Saaŋ 12

Mari náyu míĉir matiŋoe ni guot Yésu

(Mácie 26.6-13 ; Maruk 14.3-9)

1Gunah futoh ni fanur balama Paak, Yésu nájoul bi Betani, ésuh Lasar o nailen me ni gaĉet me. 2No naĉih me, n’gúsilol ; Maruta aamen n’ecokor bugan bugagu, ban Lasar bugo guomen me n’etiñor ni Yésu. 3Mari, o, naŋar jibara jaa míĉir mútut matiŋoe másumut funnom áyu ni guot Yésu, aban naŋar walol náti go ; gatiŋ míĉir mamu n’guram yaŋ yay ᵽooyo.

4Ace n’ulagora Yésu, gajaol Yudas Isikariot ajae me ennomenol, naah ñer : 5« Wa uĉile unnomenutal míĉir maumu síralam sammeŋe#12.5 Ni gugerekay guoge sifaraku sikeme sífaji ; efaraku yaa no, yo eᵽilo me bacam an baroker funah fanur. usenal galeh me ? » 6Nalob mee, let gaa búoh ter enilol erundum galeh me, bare min aamme áku. Aĉila náh’átuh jiet jaju jolil dó gukane me síralamil, ban nah’aŋar waam dó me. 7Bare Yésu naagol : « Uhalol ! Nakan mee bi funah fafu faa gafogom. 8Galeh me, bugo, ᵽan jibajil nánonan ni buru, bare ínje jilelom n’ebaj nánonan. »

Egum firim yay bi emuh Lasar

9Fítiman fal Esúif ni fuun búoh Yésu umu Betani. Ñer n’gujow bi bo, let mala Yésu bare, bare ᵽoᵽ bi ejuh Lasar o nailen me ni gaĉet me. 10Ñer ufan uteŋenaaw n’gujoh bi may jamuh Lasar, 11mata aĉila aĉil me min Esúif gammeŋe gúhatuloil min gúinen ni Yésu.

Yésu o n’enogen Yérusalem

(Mácie 21.1-11 ; Maruk 11.1-11 ; Lík 19.28-40)

12Tihalen fo, fítiman fafu fakelo me emat gaggan gagu gaa Paak ni fuun búoh Yésu umu n’éjoul mbaa Yérusalem ; 13ñer bugala fo n’guŋar ubes wal úit min gúᵽurul guemor ni o n’eŋan ró guoh : «

Hosanna !

Aláemit ásonien an ahu ájaeul me ni gajaol,

ásonien ávi ahu ala Israel#12.13 ávi ahu ala Israel : Aláemit naᵽie nagiten ávi ahu David búoh ace ni gabulakenol ᵽan áni ávi Israel (2 Samiel 7.11-13). Aví ahumu ni Kirista, an anur om. Yésu aamme ávi ahumu o guomen me n’enah. Gurim gagu go bugan bugagu guunen me tale ni Ufóñ 118.25-26 gúᵽullo. ! »

14Ñer Yésu natoh to jusum ; narembor ni jo, ti hiĉi me :

15« Buru bugaa Yérusalem, jambi júholi !

Juluj, áviul umu ájaeul mee

min anamoe ni jusum#12.15 Juluj Sakari 9.9. »

16Bítinar ᵽan, ulagorol gujogut dáuru ; bare búsol, no Yésu ailo me ni gaĉet me áni ni gasalol, no ñer guosen me búoh waf wauwu uhiĉihiĉ uya ni o, bi ni eyab yay ró yo guyabol me.

17Bugan bugagu gaamen me ni Yésu no navogulo me Lasar áᵽunnul ni fuyah fafu min ailenol ni gaĉet me, n’gunamo egiten wo gujuh me. 18Gammeŋe, nemme guune búoh Yésu nakakan waf wauwu wajureruti mee, n’gújoul guemor ni o. 19Ñer Eᵽárisie yay nihi guogoro : « Jujuge búoh újuutal to wáfowaf. Juluj min ésuh yay ᵽe gukae mee mbal aĉila. »

Yésu o n’elob mala eĉelol

20Ni bugan bugagu gajoulo me gúkail esal Aláemit ni gaggan gagu, bajen dó bugan guman galet Esúif. 21N’gújoul gutoh Fílip ala Betusaida yaa Gálile min guogol : « Afanóli, Yésu jimaŋene bujuh. » 22Fílip najow ak’alob yo Andere, min gujaor iki gulob yo Yésu. 23Ñer Yésu naagil : « Tinah talu tiĉilo no Añol Arafuhow áari me asali. 24Maagen, ínje ilobul yo : Gaugit gulout me n’ettam ban ni guĉet, ᵽan gúni to nevongo. Bare guĉet me, ᵽan guogol#12.24 eogol : dóemme ebuh mitiñ mammemmeŋ.. 25An ahoten me ni buroŋol ni mof maume, ᵽan ábbur bo. Bare an alejehen me bola, ᵽan abaj buroŋ babu bábaerit me. 26Iní me an amaŋe éni arokaom, mb’alagenom, ban to nijae me éni, arokaom ᵽoᵽ ᵽan áni to. Ban an áni me arokaom, Ᵽayom ᵽan ajogol guñen gúuba.

27Maer to niom maa, biinumom búguoe. Ᵽan ᵽiaŋ ioh : “Ᵽayom, uᵽagenom ni wajae me ebajom” ? Bare hum sílam sausu mala so nijoulo maa bi eteb so, ban tinah so tiĉige. 28Ᵽayom, ugiten ñer bájaloi ! »

Ñer firim ni fúᵽurul n’émit fuoh : « Nigitenen bo, ban ᵽan ibbañ igiten bo. » 29Ñer guce ni fítiman fafu fautteneol me n’guoh : « Dáuru fuᵽaranu fiele. » Bugagu n’guoh : « Amalaka alobe ni o. » 30Bare Yésu naah : « Firim faufu fauni mee, let múmbam fuunumi, bare molul. 31Maer bataliŋ babu baa mof biĉige, ban Seytane aamme afan ahu ala mof ᵽan áᵽunni abeni tíyaŋ. 32Ban ínje, no gujaeom me eteben mbaa fatiya, ᵽan íñagul bugan bugagu ᵽe bi n’ínje. » 33Ni gurim gaugu go nalob maa, namaŋe egiten bu najae me eĉet nogor.

34Fítiman fafu ni fuogol : « Juune ni Bahiĉer gúboñ gagu gaa búoh Kirista ahu ᵽan áni to bi nánonan. Ñer bu núogum me : Añol Arafuhow náarie atebeni mbaa fatiya ? Ay aamme Añol Arafuhow ahumu ? » 35Yésu naagil : « Gajaŋa gagu guroŋ ᵽan ni buru jatiito. Jiaken n’jujow no guroŋ me ᵽan ni buru, balama emoĉ yay etobenul, mata ajaa n’emoĉ nd’affas mbaa bay naam n’ejow. 36Nemme juroŋ n’ebaj gajaŋa gagu, jíinen ni go, tima n’jíni bugan bugaa gajaŋa. »

Gáinenut gagu gal Esúif yay

No Yésu alob me firim faufu aban, nakay ak’akoᵽ áraliil. 37Hani min akan me bújoŋor Esúif yay waf wammeŋe wajureruti, bare bae gúinenut ni o, 38mamu min mbi firim fafu fo aboñer ahu Esai alob me fukano faah me :

« Atúla, ay áinene wo wóli julob me ?

Ay nugitene sembei#12.38 Juluj Esai 53.1 ? »

39Gújuenut gúinen. Wa uĉile ? Esai faŋaol nalobe may mala gáinenutil no naah me :

40« Aláemit nápimene gúĉilil,

nakane uinumil n’uak ;

mamu, jambi gúĉilil gujuh,

jambi uinumil ujoh.

Dó ᵽe jambi gúbahoul mbal ínje

min isenil gahoy#12.40 Juluj Esai 6.9-10. »

41Min Esai alob maa, mala Yésu nalobe mee, o nájugali me bájalo babu bola.

42Ni baj til gammeŋe n’ufan Esúif yay gúinen ni Yésu ; bare mala gáholi Eᵽárisie yay, gugitenut yo gúvasul jambi gúᵽunnil ni yaŋ yay yaa galaw|yaŋ yaa galaw, 43mata gufaŋe eruhen eyab gasal gagu gaa bugan bugagu faŋ gal Aláemit.

44Yésu naah fatiya : « An áinen me n’ínje, let n’ínje bareom náinene, bare ᵽoᵽ ni An ahu aboñulom me. 45An ajugom me, aboñulom me ᵽoᵽ najuge. 46Injé aamme gajaŋa gagu nijoulojow ni mof min mbi ánoan áinen me n’ínje jamb’abbañ áni n’emoĉ. 47An aun me gurimom, mbiban akanut wo gulob me, let ínje mb’italiŋol, mata ijoulat bi etaliŋ mof mamu, bare til bi eᵽagen mo. 48An alalom me ban naceŋ eyab gurimom, an ahumu nabaje wajae me etaliŋol : gurim gagu go nilob me, guĉila mbi gutaliŋol me funah fúsola. 49Gurim gagu go nilobe me gujoumulat n’ínje, bare Ᵽaaya faŋaol aboñulom me nagitenomgiten wo niot me ilob, ni ᵽoᵽ bu niot me ilob wo. 50Ban niffase búoh waf waw wo naboñom me elob, wo úŋareul me buroŋ babu bábaerit me. Yo eĉil me, wo nilobe me, nilobewolob ti Ᵽaaya alobom wo me. »

Currently Selected:

Saaŋ 12: bqjDBL2

Highlight

Copy