Sonas 2
2
Sonas nalaw Aláemit
1Ñer Atúla náboñul eol yámah ékail émer Sonas. Nanamo ró ni far yo sutufunaha sífaji ni sufuga sífaji. 2Ni far eol yay nalaw Atúla aamme Aláemilol 3naagol :
« Bíyih bámah nibaje,
níbaho nivoh aw Aláemit, núttunom.
To ni butum eĉet yay níᵽib min urambenom,
nuun firimom.
4Ni másiko fal fafu nubelenom,
ban mal mamu múgolom múharo.
Gatey mal mamu n’guĉimenom,
gulongos gagu n’gúggubom gúharo.
5Injé nieh : “Nutosenom dáli ni aw.
Nimaŋene ibbañ ijuh yaŋi yanab me.”
6Muu mamu mímmeŋul iki mireom n’ehondor.
Injé umu n’étimo,
mafos mamu ni mugolenom ni fuhow.
7Nialoene bi to n’ettam gurijaŋ gagu.
Nijaene mbaa buroŋ babu baa gaĉet me,
ettam yay ᵽan eᵽamunorenom bi nánonan.
Bare aw Aláemit aamme Atúla,
núᵽunnulom maroŋe ni gasun gaugu,
8mata nikaene eĉet.
Bare niosen míya min ilai ;
galaom n’gujow iki gutogi bo ni yaŋi yanab me.
9Gabaj me gáinen bamotoŋ n’uce úbuli n’aw,
mati gúmus gubaj gásumay.
10Ban ínje ᵽan ísimeni nisali nímoro.
Ᵽan ikan wo nibbat me ni aw Atúla,
aw aamme aᵽagena ahu. »
11Ñer Aláemit naah eol yay : « Uk’úmasul Sonas ni mahae ! » Nemasulol to baenah.
Currently Selected:
Sonas 2: bqjDBL2
Highlight
Share
Copy
Want to have your highlights saved across all your devices? Sign up or sign in
Wycliffe Bible Translators, Inc. All rights reserved.
