Nengeulaula 2

Is Kebpekeuma te Wag̵as he Mulin-ulin

1Ne hein andew en te pista he egngezanan te Pintikusti nevurun kes langun he menge tumutuu ziyà te sevaha he valey. 2Ne netekewtekew zan te zuen utew mezag̵ing he nezineg dan he ebpuun diyà te langit he henduen be te edselenuhug he utew mevendes he keramag. Ne haazà is dag̵ing, midsagkung dutun te seled te valey he nevurunan dan. 3Ne zutun nengeehè dan is henduen be te menge regreg te hapuy he nekedsisiveysivey he nemekeuntud te kada sevaha kandan. 4Ne mibpurungan ulini te Wag̵as he Mulin-ulin is kada sevaha kandan, ne netekewtekew zan pintezi te menge kineg̵iyan he kenè dan egketuenan sumalà is gehem he imbeg̵ey kandan te Wag̵as he Mulin-ulin.

5Duen menge Hudiyu ziyà te Hiruselim he ziyà ebpemuun te minsan hendei he inged dini te tungkup te kelibutan ne menge metinumanen sikandan te sug̵ù te Megbevayà. 6Ne hein nezineg dan haazà is mezag̵ing, nerivurun sikandan dutun. Ne utew zan nengeinuinu su is kada sevaha zutun te menge etew he nerivurun, egkezineg din is kandin he keugelingen he kineg̵iyan he egkekag̵i zutun te menge tumutuu. 7Netik-awan dan ne nengeinuinu zan ne mibpein-inseey zan te, “Hengkey vuwa heini? Menge tigGeliliya is egkag̵i. 8Ne maan is egkezineg ta is kegkag̵i zan he iyan egkeg̵amit dan is kineg̵iyan te kada sevaha kenitew? 9Su zuen kayi te menge zuma tew menge tigPartya, menge tigMidya, wey menge tig-Ilam. Ne is duma kenitew, diyà ebpemuun te Misuputamya. Duen daan tigHudiya, tigKepedusya, tigPuntu, tig-Asya, 10menge tigPrigya, menge tigPempilya, menge tig-Ihiptu wey ebpemuun te menge inged diyà te Libya he uvey te Sirini. Ne zuen daan dini minsan menge tigRuma he menge Hudiyu wey kenà menge Hudiyu he nemeketuu zaan te tinuuwan te menge Hudiyu. 11Duen daan menge tigKrita wey menge tig-Erabya. Ne minsan pa te kenà ebpeked-iiring is kineg̵iyan tew, is kada sevaha kenitew, nesavut din is egkeg̵iyen su kandin he keugelingen he kineg̵iyan is egkeg̵amit kayi te menge tigGeliliya. Ne impesavut dan kenitew is utew meupiya he egkein-inuwan he vaal te Megbevayà,” ke sikandan. 12Ne is langun he menge etew zutun, utew zan nengeinuinu, su wazè dan mesavut haazà is nehitavù. Ne kenà egkerintas is kebpein-inseey zan he egkag̵i te, “Hengkey vuwa heini?” 13Ne is duma kandan, edsumpeliten dan haazà is menge tumutuu he egkag̵i zan te, “Egkengelangut heeyan!”

Is Kedwali ni Pedro Hein Andew te Pintikusti

14Ne zutun midhitindeg si Pedro ne midhitindeg daan haazà is menge zuma zin he sepulù wey sevaha he epustul. Ne mibpekezesen sikandin he egkag̵i te, “Sikiyu is menge zuma ku he menge Hudiyu wey langun niw te menge meg̵inged dini te Hiruselim, pemineg kew wey niw mesavut is egkeg̵iyen ku. 15Kunaan niw ke egkengelangut heini is menge zuma ku. Iyan, kenà egkehimu su liwazè pa he ebpemenahik is andew. 16Iyan heini kes netagnà dengan te ebpeneuven dengan he si Joel, su ke sikandin te,

17‘Migkag̵i is Megbevayà te,

“Keuzemà te ketepusan he timpu, sikiyu is tivuuk he menusiyà,

ibpelumun ku keniyu is Wag̵as he Mulin-ulin.

Ne zutun ebpeneuven is menge anak niw he maama

wey is anak niw he vahi ne ibpesavut dan te menge etew is lalag ku.

Duen menge menguhed he ebpuwasan ku is id-ehè dan

wey zan maahà is kenà egkeahà te zuma.

Ne zuen menge meg̵urang

he edhimuwen ku he menge meneneg̵einep.

18Su sikan is menge sulug̵uen ku,” ke sikandin,

“menge vahi se maama, ibpelumun ku kandan keuzemà is Wag̵as he Mulin-ulin

ne ebpeneuven ku sikandan

ne ibpesavut dan te menge etew is lalag ku.

19Ne zuen menge egkengein-inuwan he singyal he ibpeehè ku

ziyà te langit wey ziyan daan te lumpad.

Egkeahà is lengesa wey hapuy wey zekelà he evel.

20Siak is Nengazen,

te kenè pa keuzemà egkeuma is nevantug he andew te kedsiluti ku te menusiyà,

ebmerusirem is andew ne ebmerig̵à is bulan he iring te lengesa.

21Ne zutun he timpu,

is minsan hentei he ebpehizuhizu kediey te Nengazen,

edlibriyen ku sikandin te silut.” ’ ”

22Ne mid-uman megkag̵i si Pedro te, “Sikiyu is menge zuma ku he kevuwazan ni Israyil, pemineg̵a niw is egkeg̵iyen ku. Si Jesus, kes tigNeserit, sug̵ù sikandin te Megbevayà. Impesavut kenitew te Megbevayà he sug̵ù din si Jesus pinaag̵i te g̵ehem din wey menge egkein-inuwan wey menge singyal he mibpeveelan kandin te Megbevayà. Netuenan niw en heini is egkeg̵iyen ku su neulaula heini is langun dini te inged niw. 23Ne heini si Jesus, impalad te etew keniyu. Ne zaan he netuenan heini te Megbevayà su iyan imbanglis din ki Jesus. Impehimetayan niw sikandin te menge etew he kenà ed-azap te Megbevayà. Ne inransang dan te krus. 24Iyan, midlibri si Jesus te Megbevayà ne mibanhew zin su kenà egkehimu he egkevakus si Jesus te kemetayen. 25Netagnà dengan ni Hadì David is migkag̵i ni Jesus su ke sikandin te,

‘Layun ku egkeahà he edumahan a te Nengazen

su kenà sikandin ed-awà kayi te zapit

te egkekewanan ku,

umba kenà a egkesemukan.

26Tenged kayi ne utew meupiya is gehinawa ku

ne melipayen is kegkag̵i ku.

He Nengazen, idsarig ku kenikew is lawa ku

27su netuenan ku he kenè nu ebpesegdanen

is gimukud ku ziyà te Iveyaan.

Siak is metinumanen he sulug̵uen nu,

netuenan ku zaan he kenè nu idtug̵ut

he meredak is lawa ku.

28Impeehè nu kediey sikan is ibayà

pehendiyà te untung he wazà pidtemanan.

Emun layun ka zuma ku,

utew zekelà is kediey he kelipey.’

Iyan heini kes netagnà ni David he lalag ni Jesus.”

29Ne impelaus ni Pedro haazà is egkeg̵iyen din, ke sikandin te, “Menge suled ku, netuenan tew he sikan is tipehuna he hadì tew he si David dengan, neug̵et en he minatey wey inleveng ne wazè pa mahanew is leveng din. 30Ne si David, geina te mibpenaub te Megbevayà, nesavut din ke hengkey is impenaad kandin te Megbevayà su si David, iyan penaad kandin te Megbevayà is: keuzemà duen kevuwazan din he egkehimu he hadì he iring kandin. 31Ne g̵eina te netuenan ni David he iyan heini ebeelan te Megbevayà, netagnè din is kebenhawa ki Kristu, sikan is mibpilì te Megbevayà he ibpahadì su ke si David te,

‘Wazà sikandin pesegdana te Megbevayà diyà te Iveyaan, ne wazà daan meredak is lawa zin.’ ”

32Ne ke si Pedro te, “Iyan egkeg̵iyen din si Jesus he mibanhew te Megbevayà. Ne is langun te sikami, ebpeketistig̵us key he nevanhew su neehè en te menge mata zey. 33Midtulus en si Jesus ne impepinuu en diyà te lavew he pinuuwà diyà te zapit te egkekewanan te Megbevayà, ne imbeg̵ey kandin te Amey tew he Megbevayà is Wag̵as he Mulin-ulin he impesarig din kandin. Umba nengeehè niw wey nengezineg niw g̵untaan heini is langun he egkein-inuwan su ebpuun te g̵ehem te Wag̵as he Mulin-ulin he imbeg̵ey te Megbevayà. 34Ne zutun te netagnà ni David wazè din iyan keg̵iya is kandin he lawa su wazà iyan si David tulusa te Megbevayà pehendiyà te langit. Duen selakew pa he insurat he lalag ni David he ke sikandin te,

‘Migkag̵i is Megbevayà diyà te Nengazen ku,

ke sikandin te,

“Dini ke zè pa pinuu

te zapit te egkekewanan ku

35taman te kenè ku pa

ibpeluhud diyà te kenikew

is menge kuntada nu.’’ ’

36Na,” ke si Pedro, “kinahanglan he edsevuten tew te langun he menge kevuwazan ni Israyil he si Jesus, sikan is inransang niw te krus, midhimu en te Megbevayà he Nengazen wey hadì tew te langun.”

37Ne hein nezineg haazà te menge etew utew zan nekedsendit. Ne ke sikandan diyà te ki Pedro wey te menge zuma zin he epustul te, “Menge suled, ebmenumenu key?” 38Ne midtavak si Pedro te, “Kada sevaha keniyu, iniyug̵i zin is mezaat he ulaula zin ne mebpebewtismu wey metueni he ebpekidsevaha sikandin ki Jesu Kristu. Ne human egkepesaylu is menge salè din ne is Wag̵as he Mulin-ulin, ibeg̵ey kandin te Megbevayà. 39Su sikitew wey is menge kevuwazan tew, iyan mibpenaazan te Megbevayà te Wag̵as he Mulin-ulin ne kenà iyan kiw zà mibpenaazan kayi, kekenà, elin daan sikan is menge etew he ziyà ed-ubpà te meziyù, is minsan hentei he edhimuwen te Nengazen tew he Megbevayà he meketuu kandin.”

40Ne mezakel he menge ketezengan is insambag ni Pedro kandan, ke sikandin te, “Likayi niw is limas te Megbevayà kayi te menge etew g̵untaan he memezaat is ulaula.” 41Ne zutun, mezakel is nemeketuu te impesavut kandan ni Pedro ne mibpebewtismu sikandan. Ne zutun he andew neumanan kes menge tumutuu te tetelu he libu.

Is Betasan te Menge Tumutuu

42Ne te kada andew ebpemineg dan te ibpenurù kandan te menge epustul. Mibpekid-upakat dan te langun he menge tumutuu ne mibeelan dan te tedeman is kebpatey ni Jesus pinaag̵i te kegkaan te supas ne layun dan ed-ampù.

43Mezakel is menge egkein-inuwan wey singyal he nehimu pinaag̵i te menge epustul, umba neteg̵uan is menge etew te kegkehandek te Megbevayà. 44Mezesen is kebpekid-upakat te menge tumutuu. Sikan is duen azen din, mibeg̵ayan din daan is menge zuma zin. 45Imbelegyè dan is menge azen dan wey menge tanà ne is halin dutun, ne mibpenalad dan diyà te langun he menge zuma zan sumalà is kinahanglan te kada sevaha. 46Ne kada andew edtig̵um is langun he menge tumutuu zuen te zekelà he simbahan he egngezanan te Valey te Megbevayà. Ne egkesevaha zan daan he utew melipayen te kegkaan dan dutun te menge valey zan wey kebpevegbeg̵ayè dan. 47Ne nekezalig dan te Megbevayà ne egkengetahud sikandan te minsan hentei. Ne te kada andew zutun duen menge etew he ebpeketuu. Ne is langun dutun, edlibriyen te Megbevayà wey kenè din en sikandan mesiluti ne haazà nemekeuman te menge tumutuu.

Currently Selected:

Nengeulaula 2: mbbNT

Highlight

Copy