Marukusu 7

Agadu a ikaya

(Mat. 15:1-9)

1Afarishi koɓolo nu nlum n Wila̱ n yoku a̱ uta̱i a Urishelima ɗa a banai adama a na e ene Yesu. 2Ɗa e enei mukumitoni n ni a kulyaꞋa ilikulyaꞋa babu ekiye usaꞋi mayin.

3(Afarishi n Ayahuda dem a ci lyaꞋa ilikulyaꞋa ba, sai a saꞋa ekiye e le mayin. Adama a na i ta̱ o kutono agadu a ikaya e le. 4Ko a̱ uta̱ baci e kuden a kulyaꞋa ilikulyaꞋa ba, sai a saꞋa biꞋi ekiye. Agadu i ta̱ n a̱bunda̱i a na i o kutono, tsu na kuza̱Ꞌa̱ ku nkoꞋo nu ndiki koɓolo n edele.)

5Ɗa Afarishi koɓolo nu nlum n Wila̱ me ecei Yesu, “Yi ɗa̱i i zuwai mukumitoni n nu i o kutono agadu a ikaya ba? Ɗa i a kulyaꞋa ilikulyaꞋa babu na a saꞋi ekiye?”

6Ɗa u danai le, “A̱ɗa̱ aza a kapalaka̱shi! Kadanshi ke keneki Ishaya mayun ɗa, ana u ɗanai i na Ka̱shile ka danai,

‘A danai uma a nam pa, n una̱ u le u ɗa i e kuneke mu tsugbayin.

Amma punu a̱ɗu e le i ta̱ daꞋin nu mpa.

7Uma a nam pa gbani ɗa i a kuyaꞋanka mu tsugbashi n una̱ u le.

Adama a na a̱ɗu e le i ta̱ daꞋin nu mpa.

Ili i na i o kuyotsongusu, wila̱ u uma u ɗa koci.’#Ish. 29:13.

8“I vakangi kadanshi ka̱ Ka̱shile, ɗa i ɗikai kadanshi ka uma.”

9Ɗa u danai le, “I yeve ta̱ kuvakangu kadanshi ka̱ Ka̱shile, adama a na i tono agadu a̱ ɗa̱. 10Adama a na Musa† u dana ta̱, ‘Cikpa eshevu koɓolo n a̱na̱vu. Vuza na baci u goyoi a̱na̱ku ko esheku, vuma vu nan lo a una yi.’ 11Amma kuyotsongusu ku ɗa̱ ku dana ili i singai i ɗa vuza u dana a̱na̱ku ko esheku, ‘Ili i na mi ishi e kuneke ɗa̱ dem n neke ta̱ ɗe Ka̱shile.’#7:11 Ayahuda a cau i ta̱ n agadu o yoku a na e ci ɗeke “korban”. Agadu a ɗa a na vuma u kuneke ikebe ko ili i na i n i ɗa an alyuka adama a ulinga u Ka̱shile. Na va u zuwa le ta̱ okpoi babu unushi ko kadama a̱ la̱na̱ baci mmaci n le ba, a kucikpa a̱ ka̱na̱ i ɗa adama a̱ ka̱ci ke le a na e neke Ka̱shile. 12Nannai kpamu i sa̱nka̱ yi ta̱ kuɓa̱nka̱ esheku ko a̱na̱ku n ili i yoku. 13Ta i ci yaꞋan nannai i bonoko kadanshi ka̱ Ka̱shile ili i gbani adama o kuyotsongusu ku ɗa̱. Ili n a̱bunda̱i uteku u nan lo i ɗa i ci yaꞋan.”

Ili i na i tsu la̱nga̱sa̱ vuma

(Mat. 15:10-20)

14Ɗa Yesu u doku u ɗekei uma a, ɗa u danai le, “Zuwakai mu atsuvu ra̱ka̱ vu ɗa̱, ka̱ta̱ i panaka mu. 15Ili i na i kuꞋuwa a̱ ka̱tsuma̱ ka vuza, i ɗa yi kula̱nga̱sa̱ vuza ba, sai ili i na yi a̱ kuta̱ punu a asuvu a̱ ni. 16[Vuza na baci de dem wi n atsuvu a kupana, u pana.]”

17Ana u ka̱sa̱kpa̱i ka̱bunda̱i ka uma ka, ɗa u uwai a kpaꞋa. Ɗa mukumitoni n ni me ecei ni, “Yi ɗa̱i vi ciya̱i na agisana a kadanshi a na vi yaꞋin va?” 18Ɗa u danai le, “A̱ɗa̱ i yeve iyoci i kadanshi ya ba? Ili i na baci de dem i uwai a̱ ka̱tsuma̱ ka vuma, babu uteku u na i kula̱nga̱sa̱ vuza? 19Adama a na i ɗa i uwa ka̱ɗu ka̱ ni ba, a̱ ka̱tsuma̱ ka̱ ni kaꞋa, ta kpamu i kuta̱ nannai?” Ta ta na nannai, Yesu u danai vuza wi ta̱ a kufuɗa wa lyaꞋa ilikulyaꞋa dem.

20Ɗa kpamu u danai le, “Ili i na ya̱ kuta̱ a̱ ka̱ɗu ka vuma, i ɗa ya̱ kula̱nga̱sa̱ yi. 21Adama a na ta punu a̱ ka̱ɗu ka vuma, kadanshi ka gbani-gbani ki a̱ kuta̱. Tsugbani n a̱ma̱ci n ali, n uboki, m munaka, n tsugbani n nkere n olobo. 22N a̱shi awuya, n asuvu a awuya, n tsugbani, m modoroko, n a̱ra̱ɗi, n cisheꞋe, n kuyaꞋan ki ili i gbani-gbani dem. 23Ili i gbani-gbani i nan lo dem, ta punu i ɗa yi a̱ kuta̱ asuvu a vuma. I ɗa kpamu ya̱ kula̱nga̱sa̱ vuma.”

Uneki u ka̱ɗu u Vuka vi Finisiya

(Mat. 15:21-28)

24Punu na lo a̱ ubuta̱ wa, ɗa u ɗenga̱i, ɗa u banai a uɓon u Taya koɓolo n Sida. Ɗa u uwai a kpaꞋa ku yoku, amma ta na u ciga vuza u yeve ba. Babu ta na uteku u na u kusokongu ka̱ci ka̱ ni. 25Ɗa vuka vi yoku vu na maku mekere ma̱ ni, mi n wunla̱i u gbani-gbani o kutono yi. Ana u panai Yesu wi ta̱ lo, ɗa u banai wa̱ ni, ɗa u kuɗa̱ngi kelime ka̱ ni. 26Vuka va ta na Vuza̱ka̱yimbi ɗa, ta ɗe a matsai ni Siriya vu Finisiya. Ɗa u folonoi Yesu u lokoko mekere ma̱ ni wunla̱i u gbani-gbani. 27Ɗa Yesu u danai ni, “Ka̱sa̱kpa̱ muku n cuwa̱ biꞋi. Adama a na u gaꞋan a ɗika ilikulyaꞋa i muku e neke nsheꞋe ba.”

28Amma ɗa vuka va vu ushuki ni, “E, ta nannai Vuzavaguɗu, amma nsheꞋe n ci lyaꞋa ta̱ alyashi a̱ muku.”

29Ɗa u danai ni, “Adama a kadanshi ka na vu yaꞋin na, wala vu bono a kpaꞋa. Wunla̱i u gbani-gbani u ka̱sa̱kpa̱ ta̱ mekere ma.”

30Ɗa u lazai o kubono a kpaꞋa, u cinai mekere ma ivaꞋin a kajiba. Wunla̱i u gbani-gbani kpamu wana ɗai u ka̱sa̱kpa̱ yi.

Yesu u potsokpoi kagulani

31Ɗa Yesu u ka̱sa̱kpa̱i uɓon u Taya. Ɗa u tonoi n Sida, ɗa u banai a uɓon u Mala ma̱ Ga̱lili n uɓon u Dikafoli. 32Ɗa a bankai ni n kagulani ko yoku vuza vu cikeku. Ɗa o folonoi ni adama a na u zuwaka yi kukiye ka̱ta̱ u potsokpo yi. 33Ɗa Yesu u ɗikai ni adama a na u pece yi n uma a na a buwai. Ɗa u zuwai a̱jivu a̱ ni a atsuvu a kagulani a ɗa u ciꞋikpa̱i ni ntsa̱n, ɗa u saꞋwai kelentsu ka vuma ka. 34Ɗa Yesu u ɗengusa̱i a̱shi a̱ ni gaɗi, ɗa wu ura̱i n ka̱tsuma̱. Ɗa u danai vuma va, “Ifata,” ɗaɗa “Ɓa̱yuwa̱.”

35Ɗa u ɓa̱yuwa̱i atsuvu a̱ ni, ɗa kelentsu feu ka shikpai. Ɗa u ka̱na̱i kadanshi mayin. 36Ɗa Yesu u kushei le, ka̱ta̱ a dana vuza ba. Amma ɗa ukushe wa wo okpoi adanshi a kushangu le ta̱, a bana a dana uma kadanshi ka. 37Ɗa uma a̱ ka̱na̱i kuyaꞋan mereve n a̱bunda̱i. A danai u yaꞋan ta̱ ili dem mayin u zuwai kagulani ka panai, kebebe kpamu ka yaꞋin kadanshi.

Currently Selected:

Marukusu 7: asgNT

Highlight

Copy