Juan 13

Is Kedlùlù ni Jesus te Menge Paa te Menge Sumusundan Din

1Sengeandew pa zutun ne egketuman en is Pista te Kedlevayi. Netuenan ni Jesus he uvey en is ked-awè din dini te kelibutan su ed-ulì en diyà te Amey zin he Megbevayà. Utew mahal ziyà te g̵ehinawa zin is menge sumusundan din dini te kelibutan, ne zutun ibpeehè din ke hengkey kemahal sikandan diyà te g̵ehinawa zin.

2Si Jesus wey is menge sumusundan din, ne edlavung dan dutun. Ne si Hudas he tigKeriyuti he anak ni Simon, daan en he impeseled ni Setanas diyà te isip din is ked-ekali zin ki Jesus. 3Ne si Jesus, netuenan din he insarig kandin te Amey zin is kebayàbayà te langun. Netuenan din daan he ziyà sikandin ebpuun te Megbevayà ne ziyà daan sikandin ed-ulì. 4Ne zutun te edlavung dan, midhitindeg si Jesus ne midluwas din is kumbalè din ne zuen imbevakes din he tualya, 5ne midsulug̵an din te wahig is pelenggana. Ne zutun mibpenlùluan din is menge paa te menge sumusundan din, ne mibpenerepuwan din dutun te tualya. 6Ne hein iyan en si Simon he migeraran ki Pedro, migkag̵i si Pedro te, “Edlùluan nu ve is menge paa ku?” 7Ne midtavak si Jesus te, “Kenè nu egkesavut is ebeelan ku g̵untaan, iyan, keuzemà egkesavut nu.” 8Ne migkag̵i si Pedro te, “Kenà egkehimu he iyan ka ebpenlùlù te menge paa ku!” Ne midtavak si Jesus te, “Emun kenè ku sikew egkelùluan, kenè ku sikew sumusundan.” 9Ne zutun midtavak si Pedro te, “Ne emun iyan heeyan ne kenà iyan dà is paa ku, kekenà, elin nu zaan lùlui is menge velad ku wey ulu ku!” 10Ne migkag̵i si Jesus te, “Sikan is nekepemezig̵ù en, iyan dà kinahanglan he edlùluan is menge paa zin su nelumpiyuwan en is lawa zin. Ne sikiyu zaan, nepurung kew en melumpiyuwi. Asal is sevaha keniyu wazà melumpiyuwi.” 11Umba migkag̵i he wazà melumpiyuwi is sevaha su netuenan din ke hentei is ed-akal kandin wey mehimetayi.

12Ne hein netapus din haazà is kebpenlùlui zin te menge paa zutun te menge sumusundan din, insun-ud din is kumbalè din ne mibpinuu. Migkag̵i sikandin diyà te kandan te, “Egkesavut niw ve is kehulug̵an kayi te mid-ulaula ku keniyu? 13Iyan niw id-umew kedì is Menunudlù wey Egalen, ne hustu en heeyan su iyan a iyan egalen niw. 14Ne siak is menunudlù wey egalen niw, emun engayan a he ebpenlùlù te menge paa niw te menge sakup ku, kinahanglan he ebpelùlùluey kew te menge paa te uman sevaha keniyu. 15Umba mid-ulaula ku heini kayi te keniyu su wey niw meiringi. Kinahanglan he mebpevayàbayà is kada sevaha keniyu te zuma zin. 16Utew venar is egkeg̵iyen ku keniyu he is sulug̵uen, kenà lavew sikandin te egalen din, ne is sug̵ù daan, kenà sikandin lavew te midsug̵ù kandin. 17Emun egkesavut niw en heini is impenurù ku keniyu, igkelipey niw utew ke edtumanen niw.

Is Kegkeg̵iya ni Jesus te Kedlimbungi Kandin

18Kenè kew pudu is egkeg̵iyan ku kayi su netuenan ku ke hengkey is gehinawa te uman sevaha keniyu te menge pinilì ku. Duen sevaha keniyu he ed-ekalan e zin. Umba egkeulaula heini su wey metuman sikan is netagnà dengan diyà te insurat he Lalag te Megbevayà he edhenduen te, ‘Is duma ku he ebpekidtug̵en kediey, iyan nehimu he kuntada ku.’ 19Umba,” ke si Jesus, “te kenè pa heini egkehitavù, egkeg̵iyen ku en keniyu he zaan su emun egketuman en, ebpeketuu kew he iyan a sikan is mibpilì te Megbevayà he ibpahadì. 20Utew venar is egkeg̵iyen ku keniyu he ke zuen etew he edewaten din is edsug̵uen ku, edewaten e zin daan, ne is edawat kediey, edewaten din daan is Amey ku he midsug̵ù kediey.”

Is Edlimbung ki Jesus

(Juan 13:21-30; Mateo 26:20-25; Marcos 14:17-21; Lucas 22:21-23)

21Ne te kegkeg̵iya zutun ni Jesus, utew mibmesakit is gehinawa zin ne migkeg̵iyan din is menge sumusundan din te, “Utew venar is egkeg̵iyen ku keniyu he ed-ekalan a te sevaha keniyu wey a mehimetayi.” 22Ne mibpetengtengtengà haazà is menge sumusundan din su wazè dan metueni ke hentei is egkeg̵iyen din. 23Ne zutun te zurug ni Jesus kes sumusundan din he pinedtayè din utew. 24Ne haazà he sumusundan, mid-uyawan ni Simon he iyan kes migeraran ki Pedro. Ke si Pedro te, “Insai nu sikandin ke hentei is egkeg̵iyen din.” 25Ne haazà he sumusundan, geina te uvey sikandin ni Jesus, mid-insaan din si Jesus te, “Hentei kenami is ed-akal kenikew?” 26Ne midtavak si Jesus te, “Emun igkezehulit ku en heini is supas, ne is ebeg̵ayan ku, iyan sikandin.” Ne indehulit din haazà is supas, ne imbeg̵ey zin ki Hudas he anak ni Simon he tigKeriyuti. 27Ne hein nezawat ni Hudas haazà is supas, ne mid-ehukan sikandin ni Setanas ne migkeg̵iyan ni Jesus te, “Gègaani nu is ebeelan nu!” 28(Ne wazà minsan hentei kandan te menge sumusundan dutun he nekesavut ke maan is migkag̵i ni Jesus haazà. 29Kunaan te zuma he ibpepemasa ni Jesus sikandin te egkinehenglanen dan he idsilibra te pista, ne emun kenà, duen ibpeveg̵ey ni Jesus diyà te menge egkengeayuayu. Umba iyan haazà netag̵ù diyà te g̵ehinawa zan su si Hudas, iyan edtipig te selapì dan.) 30Ne hein nekaan ni Hudas haazà is supas, midlawang ne mezukilem en dutun.

Is Beg̵u he Sug̵ù

31Ne hein migenat en si Hudas, migkag̵i si Jesus te, “Meg̵aan en egkeahà ke sengemenu is kezekelà te g̵ehem ku te Kakey te Menusiyà, ne pinaag̵i kedì egkeahà daan ke sengemenu is kezekelà te g̵ehem te Amey ku he Megbevayà. 32Ne emun pinaag̵i kedì egkeahà guntaan is dekelà he g̵ehem te Amey ku he Megbevayà, kenà utew egkeug̵et ne ibpeehè din daan is kediey he dekelà he g̵ehem. 33Sikiyu is menge minahal ku he menge sumusundan, egketegteg̵aad dà guntaan ne egkeawaan ku en sikiyu. Ebpen-ahaan a keniyu ne iring te migkag̵i ku ziyà te menge Hudiyu, egkeg̵iyen ku zaan dini te keniyu he ke hendei a ebpevayà kenè kew ebpekezuma. 34Beg̵u en he sug̵ù is ibpetuman ku keniyu. Iyan is: kinahanglan he mahala ziyà te g̵ehinawa te uman sevaha keniyu is minsan hentei keniyu. Iring te mahal kew zini te g̵ehinawa ku, kinahanglan he mahal ziyà te g̵ehinawa te uman sevaha keniyu is minsan hentei keniyu. 35Emun ed-ul-ulahan niw heini, egkeahà te langun he menge etew he menge sumusundan ku sikiyu.”

Is Kegkeg̵iya ni Jesus te Kebpemarew ni Pedro

(Juan 13:36-38; Mateo 26:31-35; Marcos 14:27-31; Lucas 22:31-34)

36Ne zutun migkag̵i ki Jesus si Simon, kes migeraran ki Pedro, ke sikandin te, “Ebpehendei ka?” Ne midtavak si Jesus te, “Ke hendei a ebpevayà kenè kew pa ebpekezuma; iyan, keuzemà ebpeketelukun kew g̵ihapun.” 37Ne migkag̵i med-uman si Pedro te, “Maan is kenà a ebpekezuma kenikew g̵untaan? Kenè ku sikew ed-ewaan minsan pa ke kinahanglan he ebpehimatey a tenged kenikew!” 38Ne midtavak si Jesus te, “Ebpehimatey ke ve tenged kediey? Benar iyan is egkeg̵iyen ku kenikew he te kenè pe kan ebpengukarà is manuk ne ketetelu ke en ebpekekag̵i he kenà a kenikew egkekilala.”

Currently Selected:

Juan 13: mbbNT

Highlight

Copy