Matthew 21

Chin nangdaydayawan chin tatakhu ay Hesus hi omajana ad Jerusalem

1Empacheh cha Hesus an khun cha homnot ad Jerusalem. Emmatam cha ad Betfage an achaan chuy pfulludna an nangadnan hi Olibo ja hennag Hesus han chugwa an disipolo na 2an inali na hi, “Ipangulu ju ay chuy pfarju hichi chammangna. Nu omatam aju hot chakngan ju han nekhokhoꞌ-od an donkey ja han pfoꞌtot an empfalay na. Upfachon ju ja in-ali ju heto. 3Ja nu gway mangpfokha hi, ‘Anagkha ta alaon ju hato donkey?’ ja allon ju hi, ‘Alaon mi, ti nan mahapor Apo ta-o,’ hot i-apfulut cha.” 4Na-at hitay ta mipa-annung chin inalin chin profetan Apo Jos chin hophopapna hi nangarjana hi,

5“Allon ju hana tatakhu an eSion hi,

‘Chiya an umali hichuy Ari ju,

An napakumbaba ja nunhahakkay han pfoꞌtot an donkey.’ ” #21:5 Zechariah 9:9

6Immuy hachi chugwa an disipolo ja inunud cha chin inalin Hesus. 7Enala cha chin donkey ja chin empfalay na ja in-uy cha ay Hesus. Enopnan cha chin khatud cha hi lopfong ja nunhakay hi Hesus ay ni oha. 8Hi khun cha omajan ja chenom-or chin tatakhu, ja nunloh-op cha chin uchumna an lopfong cha hon en-ap-ap cha chin chalan. Hachi uchumna ja numpateng cha chin tupfun chi ajiw ja nun-e-ap-ap cha khu ay chuy chalan. 9Hachi ayya nangpangpangullu ja hachi khun mangun-unud an atakhutakhu ja khun cha iꞌgwap hi, “Madaydayaw a an holag Ari David. Mabindisyonan a an hennag Apo Jos. Madaydayaw hi Apo Jos ad langit!”

10Unagkhu emmatam cha Hesus ad Jerusalem ja napfu-ar hachi atakhutakhu ja khun cha allon hi, “Ngay ngachan tay an takhu?” 11Ja hachi nitnud ja hi-a-ali cha hi, “Hitay hinuy profetan Apo Jos an hi Hesus an eNazaret hichi provincian chi Galilee.”

Chin nangpakakan Hesus hachi khun mungngina hichi Templo

12Immuy hi Hesus ay chuy partug chi Templo ja chinakngana hachi khun mungkumerchu hi animar an hijay khun nguminaan hana takhu hi ipidaton cha ay Apo Jos. Ja nun-epakak na hay hachi khun ngumina ja mungngina. Nun-ipfu-allo na hachi lamehaan hachi khun munhukat hi pihu, ja chin umpfunan hachi khun mungngina hi hagwiti an pfalug. 13Ja inali na ay chicha hi, “Allona ay ni hapit Apo Jos hi, ‘Hitay pfalay u ja pfalay an pungkalalakhan.’ ”#21:13 Isaiah 56:7 Muti tayya an numpfalinon ju hi a-amungan chi mangakaw.#21:13 Jeremiah 7:11

14Chin agwachaan Hesus hichi Templo ja immuy ay hija hachi nun-apfulaw ja hachi nun-apilay ja nun-epatenong na. 15Muti hachi a-ap-apon chi papachi ja hachi memehtolon chi urchin Moses ja emmomohchong cha hay hato milagro an enat na, ja chedchengngor cha hachi ung-ungungnga an gwah chi partug chi Templo an khun cha iꞌgwap hi, “Madaydayaw hitay holag Ari David!” Ja pfimmungot hato a-ap-apo 16ja inali cha ay Hesus hi, “Chonglom akay niꞌ hay hato khun cha iꞌgwap.” Ja inalin Hesus hi, “Aa, chengngor u. Un ju chah agkhuy pfinaha hitay Hapit Apo Jos hi nangarjana hi,

‘Tinuchugwam hana ung-ungungnga ja hana paꞌ-ipfutay an khun mun-inum

Ta mapmaphod hini aton cha an mundayaw ay he-a.’ ” #21:16 Psalms 8:2

17Amat hichi ja tenaynan Hesus chicha ad Jerusalem ja immuy nunnanong ad Betani.

Chin nangtubtupfan Hesus han ajiw an higos

18Chin nun-inggwiꞌgwiit ja pfimmugwah cha Hesus an mumpfangngad ad Jerusalem ja hemmenaang hija. 19Enamang na han ajiw an higos ay chuy pingngit chuy chalan ja immuy ta i omala hay pfunga na. Unagkhu emmatam chin achaan chuy ajiw ja ma-id oh-ohhah pfunga na, an un angkhay chin malupfong an tupfu na. Ja inalin Hesus ay chuy an ajiw hi, “He-a ton ajiw, achi a mahpay pfumungpfunga ja ingkhana!” Unot empa-opoh Hesus hitay an inali na ja naꞌleng chin higos. 20Nanor hachi disipolo ja khun cha allon hi, “Anagkha ta ngay na-at ta hin-alina ja i naꞌleng hitay higos?” 21Ja inalin Hesus hi, “Umannung hitay alloꞌ ay chaꞌju, nu munchomoꞌ aju ay Apo Jos an atona hini epfokha ju, an achi munharhalinchugway nomnom ju, hot mapfalin an aton ju khu chi amat ay tay enat u ay tay higos. Ja pfu-un hitay ja angkhay, an mapfalin an allon ju ay tay an pfulludna hi, ‘Makak a heto ta i a mituud hichi baybay’ hot ma-at. 22Hotti nu ngachah chi ekalalag ju ay Apo Jos, ja ma-at an ma-at nu gway pammati ju.”

Chin nangpfokhaan cha nu ngay narpugwan chi apfalinan Hesus

23Emmatam cha ad Jerusalem ja immuy cha ay chuy partug chuy Templo. Khun muntudtuchu hi Hesus ja immuy hachi a-ap-apon chi papachi ja hachi uchumna an a-ap-apon chi Hudju ja empfokha cha ay hija hi, “Ngachah chi narpugwan ni apfalinam an mangat hay hato khun mu aton? Ja ngay nangchat ay nuy apfalinam?” 24Tempfar Hesus ja inali na hi, “Unchani adchiya ta topfalon ju pay hitay peꞌpfokhaꞌ. Nu topfalon ju hot alloꞌ ay chaꞌju hini narpugwan tay apfalinaꞌ an mangat hato.

25Hotti allon ju adchiya tugwali, ngay nannag ay John Bautista an immali an khun mumbautisar? Hi Apo Jos wenno hay takhu?” Ja khun cha manghempfopfogkha an khun cha allon hi, “Hot ngachah chi allon ta-o mah? Nu allon ta-o hi un hennag Apo Jos hot allona hi ‘Nu hi Apo Jos chi nannag ay John ja anagkha mah ta agkhuy ju pinati hija?’ 26Ja nu allon ta-o khu hi hennag chi hay takhu hot pfumungot hay hato tatakhu, ja unakkay gway aton cha ay chita-o, ti namati cha an amin an profetan Apo Jos hi John.” 27Hotti hay nampfar cha ay Hesus ja inali cha hi, “Ma-id anila mi nu ngachah chi nannag ay hija.” Tempfar khu Hesus ja inali na hi, “Nu amat hina hot achiꞌ khu epfaag nu ngay nangchat ay ha-in hi apfalinaꞌ an mangat hay hato.”

Chin pangngarig han chugwa an hin-akhi

28Inalin khu Hesus hachi a-ap-apo hi, “Ut-utnuwon ju akay niꞌ nu ngay penhod tay pangngarig an hapiton. Gwa han lala-e an chugwa han empfalay na an linala-e. Immuy niꞌhapit ay chuy panguluwan ja inali na hi, ‘Umuy a akay ta i a muntamu hichi kharchin ta-o.’ 29Ja inalin chin panguluwan hi, ‘Ti tan mahulit hotti achiyaꞌ umuy.’ Muti unagkhu nahnahop ja nunnomnom ja immuy chamchama. 30Immuy khu hi ama cha ay chuy netob ja inali na khu hi, ‘Umuy a akay ta i a muntamu hichi kharchin ta-o.’ Ja inalin chin netob hi, ‘Aa, umujaꞌ,’ muti agkhuy chamchama immuy. 31Hot ngay allon ju ay cha tay an chugwa hi nangat ay ni penhod ama na?” Tempfar cha ja inali cha hi, “Hinuy panguluwan.” Ja inalin Hesus hi, “Aa, ja umannung hitay alloꞌ ay chaꞌju, an khun mahhun hana nun-apfahulan an tatakhu an midchum ay ni Pun-ap-apugwan Apo Jos, an amat hana khun munhenger hi pakha ja hana putah. 32Ti immali hi John an nangtuchu hana magpong an peꞌ-at cha ja inunud cha. Muti chaꞌju ayya ja agkhuy ju inunud. Tinnig ju mit hitay enat cha an namati ja agkhuy ju tugwali chin-ug hana pfahor ju ta niꞌpati aju koma.”

Chin pangngarig hana khun meꞌpfengpfeng

33Inalin khu Hesus hi, “Chonglon ju pay hitay oha khu an pangngarig. Gwa han ohan lala-e an nuntanum hi cho-or hi ubas ay ni kharchina. Enalad na chin kharchin ja tinau-ana han pfato an khun cha pang-amungan hi chanum chi ubas hi un cha lochehon. Empahaꞌ-ad na khu han nataꞌnang an ab-abpfong an oma-ayyan chi mumpfantay. Napfalin hay hato ja empapfengpfeng na hichuy kharchina ja unot makak an umuy hichi achawwi. 34Unot nachakngan chin ahipokhah ja hennag na hachi takhala na an i meꞌ-aggwa ay chuy penokhah cha an ubas. 35Muti hay hato an neꞌpfengpfeng ja enala cha hachi takhala ja numpakhuh cha hichuy oha, penatoy cha khu hichuy oha, ja nungkhajang cha hichuy oha. 36Ja hennag na khu hana choꞌchoꞌ-or pay an takhala na, ja hihiya, an pinalikhat hachi neꞌpfengpfeng. 37Unot omaꞌ-angonoh ja hennag na chin empfalay na an lala-e an umuy meꞌ-aggwa ta alom ja egngor hachi neꞌpfengpfeng hija. 38Muti unot nangalimutugwan hachi neꞌpfengpfeng hichuy empfalay na ja nunhahapit cha ja inali cha hi, ‘Hijah tay hini empfalay ni khun ta-o peꞌpfengpfengan an hijay mamanoh ay tay lotan ama na. Unot la-ahna ja penatoy ta-o ta chita-oy mangheꞌ-a ay tay lota.’ 39Amat hichi ja enekak cha ja penatoy cha.” 40Ja inalin Hesus hachi a-ap-apon chi papachi ja hachi Farisee hi, “Ngachah tugwali chi aton tay an takhu hay hachi neꞌpfengpfeng ay hija?” 41Tempfar cha ja inali cha hi, “Epapatoy na kaykhu hay hato an napupukhit an tatakhu ja empapfengpfeng na hinuy kharchin hi uchumna an achi ngumangannu an mangchat ay ni khaggwa na.” 42Ja entoloy Hesus an nangali hi, “Anilaꞌ an pfinaha ju hitay nitulaꞌ an Hapit Apo Jos hi nangarjana hi,

‘Hinuy pfato an namlenan hay hana mumpakhad hi pfalay

Ja hijay numpfalin hi na-ahammad an pognad tay an pfalay.

Hi Apo Jos chi nangat ay tay,

Ja nakaskasda-aw hi pannikhan ta-o!’ #21:42 Psalms 118:22

43Hijaot un u khun allon ay chaꞌju an pfu-un mahpay chaꞌju an Hudju chi tatakhun Apo Jos an midchum ay ni Pun-ap-apugwana, ti enaan chaꞌju ja empallog na hana khun mangat ay ni penhod na. 44Hinuy pfato an namlenan cha ja nu gway makhah ta meꞌna ay tay an pfato ja mun-igwa-itay. Ja nu meꞌna hitay an pfato ay ni takhu hot mun-akhupung.” 45Unagkhu chengngor hachi a-ap-apon chi papachi ja hachi Farisee hay hato in-arig Hesus ja anila cha an chicha hana khuna hapiton an nan-ug ay hija. 46Penhod cha an tiligwon hi Hesus muti agkhuy cha entoloy ti toma-ot cha hachi cho-or an tatakhu an nangapfulut an profetan Apo Jos hija.

Currently Selected:

Matthew 21: ifu

Highlight

Copy