Lucas 20

Is Ketenged ni Jesus

(Lucas 20:1-8; Mateo 21:23-27; Marcos 11:27-33)

1Ne sevaha he andew zutun ne midlikù si Jesus diyà te zekelà he simbahan he egngezanan te Valey te Megbevayà ne mibpenurù din is menge etew, ne impesavut din kandan is Meupiya he Tudtulanen. Ne zutun mibeyaan sikandin te punuan te menge memumuhat wey menge menunudlù te kesug̵uan wey is menge ebmeg̵urangen te menge Hudiyu, 2ne mid-insè dan kandin te, “Heini is langun he ed-ul-ulahan nu zini te simbahan, hengkey is ketenged nu te ked-ulaula kayi, wey hentei is mibeg̵ey kenikew te ketenged wey nu meulaula?” 3Ne midtavak si Jesus te, “Duen daan id-insè ku keniyu, ne huna kew tavak te insè ku. 4Hentei is mibeg̵ey ki Juan Megbebewtismu te ketenged te kebpemewtismu. Megbevayè be wey ke etew zà?” 5Ne zutun mibpein-inseey zan is egkag̵i te, “Emun egkeg̵iyen tew he impenaub ki Juan te Megbevayà ne id-insè din ke maan is wazè tew tuuwi si Juan. 6Ne emun egkeg̵iyen tew he isip dà te etew, ne egkepeukan kiw te menge etew. Ne edtulengen kiw zan te vatu wey kiw zan mehimetayi su is menge etew, edtuuwan dan he ebpeneuven si Juan te Megbevayà.” 7Ne zutun iyan dà ingketavak dan ki Jesus is, “Kenè dey egketuenan.” 8Ne migkag̵i si Jesus diyà te kandan te, “Kenè ku zaan egkeg̵iyen keniyu ke hengkey is ketenged ku te kebaal kayi te langun.”

Is Sempità Mehitenged te Menge Etew he Impeelima te Perasan

(Lucas 20:9-18; Mateo 21:33-46; Marcos 12:1-12)

9Ne zutun impezineg ni Jesus te menge etew is sempità su ibpesavut din kandan is keag̵i te ed-ul-ulahan te Megbevayà. Ke sikandin te, “Duen etew he zuen din bevesukà he mibpemulaan din te menge g̵awed he paras. Ne mibpeelimahan din te menge etew ne midhipanew ziyà te sengeg̵inhedian ne neug̵et sikandin dutun. 10Ne hein tirag̵un en dutun, midsug̵ù din is sulug̵uen din diyà te impemeelima zin su wey meveg̵ayi sikandin te vahin din dutun te paras. Iyan, hein nekeuma haazà is sulug̵uen ne mibpemug̵el zutun te menge ed-elima ne impeulì dan he wazà beg̵ayi. 11Ne haazà is teg̵ig̵aked, midsug̵ù en maan te sevaha pa he sulug̵uen din he impehendutun din te menge impeelima zin. Ne mibpemug̵el zan ded maan haazà, ne mid-eled-eled dan, ne impeulì dan he wazà daan beg̵ayi. 12Ne mid-uman en maan medsug̵ù haazà is teg̵ig̵aked te sevaha pa maan he sulug̵uen din ne mibug̵el zan en maan haazà taman te nengepelian ne zutun midsegseg dan sikandin. 13Ne migkag̵i haazà is teg̵ig̵aked te perasan te, ‘Hengkey is ed-ul-ulahan ku? Iyan is: iyan ku en edsug̵uen is mahal ku he anak su kenè dan egkeaku te ebpesipala sikandin, kekenà, edtehuzen dan.’ 14Iyan, hein naahà dutun te menge impeelima te perasan haazà is anak te teg̵ig̵aked ne mibpevitbitiyereey zan te, ‘Na! Iyan en heini sikan is anak din; kuwa kew en su edhimetayan tew ne iyan kiw ebpekeangken kayi te perasan!’ 15Ne migewezan dan ne mid-uwit dan diyà te g̵awas te perasan ne midhimetayan dan.”

Ne zutun migkag̵i med-uman si Jesus te, “Ne g̵eina te iyan haazà mid-ulaula zutun te impemeelima te perasan, hengkey is ed-ul-ulahan kandan dutun te teg̵ig̵aked? 16Iyan is: ebeyaan din haazà is menge etew ne ebpenhimetayan din, ne ebpeelimahan din haazà is perasan din te selakew en maan he menge etew.” Ne hein nezineg dutun te menge etew he ebpemineg ki Jesus ne utew zan neseeng ne ke sikandan te, “Kenà heeyan ed-ul-ulahan te Megbevayà!” 17Iyan, midtengtengan ni Jesus sikandan ne ke sikandin te, “Emun iyan egkeisip niw he kenà heini ed-ul-ulahan te Megbevayà hengkey is kedsevuta niw zuen te insurat dengan he Lalag te Megbevayà he edhenduen te,

‘Sikan is batu he idhiman te valey,

mid-engkezan te menge pandey su kunaan dan ke wazè din pulus,

iyan, nehimu heini g̵untaan he vatu he iyan dà ebpekepurung te valey.’ ”

Ne impelaus ni Jesus is lalag din te, 18“Ne haazà he vatu, ne emun egkeulug̵an te etew ne egkepurung egkerupet is egkeulug dutun. Iyan, ke zuen etew he egkeulug̵an dutun te vatu ne egkepurung egkeapug is lawa zutun te egkeulug̵an.”

Is Kebayad te Vuhis Diyà te Hadì te Ruma

(Lucas 20:19-26; Mateo 22:15-22; Marcos 12:13-17)

19Ne zutun, is menge menunudlù te kesug̵uan wey menge punuan te menge memumuhat te Megbevayà, nesavut dan he iyan din sikandan egkeg̵iyen dutun te sempità, ne ed-isipen dan dutun pezem edekepa si Jesus, iyan, nahandek dan te mezakel he menge etew. 20Umba, puun dutun ne ebpengahaan dan ke ebmenmenuwen dan te kedekepa sikandin. Duen menge sinuhulan dan he ibpepeniid dan ki Jesus. Ne zuen daan menge insà kayi te etew ki Jesus he uvag kun menge hustu he insà. Ne iyan tuyù dan is: emun ebpekesupak si Jesus te kesug̵uan dan pinaag̵i te menge tavak din ne egkehimu he ibpalad sikandin diyà te gubirnedur he Rumanu wey mehukumi sikandin. 21Ne haazà is menge etew he ibpepeniid ki Jesus, migkag̵i zan diyà te kandin te, “He Zatù, netuenan dey he wazè nu ibpelavi he minsan hentei he etew ne tutuu is egkeg̵iyen nu wey hustu is kebpenurù nu te ebpeveelan kenitew te Megbevayà. 22Hengkey is isip nu? Ebpekesupak ki ve te kesug̵uan tew ke ebayad ki te vuhis diyà te hadì tew ziyà te inged he Ruma?” 23Ne netuenan ni Jesus is mezaat he ed-ul-ulahan dan ne ke sikandin diyà te kandan te, 24“Ipeehè niw kediey is selapì he ibayad niw te vuhis.” Ne hein naahà ni Jesus haazà ke sikandin te, “Hentei ki zagwey kayi wey hentei ki ngazan heini is nekesurat kayi?” Ne ke sikandan te, “Dagwey wey ngazan te hadì diyà te inged he Ruma.” 25Ne ke si Jesus te, “Ne emun kandin, ne iyan egkesuatan din, iveg̵ey niw ziyà te kandin; ne iveg̵ey niw zaan diyà te Megbevayà is kandin he azen.” 26Ne haazà is menge etew he ibpepeniid ki Jesus, wazè dan dutun te etuvangan te menge etew neg̵ewezan te intavak ni Jesus he igkehimuwa zan kandin te edakep. Umba, wazè en nekag̵i zan, ne utew zan nengeinuinu te tavak din kandan.

Is Ketudluanan Mehitenged te Kegkevanhew

(Lucas 20:27-40; Mateo 22:23-33; Marcos 12:18-27)

27Ne zutun mid-uvey ziyà te ki Jesus is menge Sedusiyu. Ne is menge Sedusiyu, iyan kes menge Hudiyu he edtuu he kenà egkengevanhew keuzemà is minsan hentei. Ne migkag̵i zan diyà te ki Jesus, 28ke sikandan te, “Menunudlù, impenurù dengan ni Moises he penenglitan, ke zuen maama he zuen din esawa ne ebpatey haazà is maama he wazà mevuwad, kinahanglan he ebpemeluwen te suled dutun te maama haazà is ipag din su wey mevuwad haazà is minatey pinaag̵i kandin. 29Ne zengan duen pitu he menge maama he teltelehazi. Mibpengesawa haazà is kakey, iyan, minatey he wazà med-anak. 30Ne mibpemalu zutun te ikezuwa haazà is ipag dan ne minatey zaan he wazà mevuwad. 31Ne iring din ded daan haazà is iketelu. Ne henduen dà duen su naamin haazà is pitu ikevalu zutun te vahi ne wazà mevuwad. 32Ne te huziyan dutun minatey zaan haazà is bahi. 33Ne keuzemà te kegkevanhew te menge etew, hentei is hustu he esawa zutun te vahi? Su haazà is pitu he teltelehazi, pudu zan man nekeesawa kandin.”

34Ne migkag̵i si Jesus te, “Is menge etew kayi te kelibutan, ne ebpees-eseweey, 35iyan, haazà is menge etew he ed-isipen te Megbevayà he zait he ebenhawen he ibpeubpà diyà te langit, kenè dan mulà keuzemà diyà te langit ebpees-eseweey. 36Iyan dan kenà ibpees-eseweey su iring dan en te menge velinsug̵uen te Megbevayà ne kenè dan en ebpatey. Menge anak dan en te Megbevayà su nevanhew zan en. 37Ne pinaag̵i te insurat dengan ni Moises, egkesavut ta he egkengevanhew is menge minatey su minsan te neug̵et en dutun he minatey si Abraham, si Isaak, wey si Hakub, dutun te insurat ni Moises mehitenged te sagbet he egkeregreg migkag̵i sikandin he is Megbevayà, ne iyan ed-ezapen ni Abraham wey si Isaak wey si Hakub, 38he ke và dà egkeg̵iya, kemulu zan pa ed-ezapen is Megbevayà, minsan te minatey zan en. Su is langun he menge minatey, kemulu zan pa uuyag diyà te Megbevayà.” 39Ne zutun migkag̵i is duma he menge menunudlù te kesug̵uan, ke sikandan te, “Utew venar heeyan is migkag̵i nu.” 40Umba nekag̵i zan heini su kenè dan en ebpekesukul pa maan he ed-insà ki Jesus.

Is Hadì he Mibpilì te Megbevayà he Kevuwazan ni David

(Lucas 20:41-44; Mateo 22:41-46; Marcos 12:35-37)

41Ne migkag̵i si Jesus diyà te kandan te, “Maan is egkehimu he ibpenurù te menge menunudlù te kesug̵uan he sikan is edteg̵azan he ibpahadì, ne kevuwazan dà ni Hadì David? 42Su ziyà te libru he Salmo, duen insurat ni Hadì David he edhenduen te,

‘Migkag̵i is Megbevayà diyà te Nengazen ku te,

“Kayi ka pinuu te zapit te egkekewanan ku

43taman te kenè ku pa ibpeluhud diyà te kenikew

is menge kuntada nu.” ’ ”

44Ne impelaus ni Jesus haazà is lalag din, ke sikandin te, “Emun migkag̵i ni David he Nengazen din sikan is ebperetengen he ibpahadì, ne egkehimu ve he kevuwazan dà duen ni David?”

Is Menge Etew he Uvag Edsunud te Megbevayà

(Lucas 20:45-47; Mateo 23:1-36; Marcos 12:38-40)

45Ne zutun te kemulu pa ebpemineg te lalag ni Jesus haazà is mezakel he menge etew, ne ke sikandin diyà te menge sumusundan din te, 46“Andam kew limbe wey kew kenà mekeiring te menge menunudlù te kesug̵uan su iyan dà egkesuatan dan is kedhiphipanew he memelayat is kemisula he edtehuzen sikandan te menge etew emun diyè dan te mirkadu. Ne emun diyè dan te simbahan egkesuatan dan he iyan sikandan ibpepinuu ziyà te ebpepinuuwan te lavew he menge etew. Ne egkesuatan dan daan he utew zan metahud ke edtelavuk dan te keemuran. 47Ne heini is menge menunudlù te kesug̵uan, edlimbungan dan is menge valu he vahi wey zan maangken is menge valey zutun te menge vahi. Ne utew melug̵ayad is ked-ampù dan he iyan idtambun dan te mezaat he vaal zan. Utew edekelà is silut te Megbevayà kandan keuzemà.”

Currently Selected:

Lucas 20: mbbNT

Highlight

Copy