Naiꞌ Yohanis 1
1
Naiꞌ Yesus naan, sekau?
1Nahunu te, Uisneno In Kabin ma Prenat nmuꞌi nrair.
Uisneno In Kabin ma Prenat naan, humaꞌ meseꞌ on reꞌ Tuaf es.
Tuaf naan nok Uisneno.
Ma In es reꞌ Uisneno msaꞌ.
2Oras neon goe tunan ma pah-pinan ka njair fa feꞌ,
Tuaf naan nok nain Uisneno.
3Uisneno nmoeꞌ areꞌ saaꞌ ii njair, npaek In Kabin ma Prenat naan.
Ka nmuiꞌ fa baer es, reꞌ njari msaꞌ, karu Tuaf naan ka es reꞌ anmoeꞌ je fa.
4In reꞌ naan, oe je matan ma hau goe uun naꞌko ꞌmonit.
Onaim atoniꞌ reꞌ napein ꞌmonit reꞌ namneo ma namnoon,
sin napein je naꞌko Na.
In humaꞌ meseꞌ on reꞌ Meuꞌ-sineꞌ reꞌ npiin amsaꞌ,
he tuaf-tuaf reꞌ anmonin nbin Meuꞌ-sineꞌ naan,
bisa nkisun, nahinin ma nakeon.
5Meuꞌ-sineꞌ naan, npiin ma ntanaꞌ ntaam antea meisꞌokan;
ma meisꞌokan naan ka bisa ntahan naan Ee fa.
Fin Meuꞌ-sineꞌ naan anpiin ma ntanaꞌ piut.
6Anmuiꞌ tuaf es antein, kaan ee naiꞌ Yohanis. Uisneno nreek haefn ee msaꞌ,#Naiꞌ Mateos 3:1, Naiꞌ Markus 1:4, Naiꞌ Lukas 3:1-2 7he njair saksii reꞌ natoon anmatoom nok Meuꞌ-sineꞌ naan. Maut he areꞌ mansian ii, sin arsin bisa npirsain neun Uisneno, natuin naiꞌ Yohanis in uaban naan.
8Naiꞌ Yohanis reꞌ ia, ka Meuꞌ-sineꞌ naan fa. Mes Uisneno nreek haefn ee, he natoon anmatoom nok Meuꞌ-sineꞌ naan. 9Fin Tuaf reꞌ anjair Meuꞌ-sineꞌ batuur aan, he ntaam neem neu pah-pinan ia. Meuꞌ-sineꞌ naan anmoeꞌ areꞌ kanan rais amneot ma amnonot, mamnitaꞌ neun mansian ein ok-okeꞌ.
10Maski In nmoꞌe nrair areꞌ saaꞌ ii reꞌ nbi pah-pinan ia, mes mansian reꞌ abit pah-pinan ia ka nahiin naan Ee fa, oras In neem natua nbi ia. 11Maski In neem natua nok Iin na kuun, mes sin ka nromin fa he ntoup Goe. 12Maski on naan amsaꞌ, mes areꞌ mansian ii reꞌ antoup Goe ma npirsai Je, In nfeen sin hak he njarin Uisneno In aanh ein. 13Naan nahuumb ok on reꞌ nahoniꞌ nafaniꞌ sin. Mes nahoniꞌ naꞌfeꞌu sin reꞌ naan, ka humaꞌ meseꞌ fa nok bifee nahoniꞌ riꞌanaꞌ. Ma ka naꞌko fa atoin es, reꞌ nroim he napein sufaꞌ-kaꞌuf. Fin sin njarin Uisneno In aanh ein, natuin Uisneno es anfeen sin aꞌmoin feꞌu naan.
14Rarit ‘Uisneno In Kabin ma Prenat’ naan,
nmoni njair mansian.
In nmoin et hit sonak ma hit atnaank ii.
Hit tkius ma tiit In pinan ma krahan.
In npiin ma nakraah on reꞌ naan, natuin In reꞌ naan, Uisneno In Anah fuaꞌ meseꞌ.
In nroim he naruruꞌ ma nakriraꞌ In nekan arekot neu kit,
natuin In amneikn ee, on reꞌ naan.
Ma areꞌ saaꞌ ii ok-okeꞌ reꞌ In natoon sin anmatoom nok Uisneno, ro batuur.
15Naiꞌ Yohanis naan, es reꞌ natoon anmatoom nok Tuaf reꞌ ia. In nhunun ma nkoaꞌ am nak, “Amneen ma mitniin, oo! Tuaf reꞌ ia, es reꞌ au uretaꞌ ꞌrair Je ꞌak, ‘Tuaf es of he nkoen On neem. In reꞌ naan, koꞌu nneis naꞌko kau. Fin oras ka nahoniꞌ kau fa feꞌ, In nmoin nahunu nrair!’ ”
16Naiꞌ Yohanis naꞌuab on reꞌ naan, natuin Tuaf naan anroim he naruruꞌ ma nakriraꞌ In nekan arekot. Ma fani-fani In nmoeꞌ on reꞌ naan neu kit arkit. 17Un-unuꞌ te, kaꞌo Musa es reꞌ antoup Uisneno In Atoran ma nasaunt Ee neu hit beꞌi-naꞌi sin. Mes oras ia, Tuaf naan, es reꞌ Yesus Kristus, In es reꞌ naruruꞌ ma nakriraꞌ Uisneno In nekan arekot neu kit. Ma areꞌ saaꞌ ii ok-okeꞌ, reꞌ In natoon sin anmatoom nok Uisneno, ro batuur on naan. 18Ka tiit tiit fa tuaf es, reꞌ ankius niit Uisneno. Mes In Anah fuaꞌ meseꞌ reꞌ In nneek Ee naan, es reꞌ naruruꞌ ma nakriraꞌ neu kit Uisneno In nekan. Riꞌanaꞌ naan, et In Aamf ee aon-bian. Fin In reꞌ naan, es reꞌ Uisneno msaꞌ.
Naiꞌ Yohanis Asranit naruruꞌ ma nakriraꞌ Usif Yesus
(Naiꞌ Mateos 3:1-12, Naiꞌ Markus 1:1-8, Naiꞌ Lukas 3:1-18)
19Neot es, atoin Yahudis sin aꞌnaet ma kaes kouꞌn ein abitan Yerusalem anreek haefan aꞌnaak rais pirsait tuaf fauk, ma tuaf fauk naꞌkon uuf naiꞌ Lewi reꞌ biasa ntuthaen anbin Uim Onen Uuf. Sin annaon neun noe Yarden in panin,#1:19: Naiꞌ Yohanis in bare sraniꞌ neu tuaf, nait naꞌko eraꞌ boꞌ nua mfaun (28). he nataan naiꞌ Yohanis Asranit am nak, “Ho reꞌ ia, Kristus reꞌ Uisneno nbaꞌan he nreek Ee neem, aa oo?”
Rarit in natoon neu sin am nak, in reꞌ naan sekau. 20In nmanakuꞌ maat-maat am nak, “Kaah fa, tua. Au reꞌ ia, ka Kristus fa, tua.”
21Onaim sin nataan anteinꞌ ein am nak, “Karu on naan ate, ho reꞌ ia, sekau? Kaꞌo Elia, oo?”
In nataah am nak, “Kaah fa msaꞌ, tua.”
Rarit sin nataan anteinꞌ ein am nak, “Kais-kaisaꞌ ho reꞌ ia, Uisneno In mafefa kniun aan, aa oo?”
In nataah am nak, “Kaah fa msaꞌ, tua.”#Surat reꞌ Naretaꞌ Nafaniꞌ Raan Aꞌhonis 18:15,18, Naiꞌ Meliaki 4:5
22Rarit sin nataan anteinꞌ ein am nak, “Karu on reꞌ naan ate, ho reꞌ ia, sekau? Mutoon kai feꞌ! Natuin hai he mfain he mitoon meu aꞌnaet ein reꞌ nreek haefan kai. Amturun ma mbaab maan kai, tua!”
23Onaim in naꞌuab natuin saaꞌ reꞌ kaꞌo Yesaya ntui nain je mnak,
“Au reꞌ ia, es reꞌ tuaf reꞌ anhunun ma nkoaꞌ anbi bare ꞌroo ma maꞌkoroꞌ mnak,
‘Hi ar-arki ro he mraip ma miꞌsonaꞌ ranan,
he mseun ma mtoup Usiꞌ In amneman!
Amꞌoop ma mnae ranan he mseun Goe.’ ”#Naiꞌ Yesaya 40:3
24Anbi tuaf ein reꞌ neman naꞌkon kota Yerusalem sin atnaank ein naan, anmuiꞌ tuaf fauk naꞌkon partei pirsait Farisi msaꞌ. 25Rarit sin nataan naiꞌ Yohanis am nak, “On nai, tua. Karu ho ka Kristus ko fa, ka kaꞌo Elia ko fa, ma ka Uisneno In mafefa kniun aan ko fa te, nansaaꞌ am es naꞌ ho musrain tuaf? Ho mupein hak muꞌko mee?”
26Onaim naiꞌ Yohanis nataah am nak, “Au reꞌ ia, au usrain tuaf suma ꞌpake haa oe. Mes anmuiꞌ Tuaf es, et hi tnaanm ein reꞌ hi ka mihiin Je fa. 27In reꞌ naan, koꞌu nneis naꞌko kau, maski au es unoniꞌ atoniꞌ uhuun. Maski au ꞌjari haa In aan renuꞌ-aan rekaꞌ amsaꞌ, au ka umnees ꞌok Ne fa, tua.”#1:27: Tuis uab Yunani un-unuꞌ nak “ꞌseif in sapautn ein in taink ein amsaꞌ, au ka neu ubeiꞌ fa.” In oetn ii nak, naiꞌ Yohanis naan suma atoin ba-baun kuun. Maski in njari haa Usif Yesus In aan renuꞌ-aan rekaꞌ msaꞌ, in ka pantas fa.
28Rasin reꞌ ia ok-okeꞌ njarin nbin Betania, nbi noe Yarden in panin. Naiꞌ Yohanis nok in atoup noinꞌ ein nasranin tuaf anbin naan.#1:28: ‘Betania’ reꞌ ia, aꞌtetaꞌ naꞌko kuan Betania reꞌ anpaumak-maak kota Yerusalem. Mes in baran naan, ka mahiniꞌ reko fa. Atoin ahiint ein nateenb ein am nak, of oniꞌ bare ia on reꞌ pah Basan, reꞌ et nefo Galilea in bian pasaꞌ neon-saet, fin naiꞌ Yosepus antui bare naan in kaan ee, ‘Batanea’ msaꞌ. Naiꞌ Yosepus naan, atoin Yahudis es, in es reꞌ antui nfee neu anaaꞌ aprenat pah Roma anmatoom nok sejara pah Israꞌel.
Usif Yesus naan, on reꞌ Uisneno In Aꞌbib-kaes Anaꞌ
29Nokaꞌ on naan ate, naiꞌ Yohanis ankius niit Naiꞌ Yesus annao neem anꞌain na. Onaim In naꞌuab am nak, “Amkius miit Atoniꞌ nee, tua! In reꞌ naan, Uisneno In Aꞌbib-kaes Anaꞌ reꞌ njair fuaꞌ-turuꞌ he nsaok nain mansian pah-pinan ia sin saant ein. 30Atoniꞌ reꞌ ia, es reꞌ au utoon Ee ꞌeu ki afi naa mꞌak, ‘Of anmuiꞌ Tuaf es, reꞌ npoi ma nboor neem. In reꞌ naan, koꞌu nneis naꞌko kau, natuin In nahuun nain naꞌko kau.’ 31Unuꞌ te, au ka uhiin fa ꞌak, In reꞌ naan, Kristus. Maski on naan amsaꞌ, mes au uhini ꞌrair. Onaim au ro he utoon ꞌeu atoin Israelas sin anmatoom nok Ne. Natuin rasi naan, au ꞌuum ma usrain tuaf aꞌpaek oe.
32-33Uisneno nhaefan kau he usrain tuaf aꞌpaek oe. In natoon kau msaꞌ am nak, ‘Of Tuaf es he neem neu ko. Rarit Au Smanak ansanu ntoko nbi Na. Tuaf naan of es reꞌ neik Au Smaan Akninuꞌ, he nfee kuasa neu Au ngguin.’ Oras Tuaf naan neem, au ka uhiin ꞌain Je fa. Mes oras au ꞌkius Uisneno In Asmanan ansaun neem naꞌko neon goe tunan, nahuum on reꞌ kor-kefi ma ntoko nbi Na, naꞌ au uhiin Je mꞌak, ‘Tuaf reꞌ naan, In es reꞌ naan!’ 34Au ꞌkius ꞌiit rasin naan nok au matak fuak ein kuuk. Rarit au utoon ki mꞌak, ‘Tua amnemat naan, es reꞌ Uisneno In Anah!’ ”
Usif Yesus anpiir naan kuun In aꞌtoup noniꞌ ahuunt ein
35Nokaꞌ on naan ate, naiꞌ Yohanis anhaek nok in atoup noniꞌ tuaf nua. 36Oras naiꞌ Yohanis ankius niit Naiꞌ Yesus annao npeoꞌ naan, in naꞌuab am nak, “Amkius miit! In reꞌ naan, Uisneno In Aꞌbib-kase reꞌ of anjair fuaꞌ-turuꞌ!”
37Rarit naiꞌ Yohanis in atoup noniꞌ tua nuaꞌ ein reꞌ nneen in uab naan, nnao nasaitn ee, he natuin Naiꞌ Yesus. 38Onaim Naiꞌ Yesus anniik, rarit In nkius niit sin natuin Ee. Onaim In nataan sin am nak, “On mee, tua? Hi mperluu Kau, oo?”
Sin nataan nafainꞌ Ee mnak, “Rabi, Ho mutua et mee?” (Neik sin uab Aram, ‘Rabi’ in oten nak, ‘Aam Tungguru’.)
39Rarit Naiꞌ Yesus nataah am nak, “Iim he mkius kiim.” Onaim sin natuin Ee, rarit sin nkius In bare ꞌtua-haꞌ. Oras sin ntean, oniꞌ nreuk haa maans ee nmaeb. Rarit sin nok Ne, tar antea maans ee nmouf.
40Naꞌko tua nuaꞌ ein naan reꞌ anneen naiꞌ Yohanis In uaban, rarit natuin Naiꞌ Yesus naan, tuaf es, kaan ee naiꞌ Anderias. In reꞌ naan, naiꞌ Simon Petrus in orif. 41Anfain neem antea te, naiꞌ Anderias annao naim in tataf naiꞌ Simon am nak, “Taat! Hai miteef amrair mok Mesias!” (Neik sin uab, ‘Mesias’ in oten nak, ‘Kristus, Tuaf reꞌ Uisneno nbaꞌan nain Je naꞌko unuꞌ he nreek haefn Ee ntaam neem.’) 42Rarit in annao naat In taatf ee neu Naiꞌ Yesus.
Onaim Naiꞌ Yesus ankius goe, ma natoon ee mnak, “Ho reꞌ ia, naiꞌ Simon. Ho amaꞌ, es reꞌ naiꞌ Yohanis. Anmurai oras ia, atoniꞌ anhaman ko nak, ‘Kefas’ ” (In oten huma meseꞌ nok ‘Petrus’, es reꞌ ‘fatu’.)#1:42: Kanaf Kefas naan, naꞌko uab Aram kefa. In oten ‘fatu’. Kanaf Petrus naan, naꞌko uab Yunani Petra, In oten ‘fatu’ msaꞌ.
Usif Yesus noꞌen naiꞌ Felipus ma naiꞌ Nitanel
43-44Anbi naan amsaꞌ, anmuiꞌ tuaf es, kaan ee naiꞌ Felipus. In kuan ee, et Betsaida. Naiꞌ Petrus ma naiꞌ Anderias naꞌkon naan amsaꞌ.
Nokaꞌ on naan ate, Naiꞌ Yesus nafeek he nnao neu propinsi Galilea. In nnao nateef naiꞌ Felipus, rarit In noꞌen am nak, “Uum mutuin Kau, he mjair Au ngguin!”
45Rarit naiꞌ Felipus annao naim naiꞌ Nitanel, onaim natoon ee mnak, “Baꞌe! Hai miteef Tuaf reꞌ kaꞌo Musa antui nain Je nbi Uisneno In Atoran. Uisneno In mafefa kniunꞌ ein un-unuꞌ ntui nmatoom nok Tuaf reꞌ ia msaꞌ. In kaan ee Naiꞌ Yesus, naꞌko kuan Nasaret. In aamf ee naiꞌ Yusuf.”
46Mes naiꞌ Nitanel nataah am nak, “Atoin Nasaret!? Ka nmuiꞌ fa rais reok goes reꞌ anpoi ma nboor naꞌko naan, oo!”
Onaim naiꞌ Felipus nataah am nak, “Hoe! Kais on reꞌ naan. Uum he mnao mkius kuum!”
47Oras naiꞌ Nitanel neem, Naiꞌ Yesus niit nain je, onaim In nak, “In reꞌ ia, atoin neek amneot ma amnonot! Fin anbi in nekan ka nmuiꞌ fa puta-kriut. In reꞌ ia, atoin Israelas batuur-batuur!”#1:47: Naiꞌ Yesus naꞌuab uab manporin anbi eraꞌ reꞌ ia. Fin oras Uisneno ka nakanab fa ‘Israꞌel’ neu kaꞌo Yakop, kanaf Yakop in oten aiꞌ in aꞌmoufun ‘aputa-kriut’. (Amkius Retaꞌ Ahun-hunut 27:1-40, 30:22-32). Naiꞌ Yesus In sairt ii nak, naiꞌ Nitanel reꞌ ia, atoin Israelas reꞌ in human ma in masan aꞌtetaꞌ naꞌko kaꞌo Yakop. Fin naiꞌ Nitanel reꞌ ia, atoin neek amneot.
48Naiꞌ Nitanel nataan am nak, “On mee mꞌes Ho muhiin kau, tua?”
Naiꞌ Yesus nataah am nak, “On nai. Au ꞌiit aꞌrair ko oras ho mbi hau goe mafon.#1:48: Uab Indonesia npaek uab tukaꞌ ‘pohon ara’ naꞌko uab Yunani es, sukei. Mes Suur Akninuꞌ nakriraꞌ ma natoon hau roet es anbi bare ne, reꞌ biasa atoniꞌ naah in fuan. Anbi pah Indonesia pasaꞌ neon-saet, atoniꞌ ka naah fa ‘pohon ara’ in fuan. Onaim ‘pohon ara’ anbi Suur Akninuꞌ uab Indonesia, ka humaꞌ meseꞌ fa nok pohon ara nbi eraꞌ reꞌ ia. Oras naan, naiꞌ Felipus ka neit noꞌen ko fa feꞌ.”
49Rarit naiꞌ Nitanel anmanakuꞌ mnak, “Aam Tungguru reꞌ ia, ro batuur Uisneno In Anah! Ma Ho amsaꞌ, of hit atoin Israelas sin Usif!”
50Naiꞌ Yesus nataan ee mnak, “Ho reꞌ ia, mpirsai Kau natuin Au ꞌak, ‘Au ꞌiit aꞌrair ko oras ho mbi hau goe mafon naan’? Mumnau, fin ho bisa mkius areꞌ rasi reꞌ maꞌtaniꞌ nneisi ntein!
51Batuur! Au utoon ꞌain ki. Hi of amkius neon goe natfeꞌi. Onaim Uisneno In ameupt ein abitan sonaf neno tunan ansae-nsanun nbin Au aok-bian. Ma Au reꞌ ia, Mansian Batuur-Batuur.”#1:51: Anbi Retaꞌ Ahun-hunut 28:10-17, naiꞌ Yakop namnei nbi Betel. Anbi in amneit naan, in niit Uisneno In ameupt ein ansaen-nsanun anbin eraꞌ fuaꞌ es, reꞌ naiꞌ Yakop anteek ee nak, “enoꞌ ꞌtamas sonaf neno tunan”.
Currently Selected:
Naiꞌ Yohanis 1: aaz
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.