Mateo 17

Is Kegkahalin te Zagwey ni Jesus

(Mateo 17:1-13; Marcos 9:2-13; Lucas 9:28-36)

1Neiwas is heenem dutun he andew ne miduma ni Jesus ensi Pedro, si Santiago, wey si Juan, sikan is hazi ni Santiago, ne midtekezeg dan te metikang he vuntud he iyan dan dà. 2Ne zutun te kedtengtengi zan ki Jesus, netik-ew mahalin is dagwey zin. Utew merayag is paras din iring te andew. Ne nengenamag is bisti zin te keputì. 3Ne zutun netik-ew zan daan maahà si Moises wey si Elias he ebpekidlalag ki Jesus. 4Ne migkag̵i si Pedro ziyà te ki Jesus te, “Utew meupiya te zini key. Ke egkesuatan nu, ebeelan ku kayi is tetelu he lawig; sevaha is kenikew, sevaha zaan is ki Moises, wey sevaha is ki Elias.” 5Ne te kemulu pa heini is lalag ni Pedro, neselikuvungan sikandan te ebpenganlag he g̵apun. Ne ebpuun dutun te g̵apun nezineg dan is midtik-ew megkag̵i te, “Iyan heini sikan is Anak ku he utew ku minahal; ingkesuat ku utew sikandin. Pemineg̵a niw sikandin.” 6Ne hein nezineg heini zutun te menge sumusundan ni Jesus nekelangkeb dan su utew zan nengahandek. 7Ne mid-uvayan sikandan ni Jesus ne migewezan din sikandan ne ke sikandin te, “Enew kew, kenè kew mahandek.” 8Ne hein mid-enew zan, ne iyan dan dà dutun maan naahà si Jesus.

9Ne zutun te edtupang dan, mibeleuzan sikandan ni Jesus te, “Heini is neehè niw, kenè niw tudtula ziyà te minsan hentei taman te kenè e pa is Kakey te Menusiyà egkevanhew.” 10Ne zutun mid-insaan si Jesus te menge sumusundan din te, “Maan is egkeg̵iyen te menge menunudlù te kesug̵uan he kinahanglan he edhuna edlepew si Elias, sikan is ebpeneuven dengan, ne human sikan is edhadì he mibpilì te Megbevayà?” 11Ne zutun midtavak si Jesus te, “Tutuu iyan he egkehuna ebpekeuma si Elias su ed-endamen din is langun. 12Iyan, egkeg̵iyen ku keniyu he nekeume en iyan si Elias, iyan, wazà sikandin mekilala te menge punuan. Midrasey zan sikandin sumalà is egkesuatan dan he ed-ul-ulahan dan kandin. Ne iring ded dutun te kedresaya zan kandin is ed-ul-ulahan dan dini te kedì te Kakey te Menusiyà.” 13Ne human mesavut dutun te menge sumusundan ni Jesus he iyan egkeg̵iyen din si Juan Megbebewtismu.

Is Kebug̵awa te Mevurut he Mezaat he Mulin-ulin

(Mateo 17:14-21; Marcos 9:14-29; Lucas 9:37-43)

14Ne hein neumahan dan sikan is mezakel he menge etew, ne zuen etew zutun he mid-uvey ziyà te ki Jesus ne midluhud diyà te etuvangan din. 15Ke sikandin te, “Datù, kehizuwi nu is anak ku. Ebevuyen sikandin ne utew merasey is egkeulaula zin su layun egkeulug diyà te hapuy wey ziyà te wahig. 16Impeehè ku ziyà te menge sumusundan nu, iyan, wazè dan meulii sikandin.” 17Ne zutun migkag̵i si Jesus te, “Sikiyu is menge etew g̵untaan, utew zekelà is menge sayep niw! Wazè niw iyan kedtuu! Utew ves egkeug̵et is kebpekiduma ku keniyu! Utew ves egkeug̵et is kebpekeantus ku keniyu ne human kew edtuu! Ihengkayi niw heeyan is batà.” 18Ne midawey ni Jesus is mezaat he mulin-ulin he edlalung dutun te vatà ne impeg̵uwè din ne zutundutun neulian haazà is batà.

19Ne is menge sumusundan din, hein iyan dan dà engki Jesus, mid-uvayan dan sikandin. Ne ke sikandan te, “Maan is wazè dey meulii sikan is batà he edlelungen te mezaat he mulin-ulin?” 20Ne midtavak si Jesus te, “Wazè niw meulii tenged te utew zeisek is kedtuu niw. Tentenuzi niw he ke zuen niw kedtuu, minsan utew zà deisek iring te lisu te mustasa, egkehimu he egkekeg̵iyan niw heini is buvungan he medhalin, ne ebpemineg keniyu. Minsan hengkey, ne egkehimu niw. 21Iyan, sikan he kelasi te mezaat he mulin-ulin, igkepaawà pinaag̵i zà te ked-ampù wey pinaag̵i te kedsalang te kegkaan. Wazà duma he paag̵i.”

Is Ikezuwa he Kebpesevuta ni Jesus te Kemetayen Din

(Mateo 17:22,23; Marcos 9:30-32; Lucas 9:44,45)

22Netig̵um is menge sumusundan din diyà te prubinsya he Geliliya. Ne zutun migkag̵i si Jesus diyà te kandan te, “Siak is Kakey te Menusiyà, duen timpu he ibpalad a ziyà te menge kuntada ku ne edhimetayan e zan, 23iyan, seled te tetelu he andew zutun egkevanhew a.” Ne zutun utew nengeseeng is menge sumusundan din.

Is Bayad Para te Valey te Megbevayà

24Nekeume en si Jesus wey menge sumusundan din diyà te inged he Kepirnaum. Ne mid-uvayan si Pedro te menge menunukut te ibayad dutun te Valey te Megbevayà. Ne mid-insà sikandan te, “Is menunudlù niw, ebayad be sikandin te ebpeveyazan kandin te Valey te Megbevayà?” 25Ne midtavak si Pedro te, “Uya, ebayad sikandin.” Ne hein mid-ulì dutun si Pedro ziyà te valey, iyan si Jesus mid-insà kandin te, “Simon, hengkey is ked-isipa nu kayi? Penenglitan, kayi te kelibutan hentei is ebayad te sidula ziyà te hadi? Iyan be is menge mesipeg din wey ke iyan be is kenè din kezuzumahi?” Ne ke si Pedro te, “Iyan is kenè din kezuzumahi.” 26Ne ke si Jesus te, “Ne emun iyan heeyan, ne kenè en ebpekevayad is menge mesipeg te hadì. Ne sikita is mesipeg diyà te Megbevayà, kenà daan kinahanglan he ebeyazan ta is ebpeveyazan te valey zin. 27Asal, kenà meupiya he mepauk kenita heini is menge menunukut te ibayad dutun te Valey te Megbevayà. Hendiyè ka te ranew ne pemunuwit ka. Ne zutun te vèbà te pait he egkehuna nu egkeutel, egkeehè nu is selapì. Kuwaa nu haazà is selapì ne ivayad nu kayi te edsukuten kenita he ibayad te Valey te Megbevayà.”

Currently Selected:

Mateo 17: mbbNT

Highlight

Copy