Laopolaga, moni akaiki'a eapitoleaina auga,” eoma.

Ke Iesu eifa pugu einaka, “Oi opolamu felo,” eoma.

44Ke Iesu ega'ina papiega eaipenia kai Saimon epainia pugu einaka, “I'ina papiega loisa. Lau oi emu e'a alogai lakoko aisama, kagakaga kainai ifeu foikua feina aga'o fopeniau koa i'opoga kai alopeniau. Kai isa emai aisama, maaga iugai ifeu epafei'i ke fufugai epaigu fugania. 45Lau lamai aisama, kagakaga kainai foogoapiau kai alogoapiau. Kai i'ina papiega eeu emai aisama, gaifa kokoisau eoma puo ifeu egoapia aeapakipo. 46Lau lamai aisama, kagakaga kainai au akaiki'au fopamiaisau oili kaniauai fooge kai aloogeisa. Kai isa mulamula foga felo ipaumagai ifeu e'efaisa. 47Ega puo iifa gome maamuai laifania. Deo kaisau ega laomai apala'i ma'o e'agegeaini'i aisama, isa auga Deo anina eani alogaina. Kai Deo kaisau ega laomai apala e'ele'i mo e'agegeaini'i aisama, isa Deo afa'agamo anina eani. Deo i'ina papiega ega laomai apala'i ma'o e'agegeaini'i puo, alo ko'agai aniu eani auga papiau epakina'i,” eoma.

48Egae kai Iesu ega'ina papiega epainia einaka, “Deo emu laomai apala'i e'agegeaini'i,” eoma.

49Ega aisama Saimon papiau eifa koko'i au'i ifo'i epo'iai ke'ina keifa keinaka, ‘Deo mo laomai apala'i e'agegeaini'i kai, isa isafa papiau e'i laomai apala'i e'agegeaini'i eoma. I'ina auga kaisau?’ keoma.

50Kai Iesu ega'ina papiega epainia einaka, “Oi lopako'aniau puo Deo emu laomai apala'i e'agegeaini'i, ke kaniamu eagamauga. Gagaoai molao,” eoma.

Currently Selected:

Luka 7: mekNT

Highlight

Copy