Aluki 17

Tɩ da botɩ nẽra basɛ Nawẽnnɛ sore, la tɩ basɛ taaba tõon-be'ero taalɛ

(Amatie 18:6-7,21-22, Amarkɩ 9:42)

1Tɩ Azezi yele a karẽnbiisi la yetɩ: «La ka tã tɩ bõn-sɛba n pã'asrɩ nẽrba tɩ ba basra Nawẽnnɛ sore la ka wa'am. La nẽr-sɛka n wʋn botɩ bõn-bãma wa'am na wʋn yẽ toogo. 2Ba sãn dɩkɛ nẽerɛ kug-kãtɛ lʋ yulse a yugla lobe ẽ basɛ ko-kãtɛ pʋam, n sõɩ ẽŋa n wʋn botɩ bi-pɩka ayɩla basɛ Nawẽnnɛ sore. 3Guuse-ya ya mẽŋa.

Fʋ sɔbia sãn tõm be'em, fʋ kã'an ẽ. La a sãn teege yɛm basɛ tõon-be'ero la, fʋ basɛ ẽ taalɛ. 4La a sãn ẽŋɛ fʋ be'em nõorɛ ayopɔɩ daarɛ ayɩla, dee leme fʋ zẽ'am nõorɛ ayopɔɩ wa yetɩ: ‹Mam tõm na be'em, bɔ mam sugri›, dẽnɩ tɩ fʋ basɛ ẽ taalɛ.»

Tɩ bɔ Azezi sɩra

5Tɩ Zuudãana Azezi karẽnbiisi pia la ayi la yele ẽ yetɩ: «Botɩ tɩ bɔ fɔ sɩra zo'oge.» 6Tɩ Zuudãana la yele ba yetɩ: «Ya sãn bɔ mam sɩra fẽe wʋ sɔ'ɔrɔ biire la, ya tã wʋn yele kẽnkãŋa wã tɩ a võogɛ sẽŋɛ ka sele mõgrɛ pʋam ke, la a wʋn sakɛ ya nõorɛ mɛ.»

Tõntõnna masɛ mɛ tɩ a tõm a tõonɛ

7«Tẽ'esɛ-ya bɩsɛ, nẽra sãn bɔna yãma pʋam tara tõntõnna tɩ a kɔɔra, bɩɩ gu'ura a dũnsi, tɩ tõntõnna la sãn ze'ele va'am wa'am, a wʋn yele ẽ mɛ yetɩ, wa'am wa di bɩɩ? 8Ayɛɩ, a wʋn yele ẽ yetɩ: ‹Dʋgɛ m dia, dee teege fuugo yɛ, tarɩ dia la wa'am wa bɔ ma tɩ m di. M sãn di dee yũ ba'asɛ, tɩ fʋ mẽ yãŋa di dee yũ.› 9La zuudãana la n yele tõntõnna la tɩ a ẽŋɛ se'em, tɩ a ẽŋɛ la, zuudãana la kãn pʋ'ʋsɛ ẽ. 10Bɛla mẽ, ya sãn ẽŋɛ sɛla woo tɩ Nawẽnnɛ yele ya tɩ ya ẽŋɛ la, ya yetɩ: ‹Tõma wen dɛna la tõntõnɩba, tõma ka narɩ pʋ'ʋsgɔ, se'ere n soe la, la de la tɩ tõoma, la masɛ mɛ tɩ tɩ tõm.› »

Azezi botɩ kõnkɔma pia yẽ ĩmã'asʋm

11Azezi daan boe la sore wɛ'ɛsa Zerizalɛm dɔla Samaari la Galile tẽŋasʋka, 12paagɛ tẽŋa ayɩla pʋam, tɩ kõnkɔma pia tʋ'ʋsra ẽ, ze'ele kẽnkɛrŋa 13kaasra yetɩ: «Zuudãana Azezi, zoe tɩ ninbãalga.» 14La ẽn yẽ ba la, tɩ a yele ba yetɩ: «Sẽŋɛ-ya kãabgɔ kẽma la zẽ'am tɩ ba ka bɩsɛ ya ĩyã la n ãn se'em.» La ban sẽnnɩ wɛ'ɛsa la, tɩ bã'asɩ la basɛ ba, tɩ ba ãna sõŋa. 15La ba nẽra ayɩla n yẽ tɩ a kõnkɔm na basɛ ẽ na, tɩ a lɛbra Azezi zẽ'am dee tɔgra ke'enke'em pẽgra Nawẽnnɛ, 16sẽŋɛ ka ka dũma dɩkɛ a nẽŋa võglɛ tẽŋa Azezi nẽŋam pʋ'ʋsɛ ẽ. A daan de la Samaari nẽra. 17Tɩ Azezi yetɩ: «La dagɩ bãma pia n yẽ ĩmã'asʋm? Tɩ bawɛɩ la bɔna la bɛ? 18Bẽm tɩ ẽna n de sãana la mã'a n leme wa'am tɩ a pʋ'ʋsɛ Nawẽnnɛ a yel-sõnnɛ?» 19Dee yele ẽ yetɩ: «Fõn bɔ mam sɩra la n botɩ fʋ yẽ fãarɛ, isge sẽŋɛ.»

Nawẽnnɛ n diti na'am se'em

(Amatie 24:23-28,37-41)

20Farisi dõma soke Azezi mɛ tɩ ba bãŋɛ wakat-sɛka tɩ Nawẽnnɛ wʋn di na'am nẽrba sʋkam. Tɩ a lerge ba yetɩ: «Nawẽnnɛ sãn wa dita na'am, la ka de sɛla tɩ nẽrba tã wʋn yẽ la nini. 21La nẽra kãn yetɩ: ‹Bɩsɛ-ya, a boe la kalam›, bɩɩ ‹a boe la ke›. Bãŋɛ-ya tɩ Nawẽnnɛ boe la ya tẽŋasʋka dita na'am.»

22La Azezi yele a karẽnbiisi la yetɩ: «Wakatɛ sẽm mɛ tɩ ya wʋn bɔɔra tɩ ya yẽ Nẽrsaala Dayʋa la, baa la sãn dɛna daarɛ ayɩla, la ya kãn yẽ ẽ. 23La nẽrba wʋn yele ya yetɩ: ‹Bɩsɛ-ya, a boe la ke›, bɩɩ ‹bɩsɛ-ya, a boe la kalam.› Da kãn sẽŋɛ-ya, da doose-ya ba. 24Se'ere n soe la, daar-sɛka tɩ Nẽrsaala Dayʋa la wʋn leme na, la wʋn ãna wʋ saaga n ẽn yãkɛ saazuum tɩ la nẽegɛ zẽ'a wuu se'em na. 25La, lan dẽŋɛ tɩ bõn-bãma wʋn ẽŋɛ, dẽnɩ tɩ a nãmsɛ zozo'e tɩ zamãan-ẽna wã dõma zagsɛ ẽ.

26Wakat-sɛka tɩ Nẽrsaala Dayʋa la wʋn leme wa'am na, la wʋn ãna wʋ Anoe wakatɛ tɩ la yʋʋn ãn se'em na. 27Nẽrba yʋʋn diti mɛ, dee yũura, tɩ bʋraasɩ dita pɔgba, tɩ pɔgsɩ mẽ ɛlla sɩrba, tɩ la wa paagɛ daar-sɛka tɩ Anoe kẽ õorŋ-kãtɛ la pʋam, dee tɩ ko'om yãŋa wa'am wa pɩrɛ zẽ'a wuu libe nẽrba wuu tɩ ba ki. 28La mẽ wʋn ãna wʋ Alotɩ wakatɛ n yʋʋn ãn se'em na. Ba yʋʋn diti mɛ, dee yũura, dee da'ara, dee kɔɔsra, dee bʋta, dee mẽta, 29ka paagɛ daar-sɛka tɩ Alotɩ fõrgɛ Sodom tẽŋa la, dee tɩ bugum n diti kidibre ze'ele saazuum lui tẽŋa kʋ ba wuu. 30Nẽrsaala Dayʋa la lemŋo daarɛ la mẽ wʋn di'ige ba la bɛla. 31Daar-ẽŋa, nẽr-sɛka n boe gɔsgɔ dee tɩ a lɔgrɔ bɔna deego pʋam, a da sige bɔɔra tɩ a ze'ele dɩkɛ ba zoe. La nẽr-sɛka n boe a va'am, da lebe kule. 32Tẽegɛ-ya lan yʋʋn ẽŋɛ Alotɩ pɔga se'em na. 33Nẽr-sɛka woo n boorɩ tɩ a gu a vɔm, a wʋn koŋe ẽ, la nẽr-sɛka n sakɛ tɩ a koŋe a vɔm, a wʋn yẽ ẽ.

34Mam yetɩ ya tɩ nẽrba bayi sãn gã sõŋɔ ayɩla pʋam yʋ'ʋŋɔ, ba wʋn dɩkɛ ayɩla, dee basɛ ayẽma. 35La pɔgsɩ bayi sãn bɔna nẽerʋm nẽena, ba wʋn dɩkɛ ayɩla, dee basɛ ayẽma. 36[Bʋraasɩ bayi sãn bɔna va'am, ba wʋn dɩkɛ ayɩla, dee basɛ ayẽma.]»

37Tɩ karẽnbiisi la soke Azezi yetɩ: «Zuudãana, bõn-ẽna wʋn ẽŋɛ la bɛ?» Tɩ a lerge yetɩ: «Zẽ'e-sɛka tɩ bõn-kɩ'ɩsɩ boe la, zẽ'e-ẽŋa tɩ zõa lagsrɩ taaba.»

Currently Selected:

Aluki 17: gurDBL

Highlight

Copy