ⵎⵜⴰ 9
9
ⵤⵤⵢ ⵏ⵿ⵗⵢⵙⴰ ⵏⵀⴹⵏ
1ⵜⵤⵔ ⴶⵤ ⵗⵢⵙⴰ ⵗⵍⵍ ⵏⵎⵏ ⵗⵔⵙ ⴶⵔⵓ ⴾⴰ ⵜⵗⵔⵎ⵿ⵜⵏⵜ ⴾⴼⵔⵏⵂⵎ⵰ 2ⵓⵢⵏⵙⴹⵓ ⵢⵜⴹⵏ ⵏⵀⴹⵏ ⵂⵏ ⵜⵙⵜⵏⵜ⵰ ⵙ ⵏⵢ ⵗⵢⵙⴰ ⵤⴶⵤⵏⵙⵏ ⵏⴰ ⵢⵏⵀⴹⵏ «ⴰ ⴾⵢ ⵓⵔ ⵛⵓⵛ ⵓⵍⴰ ⵀⵔⵔⵏ⵰ ⵀⴾⴹⵏⴾ ⵜⵓⵙⵔⴼⵏⴾ⵰» 3ⵜⵤⵔ ⵏⵏ ⵔⵜ ⴹⵗ ⵎⵙⵏⵏ ⵏⵜⵓⵔⵜ ⵓⵢⴹ ⴹⵗ ⵎⵏⵙⵏ «ⵍⵙ ⵓⴰ ⵎⴹⵔⵓ ⵜⴶⵓ⵰» 4ⵏⵙⵏ ⵗⵢⵙⴰ ⵙⵏⵏ ⴹⵗ ⵓⴰ ⵙⵎⴹⵔⵏⵏ «ⵎⴼⵍ ⵜⵜⴶⵎ ⵔⴾ ⵎⴹⵔⵏⵏ ⵓⵏ ⴹⵗ ⵓⵍⵏⵓⵏ⵰ 5ⵓⴾ ⵎⴰ ⴶⵔⵏ ⵜⵔⵗⵙⵢ ⴶⵔ ⵢ ⵏⵏ "ⵀⴾⴹⵏⴾ ⵜⵓⵙⵔⴼⵏⴾ" ⵎⵗ ⴾ ⵢ ⵏⵏ "ⵀⴹⴹ ⵌⵓⵏ⵿ⴾⵜ⵰" 6ⵎⵔⵏ ⵔⵗ ⴹ ⵜⵙⵏⵎ ⵙ ⵏⴾ ⴶ ⴶⴹⵎ ⵍⵗ ⴹⵗ ⴹⵏⵜ ⵜⵏⵢⴰ ⴹⵜⵛⵛⵓⴹⵜ ⴹ ⵙⵔⴼⴰ ⵢⵓⴹⵏ ⵀⴾⴹⵏⵜ⵰» ⵜⵤⵔ ⵏⴰ ⵗⵢⵙⴰ ⵢⵏⵀⴹⵏ «ⵀⴹⴹ ⵜⴹⴾⵍⴰ ⵜⵙⵜⵏⴾ ⵜⴾⵗ ⵗⵢⵓⵏⴾ⵰» 7ⵀⴹⴹ ⵍⵙ ⵓⵏ ⴾⴰ ⵗⵢⵓⵏⵜ⵰ 8ⵙ ⵏⵢⵜ ⵜⵎⵜⵓⵏ ⵔⵜ ⵓⵏ ⵜⵗⵔⴹⵜⵏⵜ ⵜⵙⴰ ⴶⵤ ⴹ ⵜⴶⵏⵜ ⵜⵎⵍⵏ ⵢ ⵎⵛⵏⴰ ⴾⴼⵏ ⵜⵔⵏⴰ ⵜⴶⴹⵜ ⴹⵓⵏ ⵢⴶⴹⵎ⵰
ⵗⵢⵙⴰ ⴹⵎⵜⴰ ⴹⵏⵙⵀⴾⴹⵏ
9ⴼⵍ ⵗⵢⵙⴰ ⴹⴶ ⵓⵏ ⵍⵎⴹⵓ ⴹⴶⵎⴰ ⵏⵍⵙ ⵢⵏ ⴶⵏ ⵙⵎ ⵎⵜⴰ ⵆⵎⵏ ⴹⵗ ⴹⴶ ⵓⵏ ⵤⵔⵤⵎ ⵏⵤⵔⴼ ⵓⵏ ⵜⴾⵙ ⵏⵙ «ⵍⴾⵎⵢ⵰» ⵜⵤⵔ ⵀⴹⴹ ⵎⵜⴰ ⵍⴾⵎⵙ⵰ 10ⵤⵍ ⵢⵏ ⵂⴰ ⵗⵢⵙⴰ ⵗⵢⵓⵏ ⵏⵎⵜⴰ ⵏ⵿ⵜⴰ ⴹⵢⵜⴹⵏ ⴶⵜⵏⵏ ⵏⵤⵔⵤⵎ ⵏ⵿ⵜⴾⵙⵏ ⴹⵏⵙⵀⴾⴹⵏ ⴹⵔⵓ ⴹⵔⵙⵏ ⵎⵏ⵿ⵙⵓⵏ ⵏ⵿ⵜⴰ ⴹⵏⵜⵍⵀⵏⵜ⵰ 11ⵏⵢⵏ ⴼⵔⵙⵢⵜⵏ ⵔⵜ ⵓⴰ ⵏⵏ ⵢ ⵏⵜⵍⵀⵏⵜ «ⵎⴼⵍ ⴹⵔⵓ ⵛⵈⵏⵓⵏ ⴹⵏⵤⵔⵤⵎ ⵏ⵿ⵜⴾⵙⵏ ⴹⵏⵙⵀⴾⴹⵏ⵰» 12ⵙⵍⵙⵏ ⵗⵢⵙⴰ ⵏⴰ «ⵢⵜⴹⵏ ⵓⵏ ⵓⵔ ⵏⵍⴰ ⵗⵍⵢ ⵓⵔ ⴹⵔⵔⵏ ⵙⵏⵙⵎⴶⵍ ⵎⵔⵏⵏ ⵙⵔⵙ ⴹⵔⵔⵏⵏ⵰ 13ⴶⵍⵓⵜ ⵜⵙⵏⵎ ⵍⵎⵗⵏⴰ ⵏⵀⵜⵓ ⵜⴰ ⴶⴰ ⵎⵛⵏⴰ ⵙ ⵏⴰ "ⵜⵂⵏⵏ⵿ⵜ ⵔ ⵓⵔⴶⵗ ⵛⴾⵜⵓⵏ⵰" ⵓⵔ ⴹⵙⵗ ⴼⵍ ⴹⵗⵔⵗ ⵢⵜⴹⵏ ⵓⵏ ⵗⵔ ⴶⴰ ⵙ ⵗⴹⵏ ⴾⵍⵔ ⵏⵙⵀⴾⴹⵏ ⵙ ⴹⵎⵤⵍⴰ ⵢⵜⵏ⵿ⴹⵗⵔⴰ ⵆⵍⵏ ⵏⵍⴾⵎⵏⵏ⵰»
ⵎⴶⵔⴹ ⵓⴰ ⴶⴰ ⵗⵢⵙⴰ ⴹⵗ ⵀⵜⵓ ⵏⵤⵎ
14ⵜⵤⵔ ⴾⵏⵏ ⵏⵜⵍⵀ ⵏⵢⵈⵢⴰ ⵗⵢⵙⴰ ⵏⵏⵙ «ⵎⴼⵍ ⵏⴾⵏⵢ ⴹⴼⵔⵙⵢⵜⵏ ⵏⵜⵤⵎ ⴼⵓ ⵎⵔⵏ ⴾⵢ ⵏⵜⵍⵀⵏⴾ ⵓⵔ ⵜⵤⵎⵏ⵰» 15ⵌⵓⵀⵙⵏ ⵗⵢⵙⴰ ⵏⵙⵏ «ⴾ ⵍⴶⵜⵏ ⵗⵔ ⵍⴰ ⵎⵤⵍⵢ ⵤⴾⵏ⵿ⵤⵔⵏ⵰ ⵎⵛⵏ ⵍⴾⵎⵏ ⴹⵏ ⵗⵔⵙⵏ ⵤⵎⴹⴾⵍ ⵎⵤⵍⵢ ⴹⵢ ⵎⵔⵏ ⴹ ⵤⵤⵎⵏ⵰ 16ⵓⵔ ⵜⵍⴰ ⵢ ⵤⵓⵜⵏ ⵛⴾⵙ⵿ⵜ ⵜⵢⵏⵢⵜ ⴹⵗ ⵜⵀⴹⵆ ⵓⵛⵔⵜ ⴼⵍⵙ ⴹⵢ ⵛⴾⵙ⵿ⵜ ⵜⴰ ⴹⵏ⵿ⵜⵜⵓⵜⵜ ⴹⵜⵤⴾⵓⵏ⵿ⵤⵤ ⵜⵀⴹⵆ ⵜⴰ ⵓⵛⵔⵜ ⵜⵤⵔ ⵜⵛⵜⵙ ⵤⵔⵓ ⵓⵍⵏ⵰ 17ⵓⵔ ⵜⵍⴰ ⴹⵗ ⵢ ⵤⴶⵏ ⵙⵎⴹ ⵏⵍⵗⵏⵀ ⵢⵏⵢⵏ ⴹⵗ ⴶⴹⴹ ⴼⵍⵙ ⵙ ⴶⴰ ⴹⵢ ⴹ ⵀⵆⵏ ⴶⴹⴹ ⵓⵏ ⵜⵤⵔ ⴼⵜⵓ ⴹⵗ ⵙⵎⴹ ⴹⴶⴹⴹ⵰ ⴾⵍⵔ ⵔⵜ ⵓⴰ ⵂⵔⵏ ⴹ ⵜⵓⴶⵓ ⵙⵎⴹ ⵓⴰ ⵢⵏⵢⵏ ⴹⵗ ⵀⵢⵗ ⵢⵏⵢⵏⵏ ⵎⴾ ⵓⴹⵢ ⴹⵗ ⵙ ⵤⵗⵍⵙ ⵙⵎⴹ ⵂⵔⴾⴹ ⵀⵢⵗ⵰»
ⵙⵏ⵿ⴾⵔ ⵏ⵿ⵗⵢⵙⴰ ⵜⵀⵔⵔ⵿ⵜ ⴹⵗ ⵜⵎⵜⵏ⵿ⵜ ⴹⵤⵤⵢⵏⵜ ⵜⵏ⵿ⵜⵜ
18ⵛⵓⵍⵙⵏ ⵗⵢⵙⴰ ⴹⵏ ⴹⵗ ⵙ ⴹⵙⴰ ⵢⵏ ⴹⵗ ⵎⵤⵔⵏ ⵏ⵿ⴾⵍⵍⵢⵂⴹ ⵙⵌⴹ ⴹⵜⵙ ⵏⵙ «ⵜⵀⵔⵔ⵿ⵜⵏ ⵀⴰ ⵎⵔⴹⴰ ⵎⵛⵏ ⵢⴰ ⵙⵏⵗ ⵙ ⵙ ⴹⵜⵙ ⵜⵙⵓⵔⵆⵜ ⴼⵙⵏⴾ ⴹⵜⵏ⵿ⴾⵔ⵰» 19ⵜⵤⵔ ⵏ⵿ⴾⵔⴹⵓ ⵗⵢⵙⴰ ⵍⴾⵎⵙ ⴹⵓⵏ ⴹⵔⵙ ⵏⵜⵍⵀⵏⵜ⵰
20ⵜⵍⵜⵓ ⵜⵏ⵿ⵜⵜ ⵜⴶⵜ ⵎⵔⵓ ⵍⵏ ⴹⵛⵏ ⴶⵎⴹⵜⵜ ⵤⵏⵢ ⵜⵂⵤⴹⵓ ⵗⵢⵙⴰ ⵙⴰ ⵙⵔ ⵜⵗⵔⴹⵏ ⵜⴹⵙ ⵜⵀⵏⴾ ⵏ⵿ⵜⴾⴹⴾⵜⵏⵜ 21ⴼⵍⵙ ⵜⵏⴰ ⵜⴶⴰ ⴹⵗ ⵎⵏⵜ «ⴶⴹⴰ ⵗⵙ ⴹ ⴹⵙⴰ ⵜⴾⴹⴾⵜⵏⵜ ⴹ ⵤⵢⴰ⵰» 22ⵎⵍⵍⵢⵏ ⵗⵢⵙⴰ ⵏⵢⵜⵜ ⵏⵙ «ⴹ ⵓⵔ ⵜⵗⵛⴹⴰ ⵜⵀⵔⵔ⵿ⵜⵏ⵰ ⵤⴶⵤⵏⵎ ⵙⵔⵢ ⴾⵎⵤⵤⵢⵏ⵰» ⵎⵤⵢ ⵓⵏ ⴹⴰ ⴹⵗ ⵜⵤⵢ ⵜⵏ⵿ⵜⵜ ⵜⵏ⵰
23ⴹⴼⵔ ⵓⵏ ⴾⴰ ⵗⵢⵙⴰ ⵂⵏ ⵏⵎⵤⵔ ⵏ⵿ⴾⵍⵍⵢⵂⴹ ⵓⵏⴹ⵰ ⵙ ⴹⵏⵓⴹ ⵗⵢⵙⴰ ⵏⵢ ⵎⵓⵜⵏ ⵏ⵿ⵜⵙⵏ⵿ⵙⵗ ⵛⵏ ⵜⴼⵢⵓⵜ ⴹⵢⵜⴹⵏ ⵏⵌⵔⵓⵢⵏⵏ ⴶⵏ ⵜⵔⵎⵆ⵰ 24ⵏⴰ «ⵓⴹⵏ ⴾⵍ ⵔⴹⵗⵜ⵰ ⵜⵀⵔⵔ⵿ⵜ ⴹⵢ ⵓⵔ ⵜⵜⵀⴰ ⵜⵙ ⵗⵙ ⵜⴶⴰ⵰» ⵜⵤⵔ ⴶⵏ⵿ⵜⵓ ⵌⵀ⵰ 25ⵙ ⵜⵜⵓⵙⵔⴹⵗ ⵜⵎⵜⵢ ⵜⵏ ⴶⵤ ⵗⵢⵙⴰ ⵂⵏ ⵓⴰ ⵜⵂⴰ ⵜⵀⵔⵔ⵿ⵜ ⵜⴰ ⵀⴰ ⵀⵤ ⴼⵙⵏⵜ ⵙⵏ⵿ⴾⵔ⵿ⵜⵜⴹⵓ⵰ 26ⵓⵤⵓⵤⵏ ⵙⵍⵏ ⵏⵓⴰ ⴶⵏ ⴹⵏ ⴹⵗ ⴾⵍ ⴾⵜⵏⵜ⵰
ⵤⵤⵢ ⵏ⵿ⵗⵢⵙⴰ ⵛⵏ ⵎⴹⵔⵗⵍ
27ⵙ ⴼⵍ ⵗⵢⵙⴰ ⴹⴶ ⵓⵏ ⵍⴾⵎⵏⵙ ⵛⵏ ⵎⴹⵔⵗⵍ ⵙⵗⵔⵏ ⴶⵏⵏ «ⵢⴰ ⴶ ⵏⵀⵢ ⴹⵓⴹ⵰ ⵂⵏⵜⵜⵏⴰ⵰» 28ⵙ ⴹⵏⵓⴹ ⵗⵢⵓⵏ ⴶⵤ ⵂⵏ ⵂⵤⵏ⵿ⵜⵏ ⵎⴹⵔⵗⵍ ⵓⵏ ⴹⵏ ⵏⵙⵏ «ⵜⵤⴶⵤⵏⵎ ⵙ ⴼⵔⴶⵗ ⴶⵢ ⵏⵔⵜ ⵓⴰ ⵜⵔⵎ ⴹⵢ⵰» ⵏⵏⵙ «ⵓⵍⴰ ⵎⵍⵢ⵰» 29ⵜⵤⵔ ⴹⵙ ⵛⵜⵓⵏⵙⵏ ⴶⵏⵓ «ⵜⵓⴶⵓⵜⵓⵏ ⵔⵜ ⵓⴰ ⵏⵎⵏⴾⵏ ⴹⵤⴶⵤⵏⵓⵏ⵰» 30ⴹⵏ ⴹⵗ ⴹ ⴶⵔⵓⵏ ⵙⵓⴹⵏⵙⵏ⵰ ⴶⵙⵏ ⵗⵢⵙⴰ ⵜⵔⵗⵎ⵿ⵜ ⵜⵙⵂⵜ ⵏⵙⵏ «ⵏ⵿ⴾⴹⵜ ⵢⴹ ⵙⵏ ⵎⵙⵏ ⵓⴹⵏ ⴹⵗ ⵓⴰ ⴹⵓⵏⴶ ⴹⴰ⵰» 31ⵎⵛⵏ ⵙ ⴶⵍⵏ ⵤⵓⵤⵓⵤⵏ ⵙⵍⵏⵜ ⴹⵗ ⴾⵍ ⴾⵜⵏⵜ⵰
ⵤⵤⵢ ⵏ⵿ⵗⵢⵙⴰ ⵓⴹⵏ ⴶⵔⵓⵏ ⴾⵍⵙⴼ ⵎⴹⴹ ⵎⵏⵜ
32ⴼⵍⵏ ⵗⵢⵙⴰ ⵗⵙ ⵎⵓⵢⴹⵓ ⵙⵔⵙ ⵓⴹⵏ ⵙ ⵎⴹⴹ ⵎⵏⵜ ⴹ ⴶⵙⴼ ⵜⵤⴹⵗⵏ⵰ 33ⴾⵙ ⵗⵢⵙⴰ ⴶⵙⴼ ⵓⵏ ⵗⵙ ⴶⵤ ⵓⴹⵏ ⵓⵙ ⵎⴹⴹ ⵎⵏⵜ ⴹⵏ ⵛⵏ ⵓⵍ⵰ ⵙⵎⴾⵍⵍ ⵓⵏ ⵙ ⵜⵎⵜⵢ ⴹ ⵜⴶⵏⵓ «ⵔⵜ ⵓⴰ ⵓⵔ ⴾⵍⴰ ⵜⵜⵓⵏⵢ ⵜⵍⵜⵏⵜ ⴹⵗ ⵙⵔⵢⵍ⵰» 34ⴼⵔⵙⵢⵜⵏ ⵎⵔⵏ ⵏ⵿ⵜⵏⵢ ⴶⵏⵏ «ⵎⵏⴾⵍ ⵏ⵿ⴾⵍⵙⴼ ⵜⴾⴼⵏ ⴼⵔⴶⵜ ⵏⴾⵙ ⵏ⵿ⴾⵍⵙⴼ ⴹⵗ ⵢⵜⴹⵏ⵰»
ⵜⵓⵜⵔⵢ ⵜⵏ ⵤⵎⵤⵍ ⵏⵎⵛⵗⵍⵏ
35ⵍⵍ ⵗⵢⵙⴰ ⵗⵔⵎⵏ ⴹⵜⵗⵔⵎⵜⵏ ⴾⵍ ⵙⵙⵗⵔⵓ ⴹⵗ ⵏⵏ ⵏⵍⵗⵀⴹⴰ ⵏ⵿ⴾⵍⵍⵢⵂⴹ ⵜⴶⵓ ⵙⵍⵏ ⵏⵍⵏ⵿ⵌⵍ ⵎⵙⵏ ⵙⵍⵏ ⵏ⵿ⵜⵗⵎⵔ ⵜⵏ ⵎⵛⵏⴰ ⵤⵤⵢ ⴹⵗ ⵢⵜⴹⵏ ⴹⵗ ⵤⵏⴼⵏ ⴾⵍ ⵏ⵿ⵜⵓⵔⵏⵓⵏ ⴹⵍⵗⵀⵏ⵰ 36ⵙ ⵏⵢ ⵜⵎⵜⵢ ⵜⴶⵤⵜⵓ ⵜⵂⵏⵏ⵿ⵜⵏⵜ ⴼⵍⵙ ⵔⴾⵏⵢ ⵏⵢⵏ ⵜⵓⵢⵏ ⴹⵎⵏⵙⵏ ⵎⵙⵏ ⵤⵏ ⵢⴼⴹ ⵓⵔ ⵏⵍⴰ ⵎⴹⵏ⵰ 37ⵜⵤⵔ ⵏⴰ ⵢ ⵏⵜⵍⵀⵏⵜ «ⵗⵔⵜ ⵜⴶⵜ ⵎⵛⵏ ⵓⵔ ⴶⵜⵏ ⵎⵛⵗⵍⵏ ⵓⵏ ⵜⵜⵤⵍⵢⵏⵏ⵰ 38ⴹⵗ ⴹⵢ ⵜⵔⵜ ⵙⵙⵎ ⵏⵎⵛⵙ ⵏ⵿ⵗⵔⵜ ⵜⴰ ⴹⵙⴶⵍⵓ ⵎⵛⵗⵍⵏ ⵜⵜⵍⵢⵏⵏ⵰»
Currently Selected:
ⵎⵜⴰ 9: TTQtg
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
