Nengeulaula 23

1Ne si Pablo, midtengtengan din haazà is nengetig̵um he menge ebmeg̵urangen ne ke sikandin te, “Menge suled, wazà buring te zengeg ku ziyà te etuvangan te Megbevayà taman en guntaan!” 2Ne zutun, si Eneniyas sikan is lavew he memumuhat, migkeg̵iyan din is menge etew zutun te uvey ni Pablo he tebpia zan is bèbè din wey mesiluti sikandin. 3Ne migkeg̵iyan sikandin ni Pablo te, “Sikew is tarù is ked-azap din te Megbevayà, siguradu Megbevayà is edsilut kenikew. Su sumalà is ibpenurù te kesug̵uan tew, ebpimpinuu ka keniyan is edsusi kediey, iyan, edsupaken nu is kesug̵uan su insug̵ù nu he tebpie e zan.” 4Ne zutun migkag̵i is menge etew he uvey ni Pablo te, “Maan is ed-insultuwan nu is lavew he memumuhat he mibpilì te Megbevayà?” 5Ne midtavak si Pablo te, “Wazà a mesayud he iyan sikandin lavew he memumuhat. Su netuenan ku is migkag̵i te insurat he Lalag te Megbevayà he, ‘Kenè niw insultuwi is edumala keniyu.’ ”

6Ne naahà ni Pablo he menge Sedusiyu is duma zutun te nengetig̵um he menge ebmeg̵urangen, ne is duma, ne menge Perisiyu. Ne tenged dutun, mibpekezag̵ing is egkag̵i te, “Menge suled, Perisiyu a ne Perisiyu zaan is ginikanan ku. Iyan ketezengan ke maan is mid-uwit e zan dini te keniyu g̵untaan is: edtuu a he keuzemà ebenhawen te Megbevayà is menge minatey.” 7Ne zutun te nekag̵i zin haazà, ne is menge Sedusiyu wey Perisiyu, nekedsumpakì dan ne nevahinbahin is langun te sikandan. 8Umba nekedsumpakì dan su is menge Sedusiyu, ibpenurù dan he kenà egkevanhew is menge minatey. Egkeg̵iyen dan he wazà menge mulin-ulin ne wazà daan menge velinsug̵uen he ebpuun diyà te langit. Ne is menge Perisiyu, edtuu zan mulà he zuen kegkevanhew wey menge mulin-ulin wey velinsug̵uen te Megbevayà. 9Umba, mid-iseg dan mebmeg̵urub dutun is ebpevenbensag̵ey. Ne zutun midhitindeg is menge Perisiyu he menge menunudlù te kesug̵uan ne ke sikandan te, “Wazà mezaat he netuenan dey he mibeelan kayi te etew. Kela ke tutuu iyan he zuen mulin-ulin wey ke velinsug̵uen be te Megbevayà he mibpekidlalag kandin.”

10Ne mid-iseg dutun is kegkesumpakì dan ne tenged dutun insug̵ù te kepitan diyà te menge sundaru zin he eg̵awa zan si Pablo zutun te menge etew wey iulì diyà te kutà. Su nahandek sikandin su kela ke pitaspitasa zan si Pablo.

11Ne zutun te kebmezukilem din, mibpaahà ki Pablo is Nengazen tew he si Jesus ne migkag̵i te, “Sarig ke zà su iring te impenudtul nu is kedtuu nu kedì dini te Hiruselim, kinahanglan daan he ibpenudtul nu ziyà te inged he Ruma.”

Is Bitiyara Mehitenged te Kedhimetayi ki Pablo

12Ne hein nepawà midtig̵um is menge Hudiyu su zuen pezem ed-ul-ulahan dan ki Pablo. Ke sikandan te, “Kenè kiw egkaan wey ed-inum taman te kenè tew pa egkepatey si Pablo.” 13Ne subra te kepatan he etew haazà is menge Hudiyu he mid-uuyun-uyun he edhimatey ki Pablo. 14Ne zutun midhendiyè dan te menge punuan he menge memumuhat wey te menge ebmeg̵urangen ne ke sikandan te, “Utew neheg̵et is uyun dey he kenè key egkaan wey ed-inum taman te kenè dey pa egkepatey si Pablo. 15Ne sikiyu wey is tivuuk he menge ebmeg̵urangen, pesurati niw is kepitan te menge sundaru he Rumanu. Ne keg̵iya niw zutun he uwita zin si Pablo zini su wey niw mepurung meimbistiga te mid-ulaula zin. Ne sikami, andam key su edhimetayan dey te kenè pa ebpekeuma zini.”

16Is anak te etevey ni Pablo, nekezineg dutun te ed-ul-ulahan dan ne midhendiyà te kutà ne midtudtulan din si Pablo. 17Ne si Pablo, mid-umew zin is sundaru ne ke sikandin te, “Dumaha nu heini is kenakan diyà te kepitan su zuen egkeg̵iyen din kandin.” 18Ne haazà is sundaru, miduma zin haazà is kenakan diyà te kepitan ne ke sikandin te, “Kes pirisu he si Pablo, mid-umew e zin ne migkag̵i zin kedì he ibpezuma zin kedì heini is kenakan dini te kenikew su zuen egkeg̵iyen din kenikew.” 19Ne zutun, is kepitan, mid-ag̵ak din haazà is kenakan dutun te uvey zà ne hein iyan dan dà, mid-insà te, “Hengkey, Mama, is egkeg̵iyen nu kedì?” 20Ne midtavak haazà is kenakan te, “Is menge Hudiyu, mid-uyun dan he keeselem, edhengyuan ke zan he uwita nu si Pablo ziyà te ketig̵uman te ebmeg̵urangen su ebpurungan dan kun ed-imbistigaha te mid-ulaula zin. 21Iyan, kenè nu itug̵ut su zuen menge kepatan he etew he ed-eles su ed-ayan kandin. Meheg̵et is uyun dan he kenè dan egkaan wey ed-inum taman te kenè dan pa egkepatey si Pablo. Mid-andam dan en ne iyan dà edteg̵azan dan is sug̵ù nu.” 22Ne zutun migkag̵i haazà is kepitan te, “Kenè nu, Mama, tudtula ziyà te minsan hentei he midtudtulan a kenikew.” Ne zutun impeulì din is kenakan.

Is Kedheteza ki Pablo Ziyà te Gubirnedur

23Ne haazà is kepitan, mid-umew zin is dezuwa he sinerig̵an din ne ke sikandin te, “Ipaandam niw is dezuwa he g̵atus he sundaru su edsug̵uen ku sikiyu ziyà te inged he Sisarya. Ipezuma zaan is kepituwan pa he egkukudà wey is dezuwa pa he g̵atus he ebevangkew. Kinahanglan he ipaandam niw sikandan taman te alas nuwibi kan te mezukilem su iyan kegenat niw. 24Kuwa kew te menge kudà he ebpeuntuzan ki Pablo. Ne purungi niw ventayi sikandin para wazà mehitavù kandin taman te ebpekeuma kew ziyà te ki Gubirnedur Felix.” 25Ne mibeelan dutun te kepitan is surat he ibpeuwit din diyà te gubirnedur.

26Ke sikandin te, “Surat heini ni Claudio Lisyas diyà te ki Gubirnedur Felix. Kumusta ka. 27Heini is etew he ibpeuwit ku ziyan, midakep te menge Hudiyu ne edhimetayan dan pezem. Iyan, nezineg ku he sakup sikandin te inged tew he Ruma, umba miduma ku is menge sundaru ne mibeyaan ku ne miduma ku para kenà mehimetayi. 28Geina te edsusiyen ku ke hengkey is insumbunga zan kandin, mid-uwit ku sikandin diyà te ketig̵uman te menge ebmeg̵urangen dan. 29Ne zutun netuenan ku he wazè bes mezaat he ulaula zin he zait he igkepirisuwa wey igkepehimetayi kandin. Iyan dà insumbunga kandin is kedsupaka zin te menge vetasan dan dutun te kesug̵uan dan. 30Ne hein netuenan ku he ed-eyanan sikandin te menge Hudiyu, neisip ku he ibpeuwit diyan. Ne migkeg̵iyan ku is menge midsumbung kandin he ziyan dan ebpekeetuvang te kenikew.”

31Ne zutun te nepasad te kepitan haazà is surat din, midtuman te menge sundaru is insug̵ù din kandan su migkuwa zan si Pablo ne migenat dan. Ne te iyan haazà he kezukileman nekeuma zan diyà te inged he Entipatris. 32Ne zutun te mid-ilis he andew midlikù haazà is ebpemenhipanew he menge sundaru ne iyan dà duma ni Pablo is menge sundaru he ebpemen-untud te kudà. 33Ne midlaus dan diyà te Sisarya ne imbeg̵ey zan sikan is surat diyà te gubirnedur ne impalad dan kandin si Pablo. 34Ne mibasa zin haazà is surat ne in-insè din ki Pablo ke hendei sikandin he prubinsya mesakup. Ne hein midtavak si Pablo te, “Sakup a ziyà te prubinsya he Silisya,” 35migkag̵i haazà is gubirnedur te, “Wey ku en edsusiya is insumbunga kenikew ke ebpemekeuma is midsumbung.” Ne zutun, impeventayan din te sundaru si Pablo ne ziyè din isavuk te turug̵an ni Hadì Hirudis.

Currently Selected:

Nengeulaula 23: mbbNT

Highlight

Copy