Fíĉilum 2
2
1Mamu Aláemit naban étut fatiya ni ettam ni waf waw waam dó me ᵽe. 2Funah fafu fakan me futoh ni gúuba, o babaner étut yay ; min áelo burok funah faufu. 3Yo eĉil me nakan fo funah faaro, ban ni fíni fola, mata fiĉila náelo me étut yay. 4Mamu Aláemit átut me fatiya ni ettam.
Bu Aláemit átut me ánaine ni anaare
No Aláemit Atúla akan me ettam ni fatiya, 5hani jununuh janur jilelen ni mof, esel yánoyan yo m’bailerut ; mata Aláemit Atúla o m’bakanerut émit nelubul ni mof mamu, ban ᵽoᵽ arafuhow m’babajerut bi eañ ettam yay. 6Bare ni baj mal nihi múbulul n’ettam yay min míjeben yo ᵽe. 7Ñer Aláemit Atúla naŋar gábupa nateᵽ arafuhow, aban náfuᵽ ni súñunduol érus yaa buroŋ, min arafuhow ahu akan an arondoŋ.
8Aláemit Atúla nailen fíreŋ fal ununuh baubu Eden, galam bo tinah talu túᵽureul me, min abaŋ ró an ahu o nátut me. 9Naban naroh ró ganunuh gánogan gáarie, ban bubugum go m’búsum. N’etut fíreŋ fafu, naroh ró bununuh baa buroŋ, naroh ró ᵽoᵽ bice bal effas maaro ni maarat.
10Ni baj fal fáᵽullo ró Eden nihi fíjeben fíreŋ fafu ; ni fúgat iki fúlandor babu siral sibbagir : 11Eral étiar gajow yo Piĉon, ban nebosor mof mamu ᵽe maa Havila, bo baj me éurus 12yaa maagen ; baj bo may ununuh wo físim wo fitiŋoe, ni ᵽoᵽ sival sáarie faŋ so nihi guŋar me n’gujjonen úibor waw. 13Eral éuten gajow yo Gihon, ban nebosor mof mamu ᵽe maa Kuĉ. 14Efáten gajow yo Tigir, uyu bo tinah talu túᵽureul me aw baamer ni mof mamu maa Aĉur. Ebarigen yay yo eemme Afúrat.
15Ñer Aláemit Atúla naŋar an ahu abaŋ ni fíreŋ fafu fal Eden bi ecokor fo naluj fo nímoro. 16Naban naagol : « Bubugum ununuh waw ᵽe waamme ni fíreŋ faufe, nújue utiñ bo ; 17bare nífireni etiñ bununuh babu basene me effas maaro ni maarat. Mata ínje ilob yo, funah fo nujae bo me etiñ, ᵽan uoᵽoro eĉet ti maagen. »
18Aláemit Atúla naah : « Jáhorut min ánaine anamo nevonol ; ᵽan ikanol arambena ajae me éjahor ni o. » 19Nemme Aláemit Atúla o baŋarer mof min ateᵽ súnuhureŋ sasu ni upu waw, náŋarul so ᵽe bújoŋor an ahu min mb’ajuh bu najae so me evoh. Ñer so ᵽe ᵽan sibaj yánoyan gajow yo, go an ahu ajae yo me ekan. 20Min an ahu akan súnuhureŋ sasu, sihaj sasu ni upu waw ᵽe ujow. Bare ajugut ni so yájahor me bi erambenol. 21Ñer Aláemit Atúla náyuol gámori gámah, min áᵽuren evul ece yaa gacaĉol, aban nabbañen to ti tínien me. 22Naŋar evul yauyu nateᵽ anaare, aban naŋallol bi ni áine ahu. 23Ñer áine ahu naah fatiya :
« Maer an ume ti ínje !
Enilol ni yúmbam éᵽullo,
físimol#2.23 físimol ni fúmbam fúᵽullo : ni gúhiboriay guoge evulol ni súmbam éᵽullo. ni fúmbam fúᵽullo.
Ᵽan guvogol anaare mata n’enil ánaine náᵽullo#2.23 mata n’enil ánaine náᵽullo : uoh me anaare ni gúhiboriay (iĉa), níni ti nuh’uoh me ánaine (iĉ).. »
24Yo eĉil me ánaine ᵽan áᵽur ahat ᵽayol ni jaol min ak’aĉin búli bugo n’aarol, min ñer bugo gúuba gúbbañul gúni enil yanur.
25Ban áine ahu bugo n’aarol sinil sirakel guomene, bare kanutil bo ñusu.
Currently Selected:
Fíĉilum 2: bqjDBL2
Highlight
Share
Copy
Want to have your highlights saved across all your devices? Sign up or sign in
Wycliffe Bible Translators, Inc. All rights reserved.
