Lucas 14

Is Kebewii te Midlevag is Menge Paa Zin wey Menge Velad Din

1Ne sevaha maan he Andew te Kedhimeley, ne mid-umbite en maan si Jesus te sevaha he pengulu te menge Perisiyu he ziyà ibpekaan te valey zin. Ne is menge kuntada ni Jesus, mibpurungan dan sikandin bentayi ke egkesupak din is kesug̵uan. 2Ne zuen dutun maama he egkezeruwan su midlevag is menge paa zin wey velad din ne mid-uvey heini ziyà te ki Jesus. 3Ne si Jesus, mid-insaan din is menge menunudlù te kesug̵uan wey is menge Perisiyu, ke sikandin te, “Sumalà is ibpenurù kenitew te insurat he kesug̵uan, ebpekesalè ki ve ke ebpemawì ki ke Andew te Kedhimeley?” 4Iyan, wazè dan tevaka si Jesus, ne zutun migewezan ni Jesus haazà is egkezeruwan ne zutundutun ne neulian. Ne impeulì sikandin ni Jesus. 5Ne zutun migkag̵i si Jesus diyà te menge etew zutun te, “Hengkey ve is ed-ul-ulahan niw ke zuen niw anak, ne emun kenà, ne vaka niw he egkeulug diyà te mezalem he vudsi emun Andew te Kedhimeley. Siguradu, edtevangan niw minsan ke Andew te Kedhimeley.” 6Ne zutun ne wazè dan meketavak.

Is Kenà Kebpelavew

7Ne zuen daan dutun menge etew he mid-umbita zaan dutun te Perisiyu. Ne hein ebpememinuu zan en is egkaan ne naahà ni Jesus he ebpilien te menge etew is ebpinuuwan dan he meupiya he ebpinuuwan he zutun ibpepinuu is menge lavew he menge etew. Ne tenged kayi impezineg ni Jesus kandan is penurù din, ke sikandin te, 8“Emun egkeumbita ki ziyà te keemuran, kenè ki edhuna ebpinuu ziyà te meupiya he ebpinuuwan. Su kela ke zuen pa ebpekeuma he lavew is ked-etew zin kenè ki. 9Ne egkeg̵iyan ki zutun te midtukud te keemuran te, ‘Ibpahalin ki su ebpepinuuwan dutun te lavew kenè ki, haazà is mibpinuuwan ta.’ Ne utew ki zutun egkeeled ke ziyè ki ibpepinuu te kenà utew meupiya he ebpinuuwan. 10Iyan, ke egkeumbita ki ziyà te keemuran, kenè ki ebpemilì te meupiya he ebpinuuwan. Ne emun ebpinuu ki en, diyè ki ebpinuu te kenà utew meupiya he ebpinuuwan. Ne zutun, haazà is midtukud te keemuran, ebpekekag̵i kenita te, ‘He Geli, kenè ka keniyan mebpinuu su kayi ka pinuu te meupiya he ebpinuuwan.’ Ne zutun, kenè ki egkeeled, kekenà, egketahud ki te menge etew. 11Sikan is etew he ed-isipen din he lavew is pid-etawan din ne ebminusen heini te Megbevayà. Iyan, sikan is etew he ed-isipen din he minus is pid-etawan din ne ebpeketikangen te Megbevayà is pid-etawan din.”

12Ne migkag̵i si Jesus dutun te midtukud te keemuran te, “Ne sikew zaan, Mama, emun edtukud ka te keemuran ne kenè nu iyan dà umbitaha is menge kilala nu wey is menge suled nu wey menge siringan nu he sepian su sikandan, ne neezenan dan mulà ne edsembayan ke zan ed-umbitaha ke edtukud dan te keemuran ne zutun ebpekevales dan en te meupiya he mid-ulaula nu kandan. 13Iyan, emun edtukud ka te keemuran ne iyan nu umbitaha is egkengeayuayu wey is menge pigket, menge pungkul, wey is menge lakap. 14Ne emun iyan heini ulaula nu ne utew zekelà is kelipey nu su kenè dan ebpekesambey he ed-umbita kenikew ne kenè dan egkevelesan is meupiya he mid-ulaula nu kandan, ne iyan is Megbevayà ebales kenikew te utew meupiya he egkeulaula zutun keuzemà te kegkengevanhew te menge etew he memeupiya is ulaula.”

Is Sempità Mehitenged te Keemuran

(Lucas 14:15-24; Mateo 22:1-10)

15Ne is sevaha zutun te menge maama he ebpememinuu ziyà te uvey ni Jesus, hein nezineg din haazà is penurù ni Jesus ne migkag̵i te, “Utew zekelà is kelipey te menge etew he ebpeketelavuk dutun keuzemà te keemuran he zutun ibpekaan is langun he menge etew he edhedian te Megbevayà!” 16Ne zutun impezineg ni Jesus kandin is sempità. Ke sikandin te, “Duen sevaha he etew he midtukud te zekelà he keemuran. Ne haazà is etew, ne mezakel is menge etew he mid-umbita zin. 17Ne hein netuman en haazà is keemuran ne midsug̵ù din is sulug̵uen din he ibpetukew en is menge etew su nengelutù en is igastu. Ne ke sikandin diyà te menge sulug̵uen din te, ‘Keg̵iyi niw sikandan he medhendini zan en su naandam en is langun!’ 18Iyan, is menge etew he mid-umbita zin, ne wazà diyà te g̵ehinawa zan haazà is keemuran. Is kada sevaha zutun ne mibpemituwà te kenà ebpeketelavuk dutun. Is duma ne egkag̵i te, ‘Kenè dà mebmezaat is gehinawa nu kedì su kenà a ebpeketelavuk su zuen tanà he veg̵u ku pa he nepemasa ne edleuyen ku g̵untaan.’ 19Ne is sevaha pa maan dutun ne migkag̵i te, ‘Kenè dà mebmezaat is gehinawa nu kedì su kenà a ebpeketelavuk te keemuran su zuen sepulù he vaka he sikan ku pa mepemasa ne igezam ku id-edadu!’ 20Ne is sevaha pa he etew zutun, ne egkag̵i te, ‘Kenà a ebpeketelavuk su sikan pa meipus is kebpeesewaa kediey ne umba kenà a ebpekehendiyan.’ 21Ne zutun mid-ulì haazà is midsug̵ù te edtukud te keemuran ne midtudtul zin diyà te egalen din haazà is langun he menge pituwà te menge etew he impeveyaan kandin. Ne haazà is egalen din, ne utew mibmezaat is gehinawa zin. Ne migkeg̵iyan din haazà is sulug̵uen din te, ‘Hendiyè ka te inged ne ikula nu is menge kersada wey menge zalan dutun ne pendumaha nu zini is menge etew he egkengeayuayu, sikan is menge piang, menge pungkul, wey menge lakap.’ Ne zutun midhipanew haazà is sulug̵uen. 22Ne hein nekeulì en haazà is midsug̵ù ne migkeg̵iyan din haazà is egalen din te, ‘Nemekeume en is menge etew he impeveyaan nu, iyan, wazè pa meenget heini is baley.’ 23Ne midtavak haazà is egalen din te, ‘Hendiyè ka te menge unayan wey vuntud ne ikula nu is menge zalan dutun ne teg̵ela nu is menge etew zutun he medtelavuk dan kayi te keemuran ku su wey mepurung meenget te menge etew heini is baley ku. 24Benar is egkeg̵iyen ku kenikew he haazà is nengehuna he mid-umbita ku, ne kenè dan ebpekekaan te minsan deisey zà kayi te g̵astu ku te keemuran!’ ”

Is Tutuu he Sumusundan ni Jesus

(Lucas 14:25-33; Mateo 10:37,38)

25Ne sengeandew zutun te edhipanew si Jesus ne utew mezakel is menge etew he ebpemenduma kandin. Ne midsineruwan din sikandan te egkag̵i te, 26“Sikan is etew he egkesuat he edsundan kediey, iyan, iyan dekelà diyà te g̵ehinawa zin is ginikanan din, esawa zin, menge anak din, menge suled din, ne emun kenà, ne iyan dekelà diyà te g̵ehinawa zin is keugelingen din he lawa, ne kenà egkehimu he tutuu sikandin he sumusundan ku. 27Ne iring din ded daan sikan is etew he egkesuat he edsundan kediey, iyan, kenà edtiang te krus din, he ke và dà egkeg̵iya, egkehandek he edtuman te menge sug̵ù ku su kela ke iyan ibpatey zin, ne kenà daan egkehimu he tutuu sikandin he sumusundan ku. 28Penenglitan, ke zuen sevaha keniyu he ebevaley te utew metikang he valey, ne zutun te kenè pa sikandin ebpuun ne egkuwintahan din is selapì he egkeg̵astu zin su wey zin metueni ke egkeveleveg din be haazà is baley he ibpehitindeg din wey ke kenà. 29Su emun kenè din egkuwintahan is selapì he igkeg̵astu zin ne kela ke tekew zin en ikepasek is menge tukud ne zutun dà taman. Ne is mezakel he menge etew he ebpekeahà dutun ne ebpemenggemenggemen is edsudì su haazà is baley, ne tekew en tukud he ingkepasek. 30Ne ebpelelelag̵è dan te, ‘Tumù pa ke wazè en sikandin mebulug mebpasek te ebelayen su kenè din bes egkehimu.’ ” 31Ne migkag̵i si Jesus te, “Iring din ded daan is hadì. Su is hadì he ebpekidtebek te sengehahadì ne kinahanglan he edhuna sikandin ebelansi ke ebpekezaag is sepulù he libu he menge sundaru zin te keluwaan he libu he ebpemekeuma he sundaru te kuntada zin he sengehahadì. 32Ne emun egkevelansi zin he kenà ebpekesukul is menge sundaru zin, ne meupiya pa ke edsug̵uen din is menge sulug̵uen din dutun te kuntada zin te meziyù pa is menge sundaru te kuntada zin su wey zan mebpehusayà te wazè pa mekevulug mekedtebek is menge sundaru zan. 33Ne iring din ded daan,” ke si Jesus, “su sikiyu is edsundan kediey, kenè kew egkehimu he tutuu he menge sumusundan ku emun kenè egkeawà diyà te g̵ehinawa niw is ked-engkezi niw te langun he egkenug̵unan niw.”

Is Timus he Wazè Din Pulus

(Lucas 14:34,35; Mateo 5:13; Marcos 9:50)

34 Ne zutun impezineg ni Jesus is sempità su ibpesavut din he is kedsundan dan kandin ne iring te timus. Ke sikandin te, “Meupiya is timus su ibmeupiya te egkeenen, iyan, ke egkeawà diyà te timus is taam din wazè en paag̵i he egkehimu te kebpelikua te taam din. 35Ne wazè en iyan pulus din su kenà egkeg̵amit te minsan ebunu he pelambù te tanà ne ed-engkezan dà. Kinahanglan he sevuta niw heini is nezineg niw.”

Currently Selected:

Lucas 14: mbbNT

Highlight

Copy